BORUAK LAL – PAGE 1

207

RAMHUAI TE HI AN AWM TAK TAK EM?

               Ramhuai chanchin leh an hnthawh dân kan sawi hmain, ramhuaite hi a tak taka awm an ni nge ni lo tih sawifiah hmasak phawt a ṭûl a. Ringlomite chu sawi loh, Kristiante zingah meuh pawh ramhuai awm ring lo ṭhahnem tak kan awm a ni. Tunlai khawvel changkâng tawhah phei chuan ramhuai chungchang han sawi thutak viau pawh hi zahthlâk lamah a kal lek lek tawh zâwk awm e. Mi tam tak ngaihdân chuan ramhuai chung chang rêng rêng pawh hi puithuna âtthlâk thil, mimawlte buaipui tâwk lek niin a lang nghe nghe.

                A dikna chen pawh a awm ang e. College leh University lamah ramhuai chanchin zri a awm si lova. Tunhma lamte chuan an lo awm ṭhin pawh ni fa hmiang, mahse tunlai thiamna leh finna hian a ûm bo tawh a, mâwlna a bo rualin ramhuaite pawh an bo vek tawh tiin kan inzirtir te pawh a ni âwm e. Daktawrte pawhin an trainingnaah ramhuai hnathawh buai vangah an puh zêl. Damdawia enkawl dam chi a ni lo tih hrethiam chhunte pawhin thlarau lama enkawl dam theih a nih an hre hlei lova, Kohhran chhúngah ngei pawh Setana hnathawh hrethiam lo hian a bumna thangah kan âwk nawk nawk fova. Buaina leh turana tam takte hi Setana hnathawha kan puh phal ṭhin lova, tum lo deuhte hian ramhuaiho thlavâng kan hauhsak fo mai a lo ni.

                Setana leh ramhuaihote hi a taka awm lo, puithuna âtthlâk leh ngaihruatna thil mai nisela chuan a hranpaa buaipui ṭûlna chhan a awm hauh lovang. Chu chu Setana tum tak pawh a ni. Baudelaire-a ( 1821 – 1867 ) ṭawngkam han hawh zâwk ila, “Setana fin vervêkzia  lan chianna ber chu, “ramhuaite chu an awm tak tak lo” tia mi tam tak rilru a hmin thei tlat hi a ni. Hemi chung cháng hi Hal Lindsey-a pawhin, “Setana inthup thiamzia chu cinemaa a changtupate ai chian a inthup thiam a, tichuan sakhuanaahte, poetry, art, music, psychology, khawvêl finna lama inthlansiakna (intellectualism)-ah te hnam nunphung (culture) leh politic-ahte hian tawmkûk a nei zêl a ni” tiin a sawi. Chûng finna leh thiamna kawng hrang hrangte chu a tâwkte tein, remote control angin a hmang rêng a. Hei hi mihringten hmufiah thiam lo mahila Bible hian ‘khawvêl pumhlum hi misual thu thuin a awm’ ( 1 Jojana 5:9) a, Setana chu ‘khawvêl zawng zawng bumtu’ (Thupuan 12:9) a ni tih min hrilhfiah sak a ni.

               Hetiang taka misual leh bumhmang, mita hmuh theih si loh, thiltithei tak si, Pathian leh a mite hmélma chanchin hi he lehkhabuah hian kan zir chho dawn a ni.

                                Ramhuai a awm ngei tih fiahnate –

  1. Bible ṭanga finfiahna :

                Bible aṭang hian Setana leh tirhkoh ramhuai (thlarau sual) ho an awm ngei tih a chiang ber a (Luka 10:17,20). A tirah chuan Setana hi sualsa a ni bîk lova. Pathian thilsiam zînga hmasa leh ropui ber, Lucifera a ni ( Isaia 14:12,13; Ezekiela 28:11-19). Mahse Pathian lakah helna tichhuakin, angel rual engemawzât chu ama lamah hruai bova. A hmingah pawh Hebrai ṭawngin ‘hmélma pa’ Setana tih a lo ni ta a. Setana lama pakai angel rualho chu thlarau sual, tuna ramhuai kan tihhote hi an lo ni ta a. Pathian leh a mite dodal tùrin Setana thuhnuaiah an awm nghet ta tlat a ni.

                Engvanga ramhuaite hi thil sual ti tûr ringawta lo awm nge an nih hi bible hian sawi chiang hle lo phei se chuan a bangbo thlâk hle ang chu. Mihring hmasa ber Evi leh Adama te thlêm sualtu leh Eden Huan min chântirtu chu Setana a ni a, tunah hian Lalpa min buatsaih sak Vanram chang lova, a tam thei ang ber Hremhmuna hnûklût turin theihtawpin ṭan a la leh ta a ni.

