Tuipuisa hráng (Hydra)

257

Tuipuisa hráng (Hydra)

            Greek-ho hmásang thawnthu-ah chuan tuia chêng sa-mak zingah Hydra an tih hi a lo ṭihbaiawm ber awm e. Hydra hi tui rúl râpthlâk zet mai a ni a. Amah hringtu nu Echidna taksa pawh a zatve chu rúl a ni. Hydra pianhmang hi a râpthlâk hle a. A vun a phuhlip tuar a, a taksa a lian êm êm mai a. A taksa lian lai tak aṭang chuan, purun bulbawk aṭanga a zung bawr ṭo chhuak ṭuai ang mai hian, rúl ang mai hi, ngháwng sei pui pui a chawr chhuak seng sung mai a, vangvat saiṭial lianpui pui ang hian an khâp thlûr hlawm a, a hmawrah chuan lú a awm ṭheuh va, chuvang chuan Hydra pakhat pawhin lú tam tak a nei tihna a nih chu. A lu neih zat hi sawi dan a inang lo va, a ṭhenin sawmnga niin an sawi. A lu neih zat sawi dan inan lohna chhan chu, a lu pakhat han tan chhumna ah khan, lu pahnih a rawn chawr chhuak leh nghal zat zel a, chu chuan a lu neih zat hriat a tihar ta a ni. Rin dan leh sawi dan tlangpui berah chuan lu pakua neia ngaih a ni a. A lai taka mi phei chu a “thi thei lo,” niin an sawi. Chuvang chuan a ni ang, Hydra hi rannung thi thei lo, tihhlum theih loh nia an ngaih ṭhin ni.

            He sa râpthlâk tak hi, Lema dil kam chirhdûm hmunah a cheng a. A thâw te reng reng chu, tûr hlauhawm tak hi a ni a, a thâw chuan a awmna chhehvela hnimte chu a tiduk chur hlawm a, dil tuipawh a titenawm zo vek a ni. A muthilh laia a thâw chuan boruaka tibawlhhlawh zo va, chu chu mihring tan a hlauhawm êm êm a, thihpui hialna khawpa hlauhawm a ni. Mi chak leh huaisen hmingthang Hercules-an rawn tihlum lo se chuan kumkhuaa chhiatna a thlen ngei ang. https://ekhai.com

            Hercules-an he sa hruanghrau tak mai, Hydra bei tura a thawh chhuah khan, a hmain mi huaisen eng emaw zatin an lo bei sil tawh a, a nghawng an tanna zelah khan lu thar a lo chawr belh hnem tawh a, a tir lam ai chuan lú pawh a ngah daih tawh zawk a ni.

            Hercules-a chuan, a hmasa berin, chirhdûm hmun aṭanga khalh chhuak turin a meithallàwn chu a han kap ṭêk chuai chuai phawt a. Chutah, Hydra lo chhuak chu a ngûnhnâmin a ngháwng sei pui puite chu a lo chhawk ta ṭhawt ṭhawt a. Mahse, a lu pakhat tan chhum aṭangin lu thar pahnih a rawn chawr chhuak leh nghal zel mai si a, lei sei zêl zûl túr hlauhawm tak tak pai chu an chhuah zûl zûl leh nghal a. Tih dan thlâk a ṭul ta.

            Hercules-a chuan amah zuitu, Lola leh a tupa chu Hydra nghâwng a sah chhumna apiangah lu dang a lo chawr chhuah leh hmain meiling sa taka lo dep (hâl) zel turin a ti a. Chuti anga an han tih hnu chuan Hercules-a chuan Hydra nghâwng, a lú thi thei lo an tih pawh chu a tan chhum ta a. Lei chhúngah a phúm a, lungpui lian tak takin a delh bet tlat a. Chuta ṭanga chhuah tum chuan tun thleng hian a la rûm dur dur reng a ni, an ti.

           Hydra túr hi a hlauhawm hle a, taksa pema a luh palh vaih chuan tihdam theih a ni tawh lo. Hercules-a chuan Hydra túr chu a thal hmáwr-ah a tât hlawm a. Ramsa kawlh dang a beih leh hunah a hmang ṭangkai thei dawnin a ring a ni.

                               

Comments