KAN HLIMNA TUR – PAGE 5

415

KAN HLIMNA TUR – PAGE 5

Nunna beidawng pawh ni ila.

            Tunah chuan Ruata pawh a leng chhuak hman ta lo. An exam a hla tawh vak lo va, a bei ngawrhin a chhiar nasa em em a. “Ka pass ve hram ang” tih rilru pu mi a ni hial a. Chuvang chuan a theih tawka beiha, ṭha tawk taka pass tum mi a ni a. Thil tih tawh reng reng bansan hni hne mi a ni lova, thil tih theih ang chi puitlin tum ran mi a ni. Chuvangin tuna a zirlaiah pawh hian a dawngdah ve mai mai lo va. A pi leh pu tena tha am deuh rana lo chhawr tumna lah an nei lova, zirna hun a nei tam tawk lovang tih hlauvin amah tibuai thei awm reng rengah chuan an inthiar fihlim zel zawk a ni.

            Mi ṭhenkhat ten, an chhungte leh chhungte lo pawh zirlai an awm pui a, an lehkha zirna pawh ngaihtuah pui duh lova, an tha ringawt lo am mite, an tih ṭhat lova, zir hlei thei lova hna an thawh tir ṭhin ngaihtuah leh si lo va, ‘i zir ṭha duh lo a ni’ tih leh ang mai mai mi an lo ni si lo va. A pi leh pute hian ṭhahnem an ngaihpui em em mai a ni.

            Ruata chu a khua a har hle ṭhin, mahse, zirlai tibuai tur erawh chuan engmah a ngaihtuah duh lo. Nakin hun atana ṭha tur a la nih zawk avangin a invawng thei viau zel a ni. Amaherawh chu Tluangi hi a ngaihawmin, a kianga awm a nuamin a thlakhlehawm em mai a, a nih ang ang a mite pawhin an ngainat laiin a ni phei chu Tluangi hmangaihna zawng zawng kawltu a lo ni leh zel bawk si a, a tan chuan khua hara lunglen chu a awm hle reng a ni.

            Tluangin, “U Ruat, theihtawpin bei la, kei pawhin tih tak zetin Pathian hnenah ka lo dilpui ang che. Ka hmangaihnaah che hian innghat la, keimah avang tala i tih ṭhat theih tak hlauhvin, ngaihtuahna ding thei lova i awm hunah pawh keimahah hian buai lo va, min hre renga i tan ṭhahnem ngai taka ka dilna hre rengin i zirlai i ngaihtuah dawn nia. Ka pi pawhin theihtawp ka lo chhuah ang.” a tih kha.

            Kan inhmuh ngun a i zirlai i thiam thei dawn a nih chuan ka hun pawh hman dan thiam ka tum a, mahse kan in hmuh tam chuan zirlai i chhiar thei lovang tih ka hlau si a, chuvang chuan a tlem thei ang ber inhmuh tum ila a ṭhain ka ring.  Chu chu kan tana ṭha tur ve ve a ni ang.” a tihte chu a hre vang vang ṭhin.

            Tluangi chanchin chu a pu fanu Lalnunziri pawl riat zirlai Synod High School a kal ve tho chuan Ruata chu a rawn hrilh ṭhin a. Mi ngawichawi, ṭawng mai mai lo, thu zep thei tak, thil chu a nihna tak sawi, sawi tur chi leh sawi loh turah chuan mi vawng thei tak a ni a. Ruata leh Tluangi tan pawh a ṭangkai hle reng a ni.

            Ziri hnen aṭang chuan an School naupang, a hmeichhia a mipain an ngaihdan te pawh a hre vek a, mi ngaihdan an hriat phei chuan Tluangi chanchin chu ngaihthlak nuam a ti hle ṭhin.

            Ruata te in exam dawn tlaiah chuan Ziri chuan lehkha tawi te a rawn hawn a.

