MI TUMRUHTE – NANDO PARRADO & ROBERTO CANESSA

50

MI TUMRUHTE – NANDO PARRADO & ROBERTO CANESSA

                Khawvêl ram hrang hranga hnam hrang hrang zingah hian mi tùm ruh tak tak an tam hle mai a, sawi sen pawh an ni lo. Chûng mi tùm ruhte tum ruh dân chu chi hrang hrang a awm a. Mi ṭhenkhat kan han sawi tâkte kha mahniin tum mumal leh fel tak an nei lâwk a, chumi tihlawhtling tura thifa hnuk chata beitute an ni a. Mi ṭhenkhat erawh chu a hmaa an tum lâwk rêng pawh ni lo, an dinhmunin a zir tak loh em avanga mahni nun leh ṭhiante nun chhanna atana nasa mangkhena beitute an ni ve thung a. Chuti ang mite chu a hmaa kan sawi mi tum ruhte aia an nêpna a awm chuang lo kan ti thei ang. Mi tam berte an beidawn a, an kaikun ngawih ngawih tawh hnu pawhin chutiang mite erawh chuan beiseina nung nen tih tak tak arpa tuihala beiin hma lam an pan ṭauh ṭauh ṭhin a ni. Khai le, chutiang mi chanchin chu chhiar rawh le…

Santiago lam panin thlawhnaah –

                October ni 13, 1972 khan Old Christian Club Rugby Union Team te chu Uruguay khawpui pakhat Montevideo aṭangin Chile ram khawpui Santigo lam panin Uruguayan Air Force pakhat turbojet Engine pahnih hmang chi, a thlawhna hming Fairchild FH-227D hmang chuan Tinguiririca lui ruam chungah an thlâwk vang vang a. An hnuai hla takah chuan Tinguiririca tláng kàng pawh chu chiang takin an hmuh theih nghe nghe a ni. He thlawhtheihna hi Carrasco International Airport aṭangin a hma ni khan a rawn thlâwk chhuak tawh a, amaherawhchu khuain a bumro avangin a tum ram chu a pan nghal mai thei lova, chuvang chuan Argentina khawpui pakhat Mendoza-ah a ṭum lailâwk ta ringawt a. He thlawhtheihna hi metre 9,000 vela sánga a han thlawh kân khan khawvela tlang ropui leh hmingthang ber pawla sawi Andes tlang, South America khawmualpui thlang lama awm, chhim leh hmar zawnga mel 5,000 zeta thuia inkhawh zui mai, a vawh êm avanga vurina a khuh var uarh mai chunga thlawh chu khaw awm dân chian loh em avangin a thei tlat lo mai a. Chutiang taka a thlawh theih tak si lovah chuan pilot chuan ar talh dàn chi dang a zawn a ngai ta. Pilot-in a tum dân chuan Mendoza khawpui aṭang chuan chhim lam hawi zawngin a thlâwk vang vang ang a, khawthlang lam hawizawnga inherin Andes tlang inkhawh chu a zui zêl ang a, tichuan chu tlang hniam lai tak Planchon an tih hmunah chuan tlang chu a thlawh khûm ang. Tichuan, Chile ram chhung chin a lo lut tawh ang a, chutah chuan thlâwk zelin Andes tláng péng pakhat Curico an tih lam hawiin hmar lamah a thlâwk zel ang a, tichuan Curico a thlawh kân hnuah Santiago khawpuiah chuan a ṭum thei dawn a ni.

                Pilot-in a ruahman lâwk ang tak chuan October ni 13, zirtâwpni tak chawhnu lamah chuan Planchon lam pan chuan a thlâwk chhuak ta a. A tum ang tak chuan vanneihthlâk takin a thlâwk thei zêl a, Planchon chu thlawh kânin Curico chung a thlâwk thleng ta tih chuan Santiago khawpuia thlawhna ṭumhmun thuneitute chu a phone-a biain ṭum turin a thlâwk hniam ṭan tih a zuk hriattir a. Amaherawhchu, chutah tak chuan tihsual pawi lutuk a nei tlat mai. A thlawh kân mêk Curico tláng hnâi tê aṭang chuan chu tlang pumpui mai chu chhum chhah lutukin a lo khuh bo vek mai chu lo niin! A mit nilovin, a thlawh chakzawng leh a thlawh reizawng aṭang ringawt chuan chu Curico chu a thlawh pelh tawh leh tawh loh a hriat a ngai ta. A mang a ang ta takzet mai.

                Tichuan, engmah hmu thei ta hek lo le, a thlawh reizawng aṭang chuan a chhût lo thei ta lova. Chu a tehna chu anni vana chak tak taka thlawk fua fuate tan chuan tehkhâwng chhe ber leh rintlâk loh ber a ni a. Mahse, mangan ni chuan Chawngbawla pawh a bawl hlei thei lovang khán, pilot mit chu ṭha hle ringawt mah se a thil hmuhna dâl turin chhûm a awm miau mai si a, ai mitthlawn ang hlauh a ni ta si a, a rinthu chu thlawh thui zawng teh nen a hmang ta lo thei lo a ni. Tichuan, a hun âwm tâwk vela a ngaihah chuan ṭum turin a thlâwk hniam ve ta ngawt pek a.

                Chutah chiah chuan thil pawi em em mai a awm tlat. Van sáng taka a thlawh lai khan thlipui na tak anmahni tâwk zawngin a rawn thawk chiam a, chu chuan an thlawh chakzawng chu nasa takin a tihniam vak a ni tih a hre tlat lo. Chutia ṭum tura thlawhna a han tihhniam chuan an ṭumhmun tur chu an lo la thleng teuh lo mai chu lo niin, tlang chhengchhe em em mai chung lawkah a lo thlâwk reng tawh mai si.

Khawvêl deng chhuak khawp chhiatna chu!

