SA RÂPTHLÂK LEH ṬIHBAIAWM (GORGON) : PART – 1

189

SA RÂPTHLÂK LEH ṬIHBAIAWM (GORGON) : PART – 1

              Hmasâng Grik-ho thawnthua sa râpthlâk leh ṭihbaiawm nia an sawi zingah miten an ṭih ber leh an hmuh hreh ber chu ‘GORGON’ an tihte hi a ni.

              An sawi dan chuan GORGON hi pathum an awm a. A tirah chuan nula hmelṭha tak an ni a, An hmelṭhatna chu an chapopúi ta lutuk a, pathiante chuan anmahni hrem nan sa râpthlâk takah an chantír ta a ni. An pianhmang chu – tin hriam pui pui an nei a, ngho sei tak an nei bawk a. An sam chu rúl hlir a ni. Thla pahnih, dâr anga tlê an nei a, an meng pual sen rum mai a. An mitin an melh fuh apiang chu, mihring pawh, ramsa pawh, lungah an chang nghal zel a ni. Chuvangin GORGON hmél hmua nungdama chhuak leh thei hi an awm ngai lo an ti. GORGON-in a rawn melh apiang chu thih ngei ngeina niin an sawi.

              Chuti anga mi zawng zawngin an râp êm êm chu, mi huaisen pakhat, Perseus-a chuan, pathum zinga pakhat chu a that thei hlauh mai a. Chumi chanchin ngaihnawm tak, “Perseus leh GORGON” thawnthu chu i lo ngaithla teh ang.

              Nikhat chu Seriphos thliarkara lên dengtu pakhat, Dietys-a chuan tuifinriat kamah, tuifâwnin a rawn len chhuah, thingrem lian pui mai hi a chhar a. A chhúngah rohlú eng emaw a awm ringin thingrem chu a hawng a. Rin loh tak maiin hmeichhe hmelṭha deuh mai hi a lo awm reng mai a, Dietys-a chu a phu chiang kher mai. Hmeichhia chuan nausên hi a lo pawm chial leh nghal a.

              Hmeichhe hming chu Danee-i a ni a, lal Aerius-a fanu a ni. Zawlnei pakhat hian lal Acrisius-a hnenah, “Tupa i neih hunah i tupa chuan a la that dâwn che a ni,” a lo ti a ni âwm a. Chu chu lal Acrisius-a chuan a hlauh vangin a fanu Danae-i chu pasal nei thei lova fa pawh nei thei lo turin kulh chhungah a khung ta hmiah a. Mahse, an pathiante zinga an hotu ber Zeus nen a rûkin an lo innei a, fa a hring ta mai a. Chumi thu chu lal Acrisius-a an hrilh a, Acrisius-a chuan a hlauthâwng ta hle mai a, a fanu te nufa chu thingremah a khung a, tuipuiah a paih ta daih mai hi a lo ni a.

              Dietys-a chuan a mi chharte chu ama in chhe tê, chhâwlbûk ang lekah chuan a hruai lût a, ṭha takin a enkawl ta a. Nausên chu a lo ṭhang lian zel a, a lo tlangval hnu chuan, mi chak leh huaisen tak a lo ni ta a. A hmingah “Perseus” tiin a nu chuan a sa a. A fapa hnenah chuan “Mama, i pa chu pathian zawng zawngte lalpa, Zeus-a a ni a sin,” tiin a hrilh ṭhin a ni.

              An awmna Seriphos lalpa chu Polydectes-a a ni a. Misual leh nunrâwng tak a ni a, a mite chuan an hlau thei êm êm mai a. Polydectes-an Danae-i a han hmu chu a hmelṭha a tiin a ngaizáwng ta hle mai a, nupuia neih a tumin a thlêm ta fo mai a. Mahse Danae-i chuan pasal dang neih leh a tum lo bur mai si.

              Vawi khat chu lal Polydectes-a chuan a lal in ropui leh a hausakna entira thlêm lungawi tumin ruai ropui tak Danae-i pualin a ṭheh a. Thliarkara mi ṭha hote chu an sáwm khawm a, Perseus-a erawh chu a sáwm ve lo. Mahse Perseus-a chuan a nu dinhmun a hlauhthâwnawm dawna a hriat avangin a nu veng turin a kal ve ta tho va. Lal Polydectes-an Danae-i chu a nupui ni tura a thlêm leh lai chuan Perseus-a chu a lo ṭawng chhuak a. “Nang lalpa, ka nu hian a nei duh lo che. A duh angin awmtir hle hle la a ni mai,” tiin a khak a.

