KAN HLIMNA TUR – PAGE 2

416

KAN HLIMNA TUR – PAGE 2

Khawthlir –

Khawthlir tláng chho hi a khaw lu mai aṭangin phùl nuam êm êm maiin a cham chho vek a, a tlang ṭan tir maiah chuan field zau tawk tak a awm a. A chhak lawkah chuan hawi vel nana remchang takah hian thlan lung pahnih zau tawk taka dawhin a ding a. Chu hmun aṭang chuan ram hla tak takte a langin hawi vel nan a remcháng êm êm a. A chhak lam te pawh chu chutiang ang a hmun nuam tak mai phulin a khuh vek a ni a, nula leh tlangval te tan mai a len nan a nuam a ni lova, nu leh pa, pitar putar, naupangte chenin Khawthlir tlang chho hi chu len nan tak an hmang a ni.

                A hnuai mai chu kham sang takin a hual vel a, tunlai thlenga ‘Zialung Kham’ an lo tih maite, tin, Zialungkhawchhan Hrangkhupa te leh Pu Hawnglaia te ho lo chên kualna in a vel hian a hual vel bawk a. Tin, hmanlai thawnthu Pu Hmawnga te, Pu Zilha te, Zialung kham huai an tihte pawh helai hmun velah hian an lo tap ve bawk a ni.

                A tlang a sang chho zel a, a hnuai lam ai maha hawi vel nana nuam leh thengthaw, ṭhian hova han lenho nana nuam tak vek mai a ni a. A chhak leh hla deuh hlekah chuan tuna a khua in a lo put chhan “KHAWTHLIR TLANG” chu a awm ve leh a. Helai hmun aṭang hian a ni tlangval huaisen Chhuanvawra’n a unaute that zotu Hrihleia leh a sipaite a lo thlirna leh a lo thah zawhna chu. He mi hmun aṭang hian Hrihleia khua chu a pe un mai a, han ngamzia zang hi an ni lova, mahse Chhuanvawra chuan a ral rêl thìam chhuahin a bei ta a, a lo kal hmasa apiang mai chu a lo that a, an lei leh an beng pakhat a hlep zel a. Chung ami thah lú chu a hnua lo kal a ṭhianten mahni thah angin an lo hawn zel bawk a. Mahse an beng leh an leite en chiang se chuan mi thah sa a nih an hre ngei dawn a. Chhuanvawra’n Hrihleia a chan hlan chuan an lo ai a, Chhuanvawra chu mi dawihzep ber, ral pawh bei ngam lovah an lo sawi a. A pa te leh a nu, a farnuhote chu zak em em in an lo siam hman a. Mahse a tawp berah chuan mitin maiin a an ṭih leh an hlauh êm êm mai Hrihleia chu a lo kal ta a, huaisen takin a lo that ta a ni. Tun thleng pawh hian chu mi hmuna tlang “Khawthlir tlang” ah chuan Chhuanvawra’n Hrihleia khua a thlirna akhup nghahna leh a silai mu dahna an tih mai chu hmuh theih a la ni.

                Chumi tlang nuam em em maiah chuan chawlhni tlai dang ang bawkin nula tlangval, naupang chenin leng an tam hle mai a. Ruata te ṭhianho pawh chu hlim tak leh lungrual takin Khawthlir tlang panin phul chho nuam takah chuan an in chhepchho ve mek bawk a. Han ṭhut nana ṭha zawng zawngte chu chu mi tlaia lengte chuan an lo luah khat vek tawh a, phûl chho tawp a chhak lawka mual pawng a chung záwl nuam tak maiah chuan ṭhut hmun an rem ho ta a. An ṭhian palite chu ṭhuhovin an nui dar dar a, Ruata leh Tluangi chu chhuah lam hawiin Ralvawng tlang inhung lurh mai chu thlirin a tuk maia an inṭhen tur an lungngaih zia leh an huphurh ziate chu an sawi sep sep a.

                An innel ṭanna pawh a la reilo em mai a, an hlim ṭan ve tak tak dawn tihin, Aizawl Mission venga an in sak thar luah tura kal a pa’n a ti thut mai si a. Chu mi tlai lam ram hring mawi tak tak ni tla turin a chhun hring dup lai hmunah chuan an tana hun tawite mai chu am takin an hmang dun a.

