KAN HLIMNA TUR – PAGE 8

73

KAN HLIMNA TUR

Kan intiam tawh si –

             Ruata chu St. Edmund College aṭangin B.Sc result nghakin anmahni khaw lamah a nu leh pa ṭanpui turin a lo haw chhova, Aizawl hmunah pawh han cham rih deuh a chak hle a, Aizawla an in hmun veah pawh in pangngai tak, lawi len nuam tak in a ding ve tawh a. An in chu office pakhat in an luah a, an tinuamin an fel hle a ni. Tluangi pawh chuan khaw lama a haw tur chu ui tak tein a ui tawh a. Amah beisei an tamin, tlangval pakhat Dawla an tih mai phei chu a nuin a sawipui fo mai bawk si a. A lo awh ruk em em, fate pasal atan, makpaah a duh zawng em em, Tluangi hnenah pawh vawi duai lo a sawi tawh a ni.

             Chuvang chuan Tluangi chuan Ruata chu a ngai zual em em a, a lungngaih lai ber te, a mangan leh a khawhar ber lai pawhin Ruata hian hnem dan a thiam em avangin tun ang hunah hian a bula awm a tan a duh a ni, a duh loh chuan a nu leh pain an tilui kher lovang tih ring mah se hun dang zawng aiin Ruata chu a ngai zual a ni.

             Mahse, Ruata’n , “Ka han haw phawt ang a, nu leh pa chhungte hnen thleng lova helaia tawp mai zawng a fel lova, ka han haw rih phawt ang e. Lo chhuk leh thuai chu a ṭul dawn a. Ka puin, “Ruata, ka tar ta deuh, hna i thawh hma chu min pui a niang chu,” min ti a. Chuvang chuan an dawr ilo vel ngaihtuah a, ka ṭanpui a phut deuh a. Chuvang chuan ka lo chhuk leh thuai ang. Amaherawh chu, rinawm takin lo awm zel la, fimkhur takin lo awm ang che. Shillong tlang aṭang pawhin i chanchin hi mi ka aṭangin ka lo hre ṭhin. Nangmah heltu teho ka hriat phei chuan, ‘I ṭang zo lo mai ang’ tih te pawh ka han hlau thut thut ṭhin a. Hengte hi hmana ka sawi lawk tawh vek an nih kha. Mahse, nangmahah hian ka rinna ka nghat a, ka hun tiam pawh a thleng ve ṭep tawh e, nghakhlel taka kan thlir chu i nghak fan fan ang,” a tih si avangin an in ṭhen chu a la ṭul rih a ni.

             Tluangi chu a khawhar thei hle ṭhin. A khat tawka a nuin Dawla a sawi pui ṭhinte chu a nu mah nise a haw lek lek a, Ruata chu lo awm lo nise Dawla chu duh ve mai theih tura fel leh ṭha a ni reng a. Mahse Ruata tluk tur chu tumah a hmu thei lo a ni. Tunah phei chuan office a thawh pawh a chak lem lo hle a, anu chu ṭanpuia, dawr lam nghah vel chu a thlang mah mah zawk a. Mahse a pa’n Matric a pass ve leh khan a lo dil sak a, a lo remchang ta mai bawk si a.

             Tluangi office a a thawh aṭang chuan tun hma Aizawl nun a lo hriat ṭhinte chu mak pawh a ti tawh lo. A chhan chu office-a thawk mipa leh hmeichhia te chu, an vai phei zawng an ni hauh lova, pa nge an nih ni tih pawh hriat lohvin an awmdanah chuan an nulain an tlangval hle mai a. Hmun ṭhenkhatah phei chuan lo inngaizawng a, office buai chhuanlama siama, pasal, nupui, chhungte thlima hawn tlai phah khawpa, hun lo hmang te, Nu in nu ka ni ti suh, pain nupui nei ka nih hi tih tum bawk si lo. Tlangval lahin mi nu pawisa miah lo, a theih phawt chuan lo chuk pem duh te, nula lam lahin ‘pawmlai nei ngei le’ ti tawk an awm. Fa pali panga neite pawh la parh hah hah tak te an lo awmin, chutiang nun inchawhpawlh leh hun inher vel karah chuan Tluangi pawh chuan a hun chu a rawn hmang chho va, mak tih tur lah a nei tam.

