KAN HLIMNA TUR – PAGE 11

366

KAN HLIMNA TUR – (PAGE – 11)

Rinawmna rah-

            Hun rawn inher zel te chuan hun thar kum thar lawmawm tak mai chu a rawn her chhuahpui leh ta a. Kum thar an hman zawh veleh Ruata pate pawh Aizawl lamah an lo zin thla a. An pute ho nena an han inhmu khawm chu an hlim dar dar hle a. Ruata’n thil awmzia a han hrilh a, a pute hi nen chuan thil rel felin Ruata leh Tluangi te inneih tur chu engkim a ruahman fel vek tawh a. January ni 25 chu Ruata leh Tluangi te inneih nan an ruat chu a ni.

            Tluangi piin leng tura a sawm avangin Ruata chu Tluangi nen chuan a pi chu an kar cheh a, a pi chuan an inneih hmaa an pahnih hmuh a duh avangin Tluangi pawh a hna lamah a kal hman lova. Chhungte awm loh lai hun chu an pahniha hmuh nan a duh a. Chuvang chuan hun hran ruatin inhmuhna hun chu an siam a, tichuan tunah hian Ruata leh Tluangi chu a pa thusawi ngaithla turin a pi bulah chuan an ṭhu dun a.

            “Mi ang kan nih dawn chuan nupui pasal kan inneih hi a ngai ṭhin a. Nangni pawh nakin lawkah chuan nupa in ni ngei dawn a, in innei tur hi ka lawmpui em em che u a ni. Amaherawhchu in lo hriat tawh ṭhin pawh a ni mai thei a, inneih hma aṭanga inneih awmzia in hriat hmasak hi in tan tul hlein ka lo hre ve a. Nupa nun leh nupa in hman tawn dante hi hriat lawk theih chin chu in hriat hian in ṭangkai pui ngei ka ring a. Mi pangai satliah mai chu ni ula, heng ka thil sawi duh te hi ka sawi kher lovang. Mahse zawm ngei tur leh hmang ngei tur chi in nih avangin in hnenah chuan ka sawi duh a ni. Tluangte, i pu nen khan thinrim tak taka inhauh kan nei ngai miah lova, ngaihdan inan loh chang chu kan nei ṭhin.

            Mahse, kan inhauh phah chuang lova, kan hlim em em ṭhin a. Chuvangin nupa nun hlim te anga khawvel a mi vannei hi an awm lo a ni tih ka hre chiang hle a ni. Tute pawh hian inneiha awm dan tur hi kan thlir lawkin kan suangtuah lawk a, thil ṭul tak pawh a ni reng a, mahse kan lo suangtuah lawk ang erawh chuan a thleng duh lo hle thung a ni. Duh berte han neih chuan nupa nun chu hlim awm tak tur leh hrehawm awm lova, nuam tak, hrehawm engmah lo thleng thei tur hian kan ring ngailo hial a ni. Chutiang chuan duh thu kan sam ṭhin, duhsakna tin reng hmu tur tein kan inngai a, mahse chu chu ngaihdan dik lo tak a ni si a. Tichuan an tum loh ang taka inneihna a lo awm ṭhin avangin inṭhenna hial a lo thlen phah ṭhin ani.

            Nupa nun hi zir chawp ngai tak mai a ni tih hi in hriat reng fo a ṭul hle a. Nupa kara harsatna lo thleng tam ber chu tum dan anga thil a lo awm ṭhin loh vang a ni fo mai. Chuvang tak chuan, inneih hma aṭangin, inneih hnuah harsatna a lo thleng thei a ni tihte thlir lawk thiam a ṭul hle a ni.

