ZAWLNEI MOHAMMED-A CHANCHIN (570 – 632 AD)

66

ZAWLNEI MOHAMMED-A CHANCHIN (570 – 632 AD)

                                Pathian chu a ropui ber! Pathian Dik Pakhat chauh lo chu Pathian dang a awm lo! Mohammed-a chu Pathian Thuchah Puangtu a ni!

                                He thu hi muslim ho chuan kum sangkhat alai lai an lo au chhuah pui tawh a. Van lal thuchah, puan loh theih lova an ngaih a ni.

                                Khawvel mihring maktaduai zali sawmnga ngawtin an zui mek, Isam sakhaw hmuchhuaktu chu eng ang mi nge ni le? Mohammed-a chu Arabia rama chhungkaw lar tak a aṭangin AD 570-ah khan a lo piang a. An chhungkua hi Quraish hnam an ni a, Abrahama fapa Ismaela thlahte niin an insawi. Mahse, Mohammed-a pian vel lai hian Mecca khua chu milem biaknaa khat a ni ringawt mai.

                                Mohammed-a chu naupang vanduai tak mai a ni a, a pian hmain a pa Abdulla a thi a, kum ruk mi lek a la nih lain a nu Amina chu a thi ve leh a. Chuvangin a pu Abdul Muttalib chuan Mohammed-a chu a enkawl ta a. Mahse, vanduaithlak takin kum hnih lek hnuah a pu chu a thi leh ta a, a pa nau Abu Talib chuan a enkawl  zui ta a ni.

                                A patea chuan Mohammed-a chu a duat thei êm êm mai a, a khumah a mutpi a, a bulah chaw a eitir a, a kalna a piangah a hruai ṭhin a ni. Mohammed-a pawhin a patea chu a ngaina êm êm a, a tân chuan nu leh pa leh ṭhian ṭha a ni.

                                Kum sawmpahnih a nihin Abu Talib chu ram hla tak, Syria-ah kal a ṭul ta a. A patea tell ova awm huphurh em avangin Abu Talib chuan a hruai ta nghe nghe a ni.

                                A naupan lai chuan Mohammed-a hian beramte pawh a veng ve ṭhin a. Enghna pawh thawk se a rinthlak em avangin mite chuan Al Amin (mi rintlak)tiin an ko ṭhin.

                                A lo tlangval ve hnu pawhin mi ingaitlawm, rilru tlang tak a ni a, thianghlim takin a nung ṭhin. Abu Talib chu mi hausa lo tak a nih avangin a fapa Mohammed-a chu a hmeithai hausa tak Khadiya-I hnenah inhlawhfakna a hmuhsak a. Sanghawngsei rual thuam phurte hruaia Syria-a kal chu a  hna pui ber a ni.

                                Mohammed-a chuan ṭha tak leh tling taka hna a thawh ṭhin a vangin Khadia-I chu a lawm thei hle ṭhin a. Tin Mohammed-a nungchang ngainatawm tak chuan a hip take m avangin an innei thuai ta nghe nghe a. Kum AD 595-a an inneih chuan Mohammed-a chu kum sawmhnih leh panga a ni a, Khadiya-I chu kum swami (40)-a upa a ni tawh.

                                Kum sawmpanga ngawtin inthlau mah se nupa inkawprem tak, hlim tak leh inthurual tak an ni. Mohammed-a chuan fanu pali leh fapa hnih a nei a, mahse, a fate hi an dam rei lo. A fanu Fatima tih loh, a dang zawng chu a dam lain an thi vek a ni.

                                Mohammed-a hun lai hian miten nupui pakhat aia tam neih an ching êm êm a, dan pawhin a khap lem lo. Mahse, Mohammed-a chu a nupui lakah rinawm tluan chhuak zakin, Khadiya-I dam chhungin nupui dang a nei duh lo. Kum sawmnga (50) a nih in a nupui kum sawmruk panga mi chu a thi a. Chumi hnuah hmeithai pakhat Sauda-I an tih chu nupui atân a nei leh a. Medina-a an awm hnnuin a ṭhian rinawm tak Abu Bekra fanu Ayesha chu nupui atân a nei leh a ni.   https://ekhai.com