                An dinhmun hlauhthawn awmzia hre miah lova hniam têa an thlawhthlâk chuan thlawhna chu thlawk kâng sáng leh tura thunun rial lohvin an lo thlawk hniam reng tawh mai chu lo niin, loh theih lohvin tláng pakhat, hming hram êm êm pawh nei lo, chhengchhe êm êm maiah chuan an ṭum ri ta rum rum mai a. An tlâkna hmun hi Cerro Sosneado leh Volcan Tinguiririca tláng inkár, Chile leh Argentina ram inrina lai bawr vel a ni a. An tlâkna lai vel chu tláng sáng tak mai, metre 4,200 a sáng a ni a. Tláng an hrut chiah khan a thla ding lam chu a milim ban thlawn hmawk mai a, a inpui hnung lam chu a kaw nghal huau bawk a. Chutah thlâwk tlang zêlin, tláng zum dang a hrut thla leh a, a thla vei lam a hrut bung leh hmawk a, tichuan thla nei lovin a tak ringawt chu boruakah a thlâwk ta a, a tâwp a tàwpah tlang awih deuh ah chuan lei chhun ngur hian a ding ta chawrh mai a, a chhunga chuangte chu ngaihtuahawm tak an ni.

                He thlawhna vanduai takah hian mi 45 an chuang a, an zinga 12 te chu ka pawh chhawn lovin an hnuk a chat nghal vek a, a tuk leh zingah hliam na zual 5 te chuan an hliam tuar chhuak zo lovin an ṭhian 12 kal tate hnung chu an zui ve leh a. A thi bang zawng chu mi 27 an la ni. Dinhmun chhe tâwpkhâwkah pawh ding mah ila, kan thâwk theih ṭêk ṭêk chhung hi chuan mihring hian thih mai hi kan lo hre ṭhin khawp mai a lo ni. A thi bâng 27-ho pawh hian chutia thih mai chu an hreh ngawih ngawih a, tum pawh an tum bawk hek lo. An zinga tam tak chuan hliam na lutuk tak mai, pa tawrh atan pawha na mah mah tur hi an tuar a, an rûm vawng vawng ringawt mai a ni. Taksa khawi maw lai emaw tal sawh sil lo an awm meuh lova, a ṭhente ke phei chu a tliak hlawm lehnghal a. Chu lai hmun chu hliam tawrhna hmun atana thlanawm loh êm êm mai a ni leh zêl si.

                A hmun hi a san em avangin a vawh hian a vawt tûk mai a, an ina fridge fahran pawh kuah ngawih ngawih an nâp ta ve ang. Chuta chhapah thawmhnaw lum ṭha an lo nei hlawm der bawk si lo, vahmim akara a mawng ṭawih lehnghal tih ang maiin chhiat tawh nâk alaia a tuam lumna leh a enkawlna hote tal pawh nei lo an ni a, an chan chuan maian chan pawh a tluk lo takzet a ni. An hmuh theih chin zawng chu vur hlir vur hlir a ni mai a; chu lai hmunah chuan an tla ang a, thuamhnaw lum tak tak leh pheikhawk ṭha tak an mamawh ang tih ngaihna reng hre lovin thinlung engthawl tak chungin thlawhnaah an chuang a, chuvangin vur chunga kalna atana ṭha pheikhawk tumahin ken nachang an hre lo hrim hrim bawk si a.

                Tin, hetiang vur hmunah hi chuan vur hi a êng tle lutuk a, mit a tivai vek thei ṭhin a, chutiang chu snow blindness an ti nghe nghe a. Heti ang hmuna vuah tur tarmit dum chi tumahin an lo keng lo bawk a ni. An thiamawm hle tho mai; zin veivahna chi hrang hrang motor, lawng leh thlawhtheihnaah hian thlawhtheihnaah hian chetsualna a tlem ber a (A chesual chhun an lar ṭhin em zawk a). Zin veivahna zawng zawnga him ber nia sawiah an chuang miau a, tumahin heti ang hian chetsualna rapthlâk tak an tâwk ang tih an suangtuah pha lo a ni e. An suangtuah phâk bâk leh an mumang ram pawhan la fan ngai reng reng loh tur khawpa rapthlâk chu an chungah ṭhumvawr tlâkin a lo tla ta si a, an tuar ngawt ngawt tawh mai a ni ang chu. A vanduaithlâk kher kher mang teh e.

An theih tawp chuan an zawng a lawm.

                An che sual a ni tih an hriat phat aṭangin ram pathum meuhvin a zawn hna chu an theih anga ngawrhin an thawk ṭheuh a, mahse, an thlawhna rawng chu a var a lo ni kher kher si a, chuta chhapah vur hmunah a lo tla ve kher bawk nen, a zawngtu tan chuan buh pawl zinga buh pawl ve tho pakhat zawn tum ang chauh a ni a, a ni ber hriat a har lulai tawh lutuk a, a beidawnthlâk tak zet a ni. A nungdamhote chuan hmui hnawih (lipstick) hmangin lianpuia SOS (Save Our Soul tihna – Kan mangang a, kan thi tak ngial dawn a, kan nunna min han chhan thuai teh u tihna) tih thumal pathum ziah an tum a. Mahse muvanlai lênna hmun ang vela thlâwk ṭhin thlawhna hmanga zawngtuten thlâwk paha an hmuh theih khawpa lian ziak tur chuan an lipstick neih chuan a daih dawn chuang lo tih an hriatin an bansan leh ta a.

                Anmahni zawngtute pawh chuan ngawrh takin thlawhna hmangin an zawng suau suau a. Chutia Andes tlang lianpui mai leh a chhehvel mel za tam tak bial chhung tihtak zeta an zawn hnu pawh chuan an hmu thei hlawl si lo va, tihngaihna a awm ta ngang lo nia an hriat hnu, a ni riat ni chuan an bansan ta ringawt mai a ni. Mizote ai chuan ni khat laiin zawn pawh an zawng rei zawk a ni.

