KAN HLIMNA TUR – PAGE 12

391

KAN HLIMNA TUR – PAGE 12

Rinawmna rah –

            Tichuan a nupui in inbualna a siam sakah chuan a inbual sarh sarh a. A inbual lai chuan hmeichhe tam tak chuan thinur phah nan an hmang ngei awm si a. Matea nu hi chu a mak ngawt mai, hetiang  mi hi tam pawh antam lovang a ti rilru nap nap a.

            Zan mut dawn chuan Tluangi chuan MAteapa, ‘Ti rawh leh, tih tur pawimawh tak kan neih kha, chumi kan tih zawh chuan kan mu dawn nia’  tiin an nupa chuan an ṭhiannu Lalmanliani tan chuan ṭhahnem ngai takin an ṭawngṭai dun a. Chutiang ti thei khawpa an nupa an awm chu an lawm dun em em a. An mut pah chuan Tluangi chuan zawt lem lo mahse Ruata chuan thil awmzia zawng zawng chu a hrilh fai vek a.

            Tluangi chuan “Chuvang chuan a lawm mak ka tih, eng vangin nge ka mittui te kha a tlak pawh ka hre thiam mai lova, mahse i rinawmna avanga ka lawmna mittui leh Mani ṭawngkam, rilru inlamlet nun khan min hneh em em bawk nen, Pathian hnena kan dilpui hi a phu hliah hliah ka ti. Hmuh pawh ka chak ngawt a sin, ral khata min rawn ngaina dertu (fiamthuin) ‘i bialnu hlui a lo ni bawk nen’ …. U Ruata, ka bang ka bang, Matea a tho vang nge, i farnu a ni tak e,” a han ti zui a, hlim taka nui dun chung chuan mumang rama chen an thlang dun rih ta zawk a.

            Chawlhni zan a ni a, Vanlalruata te nupa chuan Kristian Hlabu No. 93-na “Khawvel hi bo mahse Isua ka nei” tih hla hi an sa a. An sak tawpah chuan an fapa Lalngaihawma chuan chiang vaklo hian “Sam 23-na “Lalpa chu min vengtu a ni a” tih chu a sawi lau lau va. A sawi zawh chuan Vanlalruata chu a ṭawngṭai leh nghal a. An chhung inkhawm bang an lo ngawih ṭhap lai chuan an ṭhenawm lawk Pu Roluahthanga te inchhung chu a ri ram ram, chiang mang lo nuaia pa ber ṭe deuh  ṭhat ṭhat hi a hriat theih a.

            Chulai karah chuan an fanu Nu-ek – an tih maite chu a ṭap hlap hlap bawk a. Ruata te nupa chuan ngawi rengin an ngaithla a. Tluangi chuan, “Ṭhenawmte chhung hi chu an khawngaithlak ve em mai, chutiang chu a ni reng mai a, thawm ngaihthlak a hrehawm ngawt mai. Engemaw ti tala ṭanpui dante hi awm sela, Pathian hnena dil ngawt mai loh phei chu ṭanpui dan ka hre lo hle mai,” a ti a. Ruata chuan, ‘Nu leh pa ber maiin inchhung ngaihtuahna tak tak an neih loh chuan fate hi ṭha turah chuan rin tur an ni lo sa a. A pawi ngawt a ni, Pu Rova te nupa chu an awm dan a lutuk deuh. An fate pawh awmdan ṭha hrilh tur chuang an awm lo a ni ber a.

            “A! a thu hrimah tunlai mi kan danglam a, mahni fate pawh enkawl peih lo, awmpuite pa pek vek mai leh, awmpui ngai lote pawh thatchhiat avanga awmpui neih hramte an tih duh zawng a ni a. An khawilo kal hawn reng rengah pawh faten an lo ban lawp lawp a ngaihsak peih lo, pawm peih hlawl lo nu leh pa hi kan tam hle tawh a ni. Chutiang chu a lo nih avang chuan fate zilh a, zirtir a, fuih chu a hnai lo hle mai ani. Awmpui nei ṭha hle pawh ni mah se, nu leh paten an fate hmangaih taka an enkawl ang hi chuan tu fa mah hi an ding khaw chhuak tak tak ngai lo. Chuvang chuan tunlai ṭhangtharte sual em emna hi zawng a tlangpui berah chuan nu leh pa zir loh vang a ni ber mai. Fate enkawl peih lo kan tam lutuk ta deuh a ni. Pu Rova te chhung pawh a dik takah chuan pa berin zir hek lo, an nu lah inlam enkawl aia pa te thang bo hlana khawlai len leh vah chhuah ringawt mai hnaa neih an ni tlat mai a, a pawi a ni. An fanu neih chhung a la tet teh lul nen hian an ring lutuk a. Pu Rova lah hian an nu awm dan hi a hre lo nge, a hre ngam lo ni zawk ni.