            “I tan theihtawp chhuahin ka lo dil reng tih hria la, naktuk ni 18 March a in exam turah pawh Pathianin hriat theihna a pe ngei ang che, mangṭha le,” tih hi a lo inziak a. A thu zawng a tawi a, nula tlangval inhmangaih tak te thu infah tawn ang pawh a ni lo. Mahse Ruata thinlungah chuan chakna, tum ruhna leh hlimna rawn thlentu a ni si a. “Engkimah Pathian hi a ti vek mai si a, ka tluk lo hle mai” a ti rilru ṭhin.

            Zirlai zingah tak te hian Sikul kal nih duh si, zir peih si lo mi tam tak an awm ṭhin a, tunah phei chuan nu leh pa ṭhahnem ngai tak anmahni tan thi leh thau pawlh, thlan saphul kaia an faten lehkha an thiam lovang tih hlau em em a an thawh laiin Sikul tlan bo leh in aṭanga Sikul kal tura chhuaka sikul kal thleng ta si lo te an tam em em mai a. Chutiang naupang awm ṭha duh lo te chu an nihna tak an nu leh pate hnena zirtirtu ten an va thlen pawhin lo awisak duh lo leh, lo ṭan tlat nu leh pate an lo awm bawk ṭhin a. Chutiang nun inchawhpawlhnaah chuan Lalnuntluangi pawh chuan hun a hmang mek a. Mahse a hmangaih ber exam tur hnena a ṭawngkam aṭang hian Ruata tan phei chuan a ngaihṭhat thlakin, a duhawmna a lang chiang zual ṭhin a ni.

            Theihtawp chhuaha zir chu a mawh a ni a, a tih ṭhat chuan amah chauh a lawm dawn lo tih pawh a hre chiang em em a, Tluangi a han ngaihtuah  thlen apiang mai chuan, Tluangi’n a lung a tih awi zia te, a ni tluka a lungtiawi zo hi tumah a hmuh leh pawh hi a ring lo va, a rilru tê tê chuan,’Tluangi’ ti lova ‘Duhawmi emaw, Lungtiawii’ emaw tih hial tlâk a ni ti te’n a ngaihtuah ṭhin.

            An exam ṭan hmasak ber aṭang chuan subject tinah chuan a lungawina tawk chuan a chhang thei vek a, a ni zawng ṭawngṭai hman meuh lo zawk a ni, mahse tih tak zeta dil saktu ngenna chu a chhang ngei a ni tih erawh chu a hai lo a ni.

            An exam pawh an zawh ṭep a ni ta, subject khat chauh Lushai an la hmabak a, chu mi ni, ni 29 March chuan Aizawlah chuan kum danga awm ngai lo, tihpui deuh mai an nei dawn a, sorkar pisa pawh dar 11:00 aṭanga khar vek tur a ni a, office mi zawng zawngin lammual pan vek tur tiin order an chhuah a. Chumi ni chuan sikul naupang sikul  hrang hrang ṭanga thlan khawmin P.T. an nei dawn a. Item chi hrang hrang, hmuh châkawm leh ngaihthlak chakawm tak tak buatsaih a ni bawk a. An programme duan dan aṭang chuan mipui pawh an phur hle a ni.

            Ni 28 tlai Ziri Sikul bang lo hawng chuan Ruata lehkha a rawn hawn leh a,”U Ruat, naktukah Lammualah kan sikul pawh kan rawn kal ve dawn a, i hman tawhin ka ring a, inhmuh kan tum dawn nia,” tih chauh hi a lo inziak a. Mahse Ruata tan chuan a tawk hle a ni. Tluangi’n a tum a ṭhulh ngai lova, an inhmuh hunah lehkha ngai lovin thil tam tak an sawi thei tho dawn si a. Nghakhlel takin a tuk chu thleng thuai thuai se a ti hle a ni.

            Reilotê ah Ruata chuan a exam chu a zo thuai a, in lam pawh pan lovin Lammual lam a pan ding nghal a. Mipui tam tak zingah a inzep thla a, nula tlangval a hmel hriatte chuan, “Ruata, pan thlàng i va tum awm ve , kan kiangah hian lo ding ve rawh”, te an lo ti a. Nula ṭhenkhatin a hnung lamah, “Ruata hi chu a fuh mange aw,” tu emaw chu a vannei dawn maw le, kan nih hmel si lova”, an tih rik sapte chu a hria a.

