KAN HLIMNA TUR – PAGE 4

429

KAN HLIMNA TUR – PAGE 4

Nuṭa puan thuah nei lo.

              “Ka pi, kha in inkhawm vek dawn em ni?” “Aw, khawm vek dawn, eng nge ni Ruatte?” A, eng dang ni love, ka inkhawm ve rih lo mai dawn a, ka chau deuh tlat mai, in ka lo nghak ang e, mahse ka lo muhil mai thei a, ka ṭhiante an lo leng a nih pawhin min kaitho mai dawn nia”, tiin, a pite chuan an chhuah san ta vek a.

              Ruata chu amah chauhvin, ama pindanah chuan a awm a, Tluangi chu inkhawm ṭhulh chuan a lo kal a ring bawk lova, a khum chunga lehkha a chhiar chu a lo muhil mai tak tak a. Inkhawm bang a pi fate ber chuan Ruata muhil biangah chuan a lo chul a lo chul a, Ruata hi a ngainat awm em avangin a pu fate pawh hian an nel em em mai a, nula tlangval ni deuh vek tawh mah se a bulah hi chuan naupang chhia ang mai an ni a, an ngaina em em mai ani. An tê ber pawh chu Ruata muhil bulah chuan a tawlh a tawlh a. A bulah te chuan a han mu ve leh ṭhin, Ruata muhil lo harh pawh chuan a rawn hmu mai reng a, Fakte, i lo hawnna a rei tawh em? ka va muhil rei awm ve, i nute an lo haw ve tawh em? a han ti a. “Hawng daih tawh e, i muhil nghet lutuk a, i bulah ka awm reng a lawm, i harh thei si lo. U ruat, keini chu ka nute nen U hmingi te inah kan leng leh daih dawn a sin, lo kal ve tawh rawh,” tia a sawi lai chuan, sitting room kawng khar chu an rawn kik dat dat a, Ruata pi chuan a va hawn a, pawn a mi chuan, “Ka pi, U Ruata a awm em le? In chhung in dam tlang maw?” tia hawihhawm tak a zawt ri chu pindan dang aṭang chuan Ruata chuan a lo hre phak a.

              Ruata pi chuan, “Awm e, hawh, lo leng lut rawh, Ruatte, hei i ṭhiante an lo leng, lo ṭhu rawh, a lo kal mai ang”, tiin ṭhutthlengah chuan an ṭhu dun a, Ruata pi chuan “Chu nula chu ka hmuh ngai pawh ka la hre hauh lo mai, a va han ṭha kher em! tiin a lo suangtuah hman a ni.

              Ruata chuan, ‘E, tute nge ni ang aw. ti chung chuan a pi fapa Faktea kai chung chuan pindan aṭang chuan an lo chhuak ve ta a.

              “Aw khai, Tluangi a ni reng mai, in dam tlang maw? Nimin khan i nu ka hmu a, ka han chah ta mai a nih kha. Ka pi, hei hi Lalnunltuangi, Pu Biakliana fanu upa ber a nih hi” tiin a pi chu a han hrilh a. A pi chuan, ‘Zuk ni taka a, Khawthlir kan thlen lohna a rei ta a ni, mahni fate ho pawh kan hre hlawm ta lo che u a, kan tar ve ta a ni e, i exam ve dawn em ni le?” a han ti a. “Dawn lo ve, kan chhungin Mission Vengah sawn kan rawn awm thla ve tawh a, kumin hian pawl sawm ka zir ve chauh a ni. Rawn tlawh che u hi ka tum ṭhin a, mahse ka hman thei ngang lo a ni”, a ti a, Ruata pi chuan Khawthlir a an awm lai chanchin te chu a han hrilh vel leh nual a.

              Faktea chuan Tluangi chu a lo en duh em em mai a, Tluangi pawh chuan  mitsir chuan a hmu leh zeuh ṭhin a, zah tak si chuan Faktea chuan Tluangi chu a pan ru hret hret a, Tluangi pawh chuan a lo hmu ve reng a, a bul a lo thlen chuan a mal chungah a lo kai ṭhu a,”Valte, tunge i hming kha?” a han tih chuan,”Lalfakawma, mahse ‘Fakte’ min ti” a han ti reuh va, Tluangi chuan, “Kei pawhin, ‘Fakte’ ka ti ang che, i tlangval hle mai,’  han ti a.

