KRISTIAN MARTAR TE

369

KRISTIAN MARTAR TE

                Mi pakhat Galerius-a an tih chuan Kristian te chu a haw hle a, a man khâwm a, nasa takin a sawisa ṭhin. Chu mai chu duh tâwk lovin, hâl hlum tûrin an chungthu a rêl ṭhin bawk. A hâl hlum dan te pawh hi a hrehawm thei ang ber tûrin a duang a tih theih àwm e.

                Kristiante chu banah a ṭáwn bet a, an ke hnuaiah mei nasa vak lovin a ti alh a, chu chuan an ke phah vun leh tihrâwlte chu muangchangin a hem hmin a, an ruh aṭanga a tlâk hlawk thlengin a hliau tir ṭhin. Mei ling te chu an taksa hmun hrang hrangah a chep bet a, nâ an tawrh avânga nikhaw hre lova an awm vat loh nân tui vâwtin an hmaiah an theh huh deuh reng bawk a, an dang ro lutuk tûr vèn nân tui tlem tlem an tulh reng ṭhin bawk. Chutiang chuan, that nghal mai lovin, nileng tein a sawisa ṭhin a, an vun te chu a kàng sawr zo vêl vek tawh tihah meipuiah kàng ral tûrin a paih lût ta chauh ṭhin a ni.

💢 Julitta-i, Lycaonian hnam lal thlah chu Kristian nula niin, nula fel, rilru ṭha leh invawng tak mi a ni a, a awmna khuaah chuan lal thupêk angin, mi zawng zawngin milem pathian an be vek tûr a ni tih a ni ta tlat mai. Chutiang thuchhuak a awm tâk hnu chuan Julitta-i chu a rûkin khaw ṭhenawm lamah a kal ta daih a, a fapa la naupang tak leh a chhiahhlawh nula pahnihte nên an tlân chhia a ni. Mahse, man an ni ta hlauh mai a, martar dang zawng zawngte angin, tàn in nuam lo takah khung a ni a, nasa taka sawisak a ni zui bawk a ni. Mahse, chung a tawrhna leh an sawisakna te chu chhel taka tuarin, inlamlêt tumna rilru a neih phah lo va, a tuar tawp mai a ni.

                Governor hmaah hruai niin, Kristian a nih thu chu a puang a, inlamlêt a tum loh thu a sawi bawk. Chutianga a tih avâng chuan a fapa Cyricus-a chu lâksak a ni ta a, mahse, Cyricus-a chuan nasa takin a nu chu a ngèn chiam mai a, chu chuan Governor thinlung pawh a tihnèm phah deuh a ni ngei ang, naupang chu a kiangah hruaiin a mal chungah a pawm a, tih tlei dan tûr a ngaihtuah ta a. Mahse, Cyricus-a chuan a nu a auh chu a bansan chuang lo, a ṭap hawm hawm a, a nu ṭawngkam, ‘Kristian ka ni’ tih te pawh chu a sawi tel ve ta nuai a. Chutianga a ṭah hla an han hriat veleh Governor khawngaihna thinlung chu thinurnaah a inthlâk ta thut a, a naupang pawm lai chu dimna tel hauh lovin chhuat chárah a paih ta ṭhuai mai. Chu naupang chu a lu ruh a keh ta hial a, a thi zui ta a ni.

                Julitta-i chuan a fapa thih dan leh an tih dan vel chu a lo hmu ve vek a, mahse, thi tûr vek an ni tih a hriat vang nge, Pathian hnênah lawmthu a sawi ta zâwk hial a. A fapa hma hun tûr ngaihtuaha rilru hah taka a awm a ngai tawh lo va, a nun pawh Pathian tan lungawi taka a hlan theih tawh dawn vâng a ni.

                Julitta-i chu tél chhuan so hmangin a ke an lei kàng vek a, a nâk leh a kawng vun te chu thir kawm hmangin a pir thlêr neih nuaih bawk. Chumi hnuah A.D. 305, April ni 5 khan a lu an tan sak ta a ni.

💢 Nikodemia khua a mi pakhat, Pantaleon-a chu a naupan lai aṭangin a pain milem siam chawp pathian chanchinte hrilhin, ngaisang tûrin zirtirna a pe ṭhin a. A nu erawhin Isua chanchin a hrilh ṭhin thung. A lo tlangval hnu chuan damdawi lam zirna a tui chilh a, a thiam ta êm êm mai a. A hun laia an lal, Garelius-a hnuaiah a thiam thil te hmang ṭangkai tûrin hna ṭha tak a hmuh phah ta hial a ni.

                Chutianga duhsakna leh thiam thil bik riau a nei chu a damdawi zirpui, Kristian ni ve lem lote chuan an thîk a, an îtsîk ta tlat mai. Pantaleon-a chu pa ṭha tak, hmelṭha tak leh hawihawm tak a ni a, amah îtsîktute chuan Kristian sakhuana a zir ṭhin tih hriain, lal hnênah chuan an hék ta a ni.

                Lal Garelius-a’n Pantaleon-a chu Kristian a ni tih a hriat veleh a man tir nghal a, nasa takin a sawisak tir a, chumi hnuah a lu chu tan tûrin thu a pe zui ta a ni. Tichuan, July 27, A.D. 305 khan lal thu pêk angin a lu chu tan a lo ni ta.