            Lammual zawlah chuan sikul naupang chu an lo intlar ṭhut mai a, a hmasa ber a fala ding vang mai chu rem lo deuh tak mai aṭang chuan Ruata chuan a han hmu a. A kianga ding hote chuan a hmasa fala ding vang mai chu an lo inkawhmuh nak nak a, “Tu nge maw ni le, sawi tiang ang reng reng ka la hmu lo, saw saw zàwng, siamtuin a duhsak hle mai a,” titein an lo sawi nak nak a. An zinga tlangval ria deuh ding ve chuan, “Kan ṭhenawm nula Lalnuntluangi a nih saw, an awmna a la rei lova, thla tam a la ni lovang. Khawthlir khua aṭanga lo pem an ni a, a fel pawh a fel ngawt a sin,” a han tih ri chu Ruata chuan a lo hre ve hlauh mai a, a awmna aṭang khan a lang chiang thei lova, Tluangi a ni tih reng a lo hre lova, hmun dang Lammual sir, a pang vel te kha a mit a lo lên vel mek kha a ni a, mahse chutia an sawi an hriat chuan a hmasa bera ding chu, hmuh hlan a nghahhlelh em em mai chu a lo ni reng mai a. Dingdihlip ak akin an thlir ve leh a, chiang taka a lan theih naah a ding leh nghal thuai a.

           Chutihlai tak chuan ri ṭhat a han hria a, sikul naupang lammual khat mai a fel lutuk maia remte chu an su ta dul dul mai a. Tih dan pakhat aṭangin a dangah an kal a, an eu, an sirsawn, an kun, rual lutuk mai chuan an sawi dual dual mai chu a hmuhnawm ngang a niang, Lammual sira mipui lo pungkhawm te chuan kut an lo beng hluah hluah mai a.

            Chutah a hmasa kha, Ruata mit latu ber mai chu a kai hruai tu ber a nih a vangin Hamrik an han ham leh ṭhat chuan sikul naupang zawng zawng hriattirna a kut chu an phar vang vang a, a ruala rual ber mai chuan sikul naupang lammual khat a dingte chuan lam dan chi dang tak mai chuan an ban hawiin, zuang deuh, tlem a an ke theh chhuak chuan an han lam leh ta mai chu, mipui mak ti leh mawi ti lutuk chu an ka ho ringawt mai a ni.

            Ruata chuan thil dang chu a lo thlir ve hman lo. Tluangi che vel in a tlin zia leh, a entu te zawng zawng hmuhah pawh mittling leh an ngainat dan tur anga, zirtirtu ten an zirtir anga a han then kual ve chu hmuhnawm hi a lo ti chuang a, club leh party na hmun tur chi ni se, “Min lo ngaidam mai rawh u, ka rem chang lo tlat mai,” tia hawihhawm tak si a, a chhan ngeina tur a ni a.

            Mahse, chutiang a ni lova, sikul naupang thiltih a nih avangin, lam dan tur ang taka an zir chu a lantir mai a ni.

            Tin, Ruata hian sikul form a a inthuam hi a la hmu ngai lo va, pawnfen kerek thlenga fengin, puan a bih leh a, chutiang anga inkawm ṭhin chu an ni a. A chawn tak ngial pawh hi a la hmu lo tih theih a ni. Mahse chu mi ni chuan zirtirtu ten an duh tawk ang chiaha chhing lutuk lo, fual lutuk lo, anmahni form nena a han che vel chu Ruata pawhin mawi chung chuang a ti hle a, a rilru te te in,”I lo va mawi kum tak em, Rilru lerna leh lepchiahna riau chu nei ni la chuan kei matric pawh la pass si lo hian ka chang dawn lo che a nih hi. Vawiin ni aṭang hian kan inkarah harsatna, ( kan in hmangaihna chu tihchhiat ni lo mah se) kan tawhna tur hun hmahruai a ni tawh dawn a ni. Keimah ang bawk hian mi mit chu i chungah a fu vek si a,” tiin a lo chhut ve neuh neuh a ni.