                Chu thlawhna tlaa awmte pawh chuan in lama mite zawn hmuh thâwr ringawt an sakuh ser nghah ngawt ngawt bik lova, an theih ang angin zawn hmuh an awlsam theih nan an bei ve sauh sauh reng a ni. An zinga mi Roy Harley chuan thlawhnaa Radio Transistor chu hmuchhuakin chumi hmang chuan radio an ngaithla thei hlauh a. A ni 11 ni chuan anmahni zawn chu an tawpsan ta tih an han hre mai chu(h), an tliak hnâwp hi a ni ber e. Damkhawchhuah an beiseina rêng rêng chu a bo zo ta vek a, khawvêl dang nena inzawmna rêng rêng nei lo, thliarkara fianrial taka táng dinhmun angah khan an ding ta nite pawhin an inhria a, an beidawng tak zet zet a ni.

Beiseina nung nei Parrado leh Nicolich

                Amaherawhchu, chu lungngaihna chhûm zing pik hnuaiah pawh chuan beidawng duh hauh lo an lo awm hlauh mai. Pakhat zawk chu Parrado a ni. Ani chuan anmahni zawngtuten ṭin zai an rel ta tih a hriat pawh chuan beiseina sang tak nen an chhak tlang sang tak lam hmun aṭanga chhuah zalen theihna a nih beiseiin a thlir ta vang vang mai a. Pakhat dang leh chu Gustavo Nicolich (Coco tia an koh) chuan a ṭhiante lungngai em em hmel a hmuh chuan an thlawhtheihna taksa sira kua aṭang chuan rawn chhuakin a ṭhiante ṭhu ngui nghuaite chu, “Hei, ṭhiante u, chanchinṭha ka hria a nia. Tunah khan Radio-ah min zawn an bansan tak thu kan hria a ni” tiin a zu au a.

                Thlawhnaa ngui lap leh beidawng em ema ṭhu a ṭhiante chu an reh ṭhap a. A hnu deuhah chuan an ṭhianpa pakhat Paez chuan Nicolich chu thinrim zet hian, “Min zawngtuten min zawn an bansan chu eng ti ang teh chaiin nge chanchinṭha a nih phiangsen ang?” tiin thinrim zetin a han au let tuarh a. Nicolich erawh chuan awlsam deuh hian, “E le, hemi hmun aṭang hian keimahniin kan chhuak thei dawn tawh tihna a nia,” tiin a chhang a.

                A mak khawp mai, mihring zingah hian beidawng har tak hi an lo awm a. Chuti ang mite chuan miin an nun chu harsatna tinrengina kil tin kil tang aṭangin lem zawh vek tumin a kil hnai tuau tuau vek tawh nia an hmuh laiin anni erawh chuan tlanchhuahna tur khaw eng an hmu tlat mai zel a ni. A êng zawnga khawvel thlir tlat mite leh a thim zawnga thlir mite hi kan lo inang lo ṭhin khawp mai. Nicolich-a thlir dan chuan anmahni an zawn chhung zawng kha chuan chulai hmun an kalsan chu a rem lova, a rawn zawngtu tan pawh an kalsan chuan hmuh an harsa lehzual dawn a, mahse chutia anmahni zawn an ral bansan tâkah chuan chulai hmun chu inchhanchhuahna zawngin kalsawn a pawi tawh lovah a ngai mai a ni. A thlirna chu a dik khawp mai. Mahse, a huaisenthlaâk hle thung a ni.

Thih ngawt ai chuan ṭhiante sa ei.

                Mi 27 meuh tan chuan eitur an neih chhun chu a bei tham ta hle mai. Chocolate tlem an la nei a, kamram (snacks) chi hrang hrang tam vak lo leh sap zu bottle tam vak lo a ni tawh mai. An zinga mi Fito chuan thlawhna seat aṭanga a hmuh thIîr phêk chi khat hmangin vur tihtui dan a thiam thar a, chu chuan an tui mamawhna a phuhru deuh bawk a. An eitur neih ang ang chu rualkhai takin an nunna chhanna dawr dawr tur chauhvin ren êm êmin an insem tlang a. ‘Sem sem dam dam, ei bil thi thi’ tih kha an chângthlan a ni ber mai. An awmna hmuh hi vurin a khuh vek avangin thing hnah chawr no pakhat pawh hmuh tur a awm si lova, an mangang tawh tak zet a ni.

                Eitur a lo tlèm tak hle hnu chuan thlawhna chhung leh a seat chhungte chu ei mi a awm dah law maw, tiin an dap an dap a. Thlawhnaa seat phuar behnaa savun awm ang angte pawh an dît ngawng ngawng tawh a. Hêng savunte hi damdawi hmanga tihthih vek a ni a, chûng damdawite chu an taksa tan a ṭha lo hle ang tih chu an ring a, mahse eitur an hmuh chhun a ni miau mai si a, an ei lo thei lo a ni. Duh thlang thei an ni tawh lo. A tâwpah chuan an thawmhnaw hak lai an ei a nih ngawt loh chuan ei tur dang awm chhun chu aluminium te, plastic te, vur tlang leh lungtum te a ni tawh mai.

                A tâwp a tâwpah chuan dam an la duh a nih si chuan an tih hreh ngawih ngawih, loh theih loh vanga tih a ngai dawn ta. Chu chu an ṭhian thi tate sa ei a ni! Thing zîk bula zawng dân dinmunah an ding ta. Mûk takin an han ngaihtuahho a. An zinga thil hre deuhte chuan an taksain dam reng tura a mamawh zat an thil eiah chuan a awm tawh hlawl lo tih sawi pahin hreh hle mah se thih vek an duh a nih si loh chuan an ṭhiante sa chu an ei ngawt mai a ngai dawn a ni tih chu huai takin an sawi a, mahse, a sawitu ngei pawhin an hreh ngang mai. Mi dang, an hmel hriat loh daihte sa chu ni se a zia tak pawh a awm ang, mahse, an zinpuite leh an ṭhian kawm ngei êm êmte leh an laina hnai takte an ni hlawm si. Chungmite sa eia han nun chuh!! Mahse, kawng dang zawh tur a awm ta ngang lo, thih an la duh bawk si lo.

