OPRAH WINFREY : Chanchin ngaihnawm

123

OPRAH WINFREY

               Tlêm tlêma kan nun dan lo changkâng hret hret zelina a hrin pakhat chu TV-a Programme pawimawh deuh en kan uar sawt ta deuh deuh hi a ni awm e. Mizote hi TV en hrât tak mai kan ni a, mi tam tak chu kan nuna pawimawhna nei êm êm lem lo, film lehlin satliah mai maite pawh âtchilh bur ṭhin kan ni a, hêngte hian kan hun rangkachak min rûk bosak nasa hlê ṭhin.

               Amaherawhchu, tunah chuan programme pawimawh leh ṭangkai tak tak TV-ah tihchhuah kan ching ve ta hle mai a. TV Show tam tak chu lehkhabu ṭha tak chhiar nen a danglam meuh awm love. TV Show tam tak zingah mi fel takin mi lâr tak a nih loh leh mi pawimawh tak biangbiakna (interview) a neihpui phei chuan en loh kan hlau hlur mai tawh ṭhin a nih hi. Mizorama Journalist lâr tak Sangzêla Tlau in Mizorama Political Party President – Pu Lal Thanhawla te, Pu Zoramthanga te, Pu Lalduhawma leh Pu Lalhmangaiha te Kum 2013 General Election hma lawk, August thlaa a kawmna te phei kha chu Mizoram mipuiten kan hlut hlê a nih kha. Mi pangngai tán phei chuan a en ve lo nih zathlâk khawpin kan hlut a ni. Hetianga TV-a mi lar biangbiakna nei ṭhinte hi Mipui leh mi pawimawh bîkte inkarah an awm a. Mipuiten mi lâr leh pawimawh tak takte chanchin hriat châk kan ngah a, chu kan thil hriat châk va zâwt chhuak tùra an hnena va kal a rem lawi si lova, chutah tak chuan TV Show hmanga chutiang ang mite biangbiakna nei ṭhinte chuan mipui aiawhin zawhna pawimawh tak tak an zâwt ṭhin a, chuvangin mipuiin kan hlut lo thei ṭhin lo a ni.

               Sap ṭawng hmangte zinga TV kaltlanga biangbiakna nei ṭhinte zinga lâr lawk lak mai, mahse a bul ṭanna en erawh chuan thil awihawm loh tak ni lawi si chanchin tunah hian i lo ngaithla teh ang. A hming chu Oprah Winfrey a ni.

Pian leh murna –

               Oprah Winfrey hming hi Bible-a Ruthi bua Orpi hming aṭanga lâk a ni a, (Ruthi 1:4 en rawh) chu chu a Birth Certificate pawha a inziah dân a ni. Mizo Ṭawnga Orpi hi sâp ṭawngah chuan Orpah a ni a. A hming hian lam dik loh a hlawh hlê a ni awm e.

               Oprah Winfrey hi USA chhim lam panga state pakhat Mississipi an tiha khaw pakhat, a hming Kosciusko-a piang a ni a. A nu leh pa hi an innei lova, ama sawi dân hmangin a nu hian kum naupang tê a nih laiin a pa nen ṭum khat chauh an chetsualnaah a pâi ta tlat mai a. An chetsual hnu lawkah hian a nu hian Oprah Winfrey hi a pai ta a, chutih rualin a nu leh a pa hi ngaihzawn pawh inngaizawng zui tawh lovin an inṭhen nghal vang vang a ni. A nu hming chu Vernita Lee (1935 vêla piang) a ni a, hna thawh êm êm nei lovin anmahni inah inchhung khur hna thawka awm satliah mai a ni a. Winfrey hian Vernon Winfrey chu a pa dik takah a ngai a. Ani hi a tir chuan lungalhthei laihna khurah a thawk ṭhin a, chumi hnuah lumêttu-ah a ṭang leh a, chumi hnuah khawpui police-ah a ṭang leh a ni.