             Mahse boruak danglam zelte hian a rawn puan chhoh puite a ni a, inchei lam pawh hmanah kekawr lian hlup kawng aṭanga intia deuh vek, a dawtah ngal a bet deuh tlat khawpa zui a lo ni leh a, tunah a tlang arh a lo ni leh a, lu kawng mul aia hmeichhe sam ang hiala sei, an hnung lamah chauh phei chuan hmeichhia, mipa an nih thliar hran theih miah loh te an ni a. Nula lam lah chutiang deuh bawk, nun hi a ho hulh mai a ni.

             Tluangi office bang chu Dawla chuan a thlah ngun hle a, mite pawhin an demin, awm pawh an ti dun hle a, chung hun laia Tluangi nu rilru chu Dawla chuan hre ngat phei se chuan lawmna hlirin a khat ang a, palai pawh a tir ut ut ta ve ang. Mahse Tluangi ṭawngkamah leh chet danah han lawmna tur chhete mah a la hmu si lo. Mahse ‘Uite leh hmeichhia chu a chul nel peih apiang’ an lo tih avang leh, tun hma pawha nula harsa an tihte leh induh ve tak tak te lo tlawm vetu a nih avangin induh ve takin, chuti maia beidawn chu a tum miah lo thung.

             Mahse mak a tih em em mai chu Tluangi’n thusawina tur hun awl remchang a pe duh miah lo chu  a ni. Office bang chu han chhawm ṭhin mah se thu han sawi nan tak tak chuan a remchang thei bawk si lo. ‘Min duh lo a ni’ han ti dawn se, Tluangi rilru a hriat lohna chuan lawmnaah emaw, zahna khurpuiah emaw a la hruai ngei mai dawn a ni. An inah hun thawl tak nei dawna a han inhriat pawhin a pi inghak chuan anmahni ngaihsak lo hmel tak si, mahse eng thu mah sawipuina chi ni si lo hian an bul deuh maiah hian a awm ve ṭhin si a. MAhse chuti taka hun a hmuh theih lohna chu tum ruhna lamah a rilru a siam deuh deuh a, tlawm pawh a ngai hle a ni. A nungchang leh awmdan te chu a tluk a nula ngaihsan a la nei lova, chulam lovah pawh a pianphung duhawm tak chuan mit a la hliah hliah bawk si a. A taksa pianphung hausakna teltu leh a nun duhawm tak neitu nih chu a tum fan a ni. Eng tak chu thleng ang maw?

             Hetiang hi thil awmdan a nih avangin Ruata pawhin hriat hun a nei lo thei dawn lova, lehkha a han hrilh lah chu a fel loh bakah, a rilru a tih hrehawm phah ang tih a hlau bawk si a. Chuvang chuan hetih laia a ṭhian ṭha berte chu a pi leh Electric venga Ruata pu fanu Ziri chu an ni.

             Ziri hian Tluangi hi a nelin a ngaina em em a, Sikul an kal ho lai, (an pawl chung daih a mi mah nise) aṭang tawh khan a nunah sawisel tur a hre mawlh lo a ni. Ama nun nen nen a han tehkhin phei chuan pawl riat a nih kum, a tleirawl kum khan tlangval a ngai daih tawh a, tunah phei chuan amah ngei pawhin tisa chakna a do zawh loh avangin a kut leh lam zungṭang chu a tlangval ngaihte chhiar nan a kuai thlep vek thei leh nghal a. Mite lah chuan tun thleng pawh hian a fel, a nun a ṭha an la ti leh nghal, Tluangi chu tluk lo a inti hle ṭhin a ni. A vanduana tak erawh chu mi vanduaina anga, nau a pai loh avang chuan mualpho lovin nungchang ṭha awm takin a la awm thei a ni chauh zawk a.