                A tâwp a tâwpah chuan an zavai chuan lungrual takin an ṭhiante sa eia an nunna chelh beh chu an remti thei ta hram a. Tichuan, ti tak chung leh inthlahrung tak chung chuan an ṭhiante sa chu an ei ta a! Kum sangkhat liam taa hnam kawlhsente tih tawk lek chu an ti lo thei ta lo a ni. Mahse, misual tâwp thanga kan ngaih tual thattute pawh hi an tual thah chhan azirin kan demin kan dem lo ve tho a. Mahni nun chhan nana tual that ngatte chu dân pawhin a hrethiam a, hremna a pe ngai lo, chutin kan rilru pawhin a thiam tho. Chuti ang chiah chuan anni pawh hi kum sangkhat liam taa hnam kawlhsente tih awm tawk chauh chu an ti naa, an tihchhanin mi demna tur lakah a chhan ve tho a ni.

                Chutia an ṭhiante sa an han ei takah chuan an lo chak thar leh ta a. Heta chuangte zawng zawng hi Kristian vek an ni a, Roman Catholic kohhrana mi vek an ni. An zinga mi ṭhenkhat phei chu rinnaah an lo fir zual a, mihring sa ei chu thiang lo takzetah an ngai a ni. Mahse, reiloteah an nunna atan chauh tak taka ei an nihzia an hre thar a, an han ei duh lo ren rawn na a, a hnuah chuan an ei ve leh ta vek a ni.

Chhiatna inchherchhuan chu –

                An dinhmun a khirh tawh teh reng nen, chutia dam ṭawk ṭawka an khawsak lai chuan October ni 29, a lo ni a, chumi ni chu an thlawhna a tlâk aṭanga a ni 17-na niin, chawhnu herah chuan thlawhna chhunga an ṭhutho lai takin an chhak tlanga vur chu an zawn takah a rawn tawlh thla thut mai a. An awm mêkna hmun thlawhna taksa chu feet eng emaw zatin vurin a chim pil ta thut mai a. An zinga mi pariat lai maite chu an thi leh ta. Hmeichhe zinga la dam awm chhun Javier Metho-a nupui Liliana Methol pawh a thi zingah chuan a tel ve a.

                Nando Parrado chuan an chung zawnah boruak luh theihna turin thaw chhama an thih mai loh nan a hawlhkua a. Chumi avang chuan nung dama la awmte chuan harsatna em em an tawk ta lem lova. Mitthi tharte chu tuar hle mah se, tih ngaihna vak a awm chuang lo, an tawrhna chu an sepui ruah tawrh chawrh chawrh ringawt mai a ni. Mitthi dar vuak tur a awm lova, khawhar hla sak tur pawh ni se khawia khuang nge an ben ang? Khuang pawh chu awm ta teh rêng pawh ni se tu nge beng chuang ang le? An tan thih leh dam kar chu sûm khat leka zim a ni tawh si a. A nihna takah chuan mitthi thar an awm chuan an ration a pung a ni leh mai. Chu chu thihnain an tana danglamna a thlen awm chhun chu a ni. Chhiatna inchherchhuan an chungah a thleng a ni ber e.

Hun khirh tak chu –

                An dinhmun hi a khirh êm êm mai a. Patling rual heti zah awm ve ta chêng chu eng tin nge an dinhmun khir tak ata chhanchhuah an nih theih ang tih hi an ngaihtuah nasa hlawm hle a. Vur a rawn tlawh a, an zinga mi pariat lai mai nunna hrui a rawn zai chahsak hma aṭang rêng khan an zinga mi tlemtê te chuan chu lai chhiat an tawhna hmuna ṭanpuitu lo sakuh ser nghah ngawt mai chu dik lovin an hria a, chutia lo ṭhut ngawt ngawt mai chu dik lovin an hria a, chutia lo ṭhut ngawt ngawt ai chuan an chhak tlangah lawn chho se, tichuan anmahni ngeiin ṭanpuina va zawn ṭhain an hria a. An co-pilot (pilot thachhangdawltu) sawi dân hmangin Curico an thlawh pêl tawh a nih ngai chuan tunah hian Chile ram thlang lam panga thingtlang khaw ṭhenkhat chu an awmna aṭang chuan lo fing tam a ni hauh lovang tih an ring tlat a.

                Mahse, hetih lai hian an co-pilot khan a hre sual chhiava a. Curico kha thilpui nasa tak avang khan an lo la thlawh pel lo nasa mai a, Andes tlang khawchhak lam kilometre 89 laia hlaa ram pilril lutukah an awm mêk a ni si a. An awmna hmun hi Argentina ram chhung chin a la ni a, an zingah tumah helai hmun hre chiang rêng an awm lo. An awmna hmun aṭanga mihring chênna hnai ber chu khaw chhak lam kilometre 29-a hlaah hotel pakhat Hotel Termas Sosneado chauh chu a ni. Mahse, he hotel hi an rauhsan daih tawh lehnghal. An awmna ram hi an inhriat aiin a pilril daih zawk a ni. Inhre chiang ngat se zawng, beidawnnain a hmet chau nasa zual hle ngei ang.

                Thlawhna a tlâk tirh kar hnih thum chhung vel kha chu an awmna hmun aṭanga tal chhuak turin beih chu an lo bei ve ngei mai, mahse, an tlâkna lai vel hi a tlang a sân êm avang te, tuihal-a thih mai a hlauhawm avang te, vur tlêin mit a tihvaih vek avanga khua a hmuh hleih theih ṭhin loh avang te, zan lam boruak a vawh uchuak em avangtein bui lung tawk ang hlauhvin beidawngin an lo tâwpsan tawh a ni.