               Eng emaw chen hnuah Mississipi hmuna lo nei mi pa pakhat, Indopui pahnihna lai vêla sipaia ṭang, bang leh ta Noah Robinson Sr. chuan a pa a nih thu a rawn sawi ve leh ta si a. Tichuan, tui fa zâwk nge tih pawh chiang mang lo chuan a awm ta mai mai a. Kum 2006 khan a thisen hi genetic test an tih hmangin an finfiah a, a nu lamah chuan Kpelle ethnic group lam mi, tuna Liberia an tih tak huam chhunga chêng mite thlah kal zêl anga ngaih a ni ta a. A pa lamah erawh chuan eng ber nge a nih tak tih erawh chu sawi a awm tawh chuang lova. A Genetic test aṭanga a lan dân chuan amah hi thlah pawlh niin 89% hi Subsaharan African lam mî a ni a. 8% hi Native American an tih ang hi a ni a, 3% hi East Asian lam chan a ni ve thung. Eng hnam nge a nih tih chuan chuti teh nuaih mai chu a chhanna an hmuhchhuah chu a ni si a, “hnam hrang hrang, vun hàng mî a ni e,” ti ila a dik ber mai awm e.

Retheihna thlazar hnuaiah –

               Winfrey hi a pian hnu rei vak lovah hmar lamah, a nu nu, a píte chênna hmunah a nu chuan a pèmpui ta daih a, tah chuan a pi Hattie Mae Lee bulah kum 6 a nih thlengin a khawsa a. A pi chu a lo rethei hlê mai a. Winfrey pawh chu thawmhnaw ṭha pawh a leisak thei lova; alu (potato) dahna ip hmangin a thuamhnaw a lo ṭhuisak ṭhin a ni. Véng tlabirh taka chêng naupangte tán pawha zahpuiawm mah mah chutiang thawmhnaw a inbel chuan Winfrey hi a ṭhianten an hmusitin an nuihsawh nasa thei hlê a. Zah pawh a zak ve chem chem ṭhin; mahse, a aia ṭha leh changkâng a nei zo mawlh si lo, a tan zawng tih ngaihna a awm lo. Zahna chu a saipui ni sa do chawrh chawrh ringawt mai a ni.

               A pi hi rethei hlê mah se, Winfrey chunga a rilru put hmang erawh chu a ṭha hlê thung a. Winfrey pawh hi lehkha thiam tak ni se a duhsak êm avangin kum thum a tlin hmain lehkha chhiar a zirtir daih tawh a ni. An kohhranahte pawh a inkhawmpui fo ṭhin a. Bible cháng a vawn theih êm avangin ‘Thuhriltu’ tiin miin hming lem an vuahsak nghe nghe a ni. A pi hian Winfrey a enkawlnaah hian nakina atana la ṭha tur a ni tih hre rengin la naupang deuh mah se a hmangaihna avangin a kherkhiap ṭhin hlê a. Inchhung khur sekrek eng eng emaw thawk ṭhin turin fel takin a enkawl ṭhin a, chutianga tih nan chuan hun bi-cha fel tak a siamsak ṭhin a ni. Chutianga a hun bituksak a bawhpelh hlek chuan tiangin a vaw mai ṭhin a. Tin, a thu a awih loha kawhmawh a bâwl pawhin a vaw hreh ngai miah lo a ni.

               Kum ruk a lo tlin chuan an chênna khaw ṭhenawm lawk Milwaukee hmuna Wisconsin-ah a nu chuan a bula chêng turin a la a. A nu hi amah enkawlna thu hlaah chuan a pi aiin a tlaw daih zâwk a, a pi angin fel fai tak leh ti thlip thlepin a enkawl thiam ve lo. Tin, hetah hian pasal a nei a, ani’n pahrawn a hrawn thung a. Hetia a nute bula a chên hnu rei vak lovah hian a nu hian fanu Patricia a hring a. Ani hi kum 43 mî chauh a nih laiin Cocaine ngawl vei vangin a thi a. Kum 1962 a lo nih chuan Winfrey nu chuan fanu pahnih lai enkawl chu a sum dehchhuah a beitham êm avangin zo lo a inti ta a, chuti a lo nih tâk siah chuan Nashville-ah Vernon-a hnena chêng turin Winfrey chu a dah ta rawih a. Tichuan, Vernon-a bulah chuan a chêng ta a. Nashville-a a awm lai vel hian a nu chuan fanu a nei leh a, chu a nu fanu, a unaunu chu a nu chuan enkawl hlei theia a inngaih loh avangin fa anga la duhte hnenah a pian hnu rei vak lovah a lâktir ta daih a. Mak deuh mai chu Winfrey hian kum 2010 khan unau nu a nei tih a hre ve chauh a ni an tih chu! A nu hian a hrilh lo rei ngat ngat hlê a ni. A hnuah hian a nu bulah chuan a chêng zui ve leh bawk.

