KAN HLIMNA TUR – PAGE 6

79

KAN HLIMNA TUR – PAGE 6

I tan liau liau –

              Ruata chu khawhar tak leh lungleng takin an khuate motorah chuan Khawthlir lama a chhungte hnen pan leh, a hmangaih ber hlat deuh deuh chuan an tlan zar zar a, Tluangi nena an inkawm hmate khan ṭha tih zawng leh zuk duh ve mai theihte a lo nei ve nual tawh a. Lunglenna leh hetiang a khawharna hi awm ngai turah pawh a lo ngaihtuah phak lova.

              Mahse Tluangi tleirawl tir te tlangvalin an la kawm tak tak hmaa lo kawm ngeih a, tumah kawm ta lova, an pahnih chauha hmangaihna an lo che dun aṭang chiah mai chuan khawharna te lunglenna te chu mi aia a lo tuar nasat tak ni.

              An inhmangaih thu an sawi hmasak ber ṭuma, a fawh pawh a, chhan let dan a thiam loh zia te, a duh ve avanga a lo dawh ve satliah mai mai lai te leh, an inkawm zing tual tual a, a fawh pawha a chhan let dan leh a ngainat dan tura awmdan leh a chunga a hmangaihna a lantir dante chuan a ngaih a tizualin, a khua hi a har vawng vawng mai a ni.

              Nilengin an kal a, unau hmel hai velah an khua, Khawthlir chu an thleng ve ta hlawl mai a. A ṭhiante ho leh Tluangi ṭhiante nen chuan an han inhmu khawm a, an hlim dar dar hle a. Mahse Tluangi te ṭhian ho han hmuh chuan an ṭhiannu chu a ngaih an tizual hle a ni.

              Thingtlangah zawng hna a tam em mai a, nikhat a chawlh hahdam chuan, dam si hna thawk lova in a awm chu thil zahthlak tak a lo ni tawh a, Aizawl hmun anga len zual zuaina chi ni hek lo. Lo hal a lo ni a, mangkhawh a lo ngai zui a, buh tuhin a nang nghal a, reilotê ah hnuhlak in a dawt chho leh zut mai dawn a ni.

              Khua a thlen aṭang chuan awl hi a nei ta lo reng reng a, chawlhni leh zan lam tih lohah hi chuan hnthawh kawr nen nilen hi a ni reng tawh mai a. A lung chu han leng hle ṭhin mah se “Lung pawh a leng hman lo a ni ber e’ tiin a ngaihtuah ṭhin a ni.

              Aizawl aṭanga a haw hnu hi chuan tunhma ai khanTluangi nena an inkar thilah pawh a lungawi leh zuala, amaherawh chu amah ang bawk a, Tluangi ṭhat zia min an rawn hriat ṭan ve avang erawh chuan an inkarah eng emaw hlauhthawnna ruk tak chu a nei ta reng mai a ni.

              Ni tin an feh chhuak a, rim takin an thawk a, zan lamah te nula han kawm ve mah se a ṭhiante hnung zui mai lo phei chuan lenna tak pawh a hre ṭhin lova. han mit mei deuh se zawng inphal tak te pawh an awm ngei tak  a; Mahse a thinglungah tu dang mah an leng lo a ni.

              Tichuan hun a lo kal chho zel a, a khawharna chu a ni telin a zual tial tial thung a. June thla a lo chuan chhuah meuh chuan chanchin thar an examna lam thil hriat a inbeisei hle ṭhin a. Tlai khat chu an veng Aizawl kal haw chuan uluk taka tel ah hian ama hming lo chuang vang mai hi a rawn hawn sak a. “Eng tak chu ni ang maw?” tia a funna a han phelh chuan a tuam chhawnah chuan “Lawmpuina Thilpek” tih in ziak hnuaiah hian “L.N.T” tih hi a lo in ziak a. Ruata thin chu a phu dep dep a, a han phelh zawh chuan a mawi tih zawng deuh mai, an dawra an kal ṭuma an pahniha an en dun ngei mai kha kawr mawi tak a ṭhuisa hi Tluangi chuan a rawn thawn hi a lo ni a, lehkha chu a han chhiar a –

              U Ruata,

              I kal tak ṭanga ka awm dan zawng zawngte kha kim chang tak a sawi leh a nihna ang taka i hnena tihlan ka va chak em,’Ka khua a har’ ka han tih mai hian ka khawharzia hi a hrilhfiah zo si lo. I haw hnu mai phei kha chuan ni danga ka ngaihtuah ngai hauh loh thil min ngaihtuahtir a sin. Chu chu engnge nia i rin le?

              Inṭhen reng reng maia awm hi a hrehawm me mai a, ‘I nupui rinawm tak’ nih mai hi ka chak a sin. Mahse chutiang em chu nang nena kan tum dankha a la ni si  lo.

              Mahse u Ruat, thil awmdan leh boruak inlumlet ka thlir hian i kianga thlamuang taka awm hi ka thlahlel a ni. Engtikah nge nang nena lungrual tak maia nupa nun kan din hun tur ni ang le? Hetiang lam hlir ka ngaihtuah ṭhin avangin ka ngai zual ṭhin che. I hmel hmuh leh thuai theihna tur hun chu ka tan a lo inhawng mek niin ka hria a. U Ruat, ka lawm zia hi in result lo chhuak chu kan ina chanchinbu lo thlengah chuan 1st” Division tlar kan en zai zai a, i number a lo lang kalh mai kan hmu chu ka lawm teh asin! Awm tlang chiah ila engtin nge ka tih ang che ka hre phak lo. Ka pi ka hrilh var a, ka pi chuan, ‘A va tihzai em! Pathian hnenah lawmthu sawi tur a nih chu’ a ti a, i tan, i tan liau liau lawmthu kan sawi a sin. Ka lawmpuina che atan ka nu hnenah hei tuna ka rawn thawn hi ka dil a, ka nun min zai sak a, keimah ngeiina ka ṭhui hi ka han thawn che a ni. https://ekhai.com

              Awle, i lo chhuk thuai ka ring a, dam takin kan inhmu leh thuai dawn nia. Mangṭha

 

                                                                                                I ta,

                                                                                                L.N.T.

PAGE - 7
Comments