Kentucky Fried Chicken (KFC)

55

Kentucky Fried Chicken (KFC)

-Colonel Sanders

                Khawi ilo zin nikhuaah Kentucky Fried Chicken (KFC)-a inhnangfâk thei ngat nih chu kumkhaw sawi a tling ngei ang. Khawvela restaurant hmingthang deuh te chuan KFC neih tel ngei an tum ṭhin a, a chhawp tel thei tán chuan chapona tham a ni reng a ni. Heti ang khawpa khawvelin an ngaihsan leh ei an châk KFC bul lo inṭanna chu putar kum 65 mî aṭangin a ni.

                A hming chu Colonel Sanders a ni a, kum 1890 Sept ni 9 khan Colonel Harland David Sanders tih hming puin Indiana-a Henryville khawchhak lam km 5-a hlaa in pakhatah a lo piang a. Unau pathuam zinga a upa ber a ni. Apa chu pa zaidam leh chak tak mai a ni a, ram acre 80 laia zau amahin a enkawl nghe nghe. Sanders-a chu kum 5 a nihin a pa khawsikpuiin a boral a. A pa boral tâk vangin a nu chuan chhungkua chawmin hna a thawk a. A hna thawh hlàn chuan Sanders-a chuan a unau dangte chu a lo enkawl a ṭul bawk a. Kum 10 a nih chuan mi huanah a inhlawh ve ṭhin.

                Sanders-a nu chuan pasal dang a nei leh a. A pahrawn leh Sanders-a hi an inmil lo hle a. Kum 1903-ah zirna school a chawlhsan a, ram hna a thawk a. A hnuah Indianapolis-ah sakawr enkawl hna a thawk leh a. Hemi hnu hian a nu phalnain a patea bulah a awm a. A patea chu Street car company-ah a thawk a, Sanders-a chuan chutah chuan conductor hnà a hmu ve a.

              Sanders-a chuan a pian kum ziak danglamin US Army-ah a lût a. Sipaia a ṭan hun a tâwp hnuah hian hna hrang hrang a thawk kual leh a. Kum 1930-ah Shell Oil Company-in Corbin, Kentucky hmunah service station luah man chawi lovin an hawn tir a, chuta ṭang chuan a thil hralhna aṭangin company-ah sum eng emaw zât a chhùn luh bak chu in enkawl nan a hmang ve ṭhin. Helai hmuna a thawh lai hian Sanders-a’n ar sa leh chawhmeh te a siam ṭhin a. Restaurant hranpa nei lovin an awmna bul hnai vela amah dawrtute tan a in luah building-ah chuan eitur a siam sak ṭhin.

                Thil siam a thiam bakah a thil siam a tui bik avangin mi tam zawkin an hre lar ta thuai a. Kum 1952-ah Sanders-a chuan Kentucky Fried Chicken hmasa ber chu Utah rama South Salt Lake hmuna Pete Harman-a restaurant-ah a supply ṭan ta a. Harman hi helai vela restaurant lian ber pakhat enkawltu a ni. Sanders-a’n KFC a hmelhriattir aṭanga a kum khatnaah hian he restaurant-ina an sum hai luh chu a let thum laiin a pun phah a, an restaurant hlâwkna an hmuh thar 75%  chu KFC aṭanga an hmuh a ni nghe nghe. Harman-a tan chuan ar sa kan ro lo awm chu restaurant dang aia restaurant ti danglamtu leh tihlutu tak mai a lo ni a. Don Anderson, Harman-a’n a rawih lai, lem chei thiam chuan chu ei tur chi thar chu a hmingah ‘Kentucky Fried Chicken’ a vuah.  https://ekhai.com

                Sanders-an kum 65 a nih kum (1955) aṭangin Corbin restaurant aṭangin KFC hi a hralh chhuak ṭan a. Heta ṭang hian khawvel ram hrang hrangah KFC outlet chu hawn zel a ni a. Kum 1980 Dec 16-a Sanders-a a boral thleng khan khawvel ram hrang hrang 48-ah KFC hralh thleng khan khawvel ram hrang hrang 48-ah KFC hralh chhuahna (outlet) 6000 vel a awm hman tawh a, kum khat chhunga KFC an hralh chhuah zawng zawng belh khawm chu US dollar tluklehdingawn 2 a tling hial a ni. Sanders-an kum 1964-ah Kentucky Fried Chicken Corporation chu sumdawng mi pahnih John Y.Brown, Jr. leh Jack C. Massey hnenah US dollar maktaduai 2-in a hralh ta a ni. 

                Sanders-a’n KFC bul a ṭan lái khan kum 65 a ni tawh a. Hetih lai hian sum leh pai lamah a tla chhe hle a, mahse a thil siam ar sa kan ro chu a  ṭhiante chuan tui an ti thei hle. A thil siam chhuah thar chu tilar turin Kentucky chhuahsanin US hmun hrang hrangah a zin ṭhin a. Restaurant leh in hrang hrangah te chuan kal kualin a ar sa siam dan thar hmuhchhuah chu a va entir ṭhin a. Restaurant tam takin a ar sa siam dan chu duh lovin an lo hnawl zel a. Mahse chuti chung chuan Sanders-a chuan beidawng duh mai lovin a thilsiam chu a zuar kual zel a. Atawpah restaurant pakhat chuan a ar sa siam zawrh sak chu an remti ta hram a. Hemi hma hian midang 1009 zet in a thil siam an lo hnawl hman  a ni! Kum 1964-a company hralh hian Sanders-a hian a ar sa siam dan thar hi hmun hrang hrang 600-ah supply a hmu hman a ni.

                A vanglai hun zawng zawng mahni intun nun nan rim taka mi hnuaia inhlawh kual nan a hmang a. Kum 60 a pelh hnuah pawh beidawng duh lovin beisena nen hma lam a thlir zel a. Kum 65 a tlin meuh chuan khawvela hming dai tawh lo turin KFC bul a ṭan thei ta a ni.

(Hlawhtling tur chuan hlawhchham i hlauhna aiin hlawhtlin i châkna chu a lian zawk tur a ni.)

–Billcosby