Pawngsual a tawk mawlh mawlh – https://ekhai.com

               Winfrey nunah hian mihringin thil rapthlâk leh hun khirh tak zet kan tih ang hi a naupan lai hian a thleng nasa êm êm mai a. Amah ngei pawhin zêp leh sûm kâr nei lem lovin a harsatna tawh hi a sawi hmiah hmiah mai a ni. A pi hnena a awm laia a retheihzia kha kan sawi tawh a, chu mai bâkah kum 9 mî lek a nih laiin a unaupa (cousin) in a pawngsual a, ani mai ni lovin a patea’n a pawngsual leh bawk a, chu bâkah an chhungkaw ṭhian hnaivai tak pakhatin a pawngsual bawk a ni! Hei hi hun eng emaw chen a puangzar lova, kum 1986 khan TV Show a neih ṭumin mipui hmaah a puangzar hmiah mai a ni. Mi tam tak chuan an awihsak lo hial rêng a ni.

               Anniho khian vawi hnih khat mai an pawngsual lova, vawi tam tak an pawngsual a, tichuan kum 13 mî a nih chuan a tuar ta ngang lova, chu pawngsual a tawhna in aṭang chuan a tlanbo ta ringawt mai a ni. Kum 14 mî a nihin sâwn a pai a, mahse, he a fa pâi hi a pian hnu rei vak lovah a thi ta hlauh zâwk a. Hêng lai vêl hian Winfrey rilru hi a rethei ngawih ngawih a, a chhungte zawng zawng hian an phatsan ta vek niin a hre hial a ni; mawh pawh a mawh love.

               Hemi hnu hian Lincoln High School-ah a kal a, he school-a a luh hnu rei vak lovah Suburban Nocolet High School-ah sawn a ni leh a. He school-a a luh aṭang hian a retheihna hian ziaawm chu sawi loh, zual lam a pan nasa ta êm êm mai a, an school-a a kalte hian a chuan ve theihna tawk bus chu hniam tak mai a ni a, school-a a pawlpuite chhiahhlawhte chuanna velah a chuang pha ve ṭawk ṭhin a ni. Chuti khawpa a retheih avang chuan rilru ṭha lo a pu ṭan ta a, a ṭhian pawisa ngah tak tate tlangnêl taka a kawm ve theih nan a nu pawisa rûk pawh a ching ta hial a ni. A châng phei chuan a nu nen hian an inhial hrep ṭhin bawk.

A tân Zângkhua a bungbu ṭan e –

               A nu mangang chuan Nashville-a awm Vernon-a hnenah bawk chuan a lo enkawl atan a dah leh ta ngawt mai a. Vernon hian Winfrey a enkawlnaah hian a fîr hlê mai ṭhin a. Khirh viau e ti lovin a zirna lama nasa taka hma sawn turin a fuih reng bawk a, a zirna chu a nuna pawimawh bera ngai turin a zirtir fo ṭhin a ni. Hetih lai vel hian Winfrey hi mi rilru chak leh talent ngah ngang a ni bawk a, an school-ah chuan hmeichhe zinga lâr berah an thlang a. East Nashville High School-a Speech Team an tih chu a zâwm ve a, chutah chuan Drama chanah a ram pumpui huapin pahnihna a ni ta hial mai a. Chutia a chêt ṭhat tak hlê avang chuan a zir lehzelna turah scholarship ṭhahnem tawk tak a dawn phah ta hlauh mai a, chuan, Tennessee State University, mi hangte chauh luh theihna hmun ah BA a zir theih phah ta a. Chutah chuan communication Subject a la ta nghe nghe a ni.