              Ruata pi chuan,”Tluangi, len ka duh tlat mai a, Chhinga Vengah kan va leng lawk ang e, ti khan in lo nghak mai rawh u, Ruatte, i pu chu a inkhawm leh nghal in ka ring a, kan han len chhuah san rih mai ang che u, Fakte, hawh le i kal ang” tiin an chhuak ta a.

              An in hmuh loh chhung kha rei an ti em em mai a, tuma’n kan dem thei lovang, Ruata awma bei hle hle chu. Ngaihzawng nei pawh a an hriat loh, leh dem tur pawh an hriat loh chu Ruata awm nghêng chuan thlamuang leh lungsi takin a hmangaihna zawng zawng nen Ruata chu a inkuah tir chial mai a ni. Ruata chuan, “Tluangi, ka ngai hle ṭhin che a sin, i tel lo hi chuan thil han tih vel pawh hi a nuam tak tak lo. Ka hmuh loh chhungin hei i lo nalh leh zual a nih hi, ka mit ang hi miin an pu ve ngei ang a, ka hriat hauh loh mite chu ka thik mai ṭhin ka ti, in Sikul kalnate chu a nuam zel em? theih tawk i chhuah rih a niang chu, ” tiin hlim takin an inkawm dun a.

              A ṭhiante ho lehkhate chu a han pein an han chhiar a, a ṭhianten Ruata an fakna hlir mai leh a awm loh china a khawhar zia leh a khawngaithlak zia te, tihlawm tuma, lo zar buai tam tak te chu awm mah se, a rinawmzia leh a tana a ṭhat zia thu te, tin, Kohhran lamah leh Ṭhalai lamah te tun hma aia nasa in a inpe a, a rilru leh a hun zawng zawng hi a hmang tih mai tur a ni, ti ila an in lam hna hi a khawih fel vek hman bawk si tihte chu an rawn sawi chu a ngaithlâk a nuam hle mai, ka lo thlang fuh em che a ni e,” a han ti a.

             “U ruat, ka nu leh pain zanriah chu kan lo ring ang, zanin chu riak turin rawn hruai ang che, kan khaw lam pawh a chanchin kan hriat châk hi, ” an ti a. Chuvang chuan i pute lo hawn hunah kan in lamah kan phei dawn nia,” a han ti a. Ruata chuan, “A va tihzia awm ve, mahse riah em em te chu, tu kiangah nge maw ka han mut ngawt ang le”. In ina riaha i bula ka mut si loh chuan ka duh miah lo a nia”. a han ti fiam a. Tluangi chuan “I duh phawt chuan ka nu leh ka pa karah i mu dawn nia, chutia i ngen tlat chuan. I e, ka pi pawhin a sawi a sawi ṭhin che a. Kan pahniha kan han awmdun hi chuan kan sawi leh ṭhin che a, ka pi pawh hian kan pahnih chungah hi chuan a rilru a dah nghet ve hle niin ka hria, a sawi apiangin nang fakna thu hlir a sawi avangin. Vawiin pawh hian ka lo kal tur hi ka rawn hrilh ve vek a, hmuh che pawh a chak ngawt a sin”, a han ti a.

              Ruata chuan, “Ti rawh ka insiam chhungin ka pindan lamah min lo nghak rawh, heta i lo awm chuan ka khawhar lutuk ang,” a han tih chuan, Tluangi chuan, “Khai, pindan em em ah te chuan, tah hian ka lo nghak mai ang che, ka khawhar rei loh nan han insiam zo thuai la a ṭha zawk ang,” a han ti ve a.

              Ruata chuan, “Chuti tur em ni? min han hlau thar leh dawn em ni zawk? nge, zanina in sitting room a mu tura min duh chuan le ka hre thiam mai ang a, ka pi te ho chu hlau thawng duh suh, i tana mawi lo tur chinah chuan engah nge thil ka ngaihtuah ang. Hawh lo lut ve mai rawh, mahni te chuan a khawhar thlak tur zia mai chu”, tiin an inzui lut ta a.

               Mi zingah zawng ṭhian ṭha an ni a, an pahniha an awm dun hi chuan ṭhian ṭha nihna chu an lantir ṭhin.