              Polydectes-a thin chu a rim nasa ta mai a. Danae-i a neih theih lohna tura dâltu ber nia a hriat avangin Perseus-a chu hnawh bo dan a ngaihtuah ta a. Fin vervêk chhuahin, “E, ni e, i nu hi ka tibuai tawh hauh lo ang e. Amaherawh chu thil pakhat mi tiam ve thung tur a ni. I huaisen bawk a, GORGON lú mi rawn lâk a ngai ang,” a ti ta ngut mai a.

              Perseus-a chu a mangang ta hle mai a. “Engtin nge ka tih ang?” tiin lungngai takin lalin aṭang chuan a chhuak ta a, Lal leh a hoten an rawn nuihzat zui dan aṭang chuan a thihna tur an ngaihtuah tih a hai lo.

              Chutia a inngaihtuah buai lai chuan a bul vel chu a rawn êng a, a hmaah chuan mi pahnih an lo ding a. Pakhat zâwk chuan,”Perseus, nangmah pui turin i pa Zeus-a’n min tir a ni. Kei hi finna pathian Athena ka ni a, hei, ka ṭhian hi pathiante tirhkah Hermes-a a nih hi. Heng thil pêk te hi la la, tuipui awmna i thleng hma chu hmar lam panin kal zel ang che. Chutah chuan hmeichhe unau pathiam i va hmu ang a, anni pahnih chuan i kalna tur an lo hrilh ang che,” a ti a, an pahnih chuan an ral leh ta daih a.

              An thilpêk te chu, favah kawm hriam tak te, dára siam phâw tle vur mai te, ipte pui te, lukhum te leh pheikhawk thlâwk thei te an ni. Chungte chu a thil va tih tur atana ṭangkai tak tur an ni a.

              Perseus-a chuan pheikhawk chu a han bun a, chu veleh boruakah a thlâwk kâng thei ta mai a. Lukhum a han khum leh a, hmuh theih lohvin a awm leh ta mai a. Tichuan beiseina sáng tak nen hmar lam, Europe tláng chungah te chuan GORGON awmna zawngin a thlâwk kual ta a. A thlâwk zel a, thui tak a thlâwk a, a thlawk rei ta hle mai a. Nakinah chuan tuipui thim mup mai chhûmin a bawh phui mupna hmun hi a va thleng a. Vaukamah chuan hmeichhe unau thum, uk khek khuk te chu a va hmu a. Pitar hmel che êm êm, mit pakhat leh hapui pakhat chauh inṭawm ṭhin an lo ni a. Anni hi GORGON awmna hmun hretu awm chhun an ni a. Mahse Perseus-a chu an hrilh dur kher lo mai thei.

              Hmuh theih loh lukhum khum chungin pitarho awmna bul velah chuan a thlâwk kual a. An thil inṭawm leh inhlan chhâwn ṭhin, hapui leh mit pakhat chu a laksak ta hlauh mai a, “GORGON awmna min hrilh duh loh chuan in mit leh hapui hi tuiah ka paih daih dawn a ni,” tiin a sawiṭhaih a. Pitarte chuan mit leh ha neih loh chu an lo hlau nasa mai a, GORGON awmna hmun chu an hrilh ta vat mai ani.

              Perseus-a’n GORGON awmna bul thiam deuh reih ruih hmun a va thlen chuan mihringte leh ramsate chu lungtumah ang chang zel mai hi a lo ni a. Chuti ang khawpa sa râpthlâk va beih chu Perseus-a chuan a huphurh ngang mai a, hmulthíte a ding sung sung hial a ni. “Mi huaisen tam takte pawh heti anga an hlawhchham ṭhin chuan, engtin nge ka tih theih bîk ang le?” tiin a ingaihtuah nasa mai a.    https://ekhai.com

              A tawpah GORGON- ho awmna hmun chu a va hmu chhuak ta a. Lungpui kárah an lo muhil a, an muhil nâ a, an sam-rúl (rúl-sam) te chu an che ngual nghual a, an thaw ri sung sung bawk a. Chuti ang hmel a han hmu chu Perseus-a chuan râpthlâk a ti hle mai. An mahni tiharh lova amah pawh lunga chang lova beih dan a ngaihtuah a. An pathian Athena ten dár phâw tle tak an pek kha tun hun atana ṭangkai tur niin a hre ta a. Phâw chu darthlalang anga hmangin a pan hnai zel a, GORGON hnai ber Medusa ngháwngah tak chuan favah hriam zet maiin a fik hmawk a, a ipte pui chhúngah a kung zawk zawk a, a thlâwk chhuak nghal vat a.