               He a subject la hi a piin a lo hriat chuan a tan a ṭha dawn hlein a hria a, lawm pawh a lawmpui hle a ni; a chhan chu a tunu zia hi a hmain a lo hre tawh a, mipui hmaa dawhsana a din rêng rêngin ṭawng tur haihchhamin a awm ngai lova, a thlun phelh ang zar zarin a ṭawng thei tih a lo hre vek tawh a ni. He lam hi a naupan tet aṭanga a tuina ṭhin a ni rêng a. Hmeichhe naupang mai a nih lai pawhin fafu hmanga naute lem an siam hi a nei a, chumi chu interview te a neihpui lem lem ṭhin a, chu mai bakah an in hungna pala sava rawn fute thleng hian a lo interview hmanhmawh ṭhin a ni awm e. Tin, a pi Hattie Mae hian mipui hmaa dinga thu sawi dân hi a lo zirtir nasa ṭhin hle a, Winfrey pawh hian hei hi chhuang takin a sawichhuak nghe nghe. “Ka pi hian keimah leh keimah a ṭha zawnga inhmu turin nasa takin min pui a ni” tiin a pi hi a fak hle a ni. Mahni leh mahni inzaha, inrintâwk hi hlawhtlinna atan a pawimawh hlê rêng a. He zia kan tlâkchham avang hian mi tam tak chu kan nih tùr ang kan nih phâk loh phah nasa hlawm hlê a ni.

               A tir berah chuan an veng chhung TV-ah midang lo kawmtu ‘anchorwoman’ an tihah a ṭang a, chutih lai chuan chuti ang lam hna thawk naupang ber a ni. A hnuah WLAC-TV ah a thawk leh a, mi hang hmeichhe zinga chumi hmuna a hna ang thawk hmasa ber a ni leh bawk. Chumi hnu kum 1976 ah chuan WJZ-TV-ah co-anchor-ah a ṭang leh a. Chumi hnuah WJZ Local Talh Show, ‘People are Talking’ an tih Richar Sher-a buatsaih ṭhinah chuan a puitu Co-host ah a ṭang leh a, chu an show chu August ni 4, 1978 khan chhuah ṭan a ni nghe nghe. Chutah chuan Dialing For Dollars tih chu a host leh bawk.

Oprah Winfrey Show chu –

               Kum 1983-ah chuan Winfrey chu Chicago khawpuia WLS-TV show-ah a insawn ta daih a. He TV show hi Talh Show tho niin zing lamah darkar chanve chhung chauh hun an hmang ṭhin a. A thawh ve hma chuan mi ngaihsan pawh he show hrim hrim hian a hlawh ngai lo. A insawn kum hian he show hi a ti hman lova, a kum leh January ni 2, 1984 chuan an ṭan thei ta chauh a.

               Mak deuh maiin Winfrey-i’n show a han nei ta chu a rawn lâr ta hlê mai a. Mî rin phâk bâk fé a ni. Chuti khawpa reilotê chhunga mi ngaihhlut a hlawh chhoh tâkah chuan TV lama thawk ṭhin mi thiam tak Roger Ebert chuan a TV-King World nena thawk dun turin a sawm ta nghal a. Ebert-a chhût dan chuan Winfrey hi chutianga a thawh dun pui theih ngat chuan a TV aṭanga a sum lâkluh chu a let 40 zetin a sang chho dawrh thei dawn a ni. Tichuan, Ebert-a sawmna chu pawmin an show pawh chu The Oprah Winfrey Show tiin a hming chu an thlâk ta a, darkar chanve aṭangin darkar khatah a hun chhung hi an tipung ta bawk a. Ram pumah 1986, September ni 8 khan chu a show chu an ti ṭan a. Chutah zet chuan a show entu chu a hmu hnem ta cher cher ngei mai. A el phatu hnai ber, a hmaa kan sawi tâk Donahue aiin a lêtin thlirtu a ngah tawh zawk a. An pahniha an show ve ve hi ram pumah TV hmangin an thehdarh chuai chuai a, mi tam takin an khaikhin nasa êm êm a ni.