             Tluangi’n thil awmdan zawng zawng a hrilhte chuan ‘Hmeichhia ṭheuh ṭheuh kan va rinawm hlei ve aw’ a ti ṭhin a, an pahnih atan chuan theihtawp chhuah pawh a tum hle a ni. Mahse a hun lo hman tawh te chu siam ṭhat theih an ni tawh lova, an hun hman nawm ṭhin zia leh, khawi lai lai emaw a tlangvalte nen an tawmna leh an lo inkawmna te chu theihnghilh theih chi niin a hre lo. Mahse a u Ruata leh Tluangi te karah erawh chuan harsatna a thleng ang tih erawh chu a hlau hle thung a ni.

             Dawla pawh chuan Tluangi hnen aṭang chuan engmah ṭawngkam hmu dawna a inhriat loh avang leh neih ngei a tum si avangin a nu lamah tlan khalh a tum ve thung a, dawr lama a nu chu a kawm ngeih ta hle mai a.

             Tichuan Tluangi nu te’n  an fanu te khawsak dan leh nun dan hre hauh lovin, ṭha ema an hriat avang chuan an fanu chu Dawla tan chuan an kherh pui ta a ni. Hman hmanah khan a nu leh pate Ruata nena an awmdan lo hrilh daih tawh se chuan hetiang ang hun hi athleng kher lovang.

             Mahse an sawi lo zo tawh si a. An fanuin tunge a kawm ber pawh an hriatpui lova, nu leh pa thuawi mi tak a nih avangin, pumrua leh hmelah te, thiamna lam leh sum leh paiah pawh a duhawm tak Dawla chu a duh ve ngei ringin nei turin an thlem ṭan ta  ni. A nu leh pa h ihmanlai nun anga nupui pasal inneih thuah rilru zim tak pu an ni lova, tunlai tak, thil hrethiam tak an ni. Chuvang chuan atan pasal chu an zawn sak ta mai a, mahse awka a neih hma chuan Dawla chungah pawh thil engmah phei chu an sawi lem lo.

             Chhungkaw hlim, inkawmngei leh thil sawiho ṭhin an ni a. Nulat tlangval thilah hian kawng danga bengvar leh chinchang hre tak nupa ni mahse, an zimna lai tak a ni hlauh mai a. An awmdanah leh hun dan aṭang pawhin Tluangi leh Ruata in duhzia chu an hmuh sak lo. Chulaiah chuan an fate pawh an nu leh pa mizia aṭang pawhin an inkar thu an lo sawi lo hi an fel lohna lai tak a ni bawk. An chhungkar mizia aṭang chuan thil inhriat sak htlep thlep awm an ni a, an fel kim lohna lai tak pawh a ni.

             Tluangi chu a rilru a hah ru hle a, a nut chuan pasal neih tir ngei chu an tum si a. A ngaihdan lah chu an zawt fo tawh mai si a,”U Ruata nen kan intiam tawh” han tih maite chu a chak hle ṭhin, mahse a ṭang thei ngang dawn lo a nih chauh loh chuan sawi a tum bawk si lo, chulai chu Tluangi mawlna lai tak a ni awm e, fel kum hi a har bawk a ni. Sawi mai se, a nun a hriatthiam dawn nen.

             Dawla lah chuan a nu lamah ṭuanin, a be thiam em em mai si nen, Tluangi te in chhungah chuan Dawla fakna awka ri pawh a ti chhuak zauh zauh ta reng a, a fakna pakhatah phei chuan, “I unaupa i u Ruata nungchang kha a ang em mai a, ka ngainat phah riau a ni” a ti a. Dawla chuan Tluangi nu Pi Rovi chu a hneh hle a ni.