                Chutia beidawnga tâwpsan ngawt mai chu ni thei ngangin an hre lova. Tunah hian an ṭhiante sa an ei avangin an nungdam ṭawk ṭawk a ni a. Chutia ṭanpuitu zawnga an vahchhuah loh chuan eng tik niah emaw an ṭhiante sa pawh chu an ei zawh ni a lo la thleng ang a, an la thi vek tho tho dawn tih an hai bik lo. Tichuan, ro an rél ṭha leh a. Beng sika an ngaihtuah nawn leh hnuin an zinga a chak ṭha leh fel deuhte thlan chhuah a, chung mite chu eitur ṭha ṭha te, thawmhnaw lum ṭha ṭhate leh tlang lawnna atana hmanrua an neih theih ang angte fawmkhawm sakin tlang lawn tur chuan thawnchhuah an rel thlu ta a. Tlawng lawn chhuak nung dama an awm leh hram theih dân dap tura kal turin an rawn inpe ṭheuh mai, amaherawh chu Nando Parrado leh damdawi lam zir mi Roberto Canessa te, Numa Turcatti te leh Antonio Vizitin te chu an thlang chhuak ta a.

                An zinga damdawi zir mi mi thiam tak mai Canessa chuan khua a’n chuan a, chutia an kal nghal mai chuan thlasik a vanglai em mai a, an han dam khawchhuak lovang a, chawngthu lung chawi an sawi ang maiin an chhuak ûk si ang a, an tum an hlen leh thei tak tak si lovang tih a hlau a, kar sarih nghah leh rih a rawt a. Chumi hnuah chuan nipui a lo thaw ṭan ang a, boruak vawt lutuk pawh a lo ziaawm deuh tawh dawn a ni. Chuti zah zeta rei nghah a’n ngai leh ta chu hrehawm an ti tlang hle a, a ṭhente phei chuan Canessa ngaihdan chu pawm chi-ah an ngai meuh lova. Mahse, mihring taksain vawt a tawrh theih dân hre chiang bertu a ni lawi si a, an hnial ngam ta hlawm lova, a rawtna ang chuan kar sarih zet chu an nghak khawtlai leh ta rih a.

                tichuan, kar sarih, thla khat leh a chanve dawn chu an han nghak leh a. Hei hian chhanchhuah an nihna pawh nasa takin a titlai ta nghe nghe a ni. An ni leh thla bi nghah chu a lo kim hnu chuan chhanchhuahna zawngtu tùr atana an thlan chhuahte chu an lo tum lawk sa ang chuan khaw vawt vin tûk mai hnuaiah chuan an chhuak ta ṭham ṭham a. Sawi tawh ang khan an awmna hi an hre dik lo sa hrim hrim a, Curico thlawh pêl daih tawhah an inngaih avang khan Chile ramah awm tawhah an indah nghet thlap a. Chu an ngaihtuahna tlawhchhan chuan khaw tlang lam hawi zawngin an kal ṭan a, mahse, tlang sang tak a lo inkhawh zur tak si avangin chu tlang inkhawna lam hawi zawng chuan khaw chhak hawizawngin an kal lo thei ta lova. An kal tui deuh hnuah kir leh theihna lai a awm an beisei tho a. Chutia an kal an kal hnu chuan an thlawhna mei lam pang bung chu an vanneiha siamin an hmu hlauh mai a. A chhungah chuan Suitcase te, meizial te, chithlum lam chi te, puan te leh Comics bute a lo awm hlauh a. Chumi bula riahbûk sual a, a tûka khaw chhak hawizawnga kal leh chu an rel a. Mahse, chumi zan chuan a lo vawt rapthlâk êm êm a, vawtin a hmet hlum vek lo chauh ta mai a. A tûk zing chuan chu thlawhna mei lama thlawhna battery chu thlawhna taka radio tihnun theih beiseiin zawn haw an tum a. Mahse, a lo khin êm êm mai si a, tinngaihna a awm lo.

                An tum an thlâk leh a. An ṭhiante awmna lamah an kir leh a, radio chu an va la a, battery awmna hmunah chuan a nung thei dah law maw tiin an bei ta tlauh tlauh a. An zingah chuan Roy Harley-a radio lama tui ve tak mai a lo awm hlauh a, chumi thiamna hmang chuan an han bei ngial ṭhin a. Mahse, awmzia a awm lo, an radio chu a nung thei tlat lo. An zinga mi tumahin an hriat loh chu radio khan Alternate current (AC) an tih ang hi a hmang a, battery lam chu Direct Current (DC) a ni thung si a, a inham ṭawng lo a ni ber e. Ni eng emaw zah an beih hnu pawh chuan a nung thei hlawl si lova, thin rim tak, lung chhe tak leh beidawng tak chung chuan an thil tum chu an bansan lo thei ta lova. Beidawng let derin an awm leh ta rih a ni. Tichuan, radio-a an beiseina êng zawng zawng chu thla mang zan ang maiin a lo thim ta a. Chuti a lo nih tak siah chuan an ṭhiante awmna lamah chuan an va let leh lo thei ta lova. Damkhawchhuah an duh a nih si chuan an chhak tlang sang tak chu an lawnchhuah tho tho a ngai dawn a ni tih an va sawi a.

Zan mutbu lum –

                Tláng pawh chu han lawn ta teh rêng pawh ni se, an hma hun chu ko namenin a ko chuang lo tho mai. Zan boruak a vawt lutuk. An thi tho tho mai thei a ni. Chu zan boruak vawt namen lo tak chu eng tin nge an tuar chhuah theih ang? Chutah tak chuan zan mut bu sleeping bag siam an ngaihtuah chhuak ta a. Thufingin ‘neccesity is the mother of invention’ (mamawhna hi thil hmuhchhuah theihna tur atana nu tluka ṭangkai a ni) a lo tih hi a dik takzet mai.  https://ekhai.com

                An awmna hmu pangngai pawh zopa tán phei chuan tawrh zawh rual loh khawpa vawt a nih tawh teh rêng nen, an chhak tlanga han lawn san meuh phei chu a vawt namai lo êm êm a. Chu lai hmun vawt êm êma an kal huna an dam khawchhuah dàn tur chu an ngaihtuah a ngai ta a ni. Ni a tlâk chiah aṭangin a rawn vawt vin nghal vawr vawr a, zan a rei tial tial a, a let eng emaw zahin a rawn vawt zual ṭhin a ni. An khawngaihthlâk teh asin.

