SCIENTIST ROPUI “ARCHIMEDES”

115

SCIENTIST ROPUI “ARCHIMEDES”

            Tuifinriat ah chuan lawng lian pui puite chu an kal vut vut reng ni tin mai a, lawnga chuang mipakhat chuan thir bung pakhat hi tuiah chuan a han paih thla a, thir bung chu a pil ta nghal a. Nimahsela chu thir bung aia a lêt maktaduai eng emaw zat laia rit lawng lian pui puite chu an pil lawi si lo! Eng vangin nge an pil theih loh bik?

            Thil a nihna chiang taka hmuh theihna “hmuh theihna” (observation) tih awmzia pawh hria, chu a thil hriatte chu thil hman tlâk tura chher chhuak thei mi nih hi Scientist-te nih dan tur a ni rêng a ni. Archimedes chu an inbualna pindan aṭang chuan a rawn chhuak a, a taksa bal laite sil faia rawn chhuak mai a ni lo. Ngaihtuahna ropui leh khawvel tawp thleng pawha la pawimawh zel tur “Specific Gravity” an tih, hmuhchhuahna rilru kengin a rawn chhuak a ni.

            Archimedes hi BC 287-ah khan Sicily, Syracuse khuaah khawvel êng hi a rawn tem ṭan ve a, amah hi Pheidias, Greek arsi chanchin chhui mi (astronomer) fapa a ni. a hun hmasa chu Greek ram Alexandria khawpuia Mathematic zirna school hmingthang takah a zir ṭan a, an zirtirtu hi a hun laia scientist hmingthang Euclid (Euclid Geometry pawchhuaktu) hnen aṭanga thiamna chi kim lo zir tawh, Samos khaw chhuak Cenon a ni. Archimedes hian a hun tam zâwk chu Philosophy leh chhiarkawp lam zir nan a hmang ṭhin a. A hun laia Greek mite chuan thil reng reng hi a taka chhinna (expreriment) titute hi an ngaisang thei hle ṭhin. Chutiang takin mithiam scholar-te chuan an thil tih rêng rêng a taka enchhin ngai lo khawpin a dikna leh a tawpna tur a sawi dik nghal zung zung thei mai a ni. A chang phei chuan a dikna te chu lehkhain a ziak chhuak nghal mai ṭhin bawk. Heti hian a thil hmuhchhuah leh hriatte chu a taka hman nghal theih deuh vek an ni thung tlat si.

            A thil hmuhchhuah zinga thil ropui tak pakhat chu “Specific Gravity” hi a ni. Tun hnu-ah chuan “Archimedes Principle” tiin a thang lâr ta zawk mah a ni. Vawi khat chu an Lal King Hiero II chuan lallukhum siam ṭhintu (hmanlai chuan lallukhum siamtu bîk hi an awm ṭhin) hnenah lallukhum siam nan rangkachak ṭha mî, a siamna daih tawk tur a pe a, a siam zawh hnu chuan a han bûk chhin a, a hmaa rangkachak bûk rih lam inang turin darsen tam tâwk tak rangkachak nen pawlh ru-a rangkachak engemaw zat hlêp ru-in a ring ta tlat mai a.

            Hriatdan tlangpuiah chuan thil chi hrang hrangte hi dinhmun inang (same volume) rau rauah a bûk a inrih hleih hle tih kan hria. Rangkachak leh tangkarua pawh hi volume inang rau rauah a bûk a inthlau hle a ni. He lallukhum siamtu pa depdêtzia phawrh lang tur chuan thil awlai tê a ni. Lallukhum chu meiah a rawhtui sauh sauh a, volume inang chiah rangkachak nen khaikhin mai tur a ni. Chutia han bûk chhina lallukhum rih lam chu a zâng zâwk a nih vaih chuan lallukhum siamtu-pa chuan a hlêp ru tih a chiang nghal mai dawn a ni. Mahse chutiang a nih chuan lallukhum siam peih sa diam kha rawhtuia tihchhiat vek a ngai dawn bawk si. LAl Hiero mangang chuan he a buaina hi lukhum tichhe chuang si lova ching fel turin Archimedes kutah a hlân ta ngawt mai a.

            Archimedes chuan a thil hmuhchhuah aṭanga pian ze dik lo (irregular substance) volume zawn dan aṭangin lallukhum volume pawh hi a hriat nghal mai theih dawn tih a hria a. Volume a hriat chuan volume ang nei rangkachak ṭhamî nen bûk chhin mai tur a lo ni tawh ang a, tichuan chu lukhum chu rangkachak tak hlira siam a nih leh nih loh a chiang mai dawn a ni. Tichuan Archimedes chuan ṭinah tui a khatin a chhûng a, thil te tak tê pawh ṭinah chuan a han chiah ta a, tui che a liam ta ngei a, tui liam zawng zawng chu la khawmin a volume chu a han teh ta a, ( chu chu lallukhum volume kha a ni). Chutiang volume ang bawk nei rangkachak nen an han bûk chhin ta a, Lallukhum siamtu pa depdêtzia chu hriat chhuah a lo ni ta a, amah pawh khaihlum a ni ta nghe nghe a ni.