             Chawlhni tlai khat chu an nufain inah an awm a, ‘pasal neih a hun ve tawh thu leh a duh zawngte pawh lo thlan ve a hun a, nulat reng pawh hi a ṭha lem lova, chuvang chuan duh zawngte i neih chuan zep lovin sawi mai la. Keini i pa nen chuan Dawla hi nei la ṭha kan ti ber mai a, i ngaihdan hriat nan lo inngaihtuah la, a ṭha ang. Puitlung i ni a, nu leh pa ṭha tih zawng leh an duh zawng zawm chi, nu leh pa thu awih, nu leh pa chawimawitu an ni ngai e,’ tiin a nu chuan a hrilh a. chu mi aṭang phei chuan Tluangi chu a mangang ta hle a. A nu leh pa thu a lo zawm ṭhin a, an ring em em a, ṭawngkam vin a chhungkua inhau leh in be ngai lo, inkawmngeih tak an ni a. Chuvang chuan hetiang ṭawngkam dam thlap a a nuin a han sawi chuan nu leh pa tam takin thinrim a an vin tuar tuar ang ai pawhin ana lo chuang lovin, an ti tak tak a ni tih pawh a chiang a ni. Chu lai tak chu thil sawina hun remchangah han hmang hlauh se ṭha mai tur a ni a, a zahna lai tak a lo ni leh zel si a.

             Tichuan khawharna leh lungngaihna chuan a tuam mek a, amah chauha awmte leh a mut hmunah te chuan hrehawm a ti zual hle ṭhin. Ni hnih ni thum lai a liam hnu pawh chuan Tluangi chuan ngaihdan engmah a la sawi chhuak ta chuang lo. Chu avang chuan nu leh pa hmai zah vanga sawi ngam lovah ngaiin, Dawla ten palai an rawn tirh tur pawh chu ‘Aih emaw Aw’ tih chuang lovin an ngawihsan ta a, Dawlate chuan palai an han tir ta ngei mai a.

             Chumi zan mut reh tawhah chuan a nu nen an sitting roomah chuan an ṭhu dun a. A nu chuan, “Mami, i hriat angin Dawla te chuan palai chu an rawn tir ta chu a n a. I pa nen chuan kan duh em em a, inngaihtuahna hun pawh i nei a, tunah chuan i nu leh pain thla kan tih ang chu i zawm  tur a ni. Ani tluk kan hmu tawh chuang lo vang. Dawla hi nei la i hlim ber ang. Aizawl mi awmthei ber pawl an lo ni leh nghal a, nanga neih atan chuan an ṭha lutuk zawk a ni,” a han ti a.

             “Ka nu, in thu hi ka hnial khatin, hnial pawh ka duh lo hle a. Mahse tun thilah hi zawngin in thu hi ka la zawm thei lo a ni. Ka la naupang bawk nen, nu leh pa thu awih lo nih chu duh lo hle mah ila tun thila min tirhnaah hi chuan in thu hi pawm harsa ka ti a ni” a ti a.

             “Ka mangaih leh duh sak vang che a ni. I tan a ṭha tur leh i nawm zawkna tur a nia, sum leh pai lah an ngah a, i duh ang angin i awm thei dawn bawk si a. Chuvang chuan i nu leh pain a ṭha kan tih ang chu nang pawhin i hnial tur a ni,” a pain a ṭha kan tih ang chu nang pawhin i hnial tur a ni lo.”a nu chuan a han tih leh chuan, “In thu hi ka hnial hreh hle mai, mahse sum leh pai hian hlimna leh lawmna a siam vek lova. Buaina leh harsatna te, manganna thlentu a ni ve bawk ṭhin. Eng anga hausa leh awmthei pawh ni mah se mihring mi hrinna kawnga hmangaih theih miah loh pasala neih zawng ka thei lo a ni. Englaiin nge in thu ka hnial ngai? Ka mi duhzawng takte chu lo ni se, an awm thei bawk a, ka tan chuan nawmna tam tak min thlen mai thei e. Mahse nihna te, hausakna te, ropuina te avang maiin ka hmangaih ve thei lo a ni. Nei ila chuang kan chhungkua pawhin kan ṭhat phah ngei ang. MAhse ka nu, fanu sual takah chuan min ruat suh u, lengṭul em em pawh ka la ni bawk si lo. He thilah hi chuan min nawr lui lo hram ang che u,” a ti a.