                Thlawhna mei lam an hmuh chhuahah khan chhung lamah boruak vawt lutuk tùr dal tura an dah puan hmul a awm tih an hre chhuak a. Chu chu ṭhuikhawmin zan mut puan ip (sleeping bag) atan a siam theih an ring a. Tichuan, chung puan hmulte chu an thuah a, an ṭhui khawm ta a. An zinga mi Carlitos-a chu a naupan laiin a nuin hriau hmanga puan ṭhui dàn a lo zirtir hlauh mai a, chu mai piah lamah an vanneihna siamin a nu thil inhnawih ṭhin bawmah chuan hriau an hmu hlauh bawk nen, chumi hmang chuan an ṭhui ta a. Carlitos-a chuan midang pawh chu a ṭhui dan a zirtir a, an inṭhui chhâwk ta tlauh tlauh mai a. Fito-a phei chuan a ṭhui chak khawp mai lehnghal a. Tichuan, a tàwp a tàwpah chuan zana mi pathum inthawlh lenna khawp tura lian, zan mut puan ip chu an puitlin thei ta a. Hma an sawn tak avang chuan an lawm hle a. Mahse, an hmabâk erawh a la turu hle mai. Vanduaithlâk takin a zan mut puan ip an ṭhui zawh hnu lawk hian Numa Turcatti chuan a hliam tuar khaw chhuak zo lovin a peih lo san leh ta tlat mai a, pakhatin an kiam leh ta.

                December ni 12, 1972 ni a lo inher chhuak a, an tlâk aṭanga a thla hnihna vel a ni ta. Chumi ni tak chuan Parrado leh a ṭhiante pahnih Canessa leh Vizitin te chu an zan mut p uan ip keng chuan tlang lawn chu an ṭan ta a. Parrado chuan hma a hruai a, a kal chak deuh a ni ang, Oxygen tlém bawk si nen a ṭhiante chuan muang deuh turin an hrilh chhen mai a. Ani zawng pa tum ruh, pa sehhel a ni bawk a, chak pawh a la chak pur pur khawp mai. Tichuan, tlai a lo ni a, zan a lo thlen chuan an zan mut puan ipah chuan an inthawlh lut ta dial a, vawt hle mah se an taksa lumna ṭheuhte inchhim tawnin hrehawm lutuk lovin zan chu an tleitlâk thei ta a.

                Tichuan, an theihna zawng zawng leh an chakna zawng zawng chu beiseina chhin an al a, hma an sawn hret hret zel a. An chhuah ni aṭanga a ni thum ni chuan tlang chu an lawn chhuak ta hlawl mai le. Parrado chu tlang lawnchhuak hmasa ber a ni. An tum a va ruh kher em. Mahse, tlang lawn chhuah mai chu a lo ni aw zawng lo. Chuta ṭang chuan beiseina nen tlang letliamah chuan ṭanpuitu tur an awm hlauh dah law maw tiin an la vakthla leh dawn a ni. Tlang chhip aṭang chuan an zuk thlir a, an hmuh theih chin zawng zawng chu tlang hlir tlang hlir a la ni mai a. Tuna an zawmna tlang hi Argentina leh Chile inrina hmuna awm niin metre 4,650 zeta sang a ni a. An awmna aṭang hian Chile ram phai zawl chu kilometre sawm zeta hla a la ni. Pa ro thap leh tum ruh Parrado chuan a’n thlir vang vang a, hla taka ‘Y’ ang deuha ram inkhawh kak hi a va hmu vau vau a, chumi piah chu tlang tâwpna a nih tawh a ring a. Tichuan beiseina sáng tak nen chu lai chu pan a rawt leh ta a.

                A hmaa an lo chhût ai daihin chu tlanga lawn chu a hau tak a, an eitur (an ṭhiante sa) an ken chuan a daih dawn awzawng ta lo mai a. Kal zel tur an la nih avangin an ṭhianpa Vizitin chu zuk let leh a, eitur zuk lak belh turin an tir leh ta ngawt a. Ni thum lai an lawnna tlang ni mah se, chhuk zawng chuan darkar khat chhung lekin a thlen theih thung a ni. Hei hian an tlang lawn chhohna hautak zia leh khirh khanzia a tilang chiang hle a ni.

Beidawng lova beituten puitu hmel an hmu ta –

                Vizitin-a’n an eitur a zuk lak beih hnu chuan Parrado leh Canessa chuan an zin kawng chu an zawh chhunzawm leh ta a. Ni eng emaw zah thi leh thau pawlhin an kal leh ta ṭauh ṭauh a. An dam khaw chhuah theihna tur kawng awmchhun a nih miau avangin an peih emaw peih lo emaw, thih an duh a nih nghal loh chuan hma lam pana an kal zel mai a ngai a. Mihring chênna lam hnai nia an rinna lam pangah chuan an kal an kal ringawt mai a ni. An chauh tawh bâkah a ram hi a chhengchhe êm êm a, an kal chak thei hlawl lova. Mahse, an hnung tawlh lo.