            “Fate duat tur tih avanga hnathawh phal loh emaw, thil tih tir phal reng reng loh maite hi erawh chu a dik hauh lova, sawi ta zel ila, tunlai nula tam takte hi puan pawh tah thiam lo, buh pawh thei thiam bawk silo zu tam mai a!!

            “Awmsa ei tawr mai hi kan theih tawka nih mai awm hi maw! An te emaw an lian emaw fate chu an tih theih tawk ang zela chhawr thiam nu leh pa chuan an fate chu an siam puitling ngei ngei a ni. Keini pawh fanu fapa kan la nei zel mai thei, kan ṭhian duna kan ṭan rual a, kan ṭan tlan a ngai hle dawn a ni. Chung zawng zawngah chuan Pathian awmpuina kan mamawh ber fo vang,” a ti a.

            Tluangi chuan, “A ni ngawt mai, kan ṭangtlang anga, Pathian min puihna kan dil zel dawn nia,” a lo ti a.

            Tichuan hun a lo ral zel a, Vanlalruata te nupa chuan fanu duhawm tak an nei leh tawh a, an inchhung ti hlimtu leh lawmna thlen fo ṭhin tu te chu an fate bakah an nupa nun inkawm ngeihna leh ṭhenrual chhung leh khatte nena an inkawm ngeih tlanna chu a ni fo ṭhin. Tlai khat chu Ruata pi leh pu ṭawngṭai chuan –

                                “Lalpa,

            I ro luahpui tura fa min siamte, min duhsakna ei leh bar kawnga malsawmna te, silh leh fen tlachham lova min pek te leh, taksa hrisel duhawm tak min pek zawng zawng avangin i hnenah lawmthu kan rawn sawi a ni.

            I rawngbawl tura mi i ruat lawkna awmah i hna zawma thawk lo kan nih chuan min ngaidam a, min kawhhmuh a, eng kawngah emaw tak rinawm taka i lo buatsaih ti puitlingtu kan nih theih nan malsawm bawk ang che’ tia a dil lai chuan Vanlalruata te nupa chuan an mahni pahnih karah chuan an lo la lut ve lo thei lova, an pu ṭawngṭaina pawh chu an lo pawmpui hle reng a ni.

            Lalnuntluangi chuan rawng vel a bawl zawh hnu chuan,  tuihnai takin a inchei a, fa pahnih a nei ve tawh nain a la nalh dawn chauh mai hi a ni a. A nunhung leh chezia hian a chawimawi em em a, chu chuan amah mai ni lo, a pasal leh a pasala nu leh pa, ama nu leh pa leh unaute thlengin a chawi chhova. Tin, amah lahin pasalte tan ngainatawm taka awm chu a thil tum ber leh a rilru tihlimtu a ni a.

            Chutiang ang thil rilru thianghlim tak chu pu chung chuan fanu chu pawmin a fapa chu a bulah chuan a ṭhu ve ran bawk a, an pa office bang lo haw tur chu an lo thlir  ṭhap a. Pa ber tan chuan haw a nghahhlehawm àwm teh e. An pa lo haw an hmuh ve leh chuan an thova, an Gate thlengin an kal a. Ruata chuan ral aṭang chuan a nupui leh a faten an lo thlir ṭhap tih a hmuh chuan a pen a zangin a kal chak sauh sauh a. A rilru chuan, a ṭhiannu ngainatawm zia leh fel zia te, a thlakhlehawm zia te chu hre belh dawn chauh maiin a in hria a, khawi hmunah pawh kalin a haw hma, haw tlai emaw hmel hlim tak leh amah ngai hliah hliah ni awm taka a han awm ṭhinte chu a ni tan pawh ngaih loh leh thlakhlelh loh rual a nih loh ziate chu a inhria a.

            An nulat tlangval inkawm hun lai tawh a ‘U Ruat, kan la hlimna zawk tur a ni’ a lo tih ṭhinte chu mipat hmeichhiatna lama in sum mi nih a ṭhat zia tih lan nana a sawi lo ni tawh mahse, an nupa nunah, chhungkuaah, kawng tin renga an hlima, an lawmna zel tur a lo nih zawk ziate chu, an hun liam te leh anhman lai mekah pawh a ti lang chiang hle mai a ni. https://ekhai.com

            Nupui rintlak, ka phurrit mi chhawk zang khai a, ka tlin lohna leh kaihhruai ngai ka niha mi kaihruai a, dawhthei taka min hmangaih a, min tihlim ṭhin nupuia ka lo nei hi chu, a vanneih thlak mang e! Hetiang mi hi awm ve tak ang maw aw, “Kan Hlimna Tur’ a lo ti dik mang e! tia ngaihtuah zel chung chuan nghakhlel taka lo thlirtu a ṭhiannu leh a fate bul chu a thleng ta a. An fapa chu a pa hnen lamah a tlan a, a thil ken velte chu a pawm sak a, an fanu pawh chuan nui hiai hiai chungin a pa chu a lo vai ve lap lap bawk a.

THE END.

(A TAWP TA)

Writer Lalengmawia Ralte.

Comments