TAYLOR SWIFT CHANCHIN TLANGPUITE

147

                Tûnlai khawvêl rimawi lamah leh ṭhalaite zingah Taylor Swift hre lo chu an awm lo tluk a ni awm e. A kum la upa vak lo mahse a chanchin ziak tûr a ngah hle.

                Pennsylvania, USA-ah December 13, 1989 khan Taylor Alison, Swift hi a piang a. A pa Scott Kingsley Swift, financial advisor niin a nu Andrea Gardner hi tûn hma chuan marketing executive a ni ṭhin a, fa a neih hnu a in chhung ni pangngai a awm ta a ni a. Unau pahnih an ni a, a nau hi Austin a ni. Kum 9 mi chauh a nih lai aṭangin rimawi lamah hian a tui ṭan a. A nu hruaiin New York City-ah zai leh lemchan zirin regular takin a hun a hmang ṭhin a ni. Hung eng emaw ti aṭangin country music lamah a tui êm êm a, Shania Twain-i hla a ngaithlâk aṭangin a tui lehzual a. A sawi dan chuan “Shania hla a ngaithlâk hi chuan an awmna veng chu vawi li vêl tlânhual pah a thil eng eng emaw suangtuah hi a châk êm êm ṭhin a ni,” a ti. Kar tâwp lamah hian an awmna vêla festival leh thiltihpui eng eng emawah zaiin a hun a hmang ṭhin a. Faith Hill-i chanchin aṭangin Nashville, Tennessee-ah zai lama eizawng tûra in buatsaih tûra kal a ṭhat a ring a. Kum sawm pakhat a nih chuan a nu nên Nasville-ah chuan an kal a, nimahsela a hlawhtling lo. Ama sawi dan chuan, “Chutia ka hlawhchham aṭang chuan tihdan dang tûr ka ngaihtuah ta a ni,” a ti.

                Kum 12 mi a nihin computer repair thiam leh an awmna lai vêla music lama hming nei ve tak Ronnie Cremer chuan guitar perh a zirtir pahin hla phuah dan kalhmangte a zirtir a, chumi hnu rei lo têah chuan Lucky You tih kha a phuah ta a ni. 2003 a lo nih chuan New York-a hmun khuar music manager Dan Dymtrow puihna in Rising Star campaign-ah te a tel a, record labels lian lian ho thiltihnaah te tel zêlin RCA Records-ah a lût a.

                Kum 14 a lo nih chuan a pa chuan Nashville lama an office-ah insawnin lehkha pawh hetah hian a zir ta a. Zai lama a inhman avânga zin reng mai ngai bawk nên sikul pangngaiah pawh kal hlei thei ta lovin in lam aṭangin high school chu a zo ta hrâm a ni.

                Nashville-ah hian Scott Borchetta’n Bluebird Cafe an intawng a, chutihlai chuan Borchetta hian mahniin record lable Big Machine Records a din dawn vêl mêk lai a ni a. Big Machine Records label hnuaia zai hmasa ber te zinga mi a ni ta nghe nghe a. He Company-ah hian Taylor i pa pawhin chanvo nei tûrin pawisa a thawh ta hial bawk a ni. Theih tâwp a hma la zelin October 24, 2006 chuan Taylor Swift tih record chu a tichhuak ta a. He record release tawh zawng zawngah chart a nihna ngai awh thei rei ber niin kar 157 chhungin Billboard 200 ah 5-na a ni char char thei a ni. August 2016 a thlir lêt leh a nihin he hla album hi khawvêl pumah maktaduai 7.75 hralh a ni tawh a ni. Record company dangte chuan Borchetta-an kum 16 mi lek zai leh hla phuah chungchang a buaipui chu an hmusit khawp mai. Mahse 2007 – 2008 chhunga Taylor Swift-i hla pali te chuan Billboard lamah a hlawhtling êm êm mai a, a hla pahnihte phei chuan a rualin number one an ni ta hial a. Should’ve Said No tih hla avângin mahni sak tûr hla phuah a zai thiam bawk si chart a number one ni thei zinga naupang ber a nih phah ta a ni. Teardrops on My Guitar pawh a hlawhtling hle a. Billboard Hot 100-ah 13-na a ni a. A album Taylor Swift avâng khan Nashville Songwriters Association chuan Songwriter/Artist of the year 2007 khan an thlang hial a. He title dawngtute zinga naupang ber a ni. Hei bâkah hian Country Music Association’s Horizon Award for Best New Artist te, Top New Female Vocalist tih te leh Favorite Country Female Artist nihna te a dawn bâkah Best New Artist 2008 Grammy Award dawng tûrah pawh nomination a hmu bawk.