                Chutia an kal an kal takah chuan tlang aṭanga an va thlir vang vang ‘Y’ pianzia ang deuha leilung pianzia awm chu an va pawh ta hlawl mai a. Chu lai chu ruam zau lo te hi a lo ni a. Chutah chuan lui hi a lo awm a, chu lui chu an zawh ta char char a. An kal thui deuh chuan mihring sulhnu an hmu ta, an lawm kher asin! tu emaw riahna ni awm tak bûk an hmu a, an kal zel a, a ni kua-naah meuh phei chuan bawng ṭhenkhat an hmu ta. Beiseiawm eng mah a awm loh hnu pawhin an beiseina chuan a tâwp a tâwpah ni êng mawi tak a rawn chhuahsak dawn ngei niin an hria a, an hlim dun kher mai. Bawng an hmuh tlai chuan hmun pakhatah hian an chawl a, Canessa phei chu kal lehzel tur pawh a awm tawh lo, a chau lutuk hi a ngau kahthlâk mut thlawp tawh ringawt mai a, a âwm hlê a ni.

                Intih lum nan leh an sa neihte rawhna atan mei chhem an tum a. Parrado chuan thing a fawm khawm vel a, chutih mêk lai chuan Canessa chuan lui ral leh lamah hian sakawr chunga mihring chuan ni awm tak hi a va hmu zauh mai a. Parrado chu a au ta chul a. An pahnih chuan an thlir reng a, an lo kal hnai zel a, an hmuh chian theih deuh hnu chuan sakawr chunga mi pathum chuang mêk hi an lo ni zâwk a. Chûng mite chu Parrado-te ṭhian dun chuan va auvin ṭanpui an ngaihzia thu an va hrilh sa teh naa lui luang ri bengchheng tak avang chuan an ṭawng an hre hlei thei tlat lo mai a.

                Chutia an thusawi an hriat theih si loh avang chuan sakawr chunga chuang zinga pakhat, a hming Sergio Catalan chuan ‘naktukah’ tiin a rawn au ta ringawt a. Chu thumal ringawt pawh chu anni ṭhian dûn leh hla taka an ṭhiante, anmahni lo nghâk chawtte tan chuan khawvela thu hlu ber leh hriat nuam ber a ni. Tunah chuan khawvel hrang daiha awmte dinhmuna ding tawh kha khawvel nen an inzawm leh ta. Tu khaw kha ina an hriat loh, arte thiha thi boral mai mai tura inngai tawhte khan beiseina nung tak an nei thar leh ta a, a tukah an tan chhandamna a lo thleng dawn ta. Lawm tak leh hlim takin chumi zan chuan riah buk an sual a. An helhhawlh dun hle a ni.

                Catalan-a a va haw chuan an zanriah kilho laiin a hmaa a ṭhiante nena an thil hmuh leh hriat chu midang hnenah chuan a sawi chhuak ta a. Nipui chawlh buk Los Maites an tih hmunah mi an awm a ni tih thu chu a sawi a ni. Lui luang ri avang khan eng thu hla mah an inhrilh hre hlei thei lo kha a ni a, chuvangin tute nge an nih a, eng harsatna nge an tawh tih pawh chiangkuang takin a hre rih lo a ni. Chutia Catalan-a’n mi a hmuh thu a sawi chuan an zinga pakhat chuan kar eng emaw zah liam ta khan Carlos Paes-a pain Andes tlanga thlawhna chesual chanchin hria an awm mial em tih hriat tumin mi a zawt kual chiam a ni tih thu a sawichhuak ve a. Mahse, Andes tlanga thlawhna tlate kha chu a rei tawh em a, thla hnih a liam veng vawng tawh a, chuvangin chu thlawhna tlaa dam khawchhuakte an nih theih an ring lo vek a. A ni bawk reng a, thla thum dawn a ni tawh a, thil mak ropui tak a thleng a nih ngawt loh chuan chung lai hmun vawt uchuak lutuk tak mai lehnghalah dam khawchhuak an awm thei a rinawm tawh lo reng reng a ni.

Ṭanpuitu hmel duhawm tak chu –

                A tûk a lo inherchhuah leh chuan Catalan chuan a hma nia ṭanpui ngai nia a hriat mi pahnihte awmna lam, tuipui rala mite chu a va pan leh ta a. An ril a ṭam takin tiin chhangpèr ṭhenkhat a keng tel bawk a. A hmun a va thlen chuan chu mite pahnih chu an lo la awm a, anni chuan amah chu an lo hmuh chuan ṭanpui ngai an nihzai lantir nan an ṭhingṭhi a, an kut an lo dawh a. Tichuan, Catalan-a chuan a chhang kente chu lui luang ri huau huau chungah chuan a va vawm vak a, a va vawm kai thei hram a. Chhang chu anni chuan an lo la a, rilṭam tih hriat tak hian an chinghne koham ei ta bawrh bawrh mai a.

                Eng nge sawi duh an neih tih a hriat theih nan lungah hian pen leh ziak loh puan them a phuar bet a, chu chu a va vawm kai leh a. Chu lehkha-ah chuan Parrado chuan thlawhna tlaa damkhaw chhuakte an nih thu leh ṭanpui an ngaihzia thu a ziak a, a vawm let leh ta a. A thuziah a lo chhiar chuan a hrethiam a ni tih a chetziain Catalan-a chuan a lo tilang a. Tichuan, anmahni ṭanpui theih dan tur ngaihtuah tur chuan Catalan-a chu a sakawr chungah a chuang a, thlang lam hawi zawngin a inkhalh chhuak ta vang vang a. Chutia ṭanpuitu zawnga a kal lai chuan Rio Azufre chhim lam pangah sakawr chung chuang dang a hmu hlauh a, chumite chu ṭanpui ngai a hmuh dante a hrilh a, va ṭanpui a, Los Maitenes hmuna hruai turin a ti ta a.