                                Kum AD 605-ah khan Mecca-a chengte chuan an In serh (sacred house), ka’ba an tih chu sak ṭhat ṭulin an hria a. He in sak nan hian an intuak ngah a, an sa ta a. An lungserh, lungdum (black stoen) chu he in bangah hian char beh tur a ni a. Tu nge he lungserh hi ka;ba bangah hian dah ang? Tih thuah an inhnial buai ta chiam mai a. an buai nasat lai tak hian Mohammed-a chu in chhungah a lo lut a. an buaina ching feltu atân an hmang ta a. Kum sawmthum panga chauha up amah nise a fing hle mai. A lukhum (diar) a phawk a, a thingpharh a, chhutah a phah a, chumi chungah chuan lungdum chu a dah a. Chutah pawl pali te hruaitute chu kil liah a vawn tir a, lung chu an chawikang za ta a. Mohammed-a chu a laiah a ṭanga a, an dahna tur hmunah chuan an dah ho ta a. an zavai chuan lung dahtu an ni ta ṭheuhva, inhnial buaina a reh a, lungrual takin an thawk ho ta zel a ni an ti.

                                Mohammed-a chu a pianphung renga sakhaw mi a nih avangin Mecca aṭangin melt hum laia hla Mount Hira-a awm, pûk pakhatah chuan hahchawl turin a kal fo va. Chu hmunah chuan ṭawngṭai leh pathian pawlin a awm fo ṭhin a. Vawikhat chu khawvel thil zawng zawng dah ṭhaa, pathian a pawl lain kohna a  lo thleng ta a. Arabia rama milem biakna zawng zawng paih thla tur te, Abrahama sakhua tungding leh tur te, Pathian pakhat, Dik awmchhun, zahngaithei, Thiltithei, A bull eh A tawp chu mite rintir tura kohna a dawng ta a ni an ti.

                                Chu kohna a dawn chuan a tihhlauh em avangin Mohammed-a chu a khur hial a. Mahse a rinna zawng zawng Pathiana nghatin chu kohna chu a pawm ta a ni an ti. Kohna a dawn chu – Pathian pakhat chauh a awm thu te, milem biakna paihthla tur te, hmanlai sakhaw dik tungding leh tur te, Pathian biak leh mihringte rawngbawlsak te, rinna leh thilṭha tih te, Pathiana intulut tur leh mihring zawng zawng inunauna puanchhuah te a ni.

                                Mohammed-a tihturte chu thil namai a ni lo. A chipui Quraih hnamte chu Mecca-ah pawh milem be nasa ber hnam a ni. Mecca-ah chuan milem chi hrang zathum sawmruk panga (365) lai an bia a ni.

                                Mohammed-a sakhaw thar chuan hriat a hlawh nghal hle a, dodalna pawh a nasa hle mai. Zuitu pawh a hmu nghal mai lo. A nupui Khadiya-I chu amah zuitu hmasa ber a ni a, chutah Mecca mi hausa leh mite zah hlawh tak, Abu Berkr te, Mohrammed-a unaupa Ali-a te, Sam ni ṭhin lo zalen ta Za-id-a te chuan he sakhaw thar hi an pawm ve leh a. Kum li emaw a lo ral chuan mi sawmli emaw vel chuan he sakhaw thar hi an zawm ve ta a ni.

                                Kum AD 615 velah chuan he sakhaw thar Islam zuitute hi Muslim tiin an ko ta a. Tihduhdahna a naat take m avangin Abyssinia-ah engemaw zat chu an tlanchhe ta a. Tihduhdahna a zual zel avangin mi engemaw zat chuan Mecca chhuahsanin Abyssinia rama Negus hmunah an tlanchhe leh ta a ni. Mohammed-a erawh chu Mecca-ah a awm tlat reng a. Quraish ho chuan Abu Talib-a chu Mohammed-a ṭan tlat lo turin an nawr reng a, chute chung chuan Abu Talib chuan Mohammed-a chu a hum tlat reng bawk.

                                Quraish ho chuan Mohammed-a leh a chhungte chu an ensan ta a, kum thum chhung an ensan lai hian anchhe tinreng lawhin an tiduhdah ṭhin a ni. Kum AD619-ah chuan tihduhdahna an thlah dul ta a, mahse, hemi kum hian Khadiya-i a thi ta a, Mohammed-a tân chuan chânna nasa tak a ni. A kum leh AD 620-ah chuan Mohammed-a patea, Abu Talib chu a thi ve leh ta a.