            A bula tlangval fel hmel tak tak leh awm thei hmel tak tak te chuan an sawi sep sep reng mai a,”La kawm chhin ve tur a ni” an han ti ri a hriat phei chuan, a ni thingtlang mi, Aizawla awm ve reng thei lo tan chuan ngaihtuah a ding vang vang mai a ni. Item chi hrang hrang te chu an lo ti chho zel a, Ruata hnung lamah chuan a pu farnu Ziri chuan, “Ka u Ruat, i hawng tawh ang,” a rawn ti a.

            Tluangi te kha an la chhuak lo a a hriat a vang kha,”Ziri kan awm ve leh lawk ang e, min lo hawn san mai rawh,”a han ti a. Mahse Zir mit mengah chuan engemaw a awm niin a hria a, a zui ve ta a. Mi thawl deuhna lai an thlen chuan mi hriat tham lo hian “Gate-ah a awm”, tiin a hrilh a, a ṭhiante zingah a kalsan leh ta mai a. Ruata chuan a hrethiam ta mai a, a thlir loh lam, milianho ṭhutna sir ko pang lamah an lo chhuak daih awh hi a lo ni a.

            Hmanhmawh takin Gate lam chu a pan a, Gate bul maiah chuan thawsa hliam hian a lo ding a, a biang te chu a lo tai sen hlar mai chu a han hmu a.”Aw, lung zawng i van tiawi tak em” ti rilru chungin ṭhian ṭha in biak pangngaia inbiain Bazar lam panin an pahnih chuan an phei dun ta a. Mite chuan an thlir duh hle a, lammuala sikul naupang zinga a lam tih ṭhat zia an lo hmu vek a, chubakah, amah a lo hmel ṭhatna leh a pian hmang duhawm zia te chu thlir tham a tling ve reng a ni.

            An dawr an va thlen chuan a nu chu a lo inhralh buai nasa khawp mai a, a dawr tute nen an han intihfel chuan, “Aw, Ruata teh reng che, i lo thlenna a rei tawh em”? tiin a han zawt a, a hnung lama Tluangi ṭhu reng pawh chu a lo hmu lova, mi an tam avangin a lo virbuai hle mai a ni.

            Tluangi a han hmuh chuan, “Mami in thil tih chu in zo tawh em ni? I e, Ruata, Lammualah i va kal ve em? Sikul naupang lam (P.T.) tura a hmasa berah ka ding dawn a, a hreh lutuk a, mahse an ruat tlat si a, Mami eng nge i va an le?” a han ti a.

            Ruata zawk chuan, “Unaute pawh min tizak thei dawn a lawm le, a hmasa bera ding leh nghalin a han tisual leh zauh ṭhin kha chu ka lo ip chawih chawhi mai”, a han ti a.

            Tluangi nu chuan, “Ka hlauh ang ngei a nih chu, ka huphurh em mai a, huphurh lutuk hi chuan tihsual te pawh a awl reng a ni”, a han tih chuan Ruata chu nui hmel a pu lek lek a, an pahnih chuan an en tawn vat vat a, ‘Nang ni hi min tihder a ni awm mang e?” a han ti leh hnuhnawh a.”Tak tak a, vawiin chu a ropui hle mai, ka rilru in Tluangi tih ṭhat avangin ka lo chhuang veng veng mai a ni. Vawiin ni aṭang chiah hian a nia, hmelhriat pawh a ngah leh zual dawn ni, min ti ṭha an ti hlawm em mai”, tiin a hrilh chiang ta a ni.

            Tluangi nu chuan, “E khai, vawiin chu ka buai lutuk a, thawk lakna tur pawh ka nei lo. Khawnge thingpui in in ka han kal teh ang, Ruata, ti khan dawr min lo nghah chhawk lawk ru aw, Mami, thingpui in duh ang em?” a han ti zui a, Tluangi chuan,”Ka nu, a rem chan chuan kan chak khawp mai, ka chhawl hal ve riau mai, a hmeh chu i duh ang ang han tih tir mai rawh, e, u Ruat, duh zawng i nei em?” tiin a han zawt a.

