VÚR MÎ : HNIAKLIANA (YETI)

193

VÚR MÎ : HNIAKLIANA (YETI)

           North America khawthlang ramhnuai leh Himalaya tláng chatuan vúr khuh hmun thawnthu danglam tak kan hriat chu, rannung danglam tak, mihring pianhmang ang chiah pú, hmul thep thup ke pahnih neia kal ṭhin chanchin hi a ni. A hniak a len êm avangin English-ho chuan Bigfoot “Hniakliana” an ti mai a. Himalaya tláng chhehvela chêngte chuan “Yeti” an ti a, chu chu koh dan tlangláwn ber a ni.

           He rannung chungchanga thil chhinchhiah tlâk tak chu khawvel ram hrang hranga mîten Yeti awm dan leh pianhmang an sawi dan a inang tlang hi a ni.

           Himalaya tláng chhehvela chêng Lepchas mî te, Tibet mi te leh American Indian hote hmuh dan chuan Yeti puitling chu fit 7 leh fit 8 vela sáng a ni a. Thahrui ngah tak mai an ni a. an taksa chu sakhi rawng ang deuh hmul sen hian a khuh chhuak vek a. Bân sei tak an nei a, an lú a tung sâwl a, a chhip lamah a zum zuih deuh a ni, an ti. Tih thinrim an nih loh chuan mihring an bei zen zen ngai lo niin an sawi. Ahmu tawh ṭhinte chuan “Vúr mî” tia sawi hi a dik chiah lovin an hria a. A chhan chu vúr hmuna cheng a ni lova, ramhnuai ngawpui chhungah tàwmkûk neiin, tah chuan nilengin a mu bo va, zan khaw thim hnu ah chaw zawngin a vak chhuak ṭhin a. Hei vang hian chhun lamah hmuh tur a awm ngai lova, ahniak erawh chu vúr hmunah a chiar dup ṭhin. Hmun fai laiah chuan ke pahnihin a kal a, ramhnuaiah erawh chuan ke paliin a kal ṭhin  niin an sawi.

           Kum 1921 khan British tláng lawn mi, Howard Bury leh a hote chuan, khawvela tlang sang ber, Mt. Everest chu làwnchhuah tumin an bei a, mahse an hlawhchham a. Mahse vúr hmunah chuan mihring hniak ni âwm tak, hniak lian pui pui, chiar dup mai an hmuh chuan, tlang làwn an hlawhchhamna chu, an thil hmuh chhuah thar chuan a hliahkhuh ta hlauh mai a. Howard Bury-a te mi hruai, Sherpa hote chuan, chung hniakte chu, ramhnuai mi, hmul ther thur niin, mihringte tlawh pawh loh ramngaw chhengchhe hmunah leh, pûk chhúnga chêng ṭhin an ni tih an hrilh a.

           Howard Bury-a leh a hote thil hmuh chhuah thar chu, chanchinbu-ah an chhuah chuai chuai a. Chu thu chuan khawthlang lam mite chu a tipkhawklek nasa hle mai a, chuti ang thil nung mak chu hmuh chhuaha man chhuaktu nih an châk ta êm êm a, a zawng turin an thawk chhuak ta zut zut mai a.

           Mt. Everest láwn chhuak hmasa ber, Edmund Hillary-a pawhin Yeti chungchang hi a ngaihven hle a. Kum 1953-a Mt. Everest a làwn chhuah hnuah kumpinu sorkar chuan chawimawina “Knight” a hlan a. Chumi hnu chuan a nung chunga Yeti man chhuah tumin a thawk chhuak a. Mahse vúr zinga hniak lian pui pui mai lo chu hmuh tur a nei ta lo. A hlawhchham let der a ni.

           Ramhnuai mi, Yeti hi khawvel ram hrang hrang Canada, USA, China, Russia, Australia-ah te pawh an lo hmu ve ṭhin a. An awmna a hran zel vangin an pianhmang sawi dan pawh a danglam zel a. North America hmar thlang, Pacific tuipui kam vel khu, ngawpui zau takin a khuh avangin ramsa chi tinreng an chêng a. Chung zingah chuan Yeti chi khat, “Sasquatch” an tih chu an hmu ṭhin a ni.

           Kum 1924 khan heng ramhnuai mite hian mihring an ru bo ve tlat mai a. British Columbia (Canada)-a mi, Albert Ostman chu, chung Sasquatch-te chuan a zan mu lai chu, puanthuah chawpin an la bo va, kar khat lai an chênna hmunah an hreng a ni. An hren chhung hian an enkawl ṭha viau a ni awm e. An pa ber chu fit riata sáng a ni a, an nu chu fit sariha sáng a ni. Naupang pahnih an awm ve a. Albert-a chuan an fanu pasal atan an ru bo niin a inngai hman tawh a. Ni ruk lai an hren hnu chuan Albert-a chuan a ning ta deuh va, a Rifle chu a hmet puak dur a, silai ri avanga an chi-ai buai lai chuan a tlan chhuak ta a ni.