                                Zawlnei pa tan chuan Mecca chu hmun harsa tak a ni ta a. A hnungzuitu mi tlemte te chu Mecca-ah hian an la awm naa, a tam ber Abyssinia-ah an awm a. Harsatna karah Mohammed-a chuan a sakhaw thar Islam chungchang thu mite a zirtir zui zel a, Islam tih hi Pathian Dik Pakhat duhzawnga mahni inpek tihna a ni.

                                Islam sakhaw zirtirna chu Medina-a awm mi ṭhenkhatinan lo pawm ta a. Kum AD 621-ah chuan thutiam an siam a, chu thutiam chu hei hi a ni – “Pathian Pakhata tih loh a dang reng reng chu kan be lovanga, kan ru lovanga, kan uire hek lo vanga, kan fate kan that lo vanga, mi dangte dik lo takin kan puh lo vanga, thudikah chuan zawlnei thu kan awih lo ngai lo vang.”

                                Hemi hnu hian Medina mi 73 leh hmeichhe pahnihte chuan Mohammed-a tâna rinawm turin thu an tiam a. Medina hmun hi Muslim-ho tan a him deuh avangin tlem te tein an pem lut ta zel a ni. Mahse, Mohammed-a leh a ṭhiante pahnih Abu Bekr leh Ali-a te chu Mecca-ah an la awm ta fan a.

                                Quraish-ho chuan Mohammed-a thah dan kawng an ngaihtuah ta a. Mahse, an phiarna hi Mohammed-an a lo hriat hman hlauh avangin zanah a rukin Abu Bekr nen an tlanchhe ta a. Mecca aṭanga melt hum laia hla Thaur puk an pan a, Quraish hovin an zawng ta tih an hriatin a zan thumnaah chuan Medina panin an chhuak ta a. Hemi ni hi AD 622 June ni 20 (Sunday) a ni a, Muslim-ho chuan hei hi Hezira (tlanchhiat) an ti a, he ni aṭang hian ni chhiarna thar (calendar) a lo inṭan ta a ni.

                                Muslim-hovin Mecca an chhuahsan chung pawhin Quraish-ho chu an lungawi chuang lo va. Muslim-ho nuai bo an tum tlat a. Kum sawm chhung lai an indo zui ta a ni.

                                Mohammed-a a tlanchhiat aṭanga kum hnihnaah chuan Mecca mi sangkhat lai Medina an pan a. Mecca hovin rawn nuai chimih an tum tih an hriatin Muslim zathumte chuan an khua chhuahsanin anmahni lo do turin an inpuahchah a. Media aṭanga mel 30-a hla, Mecca aṭanga mel 220-a hla badrhmunah chuan nasa takin an inbei ta a ni.

                                An intam hleih em avangin Mohammed-a rilru chu a hah hle a. Indo hma hian Mohammed-a leh Abu Bekr-a chu Mohammed-a râp inah an lut a, nasa takin an ṭawngṭai a. Indo an ṭan ta a. Muslim-ho chuan Mecca mite chu an hneh a, Quraish hruaitu engemaw zat chu indonaah hian an thi a.

                                Badr indonaa hnehna changtu an ni ta, Muslim-ho chu an lawmin an tân naa taka fuihtu a lo ni ta a, an huaisen phah sawt nghe nghe a ni. Quraish-ho pawh an tlanchhe zawkah an ṭang na a, indo an puahchah leh nghal a. A kum lehah chuan mi 3000 ngawt an lo thawk ṭha leh a, Medina bul Uhud hmunah an rawn inkhuar a, (Uhud hi Median hmar lam mei thum chauhva hla a ni).

                                Mohammed-a pawhin Muslim-ho chu Medina aṭangin a rawn hruai chhuak a. Hemi ṭum chian Muslim-ho pawh sangkhat (1000) lai an ni ve tawh a. Mahse, hmelmaho an hmuh theih ta tihah Abdullah-ibn-Uday leh a hote mi zathum lai chuan Muslim-ho chu an phatsan leh ta mai a. Tichuan Quraish ho bei tur chuan mi za sarih chauh an ni ta a.

                                He induna râpthlâk takah hian Muslim-ho chuan mi huaisen tam tak an chân a, chuvangin an hnungtawlh ta a. Mahse, Mecca-ho chuan an umzui ngam ta bik lo, a chhan chu, Muslim-ho huaisenzia an hriat vang a ni. Engpawh nise, Muslim-ho chuan anmahni nuai chimih tumtute laka inhumhim nan an do mai chauh a ni tih hi chhinchhiah tur a ni.