Faktu leh ngaisangtu a ngah ta hle –

               Winfrey show hian fak a hlawh êm êm mai a. 1988 August ni 8-a chanchinbu lâr tak Time Magazine chuan heti hian a ziak a – “Oprah Winfrey Show hian hun reilotê chhung lekin heti êm êm hian mi ngaihhlut a hlawh nghal hluai ang tih ring chu khawte rûn tham pawh an awm ngût na maw? Mingoah pawh mipate chauh tih tura kan lo ngaih rawn deuh tawh TV show-ah hian, ani, hmeichhia ve mai, hmeichhia akara mihang lehnghalin heti khawpa huháng a rawn nei lian ta mai hi thil mak tak a ni. Interview nei tura a lo lan phat aṭangin tu tan maha han cho chi zia zâng a ni lo nghal ringawt thei mai te hi!…A hun taka fiamthu nuihzatthlâk tak a han thawh ṭhin te, a mi kawmate dinhmun a chhia a ṭhaa a hriatthiampui êm êm thei ṭhin mai bâkah, dinhmun chhe ber bera dingte thlengin an dinhmun chhiar ber lai dinhmunah a zuk dinpui tak tak thei tih hriat taka a ṭahpui mai thei ṭhin te; a cháng leh tu hnen maha an sawi duh ngai miah loh tur thurûk thlenga a sawi chhuahtir thei zêlte hi, a mak, tih mai loh chu sawi ngaihna a awm lo. A cháng phei chuan talk show ai mahin rilru lam doctor-te’n rilru lama harsatna neite an kawm hi a ang mah mah zâwk ṭhin a ni,” tiin.

               Newsday chanchinbua thawk Les Payne pawhin – “Oprah Winfrey hi Donahue aiin a thluak a ṭha zâwk a, a fing zâwk bawk a, a tak zâwk a, khawvêl nihphung hrim hrim hi a hrethiam kan tih loh vêk pawhin a show lo thlirtute rilru hi a hre vek kan ti thei hial ang,” tiin a ziak ve bawk a ni. Amah fakna hi sawi sen loh a awm a, lo sawisêl tawk pawh an bang bik lo. Eng pawh ni se, mipui titi, America mai bâkah a show lo thlir ṭhintu zawng zawngte titi a tling tak meuh meuh a ni.

               The Oprah Winfrey Show hi a tih ṭan tirh lampang kha chuan Tabloid Talh Show an tih zinga mî hi a ni a. Chumi awmzia chu mipuite hlut leh hîp thei tur zawnga talk show buatsaih tihna a ni. 1990 velah erawh chuan a huang a zauh ta a. Tabloid Talk Show kal pelin show chi dang hêng – lung natna chungchanga mi kawm te, International politics kaihhnawih chungchang te, sakhua lam leh mi lâr chi hrang hrang te, mipui nawlpui nena inkungkaihna hnai tak nei hêng cancer chungchang te, mi dang tán sum leh nun inhmang nasa te kawmna thlengin a nei ti chho zêl a. A hnu lam deuhah phei chuan an show chhimtu (audience) tinten motor car an dawn theihna te leh Australia zin theihna thlengin show hmuhnawm tak tak a buatsaih chho reng a ni.

               1993 khan Winfrey hian zai thiam fam ta Michael Jackson kha a show-ah a kawm a, chu chu American History-a Programme thlir ngah lamah a pangana a tling pha hial a ni. TV aṭanga thlirtu mi 36,500,000 (Maktaduai 36 chuang) a nei hial a ni.