                Thuthlung Thar hian ramhuaite hi a taka awm an nihzia a nemnghet chiang hle. Isuan rawng a bâwl chhúng khan ramhuai man te, ramhuai zàwlte a tidam a, mi kawchhunga ramhuai bawlhhlawh lûtte a hnawtchhuak mai ni lovin, a zirtirte hnênah ramhuai hawhchhuah theihna tûr  pawh a pe a ni. Setana leh a tirhkoh ramhuaiho hi ngaihthat chi an nih lohzia chu, Isua ngei pawhin ‘he khawvêl lal’ (Johana 12:31) tiin a sawi hial. Tirhkoh Paula pawhin ringtute hmélma, lalram ropui tak nei chungcháng sawiin, ‘Kan buante hi tisa leh thisen an ni si lo, lalnate leh thuneihnate leh, he thim chunga khawvêl roréltute leh van hmuna thlarau sualho awmte an ni zâwk e'(Ephesi 6:12) a tih miau avang hian ramhuaiho zawng an awm ngei tih a chiang tawh àwm e. An hnathawn dân chungchangah ‘boruaka thuneitute lal, awihlote chunga thawk méktu thlarau’ (Ephesi 2:2) tiin a sawifiah nghâl, boruaka thuneitute an nihzia chu kan chhiar zêl tûr aṭang hian a chiang dawn khawp mai.

                Thlarau sualhote hian an chantâwka khawrêl pawh an hai lo. Engtikah emaw chuan Leilawta paihthlâkin an la awm dawn tih an hria a, chumi hun chu an engto hle (Mathaia 8:29, Luka 8:31). Khawvêl tawp hunah erawh chuan Leilawta awmho zawng zawngte pawh khawrh chhuak lehin, chatuana hrem tûrin meidilah paih luhin an la awm ang. (Mathaia 25:41, Thupuan 20:10).

  1. History aṭanga nemnghehna :

                Khawvêl history hi a bul aṭangin indonate, thisen chhuahnate, inpáwngnêknate, dân bawhchhiatnate,hurnate, inîtsîknate leh sualna chi hrang hrang chanchin a ni ngawt mai. Tunlai chhuak thar pawh ni lovin, hmasâng chanchin kan hriat phaâk aṭang khan an lo awm vek tawh a, tun thleng hian thilsual ti tûr chuan kan la inzirtir hauh si lo. Hei vang hian tihtirtu thlarau sual hnathawh vang a ni tih hi a hranpaa puanchhuah êm êm loh pawhin mi pangngai tan chuan hai rual a n i lo. Hmanlao ai khan kan sual ta bîk pawh ni chuang lovin, thilsual tihna hmanrua a lo changkang tâk vang hian sualna hi kan hmu hluar ta zêl a. Sualna tihtírtute pawhin heng hmanruate hi an hmang thiam chho zêl zâwk niin a ngaih theih.

  1. Milem sakhua aṭanga nemnghehna :

                Khawvêl sakhaw hrang hrang lo pianchhuah dân bul kan chhût chuan, Setana leh ramhuaiho biakna aṭanga lo irh chhuak vek an ni. Tuna milem he sakhaw hrang hrangte pawh hian milem biak hma hun sawi tûr an lo nei zêl a, a tir bera an biak chu he lei leh vân Siamtu Pathian hi a ni. Mahse khawvêl pathian hian Krista Chanchinṭhain a chhun ên theihlohna tûrin ringlotute rilru a tidel tlat a. Pathian thutak hawisain, a Siamtu be lovin a thilsiamte chu biain a rawn an báwl ta zâwk a ni. (II Kor 4:4, Rom 1:24,25).

                Hmasâng Babulon te, Aigupta te, Assuria te leh Romanho sakhaw biakte kha kan thlirlêt chuan ramhuai hnathawh hlir a ni mai. Abrahama hun lai (B.C. 2000) vêlte khan Kaldai rama mite chu milem biak hmang vek an lo ni tawh a. India rama Hindu unaute milem pathian biak hrang hrangte hi han en teh u – mihring pangngai hmél pawh pu mang lo, an chhiat hlawm êm avanga ramhuai tih tlâk chauh rêng an ni. Hanumana te, thisen chhuah hmang Kali pathian leh Deva pathian angte hi entírna ṭha tak an ni. An pathian thiltithei ber Lord Shiva an tih phei chu amah tak pawh be lovin, a serh a ni an biak tlat ni. Temple chhungah Shiva serh chu ban ang maiin a ding kawh luh mai a, biakin chhunga dah mai duh tawk lovin motor kawng sira concrete ban phun tlar, mûm pel pul, a rêk china rawnga an hnawih sen vêt vût maite hi Shiva serh lem vek zu nia!