                Amah Catalan-a erawh chu lui kamah chuan a chhuk zel a, Rio Tinguiririca nena a inpawhna hmun thleng a kal a, tah chuan lei a awm a. Chu lei chu a zawh a, chumi hnuah Puente Negro khuaah a lut leh a, chumi hnuah intih thawvenna hmun atana an siam hrim hrim Termas del Flaco hmun chu a thleng leh a. Chutah chuan motor Truck a hmu a, tah chuan a chuang a, Puente Negro police Station ah a va lut a, thil awmzia engkim chu a hrilh ta vek a. Chulai Police Station duty te chuan San Fernando Army Command lam an lo hrilh chhawng ve leh a. Chutih lai vel chuan Catalan-a’n Parrado-a te ṭhian dun lo va ṭanpui tura a tihte khan an lo va pawh a, Los Maintenes hmun an lo thlenpui der tawh a, chutah chuan eitur tui ṭha ṭha an lo hlui a, an lo chawl hahdam diai diai tawh nghe nghe a ni.

Chhanchhuahna ropui.

                Chumi tûk zing chuan thlawhna tlaa la dam khawchhuakte chhanchhuak turin Santiago aṭang chuan helicopter an tir liam ta a. San Fernando hmunah an chawl zawk a, tichuan ding takin thlawhna tlâkna hmun chu an pan nghal a. Nando Parrado chu an tlâkna hmun tak hrilh hretu atan helicopter-ah chuan an phur tel ve a. Chutih lai vel chuan “October ni 13, 1972 ni-a Andes tlanga thlawhna tlaah khan mi nung dam an la awm,” tih thu thang chu zêp rual lohvin a lo darh a, chanchinbu lian tak takah te chuan an lo ṭial chuai chuai ta mai a. Chanchinbu leh chanchinthar thehdarhna kawnga thawktu mi eng emaw zatte chu Puente Negro khuaah leh Termas del Flaco hmunah chuan an rawn lut khawm ta tuau tuau hman der tawh a. Chhanchhuah leh an nih theihna tur atana a hnar kaitu ber Parrado leh Canessa-te chu thil chinchang zawh chian tumin chu lai hmun chu an pan hum hum mai a ni.

                Chutia chhanchhuahna an kalpui dawn mêk lai chuan thlawhna tlâkna hmuna beisei êm êm a lo nghâktu an ṭhiante chuan radio-ah Parrado leh Canessa ten ṭanpuitu zawnga an vak chhuak chu an hlawhtling a, chhanchhuahna an kalpui dawn ta a ni tih thu an han ngaithla mai chu, an va hlim teh lul em!! Thihna ata nunaa lut tak meuh meuh an ni bawk a, an hlim dan turzia chu tu tan mah suangtuahpui thiam rual loh a ni ngei ang le.

                December ni 22, 1972 chawhnu herah chuan chhandamna helicopter thawm an hre ta. Lawma hlimin an au a, an zuang tawr tawr a, a chang leh an inchibai thul. An hlim tak meuh meuh a ni. Helicopter pahnih tirh an ni nain hemi ni hian khua a chhe êm êm a, pakhat chauhin a hmun hi a thleng thei a. Mi 6 chauh hemi ṭum hi chuan an lachhuak thei rih a. A tuk chhun lai velah an thiar chhuah bâng 8 te chu an va thiar chhuak leh ta a, tichuan a hmun nghâk mi 14 te chu an zavaiin him takin an chhan chhuak thei ta a ni. An zavai mai chuan Santiago hospital-ah an phur lut vek a, chutah chuan duat takin doctor thiam tak takten an enkawl a. Tui an in loh rei tawh avangin tui tlâkchham avanga harsatna te an nei vek a, vur seh (frostbite) te an nei a, a ṭhente chu an ruh a tliak a, chung zawng zawng chu duat takin an enkawl damsak ta hlawm a ni.

                Tichuan, he thlawhna chesualah hian thlawhnaa hnathawk 5 leh passanger 40, an vaiin 45 an chuang a. A tir phatah mi 7 an bo a, a hnuah 5 an thi leh a, tichuan 33 chauh an ni ta a. October ni 21-ah mi 5 an thi leh a, 27 an la dam a, November ni 15-ah vur tawlh avangin mi 8 an thi leh a, 19 chauh an ni ta a. A hnu lawkah pakhat a thi leh a, 18 chauh an ni ta. Chumi hnu lawk December ni 16-ah mi pahnih an thi leh a, 16 chauh an ni ta. Heng mite hi ni 72 hnuah chhanchhuah kim an ni ta a ni.

                Beiseina rêng rêng a awm tawh lohna hmun, vur leh tláng lianpui puiin a daidanna hmun, chhiatna ata chhiat lehzualna an tawh nawn awn awnna hmun, hun thim leh dinhmun rapthlâk tak mai karah chuan mi tumruh, beidawng ve duh rêng rêng lo Parrado leh Canessa te an lo tel ve reng mai. Anni pahnih hi awm lo se chuan an hmabak chu khawvel mihring dangte hriat loha arte thih bâk hmabâk an nei lo rêng rêng a ni. An ṭhiante ruang pawh ei mah se, an ei zawh hun a thleng dawn tho tho a, an thih vek hun a la thleng dawn tho tho a ni.

                Chutih laiin anni pahnih hian beise tur rêng rêng a awm tawh loh hnu pawhin dam khawchhuahna a awm hlauh takin tiin an dinhmun khirhkhan êm êm lak ata tal chhuah dân an ngaihtuah a, a takin an che chhuak bawk a. Vurin a khuh var vo mai tlangah chaw ṭha pawh ei bik lovin vawt ti chung chungin an kal ṭauh ṭauh a. Ni tam an kal hnuin a tàwp atâwpah an beiseina mei de set set, thi lek lek tawh chu ropui taka tih ênin a lo awm ta a, anni pahnih bâkah an ṭhiante mi 14 lai mai nunna chhanhim a lo ni ta a ni. Anni pahnih tum ruhna hi khawvelin a ngaisang a, a zah a, an chanchin hi a hria apiangin an sawi luai luai a, a hun lai ngat phei kha chuan khawvel titi a tling phâk hial a ni.

Eng lehkhabu aṭanga lâkchhuah nge tih kan hre chhuak zo ta lo. Hriat chhuah theih hunah a ziaktu leh a lehkhabu hming kha kan dah tel mai dawn nia.