            “A, nei lem lova, in tih ang ang kha ka duh zawng a ni thei mai ang, hmeh pawh a ngai hlei nem” a han ti zui nghal a.

           Thingpui te an in zawh a, a nu a awm leh hnu chuan kal zai an rel leh dawn ta a, an pahnih chuan Tluangi te veng lam pan chuan an kal dun leh ta a. “U ruat, in exam in zo tawh si a, eng chen nge i cham hman dawn?” tiin Tluangi’n a zawh chuan, “Kar khat bak ka cham thei lovang, Thingtlangah chuan kan ṭul dawn chauh a ni a, Lo hal a lo hun ang a, hna thawh turin min hmuak leh ṭeuh tawh ang. Cham la chak hle mah ila kan in dinna hmun a ni lova, in leh lo kan neih ve si loh avangin chak awm taka kan hawn a ṭul ve reng reng dawn a ni. Nang in sikul kalna chu a nuam i ti zel emaw chu?” a han tih chuan, “Ti bawk e, kan zirtirtute an fel bawk a. Zirlaipui te pawh an kawm a nuam khawp mai. Mahse, ka la hriat ṭhan loh em avangin khi lama kan sikul kal dan nen chuan a inang vak lo a ni. A chhan chu, tih tak zeta bei chu tam mah se, zirlai ni si, nun dan mak tak taka nung hmuh tur an tam a. Sikul tin maiah hian tlanbo, zirtirtute zah lohna leh pawisak lohna te sikul naupang ni si, ruih theih lam thil chi hrang hrang ti ru an tam em em mai a.

            Kei pawh hi sikul tlanbo puiah te, party puiah te, eng engah emaw min zu sawm ve fova, min rawn sawm ta chu kei pawh hi ka nun dan a dik lo em ni chu aw, chutiang ang tura min han sawm tak hial chu, te ka ti ṭhin a. Mi an sual han tih ngawt pawh hi a dik lo va, an lo tih ṭhat tawh a niih chuan awm ka tihpui viau hlawm a, mahse ka tih ve atan erawh chuan ka duh ve loh bakah ka ti dawn bawk lova, khing lama kan ṭhianho a kan han tih ho ang kha ni ve hek lo. Aizawl chu naupang ṭhan len nan chuan eng emaw kawngah chuan ṭha ka ti lo khawp mai” a ti a.

            Tluangi te inah chuan rei vak lo a leng a, a len chhung Tluangi’n choka lama rawng a bawl hlan chuan a pi nen an lo inkawm ve mek a. An chungchang an hrilh miah lohva hretu a ni a. “Ruata i cham rei hman dawn emaw chu?” tia a han zawh chuan Ruata chuan,”Kar khat bak ka cham hman lovang, in lamah kan ṭul dawn em mai a”, a han ti a. “Anih, in exam-ah hian pass ta la, eng zai nge i rel zel ang,” a han ti a. “Pass hlauhte kan nih chuan, i hnenah chuan han sawi ta mai mai ila, phai lamah engemaw kan tih theih ve awm lam zir turin ka chhukin ka ring, mahse kan pass ngut a nge maw chu le,” a ti a.

            Tluangi pi chuan, “Tluangtei nen hian in inkawm ngeih hle a, a nu leh pa hian eng rilru nge an put chu ka hriat pui hauh lo mai a. An awm danah hian in inkawm dan lah hi an hrethiam hauh mai si lova. Hetia nangni pahnih in lo induh si chuan thil awmzia hriattir mai ula ṭhain ka hria. In pahnih karah hi chuan harsatna an siam ka ring lo, eng pawh nise, in harsatna chu min hrilh zel dawn nia, ka tih theih ve zawng te a awm chuan ka lo pui ang che u a ti a. Tluangi’n thingpui a rawn chawi a, an in hova, sawi zawm lehna chi a nih tak loh avangin thil dang dangte sawiin an ti ti a. Ruata pawh chuan a hawn san veleh ta a.

