KHAWVELIN CHINA KAWMSERH ȚAN

434

KHAWVELIN CHINA KAWMSERH ȚAN
PC Biaksiama

Heti taka pulh hri hlauhawm Coronavirus tichhuaka khawvel puma thehdarhtu China Communist Sorkar chunga ram tin leh hnam tinte rilru put dan chu a inthlak chiang ta hle mai. Tun țuma kan thu hi a tawi thei dawn lo tlat. A chhiar peihte tan ni mai se.

Khawvel mithiamten an han zir chiang zel a, China sorkar tenawm zia leh khawvel tihchhiat vek an lo tum dan chu nitin zan tin TV leh Youtube leh chanchin thar atangin ngaihthlak peiha thu a ni ta mai. Ram dang chu ni se, hetiang hri hlauhawm hi a țaih darh hmain mitinte fimkhur turin ralkhel dar an tiri nghal ang a, a darh zau hmain an hupbet tur a ni a. Mahse China sorkar thuneitute chuan khawvelin an hre darh ang tih hlauvin an hupbet hmiah a. A sawi chhuak apiang chu manin an chin hriat lohvin an dah bo hmiah hmiah a. A lo țaidarh zau tak em avanga hupbeh a theih loh hnuah a nep thei ang berin an report ta thung a, tumah chi-ai lo turin, țha taka enkawla control a ni, tiin khawvel a bum a. Chutih laiin khawvel ram dang atangin hmui tuamna (mask) tluklehdingawn hnih zet a lo lei khawm sa țun țun a. Hri darh huna invenna tur khawvel a lo chhuhsak lăwk bawk si a. Ram tin an buai phat a nih kha.

He hripui lo chhuahna bupui Wuhan atangte chuan khawvel ram tinah thlawhnain tourist an inphur chhuak chur chur a. Ram changkang apiangin an vei nasa ta mai reng a, ram changkang lo apiang an him mai a. Tunah hian khawvel pumah mihring nuai sawmthum dawn laiin vei tawhin, nuai sawm dawn laiin an thih phah tawh a, eibar zawnna economy a chhiat rup a, mipui tam tak manganga an awm lai pawh hian China chuan a der tala thupha chawi chu sawi loh, an mawh a nih loh thu leh thiamthu an sawi char char a. A chang leh America sipaiho siam chhuah a ni, tiin USA chu puh hmingchhiat an tum a. An ram mipui he hri avanga thi zat thupin a mawi tawk vek, 3900 vel thi tawhin an sawi duh chauh va, a awm tawk an belh leh hret țhin a. Tuman China report hi rintlakah an ngai lo.

China communist sorkarin heti taka dem rawn a kai lai hian, a aia ngeiawm lehzual a la awm a. World Health Organization (WHO) hi UNO hnuaia khawvel hriselna ngaihtuahtu pawl lian ber a ni. Sorjar hrang hrangte thawhkhawma khawsa an ni a. An kutah hian khawvel hripui darh leh control hna a innghat thuk hle. Mahse he WHO hi suangtuah phak loh khawpin a lo corrupt nasa mai a. An Director General chu Tedros Adanom a ni a, China puihnaa he dinhmuna tling thei a ni a. Hri lo darh chhuah hma khan thil chinchang an hre reng, mahse China sorkarin nihna leh sumin namen lova a lo tham lungawi avangin China thupmawina (cover up) ringawt lo chu sawi tur zu nei hlek lova maw le, tun thleng hian! He China tihchhuah hri pawh hi China hming mawi loh hlauvin, China hming lam ri tel lovin, Covid-19 tiin WHO hotuten an phuah a ni. A hming dik tak Trumpa’n a sawi thin chu “Chinese Virus” tih a ni a, tun laia reporter lar tak “China Uncensored” chuan “Chinese Communist Party Virus, CCP virus” ti ngatin an sawi. China communist party hian khawvel mipuiin an kai tam loh hlauva, zin veivak tam thei ang ber a put darhtir mek laiin, khawvel hriselna ngaihtuahtu tura pawl din WHO chuan China cover up policy zawmin, he pulh hri tidarhtu lian a lo ni ta hlauh bawk a. Tunah hian an hotupa ber Tedros-a bang tura nawrna a nasa tawh mai. A thlalak hmel hmuh ringawt pawh miin an kham. Africa ram rethei Ethiopia mi a ni a, tunah khuan Ethiopia ram khu China in a chawm a ni ber awm e. Heng corruption thil tenawm avang hian Trump-a chuan WHO tana kum tina tanpuina an pek thin dollar maktaduai 500 zet chu a tihtawp phah ta rih a, hei hi khawvel ramdang zawng zawng thawh 1/4th zet a ni. China chuan dollar maktaduai 40 chauh a thawh thin. USA in funding a suspend avangin China chuan $ maktaduai 30 in a pui ta ringawt. Heti taka China sal (slave)a WHO a lo intahluh tawh avang hian world health organisation tih aiah mi thenkhat chuan Wohan Health Organisation an ti ta hial. Hetih lai hian WHO chuan an member-ah Taiwan ram a luh ve an khap tlat zu nia, hei hi a chhan chu China in Taiwan hi control tuma a vaubeh lai a ni. Mahse Taiwan hi independent sorkar a ni tlat si. USA hian tun hma atangin China lakah chhan lo se, communist China hian a lem pil daih tawh ang. China duh loh zawng ram a nih avangin WHO pawhin a member atan a lo hnawl ve rikngawt atang hian UNO meuhin a din WHO hi a thawktu hotute corrupt lutuk avangin China thuhnuaiah a lo awm ringawt a, he China virus pawh hian mi nuai tam takin an vei a, nunna a chhat ta zawih zawih mai a nih hi.