                Taylor Swift mak ve ang reng deuhna chu a nun a thil thleng hi hlain a phuah thei zel a. Kum 14 mi a nih a, tlai sikul bàna music zirna zirtirtu nên darkar hnih an ṭhut leh ziah ṭhin lai pawh khan chumi ni a sikul a thil thleng chu hlain a phuah chhuak ṭhin.

                Ngaihzawng a han nei ve a, an in ṭhen leh pawhin hla in a rilru natna te chu a chhamchhuak zel mai. Engkim, a nuna thil thleng hi thu ziak lovin hla hmangin a puangchhuak a ni ber e.

                Taylor Swift-in a chanchin a sawi dan chuan hla chungchangah hi chuan a nu nu (a pi) in biak ina a hruai a, a pi zai ṭhin kha ka mitthlaah leh bengah hian a cham reng ṭhin a ti. A nu leh pate pawhin, “Thua a sawiin a daih loh chuan thildang dang nên phuah chhunzawm a sawi a ching ṭhin an ti.

                Mahni inrintâwkna nei tûra zirtirtu ṭha tak a neih chu a nu a ni a ti a. Thu leh hla a tui êm êmna chhan pawh a nu bawk a ni a ti. Hlaah pawh country music an tih ang chi hian a lung a lèn a, 1900 chho a hetiang lam hla satu leh phuahtu – Shania Twain, Faith Hill leh Dixie Chicks te khan an hneh a ni a ti. A naupan lai aṭang a ngaihsan leh entawn ber chu Faith Hill niin, “A sawi apiang, a tih apiang, a inbel apiang chu copy zêl ka tum ṭhin,” a ti. Dixie Chicks ten dik an tihnaah tumah hlau lova an tih ṭhin leh an instrument te mi dang ruai lova anmahnin an intum vek thei kha a ngaisang êm êm bawk a ti.

                A hlawhtling bawk a mi te sawisêl leh chîk a hlawh êm êm. A aw hi a sin lutuk tih te, zaithiam tak chu a ni lo tih te hi an sawidan fo a ni a. A ngaihzawng neih te, a nundan hrim hrim hi media te sawi nuam tihzawng tak a ni. Hetih lai hian amah chuan a mimal chanchin mitin hriat a puanchhuah hi a duh lo, hetiang a mahni inzawrh hi eizawnna thil a tlâkchhiatna chi khatah a ṭang thei a ti. A chêtzia hi a fimkhur a, tutepawh polite taka chhawn ṭhin a ni hi Rolling Stone chuan he awmdan mawi hi a tihbo lohna tûrin tattoo hial tlâk a ni a ti a. The Hollywood Reporter pawhin Bill Clinton a hnu a mihring awmdan mawi ber a ni a ti hial bawk. Mi dang ṭanpui a peih avângin Michelle Obama chuan, “Music industry-ah a vawr tâwp a thleng a, mahse a ke chu leiah a la nghat nghet hle si. A hlawhtlinna aṭanga teh chuan kum 22 mi chauh pawh niin a lang lo,” a ti hial a, Swift hian Obama te hi entawn tlâk niin a ngai ve bawk. Taylor-i makna êm êm chu amah ngaisangtu fans te a kawm danah hian a ni. A fan te hnena thilpêk thawn mai te a ching a,amah ngei pawhin a pe bawk ṭhin. Amah chuan a fans te chungah hian mawhphurhna a nei a ti a. Ngaihzawngte hi chu kan inban leh mai changte a awm a. Fans te chu chutiang a ni lo, an hlu a ni a ti.

                Media te hian Amercia’s Sweetheart tiin an lo ziak fo ṭhin a. Mahse amah chuan, “Hetianga in koh leh phuah leh beiseina an neih an ziak te ang hi ka nundan a ni lo. Media te min kohna ang hi chuan nun tum ila pal a hung hnan nun, zalenna awm lo a ni dawn a. Ka ṭha tih zawng leh duh dan a awm hi ka zalenna, min tinuamtu a ni a ti.

