KAN HLIMNA TUR – PAGE 7

336

KAN HLIMNA TUR – PAGE 7

A fanu tan a awt –

                Khua a lo a lum tial tial a, fur chhia a lo rehin, ni tla te leh khaw awmdan reng reng  mai a Favang ni ta hle mai tih angin hun a lo her chho zel a. Boruak a danglamin thlasik rim pawh a nam lek lek ta. Hetih lai hun vel hi thingtlang lo nei mite tan chuan an hun nuam, awllen, tlangvalin anṭam huan hungna tur mai te leh thingtuai an pu a, nula puantah rimna hun nuam tak atan a an hman, nula ten an bialpa te lo leng ṭhut nana ṭhutthleng an puan tahna hmuna an lo chhawp lawk hun, an hun nuam ber hun pakhat a ni a. Tlangval khawhar tak pakhat tan erawh nuam ti lova, mahnia hun hman nuam ti zâwk, a khawhar hnem tur erawh chuan hmun hla taka mi chauh tâwk têa a hun lo hmang a ni thung a. He hun rawn inher chho vel hi chu ṭhenkhat tan hlimna, hun remchang, lawmna hun ni mah se, a ṭhen tan chuan hmangaih berte ngaia ṭahna leh thihna lo tuar tute tan lah ṭahna titamtu a ni.

                Pu Biakliana te chhungah pawh chu hun lo inher chho chu lung tilengtu a ni ve tho mai. Khawpuiah pawh awm mahse thingtlang lama khaw pakhata rilru zawng zawng lo dahtu an awm ve tho a ni.

                Pi Rovi chuan an in a chuangkai tlangval fel tak tak leh hawihhawm tak tak, nihna leh thiamna lamah pawh duai lo tak tak te chu thiam takin a fanu Lalnuntluangi chu a lo kawmpui ṭhin a. A fanu hi ring tawk hle mah se fate ṭhian chu hriatpui ngei turah a ngai tlat a. Anmahni inchhung inenkawl dan leh nun chuan tumah han inkhap lo mah se, rui chunga lo lutte pawhin engmah an hai lova, zu rui hmel chuan a pangngaite chu an hmu nawn leh ngai lo a ni.

               Tluangi chu zirlai, theih tawpa bei mi a nih avangin, Chawlhni zan lote chuan kawm tur a awm meuh ṭhin lova. Tluangi ṭhian (a inleng) te pawh chuan a nu chu an kawm zawk ṭhin a, thingtlang aṭanga chhuk mah nise rual pawl thiam, mi hawiher hre thiam leh kawm nuam tak an ni a. Tluangi leh Ruata te nunah erawh chuan engmah hre silo. Mahse a fate awm dan engmah a hriat lohna avang chuan harsatna thlentu pawh a ni leh thei a ni. A fanu a hmangaih tak mai ina, a phu phak loh inleng ṭha pui pui a han hmu ve te chu a lawm hle a. Lo leng ṭhinte zinga tlangval sang tawk tak, a sam pawh a tawk chauha tunlai, nungchang ṭha tak leh hawih hawm tak phei chuan a mit a lain a fanu tan a lo awt hle a, a biak pawh a be ṭha hle a, mahse nu leh pa ṭhenkhat te anga, fate zuar mai chi zawng a ni lo.

                Tluangi chu a hre chiang apiangin a bula awm nuam an ti a, chu avang chuan tlangval chuangkai leh ama rilru hneh tuma beitu an tam hle a ni. Sikul naupang mai la ni mah se, tuman an be chhawhchhiin an pal zut mai ngam lo. Tlangval inleng chuangkai nei tam hle mah se ‘a ler’ han tih chi rual a ni bawk si lo.

                ‘A thu tak rin ren e’ han ti mah se tlangval amah hre chiang leh, abula awm tam tak te chuan a tluka kawm nuam chu an hre tlat si lo. Chuvang chuan tlangval ‘kei ka ni’ in tih loh theih lohva an pan ṭhin ni.

                A chunga lo thleng mek te, a beng hriat a, hmangaihna thu an sawite leh ‘hun ka nei si lova, lehkhain i hnenah thu ka han sawi ve a ni’ tia amah duh dertu, a ni a kar chutianga han awmte chu, anmahni chu hmangaih tum ena han en ai chuan a khawharna thlentu leh, a lung tilengtu an ni zawk fo ṭhinin, Ruata’n, a sawi lawk, thil lo la thleng ngei tur a sawi te chu dik a ti em em a ni.