               Talk Show buatsaih mai bakah hian 1989 khan The Women of Brewster Place tih serial film a siam a, a changtu pawimawh zingah a tel nghal bawk a, a hnuah Brewter Place tih filh, rei vak lo an chhuahah a chang ve leh bawk a. Hei bâkah hian hmeichhe tán bîka siam Women’s Cable Television Network Oxygen tichhuaktute zingah a tel leh a. Harpo Production an tihah President a ni bawk. ‘Harpo’ tih hi ama hming ‘Oprah’ a letlingzawnga ziah a ni a. Tin, kum 2008, January ni 15 khan amah leh Discovery Communications chuan Discovery Health Channel chu Oprah Winfrey Network (OWN) tiin an thlâk a. Chu chu 2009 a tih ṭan an tum laiin eng eng emaw ro khawlhna avangin January ni 1, 2011 khan an tichhuak ṭan ta chauh thung a.

Lemchan khawvêlah –

               Kum 1985 khan Steven Spielberg-a filh siam The Color Purple tihah khan a changtunu pawimawh tak chhungpuinu, lungngai leh thlaphang takah a chang a. He tah hian a chang ṭha kher mai a, Best Supporting Actress Award dawng tura chhawpchhuahte zingah a tel pha hial a ni. 1998 khan American hmeichhe thu ziak thiam Tonu Morrison-i thawnthu ziah ṭha tak mai, Pulitzer Prize a dawn phahna Beloved tih lehkhabu behchhanin a, a lehkhabu hming bawk a film hminga siamin a chang a, a buaipuitu ber a ni bawk a. He a film chanah hian a changtu nu ber chu Sethe a ni a. A bu-ah chuan a changtu nu hi sal a ni ṭhin a. Sethe anga a chan dawn avangin sal dinhmun a hriat theih nan darkar 24 chhung sal ang chiahin a awm chhin a. A chang leh an phuar hlâwm a, ai mitthlawn ang tlata thimin a mit an tuamsak a, ramngawah, thim zingah amah chauhvin an hnutchhiah a ni.

               Amaherawhchu, kawng engkima hlawhtlin a har a ni ngei ang, nasa taka tihlar tuma an bei chung pawhin an rin aiin a hlawh tling lo ta hle mai a. Dollar maktaduai 30 vel lai an chawi belh a ni. Mahse, a beidawng duh chuang lo.

               He film a channaah hian amah ngau ngau chuan a chang ṭha khawp mai a. Thadie Newton chuan, “Winfrey chu a zei bawk a, a bu ang thlap a chang thiam a ni. A film chan khawvêlah a chen tlat avangin a la thu tak hlê tih a hriat a. A thekthâwi a ṭhain a thluak lah chu a chak thlawt bawk,” tiin a fak a ni.

Thu ziah lama a hnuhmate –

               Winfrey hi Pathianin a hmangaih bîkin a duhsak bîk emaw tih mai turin kawng hrang hrangah talent a pe ṭha êm êm a. Midang nena inziah ṭawmin lehkhabu panga ngawt a lo khâwr pum tawh a. Amah training petu Bob Greene nena an lehkhabu ziah, mi thau leh ril lutukte tána mahni rihna tihthlâkhniam dan chungcháng an ziah phei chuan mi duh a hlawh êm êm a. A lehkhabu an hralh chhuah a nih hma ngawt pawhin a man pe lâwk tu sáng ber nihna Record a siam nghe nghe a ni. He lehkhabu an ziah hma hian USA President hlui Bill Clinton-a Autobiography kha chhuah a nih hmaa a man pek lâwk tam ber a ni a, chu pawh chu a rawn khûm a ni.

               Hei mai hi a la ni lo, Magazine pawh a tichhuak a. A hming chu O, The Oprah Magazine tih a ni a. Chu chu kum 2004 aṭang khan an chhuah ṭan a. He a Magazine chhuah hi a hlawhtling hle mai a. Kum 2009 January thla Issue ngat phei kha chu 2006 aṭang an Magazine tihchhuah tawh zawng zawng zingah hralh tla lawr lak a ni. A magazine tihchhuah hi TV kaltlanga a show lo thlir ṭhinte aiin an tam fe zâwk nia chhût a ni a. USA nuhovin an chhiar tam zual a ni awm e.