                Hnam mâwl zâwkte chênna Asia leh Africa ram rilahte kal ila, tuma hrilh ngai lovin thlarau sual, ramhuaiho hi an manganpui êm êm vek mai a ni. Keini Mizoramah pawh Isua Chanchin Ṭhain ramhuaite a hnawhbo hma chuan ramhuai tihlungawi nan an inthawi ṭhina nih kha. Ramhuaiho an sual viauna hmunah phei chuan rana inthawi mak bâkah, mihringa inthawite pawh a ngai hial a. Hmasang aṭanga aienthiamte leh dawithiamte lo awm theihna chhan pawh ramhuaiho thiltihtheihna avang veka lo awm ṭhin a ni tih te pawh kan hrechhuak thei tawh a ni.

                                Heti chunga ramhuai awm tak tak lo anga kan la ngai tho a nih chuan Setana tirhkoh mi hmantl6ak tak kan ni ngei ang.

                                Ramhuai mize Langsar deuhte.

An hmél put hmang :

                Kan sawi tâk milem betuten an pathiante leh thlarau ṭhaloho lem an siamte hi chu mihring hmél ang ve si, mahse mihring pangngai tling si lo, chhe deuh deuh an ni mai. Lehkhabu leh cinema aṭanga ramhuai hmél an siamte rêng rêng pawh an landân aṭang rêng hian ṭihbaiawm leh ngainatawm lo ber ber hmél pu an ni. Eng ang hmél chiah nge an put tih sawi a har a. Keini mihringte hi chuan min Siamtu Pathian anna tak pawh kan la pu ve ruai ruai awm e, chu chu kan ṭhatna awmchhun pawh a ni thei ang. Ramhuaite erawh chuan Siamtu anna rêng rêng kha nei ve tawh nghal lo chuan – an hmél pawh hi hmu thei tehrên pawh ni ila, duhawmna tel lo hmél a ni ngawt 6awm e. An awmdân leh mizia kan hriat tûr ṭûl zualte chu lo tarlang ila.

Thlarau an ni :

                Bible chuan ramhuaite hi thlarau khawvêl mi angin a sawi. Thlarauvin ruh leh tisa an nei lo. (Luka 24:39) tih ang deuhin ramhuaiten taksa an nei lo. Amaherawhchu mihring kawchhungahte lûtin taksa leh rilru leh thlarau an control thei a, a neitu ai maha thuneih an tum a, chu chu ramhuai man nih buaithlâkna tak pawh a ni.

Ramhuai hi ze hrang nei an ni

                Mihring ang deuhin ramhuaite pawh hi mize hrang, duhdân leh finna lamah pawh ziarang (personality) nei hrang vek an lo ni ve a., an pawngpaw man pût bik lo. Ṭhenkhatte chu chimawm riau te, ṭhenkhat vir deuh te, ṭawng duh deuh leh ngawichawi deuh te an awm a, nêp deuhte leh changkâng deuhte, lal thiltithei deuh te leh âk zahnih hnuai ang lekte pawh an awm a, mihringte kan inthlau ang deuh bawk hian an inthlau ve zût mai. Mi kawchhunga an luh chuan an mi mana chu an thu thuin an awmtir ṭhin. (Marka 5:10, Luka 4:34). An thuhnuaia an dah (possessed) êm lohte pawh an rilru leh thlaraute hi râlkhat aṭangin an thunun a, zirtirna dik lova hruai bovin an awm phah ṭhin a ni. 1 Timothea 4:1,2).

Hmuhtheihloh an ni.

                Taksa nei lo, thlarau an nih avangin ramhuaite hi mihring mita hmuh theih an ni lo. Amaherawhchu mihring zingah anmahni aiawh ‘medium’ te hmangin hmuh theihin an inlantir ve fova, thute pawh an sawi ṭhin.