                Hun inher chho zelah chuan ula tlangval inpawl khawm in Krismas hla an han sak tuar tuar ri te chuan ngaihtuah an ti tamin, tel ve a chakawm thei hle a.

                Hmun ṭhenkhata Krismas lo thleng tur an lo ur lawk dan erawh chu a dang leh hle a ni. Zan khat chu ‘Full Moon kan lawm e’ tiin an kawmchhakah chuan Record Player nen an ri bung bung a. An nula chuan sawm tak tea a sawm avangin a naute pahnih tleirawl ṭan ve ve te chu hruaiin an han tel ve a. Zantir lamah chuan hla rang lam an play a, a nula tlangvalte chu nuam ti takin an su darh darh hlawm a. A chang changa choka  lama an va in leh bawk ṭhin chu Tluangi chuan a hrethiam mai a, a lo lut thar leh chhuak te pawh chuan zu rim an nam deuh vek a ni. Nula lam te pawh chu chawlh pahin theitui an dawm far a, mahse theitui in siah chuan an men dan leh an tlangval lam puite an nel dan leh an zah loh danah chuan an theitui inah chuan telh an nei ngei a nih a rinawm a. Tluangi te unau ṭhu ṭham pawh chu an rawn pe ve a, chik taka lo hnim tanlo chuan engmah a hriat loh va, mahse Tluangi chuan ngaihṭhat lohna riau a neih avangin ‘Ka lawm e’ tiin a lo la ve a, mahse telh an nei a ni tih a hriat chuan an hriat lohvin tukverhah chuan a leihbaw vek a.

                Zan a rei deuh hnu chuan an zinga tlangval pakhat chuan an electric eng chu a rawn tuam mawlh mawlh mai a, a han tuam zawh chuan chiang lo ruaiin a inhmuh theih ta lek chauh mai a. A thim ve leh chuan hla muang chi chu an han play a, a kawp te tein, mipa awmah nula te an bei a, a hmaa an han suk sauh sauh ang ni tawh lovin pen pawh pen mang lo chuan inkuah chialin an su ta delh delh mai a ni.

                An nula hote thei tui inah a ruka thil an lo telh avangin nula ho pawhin zah an hre tawh lova, pawisak pawh an nei tlem hlawm ta hle mai a, han infawhte chu a tur rengah ngaiin, an lampui ten an duh ang anga, an han tivel pawh chu maimitchhing diar diar chung chuan hre lo ang maiin an awm a. Nuam an tiin ngaihtuah dang enghelh vak an nei lo hle a ni tih an hriat hlawm hle a ni. Nula te chu han en chian chuan an lo inring lawk nge ni, an bialpa te tana, duhsak ni awm takin an hma pawngte chu an kawr hma reh zau tak aṭang chuan an lang theiin an duh duha chai leh atan an pho lang a. Kawr hma ṭha taka kilh thlapte pawh chu a pathumna thlengin kawr kilh chu inhawng a, mahse chungte chu hre awm hmel rengin an lang lo.

                 Tluangi bula an nula lo kal hnenah chuan, “Duhi, kan haw tawh mai ang e, zan te pawh a rei tawh viau mai” tiin a naute nen chuan an chhuak a, “Ni e, u Tluang, nuam in tih loh hmelin, mak i tih hmel riauvin ka hria, a nih mangṭha mai ule” a han ti a.

                Tluangi chuan mut hmunah chuan chu mi zana an kalna chu a chhut neuh neuh a, nula hote khan an bialpa te ṭheuh em ni an kawp te kha niang aw, Party an tih hi khatiang ang vel khan hun an hmang ṭhin a ni tih a chiang ta hle mai a. A tel ṭhenkhatte lah kha a hriat mi, khatiang ang huna tel ve duh awm lo takte niin a lo hre hlawm a. Ṭhenkhatte phei chu Sunday Schoolah zirtirtu leh Biak Inah pawh a ṭanna hun hmang ve fo ṭhin, Kohhran hruaitu fanu leh fapa te an ni nual leh nghal a, a mak dawn hle mai. Khatiang ang lo tiṭhang tawh tan chuan bansan har tak leh zawng chhang awm takah a ngaihsak a ni. Mahse engnge a puak chhuah chiah ang le? ti tein a ngaihtuah a, mak a tiin, Aizawl khawpui nuun chu a la man thiam ve meuh lovin, a hre phak ve lo a ni. Mahse an awm rei tial tial ang a, engtak chu la ang ang maw!!! PAGE 8 

Comments