              Ruata pindan khum bul maiah chuan darthlalang taksa puma lan theihna chi hi a lo in hung a, Ruata leh Tluangi inkuah riala an ding dun chu chiang em em mai hian an lo lang a, chutiang ang chiah chuan an la inhmuh duh ngai loh avang chuan darthlalanga an thla chu an thlir vang vang a, in hmeh pawh an inti dûn hlê a ni ang, an nui dûn sak a, Ruata chuan Tluangi biangah chuan a piai hlak a, khum bul chair-ah chuan Tluangi chu a ṭhu ta a.

              Reilotê ah chuan a pite ho leng chu an lo hawng a, a pu pawh chawhnu inkhawm bang a lo hawng bawk a. Tluangi chuan “Pi Zual, hei zan in tlai chu kan in lamah u Ruata chuan chaw ei se ka ti a, ka nu leh pa’n an hmu chak a, han hruai hawng ang che an ti a, zanin chu a riak nghal mai ang, a remchang ang em le?” a han tih chuan, Ruata pi leh pu chuan ‘A tihzia nasa ang chu, mahse riah em em te chu, tih leh, zan rei a lo hawn nan chuan a hla deuh si a, a, Ruatte, nangma thu thu a ni e. Mahse tu inah pawh nundan mawi takin an awm ngai e’, an ti a.

              “A nih, Pi zual, kan kal mai ang e?” tiin Ruata leh Tluangi chu an chhuak dun ta a. Faktea chuan Tluangi kut chu a lo vuan ve reng a, mi ṭha leh ngainat awm hi chu naupang te hian an hre rang hle ṭhin reng a ni. Tluangi chuan “Fakte, Mangṭha aw, i tlangval hle mai”, tiin Faktea pawh chuan a vawn chu a thlah ta a, Faktea chuan Ruata chu a beng bulah a kuai kun a, Tluangi hming kha a lo hre tawh lova, a lo zawt hi a ni a. An gate an hawn lai chuan Faktea chuan, “U Tluang,  mangṭha, i lo leng leh dawn nia”, a han ti reuh a, Tluangi pawh chuan mangṭha le, ka lo leng leh em em ang”, tiin a han chhang let a. Pi Zuali chuan “Faktea lah chuan a ngaina viau mai che a, i lo leng leh thuai dawn nia,” a lo ti a.

              Ruata leh Tluangi chu tlai lam ni nem tawh hnu, Chawlhni tlaia leng an tam vanglai takah chuan muangchang hian Mission Veng lam pan chuan an kal dalh dalh a. A chang changa hmel hriat han biak tih mai loh chu an pahnih chuan eng thu nge an sawi hriat lohvin an ṭawng sap sap a. A tawh  apiang mai leh a pelte chuan ṭha ti lo an awm lo hle a, an leh hawi leh ziah hlawm a. Nula lamin Ruata chu ṭha an ti zual a, tlangval lahin Tluangi chu hmuhnawm an ti a.

              Anni lah chuan tu dang ngai awmlo takin lungrual tak maiin an kal a, Tluangin a ṭhian zirlai puite a be zauh zauh a. Chu mi ni a an in lam pana an kal dun chu min an thlir duhin an ngaih belsa ringawt a. ‘An va in awm ve aw’ ti tawk lah an tam. An veng an han thlen meuh phei chuan Mission Venga a ṭhiante phei chuan an lo dem nak nak a, mahse chhan dan tawk an thiam a, an hnung lamah an rawn thlir zui a ni tih hre reng chung chuan an in chu an thleng ve ta a ni.

              Zan inkhawm ban chuan Tluangi te inah chuan an ṭhu ṭhap a, sawi tur an ngah hlawmin, an hlim dar dar hle a. An te ber pawh chuan,”Ka ṭhiante kha an dam em? min rawn ngai ve ang em le? U Ruat, i hawn leh hun chuan ka ṭhiante lehkha ka thawn ṭeuh duh a nia,” te a lo ti ve chal bawk a. Naupangho an mut hnu chuan Tluangi nu leh pa leh a pu te, a nau nula ve tawh tak leh, an mipa tleirawl ṭan ve tawh te chu an la ṭhu ṭhap a. Kan sawi tawh ang khan a pi tih loh chuan, anní inkawm dan hi tuma’n an hrethiam pha ve lo va, unau nuṭa, farnû anga an inen tlat avangin. https://ekhai.com

              Chumi zan pawh chuan an fapa lo zin angah an ngai mai a, tin, Ruata hi mi zingah pawh an chhuang ru êm êm a ni. An hlim hle a, ṭawngna tur pawh an inchan lo hial a ni, khaw lam an ngai ve hle bawk si a.