********************************

            Kar khat lai a lo ral leh ta reng mai. Ruata pawhin hawn zai a rel loh chuan in lamah thawh tur a tam si a, Aizawl ah han awm ve reng dawn se, a nu leh pa leh a unau teho a ngaihtuah ve bawk si a. April Ni 12 thawhṭan a hawng tur chuan a inbuatsaih ta a.

            Hlim takin Tluangi nen chuan in hmu leh mah se Tluangi’n khawthlir a chhuahsan dawn ṭuma an khawharna ang bawk khan inṭhen a lo ngai leh ta a ni. Tuna an inṭhen leh chuan eng hunah nge an ihmuh leh dawn tih han hriat phak mai a ni tawh si lo. an tan hun pawimawh tak an inṭhen leh hmaa neih loh theih loh a ni ta a ni.

            Chutianga hun remchang ṭha tak an neih theihna tur chuan hmun fianrial leh mi chimbuai loh theihna hmun ṭha tak an duh a, a ṭul hunah lo chuan min an induh zia hi an hriat kher ṭul an ti lem lova, Aizawl hmunah te hmel hriat leh ṭhian ṭha tak tak nei tawh mah se, Khawthlir a an ṭhian te angin tumah an rin ngam loh avangin an mahni pahnih an in hmu fo thei tho bawk a, tumah anmahni ṭanpui turin an sawm ngai lova, a hre ber erawh chu Ziri kha a ni mai a, ani lah chu thu zep thei tak mai a lo ni bawk si. Tun hun atana an inhmuh hun hnuhnung ber atan chuan hmun dang ber aiin ruata pute in chu ṭha berin an hria a ni.

            Tluangi chu a theih ang tawka tuihnai leh thianghlimin a inchei a, a inthuamna te chu lar teh vur chu ni lo mahse a inhmeh in a nalh em em mai a. Chutiang chung chuan kal kawnga hmel hriatte be zel chung chuang Ruata pite in chu an thleng a, kawngkhar chu a han kik dat dat a. Inchhung lama lo chhawntu chuan kawngkhar chu a lo hawn sak a, Ruata chuan, “Awm dun zel tawh a va chakawm ve, inṭhen rih a ṭul si a,” a ti a. Tluangi chuan “U Ruat, kan han inṭhen dawn meuh hi chuan a va lungngaihtlak ṭhin em, kan han inhmuh a ka hlim nen, inṭhen a ṭul leh thuai si a. Ka khua a har leh dawn em mai”, a han ti a. Ruata chuan “Kei tak hian a sin inṭhen chu lungngai, a mipa zawk ka nih avang hian ka insum hram hram zawk a. Tunah kan awmna a dang ta si a, theih chu nise i kianga awm a, inhmu pha renga awm tluka thlakhlelh ka nei lo a sin.”

           Kan awmna inkar lah chu a inhlat em em mai si a, chanchin inhrilh zung zung theih lah a ni bawk silo. Tu chungah mah hian ringhlel lo che mah ila inhmu phak lova kan han awm tur ringawt mai pawh hi ka rilru min tihrehawm tak meuh a sin. Nang ṭhen che hi ka zuam thlawt lo a ni”, a han ti a. Tlaungi chuan, U Ruat, hei i pindanah kan awm leh daih mai ṭhin a, a mawi lo viauin ka hria a ni, i pite ho lo hawng se mak an ti dawn em mai,” a han ti a, Ruata chuan, “Kawng ṭhenkhat ngaihtuah chuan i thil dawn ang chu a dik khawp mai, mahse kan vanneihna a la kal tluang zel a ni. Ka pite chu an chhungin tukin chaw ei kham khan an motorin Zemabawk a an fanu pasal nei hnenah leng turin an chhuak a. Keipawh kal turin min sawm ngial a, mahse in kal san vek em em zawng a ṭha lova tih thuah chhuanlam ka lo siam a.”