               Chu mai a la ni lo cheu. Internet-ah website a siam a. Chu a website-ah chuan TV-a a show neih hrang hrang te, a lehkhabu ziah tawhte, an Magazine chungchangte leh midangte tana a hnathawh chungchangte tarlan a ni a. Chu a website chu thla khat chhungin tlawhtu maktaduai 70 (Mizoram mipui lêt sarih) vel an awm ziah anga chhût theih a ni. He Website leh a thiltih dang dang lo thlirtute aṭangin kar tin e-mail 20,000 dawng ziah ang a ni bawk. Vawi khat piang ṭheuh ṭheuh hi kan inlar thlei ṭhin teh e. Tin, chu mai bâkah naupang mipat hmeichhiatna kawnga khuakhem chingte venna tur “Oprah’s Child Predator Watch List” an tih chu TV-a a show leh website kaltlangin an din a. A’n hlawhtling mai mai khawp a, hemi an din aṭanga darkar 48 chhungin naupang khuaikhem ching mi pahnih an man nghal der mai a ni. Amah ngeiin a naupan laiin namen lovin khuaikhem a lo tâwk tawh bawk a, he thil hi a ngaimawh hlê a, heti lam kawnga ke pên pawh hi a inhmeh hlê a ni.

Radio lamah pawh kua a hreuh zêl –

               February ni 9, 2006 khan XM Satellite Radio nen Radio channel pakhat, ama enkawl tur bik kum thum chhung atan contract $55 Million man lawih mai a sign pui a. Chuta ṭang chuan Radio lamah pawh kua thui takin a hreuh ta a. An Radio channel-ah hian amah leh a ṭhian, amah puitu ṭhenkhatten nileng zankhua zakin han lai awm miah lovin programme an nei char char a. Chutah chuan kar khat chhungin minute 30 chhung hun a nei ziah ṭhin a ni.

A lo hausa ta –

               Mi hang ni bawk, thingtlanga chêng lehnghal, chuta kara mahni pa pawh hre lo, nu rethei takin ṭhenawmte ṭhatna zar zova a enkawl seilen ve ṭâwk ṭâwk a ni tih a tir lamah khan kan sawi tawh a. Mahse, miin tih takzetna leh taimâknate nena khawvêl hi an hmachhawn chuan rethei an rethei reng lem lo khawp mai.

               Winfrey ngei pawh hi a rethei reng lo. Kum 32 mî a lo nih meuh chuan a Talk Show chuan khawvêl a dâp chhuak a, Dollar maktaduai tam tak nei, hausa tawntaw Millionaire an tihte zingah a hming a chuang vang tawh a ni. TV-a a show neihnate chu a lo hlâwk tâk êm avangin amahin leisak thei khawpin a lo hausa ta a. Kum 41 mî a lo nih phei chuan a thil neih zawng zawng hlutzawng chu dollar maktaduai 340 lai a lo tling ta a. African American (Mi hang, America rama sal anga lûtte zinga mî, American khua leh tui ni zui tate)  zingah a hausa ber pawl a ni chho ta hial a. Kum zabi 20-naah khan Winfrey hi African American zawng zawng zinga hausa ber a nih an ring tawh hial a ni.

               Kum 2006 khan Winfrey hi USA-a TV paid channel nei zinga sum hailut tam ber a ni chho ta zêl a. Kum khat chhungin dollar maktaduai 260 vêl a hailût thei a ni. Amah hnaihtu ber aiin a lêt nga zetin a tam a. Kum 2008 phei kha chuan a sum hai luh hi a la pung ta deuh deuh a, kum khat chhungin dollar maktaduai 275 vel a la lût hman der a ni. India pawisaa chhût chuan thla khata chéng 1,489,583,333 hlawh ang vêl a ni a, ni khat anga chhûtsak pawhin a ni khat rate a hniam lo hlê, chéng 49,652,777 vêl la lût angin a chhûtsak theih a ni!