            Hemi aṭang hian Scientist-te leh Engineer-te chuan thil hriat tur pawimawh tak an lo nei ta a. Volume inang chiah thil (material) rih lam leh tui ama volume ang chiah rih lam khaikhin chu “Specific Gravity” tih a lo ni ta a ni. Chu chu “Compared weigh of a volume of material with an equal volume of water, called the result specific gravity” tih a ni. Rangkachak specific gravity chu 20 vel nia hriat a ni.

            Thil rêng rêng material or substance-te hi an specific gravity chu a tam zawk hriat an ni tawh a, chuvangin chutiang chu kan lo hriat tawh chuan rangkachak lem te, tangkarua lem te leh thil dang rêng rêng pawh sumdawnna kawngah emaw, thil dangah emaw inbum theih a ni dawn tawh lo a ni. Heng lo pawh specific gravity hriat hian chhawr ṭangkai theihna tam tak a nei thei a ni.

            Hetiang deuh bawk hian tuiah thil han chiah ila, ṭhenkhat chu an lâng a, a ṭhen erawh an pil daih thung. A ṭhen chu a chanve lânga a chanve dang erawh chu pil lawi site an ni. Hengte pawh hian chhan ṭha tak an nei a ni. Hemi niih dan hmuchhuaktu pawh hi Archimedes bawk a ni. Thil rêng rêng tuia kan han chiah hian kan thil chiah khan tui kha a nêk kiang ta ṭhin a, chu a tui nêk kian rih lam (volume) kha kan thil chiah nen a inmil chuan a lâng mai ṭhin a lo ni a, kan thil chiah aia a rih zâwk chuan a pil mai ṭhin a lo ni, chuvangin tuifinriata kal ṭhin lawng lian pui puite hian anmahni rih lam bûk tawk ang chiah zel tui an nêk per a, tichuan pil hauh lovin an lo lâng thei mai ṭhin a lo ni. A awmzia chu ton 80,000 zeta rit lawng lian chu tuia a lân theih nân tui ton 80,000 zet a nêk sawn (per) dawn tihna a nih chu. Tun laia Atomic submarine (tuihnuai lawng) te pawh hian Archimedes principle hi an zâwm vek a ni.

            Archimedes hian khing kan sawi chauh khi a hmuchhuak a ni hauh lo mai, tui siak (pump) chhuah dan pawh hi ama hmuhchhuah  leh hriat bawk a ni. He a khawl hmuhchhuah hi Archimedean screw an ti mai ṭhin. Mihring tha tlem tê sèna thil tam tak thawhchuah theihna dan “The law of the Lever” pawh ama hmuhchhuah bawk a ni. Hemi Law of Lever awmzia chu entir nan thingtum lo kar sawn dawn ta ila, kan sawi zawh loh avangin a kar sawn awlsam dan kan zawng ta a, tichuan hmawlh sei tak kan han la a, thing tum leh hmawlh inkarah a kamna lungtum emaw thing tum dang vêk emaw kan dah ṭhin, tichuan thing chu awlsam takin kan kar sawn thei mai ṭhin, hei hi Law of Lever awmzia chu a ni. Tin, naupang infiamna chi khat “inbûkna” kan ti dawn emaw ni “See-Saw” an tih pawh hi “Law of Lever” hmanga tih vek a ni. Heng a thil hmuhchhuahte hi mâwl tê angin lang mah sela, thil ropui tak a tling thei a ni. Amah ngei pawhin “Give me a place to stand, and I will move the Earth” a lo ti  hial rêng zu nia!

            Archimedes hi thil thar siamchhuahah leh dinchhuahah chauh a thluak a hriam a ni lo va. Mathematics lamah hlei hlei hian a thluak a hmang ṭangkai mai. Analytic Geometry te, tun laia naupangte pawhina an zir ṭhin “Squarring the Circle” an tih mai Circle (rin bial) teh dan dik tak pawh ama kutchhuak tho a ni. Tun laia thil rite hriat thuai thuai theihna leh man nghal mai theihna “Modern Radar” thleng hian “Archimedean Spiral” hmanga buatsaih vek an ni.

            Archimedes hian a thiamna hlu tak maite chu Scientist tam takte tih ang bawkin mihringte nunphung tidanglam chho zet tur atan a hmang nasa êm êm a, khawl buatsaihna lamah a hmang nasa zual bik a ni. Indona lama ralthuam atan pawh an hmang nasain an chhawr ṭangkai hle a ni tih BC 215 Syracuse-in a ram a venhim tumnaah khan chiang takin a hriat theih a ni. An hmanrua awm dan chiaha phei chu “Wounded the enemy at every range” tih a ni ngawt mai. Historian hmingthang tak Polybus pawhin heti hian a ziak hial a ni, “So true it is that one man and one intellect, properly qualified for the particular undertaking, is a host in itself” tiin. https://ekhai.com

            Hun a lo kal zel a, Syracuse chu Marcellus, Rome sipai General khan a man ta nge nge a, a in leh lo zawng zawng pawh Archimedes hnenah a hlân vek a, mahse vanduaithlâk takin thil a kal sual tlat a, Roman sipai ngûnhnám chhunna avangin a thi ta thung a ni. Rome-ho chuan zah takin a ruang chu an phum a, a thlânah chuan amah hriatrengna atan Rinkual ‘Sphere and Cylinder’ lem an ziak a. Archimedes mi ropui, scientist hmingthang, Mathematician, mi dang aia thiam filawr, khawvelin a ui êm êm chuan lungchhiatthlâk takin khawvel a chhuahsan ta a ni.