             A nu chuan,”Kan thu i hnial pawh ka rin loh nen, a upa ber pawhin nu leh pa thu inzawm loh chuan i naute ho chuan kan thu an pawisa lo leh zual ngei dawn a nih hi. I tan a ṭha tur kan ngaihtuah a, mahse a beidawnthlak hle mai, in ngaihtuah chiang hle ang che.” tiin an khum lamah chuan a luh san a, a mut san ta a. Lalnuntluangi erawh chu khawhar tak leh lungchhe takin a khum lam a pan a. A nu ṭawng chu han lak nat a, han tawrh vak tur chi a ni lo. Mahse tun hmaa an nufa inbiak dan nen a danglam deuhin, a nu ṭawng pawh Tluangi chuan lungawi lo ṭawng a ni tih a hria a. Chuvang chuan a nu kal kiang tur ṭawng chu na a ti hle mai a ni. A rang thei ang bera Ruata hnena hrilh leh lo chhuak vat tura ngen ṭha a a hriat avangin, zan khawhar leh lunglen thlak tak mai hnuaiah chuan rilru helhkam lian tak nei chung chuan Ruata lehkha chu a ziak a.

                                Ka duh ber leh ka lawmna,

             U Ruat, i hmel hmuh ka chakin ka va thlehlel che em! Nangman a ṭul hunteah lo chuan kan awmdan hi sawi chhuah a ngai love i tih avangin, nang nena kan ihmangaih dan chu a ruk tein, rinawm tak leh nghet takin kan vuan duh a. Mahse tunah hian chhungten min hriat loh lutukna chu ka manganna thlentu leh ka ṭhana ti tam tuah an lo chang ta! Chuvangin a rang thei ang berin lo chhuk la, ka nu leh pa hriatah hian thu han sawi teh. Chuti lo chuan nu leh pa lungawilohna ka thlen tamlutuk ang e. https://ekhai.com

             Tunah hian in leng ka nei mek a, mahse nang lo chu tumah ka nei dawn lo. Chuvang tak chuan ka nu leh pa chu an thin a ur dawn a ni. U Ruat, i kianga ka awmlaite kha chuan, ka thlaphan leh ka lungngaihnaah te min thlamuan ṭhin a, duat takin min pawm a, tumah ka mittui tla leh lungngaihna hi mn hruksak tu an awm lovin min thlamuantu an awm tawh bawk si lo. Nang lah chu biak phakin i awm si lova. Ka lukham te leh ka hma dawhkan te chu ka mittui avangin an huh zo ta. Zanin hun te hian engtin tak awm ve che maw aw…

             Tunah ngei hian nangmah nena kan inhmangaih zia hi puanchhuah a niih loh chuan ka ta a mangan thlak lutuk dawn a ni. Chuvang chuan lo chhuk thuai ang che. In dam tlang zel ang chu maw? Ka rawn tibuai hle ang che u tih pawh kahlau hle a, mahse min ngaithiam hram dawn nia. I hmel hmuh thuai ka beisei a nge.

                                                                        Mangṭha rih aw,

                                                                        I ta.

                                                                        L.N.T.

             Tluangi chuan a lehkha ziah chu a han chhiar nawn leh a, hmun tam takah a mittui avangin a fiah lo lek lek a, mahse a ziah nawn ngai em a nih loh avangin, a thlep ṭha a, a tuka thawn turin a dah ṭha ta a. https://ekhai.com

             Chhungkua inkawmngei leh hlim thei, inrhiat chian lohna leh nu leh pan an fanu pawhin a duh ve ngeia an rina thil an ngaihtuah puiah chuan an rilru a inhmu lo em em a, chhungkaw hlim tak ṭhin kha, sawi mai theih si lohvin harsatna a lo awm ṭan mek ta a ni.

 

Chhunzawm leh tur – A rem rih lo ( PAGE –  9)

Comments