           

Nulat tlangval lai chuan ziate hi thup theih tak a lo ni a, ze chhia thupin ze ṭha kan chhuah ṭheuh mai a nih hi. Nih dan tawk aia mawi leh ṭhaa inlantir kan tum hram hram ṭhin a ni. Mahse kan inneih tak tak chuan hmelmawi leh ze ṭha a lo chuai a, ze chhia a piang mai kha a lo langsar a. Han in hriat chian meuh chuan rin ang reng reng hi tumah hi an lo awm thei ṭhin lo a ni. Neih mek lai aia midang ṭha zawka rinna te a lo awm a. Hriat chian sa aiin ze inthup mek (a) emaw (i) emaw an duhawmin kan hre leh deuh tlat ṭhin.

            Tichuan mahni pawm lai sitna te an  lo nei thuai ṭhin. Ṭha ber tura kan ngaihte pawh hi an lo ṭha bik lem lova, fimkhur taka kan thlan, duh taka kan neih te hi hriat chian hnuah pawh duhthusam kher mah suh sela, an tlin lohna laiah te chuan hliahkhuha, hmangaih zualte kan zir tur a ni zawk si a. Han inhauh leh inbauh sual changte pawh a awm thei a. Inneih leh mai pawh thil chakawm angin a lang thei ṭhin lo. Mi ṭhenkhat chuan an thinur laiin thu ṭhalo pui pui leh ṭawngkam mawi lo tak tak te, awm dun tawh lo hial tura thinrimna tih chhuah an ching ṭhin, chungte chu chin hlek tur a ni lo.

            In thin pawh a lo ur ang, mahse insuma inthup a ṭha a, lungawi lohna chu lungawi hnuah fel taka sawi dun theih tum hram pawh a tluk a awm lo. Aw ka mawi taka inbiak te, hlim taka nupa inkawm chin te hi a mawi em em a. Nu leh pa leh midang zingah pawh hlim taka inkawm thiam in tum ber fo tur a ni.

            Taksa thlah dah te, incheina thua fimkhur loh te hi chin hauh tur a ni lo. Fel taka inthuam a, mawi taka inchei fo tur a ni. Nulat tlangval laia min mawi min ti lovang tih kan hlau ang bawkin inneih hnuah pawh kan kawppui ten mawi lo leh ṭha lo min tih kan hlau reng fo tur a ni.

            Tin, kan kawppui te chu an damlohnaa enkawl te, an mawi lohnaa thup mawi te, an chak lohnaa ṭanpui te, latu ang petu nih a, rawngbawl saka awm anga rawngbawl saktu nihte in tum tur a ni. Chu chu nupa inhmantawn dan tur a lo ni ta a ni. Hlimna awmsa chen mai tur ni lovin, hlimna chu thawh chhuah dun a ngai a ni.

            A tlangpuiin hmeichhia hi kan thikthu a chhe zual ṭhin. Thikthu chhiat lutuk pawh hi inchhung inngeih lohna bul, chhungkaw tiṭiautu, harsatna nasa tak thlentu a ni fo ṭhin. Chuvangin heng thilah pawh hian chin tawk neih thiam chu a ngai hle a ni. Pasal chhungte hui khawm thiam te hi tum tur a ni ngai e. Aw le, sawi tur a tam duh hle a, in zawm duh phawt chuan chung ka sawi zawngte pawh chu in hlawkpui viau thei ang. Nupa hlim tak in nih hi ka ring nghet tlat a ni. TLuangte, min han awmloh san tur chu ka khua a har lawk hle a, mahse thil ṭha zawk pan tur i nih avangin ka lawmpui em em a. Tin, Ruata pawh kan fapa i ni a, farnu, pianpui unau angin i enkawl hi kan beisei tlat a ni,” tiin a pi chuan an pahnih chuan thu ṭha tak tak a hrilh a ni.