                Ruata chuan,”Tluangi, hmannia ka sawi tawh ang khan, khawi hmunah pawh awm ila, rinawm tura kan intiam tawhna hi hre rengin, tumah inphatsan loh kan ti tlat ang chu. I hmaah thlemtu duhawm tak tak, kei nena tehkhin ralah phei chuan i tana ṭha tur leh i nawmsakna zawk tur an ni ang, chungte chu hetiang a kan inṭhen hmaa ka han sawi mai hi ang lo pawh i ti mai thei a. Mahse, nangmah ka hriat chian ang bawk che a mi’n an la hriat chian dawn che avang a ni. Tumah in mi ṭha leh mi dik hi an hai ngai lo. Chu lam lovah pawh i mizia leh i nungchang thlir lova, i pianphung duhawm tak, tu tan pawha taksa thila awhawm, mipate rilru put dan tidanglam vek khawpa i fuke invuah dante thlir liam mai mai theih loh khawpa duhawmna i pianpui avangin i hmaah rui chi leh rui lo chite chu an la rawn inpho lang dawn a. Chung ang te chu a lo la thleng ngei dawn tih ka hria, mahse, ka hlauthawng lo che a, tun aṭang erawh chuan hre lawk turin ka duh che a. Tuna i nun dan mawi tak hi chhawm zel la ka duh a ni. Ka huphurh ber erawh chu nangmah nen hun eng emaw ti chhung kan inṭhen tur hi a ni” a ti a.

                Tluangi hi nula duhawm an tih zingah hian a tling ve hrim hrim mai a, a hmu apiang duh zawng mi nih a tling a, a chezia, a nunphung, a hawiher, mi a biak dan kawng tin rengah. Tin, a taksa invuah dan hi amah hi nu lian tak han tih tur chu a ni lova, mahse a pianphung ang angin a invuah dik em em a. Awmbawr ṭha tak, a lian lam hrat a ni, tia tlangvalho in an han sawi pawh hian a taksa timawitu, sawisel chi ni hauh si lova lian a ni a. Ama pian danah hian tlangvalte duhthusam ang hi a kim hle a ni, chu chu tisa taka zuk thlirtu tan leh a nun ngainat awmna lam lo entu tan an duhawm em em avangin Ruata pawhin a sawi lang kher a ni.

                Tluangi chuan, “U Ruat, inṭhen hi chu kei tak hian asin lungngai, i kianga awma, hlimna leh lungngaihna leh lungawilohna te lawmna te ka sawina ṭhin, lawmnaa min lawmpui thiam zia te leh lungngaih laia i mi tawrhpui dan te, i bulah hi chuan ka thlamuang hliah hliah a. I bulah hi chuan awmdan tâwk pawh thiam lo ka inti hial ṭhin, nu leh pate bula naupan laia pangchang taka kan awm ang mai hian ibulah hi chuan ka awm ṭhin si a. https://ekhai.com

                “Vawikhat te mah mi ringhlel zawng a i ṭawng duh miah lo hi ka lawm a, keimah hi ka thiamlo niin ka hria, u Ruat, ka rilru hi hlauhthawnnain a khat ru reng a, mahse ka sawi ngam ṭhin lova. I pianphungah ngawt pawh hian mi tam tak chu an hmin mai ang tih ka hre sa, chu lam ai mah chuan i nunphung leh hawihhawmna zawng zawngte hi hre lo an awm si lova, nu leh pa lah nangmah fak lo che an awm bawk si lova, kei chu ka hlauthawng a ni, i kianga ka awmlai reng pawh hian nangmah duhtu che an tam si a. Mahse ka laka rinna i lo nghah ngheh zia ka hriat hian ka lo rinhlehnaah che chuan, i mi ngaihdam ka dil duh a ni. I hriat angin nang chauh lo chu tumah kawm ka la nei lo a, hmun hranah pawh awm ila nang ka hmangaih tawh che avangin tumah dang tan ka hmangaihna hi ka pe leh dawn lova, kan nulat pui tam tak ten an tiam ang an hlen leh lo ang mai mai hi chuan awm ka tum lova, ka awm hek lovang. Chuvangin i mi rin ang chiah hian ka awm dawn a, chanchin erawh chu a chhia a ṭha kim takin kan inhrilh ṭhin dawn nia. Reilotê ah nang pawh Matric Exam turin i lo kal dawn a, hlim takin kan la inhmu leh thuai ang chu. Ka hmangaihna che hi tithlâwnin tibeidawng lo hram ang che”, tiin chu tlai ni eng mawi tak mai thlir chung chuan lungrual takin an ṭhiante nen chuan in lam panin an hawng thla ve ta a. Pawl sawm zir chauh ni mahse an titi duh te chu an puitling ve hle ani. PAGE - 3  

Comments