MAHNI PASAL HÂL HLUM DUHTU HMEICHHIATE

76

MAHNI PASAL HÂL HLUM DUHTU HMEICHHIATE

                Hmeichhiain a pasal tihhlum a duh nachhan tûr hi chi hnihin han ṭhen ta ila. Pakhatna chu, a pasal chu mi hausa tak a ni a, a hmangaih vâng pawh ni lovin, sum tam tak a rochun dawn avângin a nei a. Chu sum chu a duh luatah leh a pasal chu thi daih mahse pawi tihna a neih loh avângin tual a thah phah hial thei. Pahnihnaah chuan, a pasal chuan ngaihzawng dang a nei emaw, rilru leh taksa thlenga mi rikrâp ching leh kutthlâk ching mi a ni a, a nupui chuan a ning hle a, kawng dang awm thlâwta a hriat loh avângin a pasal chu dah ṭhat mai a hreh lo thei bawk.

                A enga pawh chu ni se, hmeichhiate hian mipa te ang bawkin, pawi khawih duh nachhan tam tak an nei ve a, a ṭhen chu a àwm viau te pawh a ni mahna le.. Mahse, ṭhenkhat erawh hriatthiam harsa tak leh fair lo takte pawh a awm ve bawk.

  1. Tihpalh vânga kângmei tichhuaktu Michelle Houcks-i : Jackson County, Missouri-a chêng Michelle leh Darnin Houcks te nupa chuan kum 1995 tàwp lam khan in ṭhen zai an rél a. He an thil tum hi an tan chuan thil ṭha tak a ni. A chhan chu, an tibuai reng a, ni hnih khat lekah inthat duh hial khawpin an intithinrim zêl ringawt mai a ni. Pi Houcks-i zâwk chuan a pasal chu a chhuahsan ta a. A chhuahsan hnu hian a bungraw ṭhenkhatte lâk tumin August 28 zan chuan a pasal hlui inah chuan a va kal leh a. Mahse, a pasal hlui kiangah chuan nula dang a hmu tlat mai. Pi Houcks-i chu a thinrim hle a, hemi ṭum hian a pasal chu kutthlâk tum lehin, a kut lehlam lehlama screwdriver leh bakcheh kengin a bei a, mnahse, a pasal hi lo inveng hmanin, a hmanraw ken chu a chhuhsak thei hlauh a ni.

                A tûk tlaiah chuan Pi Houcks-i chu a pasal hlui inah chuan a kal nawn leh a, a pasal hlui lo haw hun nghakin chokaah chuan a lo insehruh nasa mai a ni. A pasal chu a lo haw ta ngei a, khawnvartui bur nêna lo chângin, chokaa a lo luh veleh a lo theh huh nghal vek a. A pasal hlui pawh chu lo invên tumin, Pi houcks-i’n a kuta lighter a ken chu lâksak a tum ve nghal bawk a ni. Mahse, a ti alh hman ta hlauh mai.

                Court-a a sawi leh danin, lighter chu a hmet alh ‘palh’ a ni awm e. Pu Houcks-a chu a kàng ta hluah hluah mai a, a taksa hmun zâtve vêl zet chu a kàng ta a ni. He thil avâng hian Pi houcks-i chu midang kutthlâk case lian ber awrhtir niin man a ni zui ta bawk a ni.

                Court-a an inkhin laia thuchhuah pakhat an sawi dan chuan, chutia a pasal a hàl lai chuan, a pasal chuan, ‘Engvângin nge hetiang hi ka chungah i tih?!’ a ti a ni awm e. Pi Houcks-i chuan a niin a neih theih loh chuan tumahin an nei bik lovang tiin a chhang bawk a ni.

  1. Pastor nupui, Mary Attah : Jully 2012 khan Mary Attah leh a pasal chuan Effurun, Nigeria-a an chênna inah zan tir hun hmang dûnin, khumah hlim takin an khawsa a. Mahse, chutianga nuam leh hlim taka hun an hman lai chuan a pasal phone chu a lo ri ta rang rang mai. Chu chuan an rilru ngaihtuahna chu a la péng zo ta.

                A lan danin, Pu Attah-a chu pastor ni mahse, a rûka midang kawp ching mi a lo ni àwm e. Hetia an nupaa hun an hman dun laia lo phone-tu pawh chu a ngaihzawng chu a lo ni a. Pi Mary-i chu a thinrim a sosáng ta thut mai (A pasal rinawm loh chungchang chu a hre sa reng  ni mai thei.) Chokaah a va tlân a, eirawng bâwlna hmanraw chi hnih, hmarcha dip leh chemte a va chuh nghal vat a. A pasal hmaiah chuan hmarcha dip chu thehin, chutia mit thîp manganga a awm chu a pasal hrawkah chuan a zai sak ta hmiah mai. Chu mai chu a duh tâwk lo, a pasal chu a thih ngei ngei theih nân a hâl zui ta bawk a ni. https://ekhai.com

                Hetia a pasal rinawm loh vânga râwng taka chêt a lâk avâng hian Pi Mary chu thiam loh chantir a ni a, thi tura a chungthu rêl a ni ta a ni. Amah thiam loh chantirtu Justice E.I Oritsejafor-a chuan, ‘Thiam loh chantir i ni a, khai hlum tûr i ni ang. Lalpan i thlarau chungah zah ngai tûrin ka duhsak a che,’ tiin thu a ti tâwp a ni.

  1. Margareth Rudin, the Black Widow Killer an ti mai chu kum 1997 khan a multimillionaire pasal, Ron-a thattua puh niin man a ni.