                Thlalâk chungchangah te hian saruak lutuk leh awm eu lutuk anga lâk a duh miah lo. 2011 khan Vogue magazine chuan Icon of American Style-ah an thlang a, 2014-ah People’s magazine in inchei thiam ber zinga a pakhatnaah a thlang bawk.

                2015-ah Elle Style Award Woman of the Year a ni a. Maxim’s chuan Hot 100 ah pakhatnaah a lo dah ve mêk bawk a ni.

                Thiltithei tih ang reng lish-ah hian Taylor Swift hi a tel deuh reng mai. A hlawhtlinna leh sum huiluh tam avâng hian 2010 leh 2015 te khan Time’s chuan khawvêla mi hneh thei zual 100-a thlan zingah pawh a tel a. 2011 – 2015 khan hmeichhe zinga sum hailût tam zual pathum zinga pakhat a ni a. 2015 khan Forbes’ in mi thiltithei hmeichhia a thlan zingah 64-na a ni a. 2016 phei kha chuan celebrities sum huilût tam zual an thlan 100 zingah pakhatna niin a sum hmuh hi $170 million a ni. June 2017 a Forbes in Taylor Swift-i sum hai luh zât a chhûtnaah chuan Dollar 280 million a tling tûrah an ngai a ni.

                Taylor Swift hian mi ṭanpui a uar hle a. Tennessee Disaster Services leh Do Something Award an tih te chuan mi dang ṭanpui leh mite a ṭha zawnga hruai tûra a in hmanna hi ropui an ti a. “Taylor Swift ang hi fanu atan a kan duh ang a ni” an ti. 2009 khan Iowaah tui a lian nasa hle a, chuta tuartute ṭanpuina atan chuan Red Cross-ah Dollar 100,000 a pe a. Hetianga sum fai a thawh ṭhin bâkah hian chhiatna tuarte tan concert a siam fo bawk. 2010 a Tennessee tuilianah khan dollar 5.00 lacs a thawh a. United States a thlipui tuarte tan 750, 000 thawh pawh a harsat lo khawp mai.

                Nashville-a Hendersonville High school in auditorium an mamawh a chutah pawh chuan nuai tel chu a pe leh mai a. Nashville-ah vêk Country Music Hall of Fame & Museum sakna tûrin dollar maktaduai li a pe hem mai bawk a ni. Mi dang ṭanpuina atana a insenso dan hi a nasa lutuk a ziah vek sen pawh a ni lo.

                2008 kuma president thlanna tûrah khan hmeichhia ten vote thlâk ngei ngei tûra sawmnaah khan a inhmang ve a. A hnuah chuan, “Mi dangte vote tûra sawm vêl hi chu ka hna tûrah ka ngai lo,” a ti. President Obama President atana thlan tlin a nih hnuah khan Rolling Stone Magazine hnenah, “Kan ram hi hetiang khawp hian kan hlim ngai ang tih pawh ka hre lo. Election a ka tel vawi khatna a ni a, nuam ka ti lutuk,” a ti.

                2012 khan an ram leh khawvêl ram danga thil thlengte hriat ve zel hi ṭha a tih thu leh chutiang taka nun chu a tum laiin politics hi chu a sawi ngai lo. Kennedy chhungkaw zingah a hun a hmang tawh a, Ethel Kennedy a ngaisang hle tih leh amah hrim hrim hian hmeichhia te chungchang hi a ngaihven a ti. LGBT te thliar an ni hi a duhdan a ni lo va, mi reng reng an ngaihzawng tute nge, eng vun rawng nge, eng sakhaw bia nge tih hi mihring dangte a thlir ve dan a ni lo a ti. A hla pakhat, “Mean” chu mawngkawhur leh tuai ang chi en hrangtute a demna a ni.

                Kum 30 pawh a tlin hma hian Taylor Swift hian Grammy Award 10, American Music Award 19 leh a dang tam tak a dawng a. Hla phuah thiam chawimawina te dawngin Rolling Stone pawhin 2015 a hla phuahtu ropui 100-a thlan zingah a tel a ni.

                Kum 2016 khan a album hi 40 million aia tam daih a hralh a, million 130 single downloads in a hralh bawk a. Taylor Swift, Fearless, Speak Now, Red leh 1989 te hi 4 million copy aia tam hralh chhuah an ni vek bawk a ni.

 

Thulâkna : Zonu Magazine

Comments