           Kum 1925-a Russia sipai hovin Pamir tláng chhehvela White Army-ho an um zui laiin tlang kara chêng, ramsa-mihring a awm thu, chulai vela mi te chuan an lo hrilh a. Russia sipaite pawhin hniak lian pui pui chu an hmu ve bawk a. Russua siapaite chuan White Army-ho tawmna nia an rin, pûk pakhat chu an han rin kah ṭhuai ṭhuai a. Rin loh takin sa hmul thep thup hi a rawn ṭe chhuak ṭeng ṭung a, puakrangin an lo tlir a, a thi chiang hle mai.

           Chu saruang chu sipai doctor-in a va endik a. Fit nga leh a chanve vela sáng a ni a, a pa (mipa) a ni a. Hmul chhah tak a nei a, a rawng chu a buang lam deuh a ni. Záwng ai chuan mihring a ang zâwk a, mahse mihring chu a ni si lo. A kut leh ke vunte chu a phawkphawhrawin a tuang a chhah hle a. Hmai hàng tak, mit dum tak, chal pial tle put mai, biang ki ruh sáng tak, hnár phek thlem thlum, khabe ruh lawk luau mai a ni a. Thahrui a ngah tih hriat tak hian a âwm bawr a phiar fuat mai a, a nâkruh vel pawh a inphan nghet tlet tlawt hle bawk. Sipaite chuan tláng sáng âwih panga ken thlâk a buaithlâk avangin a ruang chu lungin an vûr (khuh) a, an kalsan ta mai a ni.

           China ram, Zhejiang biala thingtlang khaw kilkhawr taka chêngte pawhin kum 1957 khan Zawng-mî pakhat chu an sawisa hrep tawh a. Nu pakhat, Xu-Fudi chu, ranrual venga awm, a fanu au thawmah in chhung aṭangin pawnah a tlan chhuak a. Záwng ang deuh, mihring ni deuh bawk siin, a fanu a man bet a, a lo tal fat fat lai chu a va hmu a. Thing fak a chuh lawk a, chu rannung chu a hem ta chawrh chawrh mai a. Buh chinna chirhdiak kawi nuaih hmunah a zuang thla a, chirhdiak avang chuan a tlan chak thei lo va. A rawn beih let ve theih hmain Xu-Fudi chuan a han vaw leh taih a. Hmeichhe dang te an rawn pung khawm a, an vuak rawn ta tluar tluar a, nikhaw hre lovin chirhdiak zingah a let hlawm ta der a. Mahse a la thi lo. Reilotê hnuah a rawn harh chhuak leh a. A mittui a tling kiau va, a hram ta ngher ngher a. Hmeichhe ho chuan an tihlum ta law law a ni. A taksa chu an chan darh vek a. A tukah chuan tlang pang aṭang hian ṭap ri ang hi an hre ta a.

           Film siamtu pakhat, Roger Patterson-a chuan Hniakliana hi zawn chhuaha Cinema Film siam tumin a bei a. Kum 1967 October ni 29 khan sakawrah chuangin, ralkhatah rannung dum lian pui mai an hmu a. Chu thil avang chuan sakawr chu a zuang thut a, Patterson-a chu a vawrh thla a.Cinema thlalâkna chu a phawrh chhuak a, chu thil dum kal liam tur chu ùmin fit sawmriat vela hla aṭangin a thlá chu a la a. Ngaw chhúng a luh hmain chu thil chu a rawn leh hawi zawk a. A pui (anu) a ni tih hriat takin a hnute uai duah pawh chu a lang thei a ni. Fit sarih vela sang, hmul dum durh mai a ni. He Film hi siamchawp mai a ni lo tih finfiah ani a,  chuti ang rannung danglam tak chu a awm ngei a ni tih a nemnghet zawk a ni.

           Kum 1967 khan Oregan (USA) ah zawng-mihring chhungkuain lungpui kara sazu tawm khawm an khawrh lai leh, ahnua balhla ang mai an ei lai hi an hmu a. A chang chuan thinghnah an ei lai hmuh a ni bawk.Kum 1976, June ni 19 khan Central China a Hubei biala thingtlang khaw pakhatah rannung hmul ther thur hian nufa a um hrep mai a. Mihring ang chiah a ni a, “ia, ia” tia hram chungin a um a ni.

           Kum 1987 February thla khan Jammu & Kashmir vela Yeti an hmuh thu hi Chanchinbu-ah an chhuah fo mai a. Khami kum khan vúr a tam avangin Yeti chaw zawnga vak chhuak ṭhenkhat chuan mihringte chênna khuaah te an rawn vak thleng a, an vak darh nasa hle niin an sawi. https://ekhai.com

           Srinagar aṭanga km. 70-a hla, Helan khuaa mipa tleirawl, kum 16 mi chuan rannung buang ther thur, fit li vela sáng nen an intawha kuttuma an inbeih vak thu a sawi.