                Ron-a hi December 1994 khan a bo ṭan a. Thla khat liam hnuah a ruang kâng chhe tak mai chu motor pakhat hnungah a lo inhnawh a. A taksa péng ṭhenkhatte chu an kim lo va, a lu ruh pawh a ruang an chharna bul luiah hmuh chhuah a ni.

                Margaret-i chuan Ron-a hausakna 60% chu a rochun thei dawn a, chumi avâng chuan Ron-a thih thu-ah mipuite chuan an ringhlel nghal hlawm hle a. Mahse, thuneitute lam chuan finfiahna leh lamṭang ṭha tâwk tak an neih si loh avângin an man mai thei si lo. Mahse, kum 1996 khan mi pakhat tui chhúng lûtin Ron-a pistol bo chu tuipui chhuatah a chhar ta hlauh mai a, a hmawrah silencer a lo invuah bawk a ni.

                Chu an thil hmuhchhuah hmang chuan Court lam chuan Pi Margaret-i chu an puh thlu thei ta a. Mahse, a lo tlân bo hman daih tawh a. Kum 2 leh a chanve an zawn hnuin a awmna an chhui chhuak thei hrâm a, Massachusetts-ah kâng ṭhelhtu pa pakhat nên an lo chêng dûn a ni.

                Kum 2001 khan thiam loh chantir a ni thei ta chauh va, tûnah chuan North Las Vegas-a tàn inah a táng mêk a, thualthata puh a nihnaah hian thiam lohna a neih loh thu a la sawi char char a, tûn thlengin pawi khawihtu a nih loh thu a la sawi reng bawk.

  1. Tatanysha Hedman leh a pasal lâktlâk loh : Tatanysha-i’n a pasal chunga a thil tih mipuiin an hriat meuh chuan, misual, a phu tâwk hremna hmu thanin a thang nghal char char mai. Heta sualna inrawlh chu naupang khuakhem a ni a, chumi zawh khâwk chu, a nupui ngeiin a pasal chu a hâl ta hluah hluah mai a ni.

                He thil hi July 17, 2014-a Vencent Philips-a chunga  a thleng nia sawi a ni. Mipa sual tak niin zu in a ching a, a nupui fanu bîk, kum 7 mi lek, a fahrawn ni bawk chu a khuaikhem ṭhin a. He thil thleng hi Hedman-in a hriat chhuah meuh chuan, pathian thinurna meipui chu amah ngeiin a lek kawh ta a ni. A pasal muthilh laiin a lu leh awm velah khawnvârtuiin a leih a, a hâl alh ta hluah mai a ni.

                Philips-a a han harh meuh chuan hremhmuna tla ang maiin a lo alh luah hluah a, in aṭanga tlân chhuak nghalin, a nupui motor chhungah chuan a lût a, dawr hnai ber thleng a khalh chhuak nghe nghe a ni. Hetih lai hian a lu chu ala alh hluah hluah reng a. Chulai dawra lo awmte hnênah chuan ṭanpui dilin, a hnu lawkah nikhaw hre lovin a tlu ta a ni.

                Hedman-in a pasal chunga thil tih dan hi a hnua a sawi leh danin, ‘Silai-a kah chu a tan chuan a nuam mah mah a, a phu lo a ni,’ a ti. Chu chu kan pawmpui hlawm pawhin a rinawm. An chanchin hi a darh hnu chuan, Philips-a hi a tuartu leh thina kotlanga ding ni mahse, naupang khawih chhiat thubuai hmangin thiam loh a chang thei a, a nupui pawh hi midang khawih nat leh kâng thei thil hman khawloh thubuai siamsak a ni ve bawk. A nupui fanu a khawih chhiat avângin a dam chian hunah tàn in lam a pan a ngaih hmel khawp mai.

  1. Rajini Narayan, a pasal kap hâltu : December, 2008 khan Adelaide, Australia-a nu pakhat chuan a pasal serh a hàl avângin media lamah a lâr hluai mai a. Satish Narayan, hàl tuartu hian a rûkin ngaihzawng a lo nei a, a nupuiin a hriat chhuah chuan a ngaihdan a ni lo khawp mai. A thîkthu vàng leh thil dik a ni lo tih chu a taka entir a, hremna pêk chu a tum ta rân a ni ngei ang le.

                Hremna pêk a tum dàn erawh hmeichhe satliah anga ân khum leh ṭhen emaw lam a ni hauh lo, spirit leh nawhalh hmangin a inthuam rup zâwk a. Tichuan, kum 24 lai a lo awmpui tawh a pasal, Navy engineer Satish-a mihil lai chu a kap zâwnah nawhalh a vawm thla ta hmiah mai. Spirit-a a leih hmasak avângin a alh ta nghal hluai a, Satish-a tán chuan harh loh chi rual a ni lo. A hamhaih leh phu nasa lutuk chuan a bul maia spirit um chu a vai baw palh leh ta hlauh mai. An in chu a pumin a kàng titih ta mai a ni. https://ekhai.com

                Rajini-i chu a thiltih avâng chuan a inchhir leh hnuhnawh a, a pasal kàng alh hluah hluah chu ṭanpui tumin chêt a la leh nghal vat a ni. A hnua a sawi leh danin, a pasal chu engtinmah tihnat tehchiam a tum lo va, a serh chu hàl sak zauh a tum satliah mai niin a sawi a ni àwm e. Mahse, a thiltih chu a fuh lo khawp mai. A pasal chu ni 20 hnuah damdawi inah a thi zui ta a ni. A tan chuan Krismas hriat reng tlâk tak a nih phah ta ngei ang le.

Thinlung zawng zawng hian ná an pâi vek a, mi â deuh chuan an tilang a, mifingte erawh chuan an nui hmel hmangin an thup hrâm hrâm ṭhin. – ?

Thu lâkna: D Zun