              GORGON dang pahnih muhilte chu an rawn harh a, áu ruai ruai chungin Perseus-a chu an rawn ûm a. An samRúlte chu an tâl suau suau va, Perseus-a chu an rawn zuan a. Mahse Perseus-a chu a lo thlâwk kâng sáng hman tawh a, an man thei ta lo va. An unaunu, Medusa thi ruang let reng chu an thlir lai chuan, sa ruang thisen aṭang chuan, hmelṭhatna leh zaidamna chhinchhiahna, “Sakawr var thla nei, ” Pegasus chu a lo piang chhuak ta mai a. “Pagasus chanchin hi a hranin kan la sawi leh dawn nia”.

              Perseus-a chu chak takina thlâwk haw vang vang a. Thliarkar pakhat a thlawh khûm dawn lai chuan thil mak deuh mai hi a hmu a. Tuipui kam lung bangah hian nula pakhat, khaidiata thlun beh tlat hi a zu hmu a. Chu nula bulah chuan a ṭum thla chawt a, nula kawl bun chu a phelh a. “Tunge i nih?” Tunge hetia thlung bet che?” a ti a.

              Nula chuan hlau chung chung hian a chanchin chu a lo hrilh a.”Ka hming chu Adromeda a ni a. Ka pain hetah hian mi dah a ni. Tuipui huaiho aia ka hmelṭhatna hi ka nuin a lo chapopui deuh va, chu chu tuipui pathian Poseidon-a chuan a lo hriatin a thin a rim a, hrem nan tuipui sa hlauhawm tirin kan khua chu min rawn tihṭhaih ṭhin a. Kan hlau si a. Keimah hi sa hlauhawm hnena min hlan mai loh chuan sakawlh chu a kal bo dawn lo tih pathiante chuan ka pa chu an hrilh a. Tihngaihna dang awm hek lo, ka pa chuan hetah hian thi turin min dah ta ngawt mai a ni,” tiin ṭap chungin a sawi a.

              Chutia a sawi lai chuan tuipui aṭangin sakawlh chu a lo chhuak a, nula chuan, “En rawh, saw pui, a lo lang ta, ” a ti chûl a.

              Mi huaisen Perseus-a chuan, “Hlau reng reng suh. Sawti ang sakawlh ngam loh ralthuam ṭha ka nei a nia,” tiin GORGON lú chu a phawrh chhuak a, sakawlh hmai zawnah tak chuan a han lek chhuak a. Chu ve leh sakawlh chu lungah a chang nghal ta mai a.

              Tichuan nula khawngaihthlâk tak chu Seriphos khaw lamah a hruai haw a, nupui atan a ei ta a ni.

              Seriphos khua a thlen chuan lal in lamah a kal nghal a. GORGON lú chu ipte puiin a ak zel a. Lal leh a khawnbawl upate chuan ruai an lo ṭheh mup mup a. Perseus-a chu dama a rawn kir an rin loh avangin hlimna siamin an lo ri búng búng mai a. Mahse rin loh taka a hmel an han hmu chu, lungawi lo zet hian lal Polydectes-a chuan., : Engti turin nge hetah i lo kal?” a lo ti khur khur a.

              Perseus-a chuan, “I mi phút ang leh keima thutiam angin thil chu ka va hlen ta e. I duh ang ngeiin GORGON lú pawh ka rawn hawn a che,” a ti a.

              Polydectes leh a ṭhiante chuan an lo nuihzat a.”Dâwt dâwt a nih chu. Tuman GORGON hi chu an la thei rawk rawk lo ve,” tiin lal Polydectes-a chuan a lo vin tuarh a.

              Chutah, Perseus-a chuan an zavaia hmuh turin GORGON lú chu a phawrh ta a.”In âwih loh chuan han en teh u,” tiin an hma zawnah tak chuan a lek chhuak a. Chu veleh lal Polydectes leh midang awm ve te zawng zawng chu lungah an chang ta vek a. Perseus-a erawh chu, darthlalang chhana thlir a nih avangin engtin mah a awm ve lo.

              Tichuan, a tihturte a ti zo tawh bawk a, a hmanruate chu Athena pathian hnenah a pe kir leh ta a. Lawmman atan GORGON lú chu a pe nghal bawk a. A nu Danae-i leh anupui thar Adromeda te nen chuan hlim takin an awm ta a ni. End of PART – 1

PART - 2