               Mi hausaho hausak dân indawt ziah fona magazine – Forebes chuan kum 2004-2006 chhung khan Winfrey hi mi hang zinga billionaire (an hausakna pound emaw dollar tluklehdingawn takzet) awm chhun leh khawvêl pian tirh ata mihang hmeichhe zinga billionaire ni hmasa ber niin a tarlang a ni. He chanchinbu vêk hian Winfrey thil neih zawng zawng hlutzawng hi dollar tluklehdingawn 2.7 a ni a. USA-a Mahni kutkawih ngat aṭanga inti hausa hmeichhiate zingah a hausa ber bawk a ni.

A in leh lote –

               Hausa ta na nâ nâ chuan In leh lo ram hlu tak tak pawh a ngah zet mai. Tunah hian Oprah winfrey hi California-a Montecito hmunah in leh lo ram zau tak mai acre 42 zeta zauah “The Promised Land” tia a hming a vuahah chuan a chêng mêk a. Hei mai bakah hian Lavallette hmunah pawh in nuam tak a nei a, Chicago-ah in chhawng khat a nei bawk a, Florida-a Fisher Island-ah in leh lo ram zau ṭha tak a nei bawk a, Hawaii and Antigua hmuna Maui-ah ram eng emaw zah a nei bawk.

Mi rilru hneh thei –

               Winfrey hi a hausa mai a ni lo, a hausakna hi chu a ve lek zawk a ni a, a larna ber zawk chu mi rilru a hneh theihna hi a ni. Khawvêla chanchinthar thehdarhna kawnga lar ber tia chhal ngam CNN (Cable News Network) leh Time.com chuan Winfrey chu “Khawvêl hmeichhe piang tawh zinga mi hneh thei ber (most influencial woman) a ni hial awm.” tiin a puang tawp mai a ni. TIME Magazine chuan “Kum zabi 20-na chhunga midang hneh thei 100 zinga pakhat a ni” tiin a ziak bawk a ni. Hei bakah pawh hian mi rilru a hneh theih dan chungchangah hian sawi tur a la tam êm êm a. Kum 2007 khan USA Today Magazine chuan “Winfrey hi tun kum zabi chawhnu ber lama hmeichhe zinga mi rilru hneh thei ber” tiin a ziak bawk a. Ladies Home Journal phei chuan America ram chhunga hmeichhe zinga mi rilru hneh thei ber tiin a number ONE ah a dah vah a ni. USA President Barack Obama meuh pawhin “Kan ram hmeichhe zinga mi rilru hneh thei ber a ni hial awm e,” tiin a sawi ve hial a ni. Forebes Magazine chuan kum 2005, 2007, 2008, 2010 leh 2013 chhunga khawvêl milâr (celebrities) hmeichhe zinga thil tithei ber tiin a puang a ni.

               Chutiang khawpa mi ngaihsan rawn, mî zah kai, mi ngaih hlut leh mi en nin theih loh chu sawi tawh ang khan hmeithai rethei fa, mahni pa tak ngial pawh hre chiang lo, tumruhna leh huaisenna avanga retheihna nghawngkawl phur chhuak a, lo hlawhtling ta a ni a. A ngaihsanawm thlâwt a ni. Mipate ai hian a lêt tam takin hmeichhiate tân hian mi ngaihsan nih theihna kawng a ping a. Hmeichhiaah mah ani chu mi hang a la ni lehzêl lehnghal a. Mahse, chûng mi ngaihsan leh mipui duh rawn ni thei tura amah daltu zawng zawngte chu rinawmna te, taimakna te, lungngai leh hrehawm tak hnuaia chêng mêkte dinhmun hriatthiampuina te hmangin a su tlang vek a, a tâwp a tâwpah khawvêl mipui tluklehdingawn sarih zettte zinga mi langsar zual mi sawmnga vêl lek zingah pawh a tel thei ta hial a ni.  https://ekhai.com

 

A in leh lo hrang hrang te en duh tan a hnuai ah photo galary ah hian a en theih e.
Gallery