            “Amaherawh chu kan lo haw tlai viau ang, chaw te kan ei nghal dawn a, an tih avang erawh chuan mahnia chaw han ei chu ka huphurh leh hle thung a, kan pahnih a ei tur rawng erawh ka bawl a ṭul dawn a ni. Heta i lo len tur i nute i hrilh em?” a han tih chuan, “Aw hrilh lovin em ni min rin, nuṭa te hnena len chu an phal khawp sin,” a han ti a. Chuti chu a ṭhat chu, ka pute lo hawnah an motor in kan va thlah mai dawn che nia, pawi lem lovang chu maw ‘Pawi lem lovang,” chuti chu a ṭhat chu.”

            Ruata chuan kuah chial chung chuan “Lammual a in lam nia i nalh zia kha, khatiang reng a i ke phah aṭanga i invuah chhoh dan kha a nalh ang tih pawh ka ring phak lova, khati em em khan an duhawm ang tih reng ka lo ngaihtuah ngai lo,” tih pah chuan a mal chu a zu piai sak hlak a. Tluangi chuan “Het, lei i chawi palh ang e’, tiin a lo fiam a. “Heng avanga lei chawi ch a man hla deuh a lawm,” ti chung chuan a zu chul sak leh zauh va.

            Nula tlangval inhmangaih ṭheuh ṭheuhah pawh hian hun kan inhman nawm hleih awm teh e. Ruata te pahnih inkawm dan anga inkawm hi zawng zaah sawmkua chu an awm nge ang tih a hriat sa a. Chu aia sang hret vek chu an nih a rinawm zawk a. Mahse anni hi chuan nun an thiam dun em na hi eng tikah maha inthlah a, inning tur chi hi an ni lo reng reng a ni. Nula fel ni si, Kristianna ngaisang tak si i rawn ti mai te hi a nih chuan i ti fuh bik kher lo mai thei a ni.Pathianin a duh zawng tak chu ni lo mah se a hmangaih ber leh duh ber tana a hun leh an hlim theihna tur a awmdante chu thiam loh tur a ni bik hauh lo.

            Ruata chuan,”Tluangi, kei chu ka haw chho leh rih dawn a ni a. Kan pahniha awm dun rengte chu duh thusam ni mahse, duh ang vek hian mihring hi a awm theih lem lova, kan inkara hmangaihna duhawm tak hi rinawm tak a kan vawn dun ka duh a. Nang hi chu ka ringhlel hauh lo che a, mahse heta in chhuak thlak dawna ka sawi kha i la hre reng in ka ring. Khang ka sawi te kha nang pawhin a dik ṭan tawh zia pawh i hmu vekin ka ring a ni.”

            “Tunah hian min hrilh lo na a, tlangval lehkhathiam tak tak i hmu ṭeuh tawh ang tih pawh ka ring a. Nangmah ngei pawhin an pianzia leh an dinhmun te an iai awm loh ziate pawh i hai lovang. Nangmah i inrin tawk avangin i tan buaina leh harsatna thlentu an nih i ring lo pawh a ni ang. Mahse min hmangaihna chu rinawm hle mah se kei chu i hmuh phak loh daihah ka awm tawh dawn a, i hmuhngun tura te chu tina i hriat mekte leh i la hriat leh zel tur, ni kar dan pawh awm hman lek lova lo langa i zuna uai turte chu an ni dawn a. Ka sawi tawh ang khan kei aia ṭha  leh duhawm tak tak vek an nih hlawm dawn avangin harsatna i la tawk lovang tih theih a ni lo a ni.