                                Kum hnih lai ral hnuah Quraish-ho leh an ṭanrualpuite chuan Medina chu an rawn bei leh a. Kum hnih chhung khan Mohammed-a leh a hote chuan indo lo thleng leh mai tur atan an inpuahchah ve reng bawk a. Trench khhur te an lai a, hmelma rawn beitute lo chhan let dan turte pawh an lo ruahman diam tawh a ni. Hemi ṭum hian Meggasipaite chu singkhat (10,000) lai an ni a. Thla khat chhung an hual a, mahse, Median venghiltu-ho chu an paltlang thei ta lo. Chaw leh tui an tlachham a, an lo hah ta hle bawk a, chutih lai chuan thlipui a  lo tleh a, an puan inte a len chhe zo ta a. Mecca sipai hotu Abu Safyan chuan chawlh a puang a, Mecca sipai rual chu an ṭin ta a ni. Mecca hovin Muslim-ho an hneh theih tâk oh avangin Muslim-ho chu an lo chak zual ta sauh a, an dinhmun pawh a ṭha ta hle a ni.

                                Hemi hnuah hian kum AD 628 March thlain Mohammed-a leh mi 1000 te chu Mecca tlawh turin an thhawk chhuak a. Mecca-ho lah chuan an lo phal awzawng lo va, Mohammed-a leh a hote chu AlHudaybiyah hmunah an chawl ta. Mahse, Mecca-ho nen an inrem ta a, Kum AD 629-a Mecca tlawh turin inremna an siam ta a ni.

                                Kum AD 628 leh 620 chhung hian Mohammed-a thuneihna chu nasa takin a ṭhang a, Mecca-ho chakna erawh a chuai zel bawk. Mecca-a mi hausa leh thiltithei engemaw zat chu Medina-ah pem lutin Islam sakhua an zawm reng bawk a. Al-Hudaybiyah inrem hnu lawk hian Mohammed-a chuan Aby Safyan-a fanu Umm Habibah chu nupui atan a nei ta a. Heta ṭang hei hi chuan Abu Safyan-a chuan indo lova Mecca hi Mohammed-a kuta hlan maid an kawng a zawng ta a ni.

                                Al-Hudaybiyah inremna angina Mohammed-a chuan AD 629 March thlaah Mecca a tlawh a, hemi tum hian Al-Abbas nen inzawmna thar an siam a. Al-Abbas-a nupui nau Maymunah chu nupui atan a nei leh a ni.

                                AD 629 November thlaah chuan Mecca ṭanrualpui ten Mohammed-a ṭanrualpuite an run leh ta tlat mai a. Hei hian inremna an lo siam tawh chu a thaichhe leh ta a. Chuvangin, Kum AD 630 January thla a lo thlen chuan mi 10,000 hruaiin Mohammed-a chuan Mecca a pan a. Abu Safyan leh Mecca khaw hotu ṭhenkhat chuan Mohammed-a chu an lo hmuak a, an hnenah an inpe ta a ni. Mohammed-a chuan ngaihdamna puan a intiam a, tichuan a lo tlanchhiatsan tawh Mecca khawpui chu dodalna awm lovin, hnehtu leh hotu angina a lut leh ta a ni.

                                Mohammed-a chu Mecca-ah hian ni 20 vel  a ch;am a, Mecca khawchhung rorelna te a remfel  a, Ka’bahchhunga milem zawng zawng thenfai a ni a. Inthawna in hmun hrang hrang pawh thenfai a ni bawk. Mi tam takin Islam sakhua an pawm ta bawk.

                                Mohrammed-a chu Medina-ah kum AD 632 June thlain a thi a, a aiawh tur tumah a ruat loh avangin Muslim-ho chu hruaitu thlan thuah an buai ta hle mai a ni. Engpawh nise, a damchhung hian Arabia ram zau takah chuan Muslim lalram chu a chak ber leh thiltithei ber an ni hman tho mai.

                                Mohammed-a thlâktu tur chungchangah chuan ngaihdan phir deuh mahse, a puzawn leh a ṭhian ṭha, Abu Bakr chu Mohammed-a thlâktu atân an thlang ta a ni. Mohammed-a thlâktute hi Khalifah emaw Caliphenaw tiin an ko ṭhin a, chu chu thlâktu (successor) tihna a ni. Caliph te hi sakhaw hotu an nih rualin lal an ni bawk.  https://ekhai.com