Ramhuai finna :

                Plato-a khan ramhuaite hi ‘demon'(Gr,daimon) tiin a lo vuah a. ‘fing’ tihna emaw, ‘hria’ tihna emaw a ni. Mihringte aia thil titheia ngaih an ni ang bawkin ramhuaite hian mihringte ai zawngin hriatna an nei zâwk. Hei vâng hian ramhuai zâwlte leh aienthiam leh dawithiamte hian tûnhma leh tûn hnu awmdân an hre thei riau a, mi rilrute pawh an hriatsak thei. Mahse he an finna hi mite bum nân leh Pathian dodâl nân an hmang a, hei vâng tak hian mihringte zingah bum theih tûr chi an hre thei mai rêng a ni.

Ramhuai chakna

                Ramhuaite hi mihringte aia fing mai pawh ni lvin, mihringte aia chak a ni. Mihring kawchhunga an han luh chiah hian an chakzia chu a hriat mai. Gerasin mi ramhuai bawlhhlawh pai, Nuaia chakzia te kha, kawlte, khaidiatte in phuar mahsela a pawtchat a, kawlte chu a ti sawm mai ṭhin a, tuma tihdawl zawh a ni lo (Marka 5:1-5) Chu chakna chu ramhuai pahnih khat ṭangrual mai ni lovin, Legion khat, sangruk vêl zet ṭangrual an nih vâng a ni. ( Pakhat leh pakhat intum ta ila, a buru pawl te chu kan buan tâwk mial mahna. Bs)

                Kha Gerasin mi kawchhunga ramhuai zawng zawng hnawhchhuah an nih a, vawk khawchhunga luhtir an nih khan vawk rual sanghnih lai kha mu leh mal nei lo khawpin khan pangah, a biling abalangin an tlân a, dilah an tlahlum ta vek mai a nih kha.

                Sêrzâwl pitar pakhat an ti em ni kha? zanah hian mi kawngkal lai hi bungpui zâr aṭang hian  lungtein a lo vawm zeuh zeuh ṭhin a. Miin an hlau hle a, a tirah chuan fiah ngam an awm lova. Mahse patling an intiamrual a, an lawnkhung a, chutih laia bûng zara a han tlân kawi kual vêl chu – a lo hmutute chuan ‘hauhûk aiin thing a thei’ an tia lawm. Chutia an hual tuau tuau si avang chua búng zár aṭang chuan a zuang thla a. Tuikhur hnar ngawchhung lam pana a han lim phei leh ta zek zek mai chu tlangval ngal chakte pawhin an ûmphak lo rêng rêng. A tâwp atawpa an va man chhuah tâkah zawng an han en chiang le, an vêng pitar, tiang hawla kal beuh beuh ṭhin kha lo ni rengin.

Ramhuaiho sualna :

                Ramhuaiho zîngah pawh sual dân inanglo tak tak an indawt ve zut. (Mathaia 12:45) Sual saa siam chu an ni bîk lova, mahse kan sawi tâk setana’n Pathian laka helna a cho chhuah laia amah zuitute khan chatuan sualna kawng an zawh dawn tih inhre saa zui lui ngat an ni a. Chuvang chuan an awmdân diklo hi sim a, ngaihdam dil tumna nei rêng an awm lo. Isua Krista hi Pathian fapa, Lalpa a ni tih pawh an hria, hlauh pawh an hlau a, Isua hmaah chuan an khur ṭhin ( Jakoba 2:19, Marka 1:24; 5:6,7), mahse Krista thuawih a, a hnêna inpêk chu an tum hauh lo. A chhan chu-tira Lucifera (Setana) hnêna an intûkluhna kha an thutawp siamna, hnuhkir leh theih tawh loh a nih vang a ni. Chatuan hremna an chan tur pawh tihdanglam theih a ni tawh lo tih an hai bawk lova (Luka 8:29-31, Thupuan 20:1,2,10,15). Chumi hun tâwp lo thlen hma ngeia Pathian leh a mite dodal a, an tihchhiat theih ang ang tihchhiat a, an lengdarh theih ang ang lengdarh chu an tihmâkmawh, an chantawka khawrêl a ni.

                Tichuan ramhuaite hi thlarau hmuhtheihloh, fing tak, chak tak, sual si an nih avangin mihringte hi nasa takin an sawisa thei a. Mi chaklo leh ringlomi kawchhunga luhna an hriat vaih chuan an lût a, an control tlat ṭhin. Chutiang kawchhungah chuan Thlarau Thianghlim tan hmun a awm lova, ramhuai lal Beelzebula thuhnuaiah, thim thiltihtheihnain a hruaibo réng tawh mai a ni. (Chhunzawm leh tur Ramhuaiho hnathawh dân).

By Dr. P.C. Biaksiama

PAGE 2