MI LIAN MIT PAKHAT NEI (CYCLOP)

762

                                MI LIAN MIT PAKHAT NEI (CYCLOP)

                Hman lai Grik-ho thawnthu ah chuan, mi lian pui pui, hmul der dur, mit lian pui pakhat nei an awm thu hi an sawi a. Thliarkár khawi emaw lai pûk chhûngah an chêng a, beram an vulh ṭhin a, chu chu an chawpui ber a ni.

                Grik mi huaisen leh pasalṭha, Odysseus-a chu Trojan indona ropui tak do zovin a hote nen an lo kir leh a. An chuanna lawng chu thlipuiin khawilai thliarkar emaw ah hian a lèn lût a. Chu thliarkar chu Cyclop-ho mi hlauhawm pui pui chênna a ni tih hre lovin Odysseus-a leh a hote chuan an fang vel a. Pûk pakhat hi an hmu a, a chhúngah chuan ei tur chaw a lo awm ṭeuh mai a. Chu pûk chu Cyclop-ho zinga a lian leh kawlhsen ber Polyphemus chênna a lo ni leh nghal a. Tlaiah chuan mi lianpa chu a beramte khalhin a rawn haw a, pûk chhúng a luh hnuah pûk kawngka chu chhung lamah lung lian puiin a khâr phui ta khup mai a.

                Tlan chhuak thei tawh hek lo. Tih ngaihna dang a awm si lo. Chu mi lianpa hnenah chuan Odysseus-a chu a inhriattir ta ngawt a. Kum sàwm chhúng zet Trojan indonaah an awm a, thi lova ruangin an lo haw a nih thu leh, ei tur chaw ṭha pawh hmu zo lova thi lek leka an awm thu te sawiin, ei tur leh riahna tur a han dil a. Mahse mi lianpa chuan eng khaw sawi set set lovin Odysseus-a hote zínga mi pahnih chu a man lawk a, pûk bang vawm nan a hmang ta mai a. Chu chu duh tâwk lovin a pawtsawm a, a ei zo ta vek mai a. Thleng dar lianpui a bawnghnute lo tling luau chu kamṭhuah fai nan a hmang a, a muhil ta burh burh mai a.

                Chu thil râpthlâk tak mai chu an hmuhin Odysseus-a leh a hote chu hlauvin an khur a. Tlan chhuah han tum dawn se, lungpui chu lum sawn rual loh khawpa lian leh rit a ni si a.

                A tûk khua a lo var a, mi lianpa chuan Odysseus-a hote zinga pahnih chu tukṭhuan atan a han hmang leh a. A ei zawhah a beramte hruaiin a kal chhuak leh ta daih a.    https://ekhai.com

                Milianpa kal bo hlan chuan mi lianpa tiang hmawr chu an zum a, meiah an rawh chang a, buhpáwl zingah an thukrû a.

                Tlaiah chuan mi lianpa chu a beramte nen an lo haw leh a. A hmaa a tih dan ang bawkin Odysseus-a hote zinga pahnih chu zanriah atan a hmang leh pek a. Chumi zawhah belpui chhunga zú chu a in ṭeuh va, a muhil ta a. Pûk chhúng nghawr nghing dur dur khawpin a hnar ri ta burh burh a.

                Chumi hun remchang chu chuin Odysseus-a leh a hote chuan an thing suih zum chuan mi lianpa mitah an chhun ta vak mai a. A na tuar chu a lo zuang tho va, mahse a mit a del tawh a vangin tumah a hmu thei tawh lo va.

                A tuk zinga a beramte hruaia a chhuah leh lai chuan Odysseus-a leh a hote chu beram pum hmulah an uai táng fara, mi lianpa man theih lohvin pûk aṭang chuan an chhuak thei ta a ni. Tuifinriat kamah an tlan thla vat a, an lawngah an chuang a, mi lianpa beramte chu an theih ang tâwk an man sak a, an inkar chhuak ta a. Chu chu Cyclop dangten an rawn hmu a, lung lian pui puiin an rawn vawm a. Vanneih thlâk takin an him thei hrâm a, an haw kawng pangngai zawhin an kal ta zel a ni.