            “Nula ṭhenkhat ten, kan inhmuh leh hmain kei aia ṭha ṭha i hmu ang, min duh tawh lovang a, mahse min duh tawh lo mah la, kei zawngin ka lo nghak reng ang che. Mi pakhat tan ka piang a, chu chu nangmah i ni. Nangin miin duh loh chuan pasal ka nei lo mai ang, mi dang tan ka piang si lo. Kan inhmuh loh chhunga ka lo rinawm lo emaw, pasal ka lo neih emaw chuan Sakei seh, ti ngata lo intiam te pawh kum khat a ral hma a pasal lo nei ta leh sawn lo pai ta te an lo ni leh a, sakei lah chuan ‘seh tang nge’ a ti lem hlei lova. Nula in ka hmangaih che tih vawi sawm sarih hmun sawmsarih pawh ti se, innghah ngamna tak tak an ni love’ an lo ti bawk a. Amaherawh chu nang berin min phatsan erawh chuan  ka dinhmun awmdan tur hi ka hre phak lova, hmeichhia hi ka ring leh ngai bawk hek lovang. Amaherawh chu chutiang ka tih avang erawh chuan tunah pawh hian i hlimna ber tur chu Ruata chuan,”Tluangi ka ringhlel lo che ka tih tawh kha, nangmah i inrinhlelh loh ang bawk khan ka ring che asin. I ngaih a ngam thei lo a nih chuan (fiamthuin) nupa chauhvin an hman tur atana Pathian in a ruahman chuan kan han tinghet emaw chu niang,” a han ti a.

            Tluangi chuan, a fiamthu a ni tih hre rengin, “Tichuan nupa kan ni tawh mai anga maw? Nupa kan nih hun atan chuan ka ui lo asin. Mahse kan la ni rih si lova,” a han ti ve leh a. https://ekhai.com

            Chutiang i ti leh zel dawn a nih si chuan i tel lova awm ka huphurh in ka zuam ngang si lova, he lai Aizawl a awm ai chuan min thlang zawk dawn  lawm ni? Tichuan, khawvel ropuina hi ka pe ang che, tichuan kan pahnih in naktuk zingah Khawthlir panin kan kal dun daih dawn nia,” a han ti a.

            Tluangi chuan, “U Ruat, lo inṭhen in khawvel pumpui pawh hi kan karah lo tla mah sela, hmangaihna ka pek tawh che kha chu ka la kir thei tawh lo ka tih fo kha. Ka dam pawhin ka thih pawhin i tan hmangaihtu rinawm ber ka ni reng fo zel ang. Amaherawh chu eng anga rethei leh nunna beidawng pawh lo ni mah ila, chutiang ema hmingchhiatna chu nang pawhin min duhsakin ka ring thei lo. Ka hming chhiat leh ka mawi lohte chu keimah ang bawkin i hlauh ṭhin kha.

            “Ka tleirawl tirhte aṭang khan min han chhut kir leh la, hetiang kawngah hian hmingchhiatna ka neih i hre tawh em? tuna kan awm dan pawh hi ka hmangaih ber leh ka duh ber tan a nih avangin leh tu hnenah mah a chhuak dawn lo tih ka hriat avangin tlangnel takin ka hmangaihna che chu ka lan tir thei a ni chauh zawk a, hei pawh hi Pathian ramri kham chu kan pelh hmel a ni. Hmelmate chu nei ve chu ni ila, hetianga kan awm dante hi theihtawpa ka hming tihchhiat nan hriam hreiah an hmang ngei ang. U Ruat, ka awm dan ang hian min hmangaih mai la, hming chhiatna khuarkhurum thuk takah chuan min hnuk lut lo hram ang che aw, ka hmangaih che, ka ring che min ti si a,” a ti a.

            Ruata chuan a fiamthu ti tak chu a ṭangkai hle tih a hria a, Tluangi a ngaihsanna pawh a zual sawt a ni. Tluangi’n, a hming chhanhim tuma a han hauh dante chu a ngaisang em em mai a. “Tluangi, i rilru ṭhatna ah chuan lawmthu ka hrilh nawn leh a che. Ka rin dan che a bul aṭangin a la dik chho ta zel a. Hei avang tak hian a ni i kianga awm reng ka chak leh zual ṭhin ni. Englai mahin min theihnghilh suh ang che aw,” a han tih leh chuan, Tluangi chuan insum harsa a ti a, “Ka dam chhungin ka theihnghilh dawn lo che asin,” tiin amah chuan Ruata chu a han kuah ngawih ngawih a. https://ekhai.com  PAGE - 6 

Comments