              Tluangi nau nula L.Rinzuali mu tur chuan “Ka u, u Ruata chu ka khumah hian mu mai rawh se, zanin chu i bulah ka mu ve mai ang e aw’,  a han tih chuan, Tluangi chuan, “Ani thingtlang mi mai mai, sitting room ṭhutthleng-ah hian mu se a tawk mai, a nih loh pawhin ‘Ka nu leh pa karah’ chu mi a han sawi chuan an han in melh zauh a, an nui dun sak a. Tak taka, Zualte, i khumah khan kan pahnihin kan mu dawn nia, zanin chu nuṭa puanthuah nei lo kan thleng a, ka khum ka han kian poh a niang chu”, a han ti a. A pi chuan, fiamthu ti tak deuh hian, “Nia, nuṭa te chu duat tur”, a lo ti ve sek bawk a.

              Rei tak thlengin an inkawm khawm a, mut zai an rel ve ta a. Tluangi chuan, u Ruat lokal rawh le, i mu tawh ang u”, tiin an pindan lamah chuan an inzui lut ta a. Zuali lo mu tawh chuan, “U Ruat, kan inkarah hian lo mu ta mai che, i hreh vak em ni?” tiin a lo fiam a. Ruata chuan, A khai, i bialpa kha emaw min ti ang a, min khawih rethei lutuk ang e, he lamah hian ka mu mai ang e” tiin Zuali khumlu lam Tluangi khum bul ṭhutnaah chuan a ṭhu a. Tluangi chuan a mutna te chu a han siam sak a. Tluangi khum han buatsaih vel dan te chu mut hi a châkawm hliah hliah mai a ni. Tluangi khum han siam zo chuan, “U Ruat, i mu duh mai tawh em?” “Duh lem lo ve, ka mut pawh a chhuak lem lo”. Chutia an ṭawng lai chuan Tluangi nu chuan, “Ruata naktuk zing chaw ei khamah aw i hawn ang,” a rawn ti a. Ruata chuan, ‘A, ka nu Zual, zingah ka haw ang e, ka pu khan tih tur neiin ka hre tlat mai’, a han tih chuan “Nangma thu thu le,” a rawn ti leh a.

              A nu nena an in be zo chu Tluangi chuan mut a lo siai zauhva, “i mut a la chhuah loh chuan hei hi i hmu tawh ngai em?” tiin lehkhabu pakhat hi a rawn phawrh chhuak a, a han entir chuan ziak loh bu kara amah Ruata thla a kawl sak chu a han hmuh a, Ruata pawh chuan Tluangi rilru chu a hrethiam mai a.”Hei ka la hmuh ngai a ni hauh lo mai, kan enchiang teh ang, min lo tibuai suh aw,” a han ti a, ngawi reng chung chuan an ṭhu dun a. Reilotê ah Zuali pawh chu a muhìl ta mai bawk a. https://ekhai.com

              Tluangi hi nula fel, a bialpa pawh hriat theih loh khawpa nun dan hmang thiam, la upa silovah chuan mi bula awmdan thiam tak, nulat tlangval kawngah tuma sawisel la hlawh lo, rual kawm thiam tak, nun dan zahawm, a tleirawl tirhte aṭanga Ruata hnena a hmangaihna zawng zawng hlantu ania. Ruata nen hun tam tak an la inkawm lo nain inringtawn leh inthlahlel tak, Ruata lakah pawh chhiatna la nei miah lo, nula tlangval induh pangngaite tih ang erawh chu a hunah chuan hrethiam tak a ni a. Tuman kan dem phah bawk hek lo. Tunge a bialpa ti se, Khawthlir khuaa a ṭhiante leh a pi lo chuan tuman an chhang thei chiah lovang. Chutiang khawpa nun dan thiam chu a nia, mahse a hmangaih ber tan erawh chuan a tawk hre tak a ni.

              Tluangi chhungte chu an muhil vek tawh a, api erawh chu a khuh kharh kharh a. Hun eng emaw ti chen chu an han inkuah dun a, nuṭa leh farnu an la nih avangin mut a hnu a, mit mei ven a ṭul, in vei dun tak chung chuan mumanga inhmuh tum ranin mahni mutna tur ve ve chu an pan dun ta a.  PAGE - 5 

Comments