WHO chauh ni lo, khawvela ram rethei engemaw zat hi China chuan loan tam tak a pe a, an rulh theih loh chuan an rama thil hlu kha a neihsak hmiah hmiah mai a, Africa ram panga South Africa te, Ethiopia te, Djibouti leh ram hrang hrang a lem pil mek. India chhim lawka Sri Lanka rama lawngchawlh hmun pakhat chu China sum hmangin ‘modernized port’ an din a, an loan lak dollar tluklehdingawn engemaw zat chu Sri Lanka chuan a rul leh thei si lova. Chu port lah chu lûn khawpa hmangtu traffic a awm leh bawk si lo nen. Tihngaihna dang awm hek lo, China duhthusam a thleng ta, kum 99 chhung China-in mahni ta anga chei theihna (99 year lease ) an siam ta. Chuvangin India hmelma lian ber China chuan India vaukam hnaiah indo lawng hmunpui a rawn din ta rup mai le. India ram tana a hnawk turzia hi sawiin a siak lo. Chutiang bawkin Indian Ocean a Maldive thliarkar chu China thliarkar atan a insiam mek. Chu aia la buaithlak chu, India hmelma leh a dorãl ni reng Pakistan chu ralthuam leh sum leh paiin Chinain a vûr a, mahse engmah a thlawnin a ti phal der si lo, chuvangin India do zawngin Pakistan hian China policy a kalpui lo thei lo bawk a ni. Dik takin China hian India hi min hual tuau tuau a ni ber mai, min chhan theitu ber leh China sorkar ngamtu awmchhun chu tu dang ni lovin America President Donald Trumpa hi a ni.

KHAWVELIN CHINA AN ENSAN MEK. He coronavirus hian aruka khawvel awpbeh tumtu China policy chu a rawn hailang ta kuarh kuarh mai. Hnamte an lo harh chhuak ta. Ram tam takin China chu an thinhrik ta mek a. Kan PM Modi-a pawh lo harh chhuakin China in India rama economic investment a tih thin chu a khar ping ta hmiah mai. Project kal mekte chu strict taka endikin, project thar tur chu sorkar phalna lak zel a ngai dawn ta, a hmaa zalen taka duh tawk tawka a lo chetna chu tihtawpsak a ni ta a ni. Europe rama Sweden te, England, Germany leh ram dang dangte pawhin China-ho thil tihpui an duh ta lo, an thinhrik tial tial. China thil siam chhuah reng reng hnawl vek tum sorkarte pawh an awm ta.

Aizawl nuho, China thawmhnawa han sumdawngte tan pawh nidang a ang thei dawn ta lo. A chhan chu, China thil siam chhuah țha leh tlawm kan tih te hi, foreign ram hrang hrang atanga company ten China rama an invest-na a lo ni a, China cheap labour hmangin an lo titlawm a, China siam chhuah vekah kan lo ngai a. Tunah chuan America company lian pui pui engemaw zat China ram atangin an factory nen an inpu chhuak zung zung tawh mai a. Lungngai lo ila, pawnfen leh jacket nalh tak tak chu ram dang atangin hak tur a awm dawn chauh zawk a nia. Tunah hian China communist party chuan covid-19 avanga thi te aiin, an ram economy tlahniam mek khi pawi an ti zawk.

XI JINPING-A TAN VANPUI A CHIM VE MEK. China ram hruaitu lian Mao Tse Tunga hnua communist hruaitu chak leh thiltithei ber chu tuna an Xi (Si) Jinpinga, China President leh Communist party General Secretary khi a ni. Ani hnuaiah khian China chuan khawvela a ber nih tumin hma a la a, hma an sawn chak nangiang reng a. Europe ram leh America ramte chuan S.Korea te, Japan te ang bawka țhian tha anga ram hmasawn a nih chu an duhsak mai a. China lakah hian an inphal ruih ruih viau a. Mahse khawvel ram dangte hausakna sawk khawmin a intilian a, namen lovin a lo chak ta a. America aia chak leh thiltithei Superpower No 1 nih tumin, khawvel awpbeh a lo tum a, amah eptu tihtlawm nana a hmanraw hman duhzawng chu a rura ta em em mai a, China virus hi a lo thleng ta hial a ni. Hlawkpui nan a hmang fe tura ngaih a ni a; mahse khawvel pumpui thinrim hian an hmachhawn let dawn ta mek a ni. Tun hmaa ni tla seng lova roreltu Great Britain te pawh an Prime Minister Boris Johnson-a leh an lal fapa, Prince Charles-a te meuh pawhin he hrichhia hi an vei ve a. German Chancellor Pi Angela Merkel-i pawh a inkhung hrang ve hial bawk a. China laka an lungawi loh tur zia hi sawi a ngai hran lo. Virus a darh tawh tih hre reng chung khan China hotute kha White House a Trump-a office pindan ropui Oval Office ah te khan an zu lut ve a, an zu țhu ve vek vuk kha a ni a. Trumpa pawh an zu kai lo chauh a lo ni a. Khawvel ram changkang apiangin an vei nasat danah hian China sorkar tùm dan leh an target hi chu a haia hai rual a ni lo. China lakah khawvel a fimkhur dawn ta a ni.

Khawvel ram dang sorkarin an ngam tawh mang loh China sorkar leh an boss Xi Jinpinga’n pulh hri hmanga khawvel a rûn mek laia Kristian mi huaisen leh tumruh, America President atan Pathianin Donald Trump-a a lo ruat hlauh mai hi chu, khawvel pum chhanchhuaktu atana hriak thih a nihzia a tichiang zel dawn. Duh tawk rih ila. Vol. 2 naah China sorkarin Kristiante a suasam dan leh Donald Trump’an a lo ep let ve dan chungchang kan la ngaithla leh dawn nia.

Comments