                Hemi ni tho hian Pantaleon-a nêna inkungkaihna nghet tak nei putar pakhat, Hermolaus-a chu man ni vein, Pantaleon-a an tihhlum dan ang chiah hian tihhlum a ni ve bawk.

💢 Cappadocia lam mi, Juitta-i chu nula thiam thil ngah leh huaisen tak, dikna ngaihlu tak mi a ni a, a hun lai chuan a lâr ve hle a ni. Ramri chungchanga thubuai a neihpui, a ṭhenawm chuan. Kristian a nihna hmangin a hék ta a, Court hnênah thamna thil a pe bawk a ni. Kristian a nihna hmang chuan man a ni ta a, thuneitute chuan milem pathian hmaa a kùn chuan chhuah zalen a ni thei ang tiin a chungthu an rêl sak ta a. Mahse, a duh loh avângin, martar dang tam takte ang bawkin hàl hlum a ni ve leh ta a ni.

💢 Armenia-a an Governor Secretary ni lai, Eustratius-a pawh kha, Kristian ṭhenkhat, tàn in aṭanga a lo tlân chhuak tir ṭhin avângin meipuia paih a lo ni tawh bawk. Auxentius-a, Eugenius-a te leh an ṭhian dang pahnihte chu Kristian an nih avângin man an ni a, Nicoplis-ah hàl hlum an lo ni tawh bawk. An zinga pakhat erawh, sawisakna a tuar laiin a thi thung. Anmahni mantu leh sawisatu zinga mi, sipai General Orestes-a pawh Kristian a a inleh avângin buh her sawmna kháwl hmanga tihhlum a ni ve bawk.

💢 Syrian chhùl chhuak, sipaia ṭang lai, Kristian ni bawk chuan Amasia-a Cybele temple chu milem pathian biak nâna an hman ṭhin avângin a hàl a. Chu a thiltih avâng chuan man a ni a, khawlaiah tawlailir hmangin an hnûk hrep a, chumi hnuah an hàl hlum zui ta a ni.

💢 Cappadocia khua a hmeichhe pakhat Dorothea-i chu Kristian ṭha tak niin, Governor laichin hnai tak a ni a. Hetih hun lai hian Kristiante chu tihhlum tûra man an ni ṭhin. Chu hremna a pumpelh theih nán Governor chuan Dorothea-i chu milem be ṭhin hmeichhe pahnih te enkawlna hnuaiah a dah a, a rinna phatsan tûra thlêm tûra tih an ni. Mahse, Dorothea-i tumruhna huaisenna leh a rinna nasa tak an hmuh chuan, chung nula pahnihte chu Kristian ah an inlet ta hlauh zâwk a, tihhlum an nih phah ta a ni. A hnuah Dorothea-i pawh chu sawisak hrep niin, a lu tan sak a ni zui ve leh bawk.

💢 Phrygia ram a mi Pancratius-a chu Kristianah a inlet a. Chumi avâng chuan a patea’n Rome-ah hruaiin, thuneitute a man tir a, tihhlum a ni ve leh bawk. Cyrinus-a, Nazarius-a, Nabor-a leh Basilides-a te chu Kristian upa an ni hlawm a. An rinna avâng chuan man an ni a, thir hrui hmanga phuarhbeh, vuak leh kawng hrang hranga sawisak an nih phah a. Lung inah tàn tir an nih hnuin an lu tan sak an ni ve leh hlawm bawk.

💢 Roman military officer pahnih, Nicander-a leh Marcian-a te chu Kristian an nih avângin man an ni a. Sipai fing, huaisen leh tawn hriat nei ṭha tak an nih avângin thuneitute chuan nasa takin an rinna phat tir tumin hma an la nghe nghe a ni. Kawng hrang hranga thlèm an nih pawha an rinna an phatsan duh loh avângin, an lu chu tan sak tûra tih an nih phah ve ta a ni. Anni pahnih tihhlum an nih dawn hian mipui tam tak an pungkhâwm a, chung zingah chuan an nupui ve ve pawh an rawn tel ve a ni. Nicander-a nupui chu Kristian ve tho niin, a pasal chu huaisen taka a thil tawrh te tuar chhuak tûr leh hlen chhuak tûrin a fuih a, Marcian-a nupui erawh milem pathian betu a ni a, a pasal chu amah leh an fa sên vâng tala amah inchhanhim tûr leh Isua chu phatsan mai tûrin a thlèm a. Mahse, Marcian-a chuan a nupui thlèmna chu hnialin, milem pathiam biak chu bansan tûrin a ngèn lêt thung a ni. A nupui leh a fa sên chu lungchim taka pawmin a mangṭha a. Nacander-a pawhin a nupui chu kham lo taka kuahin a thlah ve bawk a. Tichuan, chulai hmunah chuan ropui taka kuahin a thlah ve bawk a. Tichuan, chulai hmunah chuan ropui taka vana lawm luh an nih theih nân, Martar chan changin, an lu chu tan sak an ni ta a ni. Heng mite bâkah hian hmanlai hunah khan Kristian tam takte chu tihduhdah leh thah tuar an awm a. A tam zâwk hming erawh thuziaktute hian an chhinchhiah lêm lo va, an hre vek kher lo bawk ang.

“Tûn lai tuarna te hi nakina kan chunga ropuina tihlan tûr nên chuan tehkhin thamah ka ruat si lo,” “- Rom 8:18

Comments