            Khawthlir khua aṭang pawhin Ruata leh Tluangi te inneih ni chu rawn hmang turin an rawn kal nual a,Tluangi ṭhiante erawh chu puak leh kaih an lo fawm hman tawh avangin an lo lang thei lova, Ruata ṭhiante erawh chu Rina leh Thanga an lo tel thei a. An ṭhianho an han inhmu khawm leh chu an hlimin, Tluangin Khawthlir a chhuahsan aṭanga thil awmdanvelte chu an sawi a, an nui dar dar reng a, an ṭhianho han inkawm khawm ngang an ni a, an hlimin an bula awm pawh a zangkhai vah mai a ni. Faktea (a pu fapa) pawh a phur hle, Tluangi a hmuh hmasak ber aṭang khan a ngaihna em em a, a la hriat ṭhan loh ni mah se a nelin a bula awmte kha nuam a ti em em a. Tunah an u tur a lo ni leh dawn nghal nen a hlim hle mai bawk a.

            Tin, Tluangi pi hi a fel hle bawk, a tunu chu mi ina awm tur a nih dawn tak avangin a nu ten fuihna thu ṭha tak tak lo hrilh tawh mahse ṭha a tih ang chu ani pawh hian a hrilh malh malh a. Tluangi pawh hian a pi chu a ngainain, a ngaisang em em a. A tunu a hrilh ṭhenkhatte chu “Pasalte ring thiam leh zah thiam a, dawm thiam mi nih i tum tur a ni. Nupui ṭha chu a pasal chuan nupui leh nu nih an nih tir hial ṭhin. Tin, khawah pawh kalin, office bang emaw, hnathawk haw a niih pawhin, i hahin i buai hle a nih pawhin, ṭhut hmuna lo be mai lovin, a theih hram chuan kawt kaiah emaw, kawngkaah emaw lo hmuak hram thei la a ṭha hle a ni.

            Mi tam takin tlawmah an la fo ṭhin, mahse i pasal leng hawng hilm taka i lawm a, amah aia chau daih i nih pawha atan thlak hlelhawm taka i awm thiam phawt chuan i pasal chuan a ngaina lo thei lovang che” tiin thil tam tak a hrilh ṭhin a, a pi thil sawite chu ṭha a tiin, a rilruah a vawng reng ṭhin.

            Tichuan hun her liam zel chuan January 25 pawh chu a rawn herchhuak ta, leh lam leh lamin an phur hle a, a hmeichhe lam lah chhungkaw lung tlukna, te ber leh tar ber thleng pawha, an mi dun tlan chu an fanu, an u, an tunu pasal tur a nih avangin an hlim hle a.Tin, an fa hmasa pasal nei tur a nih avangin an hlut hle a ni.

            Leh lamah mipa lam lah, Khawthlir aṭang pawha nula chhuanvawr leh tunlai mite nulat tlangval kawnga an chhiat theih teh lul nen, chutiang kara hmeichhe ṭha, Aizawl a awm hun pawha sawiselna an hriat loh, thlahtu chena an mi hriatchian mo, fanu, fate nupui atana ṭha lutuk, beisei ngaihna pawh an hriat loh chu an neih dawn avangin an hlim hle bawk a.

            Zan dar 7:30 velah chuan “Cheih raw khah a lawi dawn e, Lalruata run in chhungah Nuntluangi a lawi dawn e” an rawn ti ta ṭhap ṭhap mai a. Ruata chu a ṭhutna turah chuan nalh deuh maia incheiin a ṭhu vang a. A pu te mi rualpawh an lo nih avangin, amah chu mikhual nih chang viau mahse mi an tam hle a, tin, Electric veng hi chu veng lungrual, chhiatni ṭhatniah pawh an fel em em reng a. Ruata chu hre lo tam mahse a pute in a zau tehreng nen tawt tlat khawpin nula tlangval an ṭhu a, an zai ṭhup ṭhup bawk a.

            Tichuan bungraw keng note chu an rawn lut thiah thliah a, Mopa ṭhianpa zuiin monu chu an rawn hruai lut ta a. Ruata chu a lo ding zaih a, Tluangin a bul a lo thlena tlema a din hnu chuan an ṭhu l eh ta a.

            Mipui mit chu an chungah a fu hle mai a, Tlangval phawk deuh leh fiamthu duh deuh phei chuan, Ruata chu an lo awtin, nihlawh an tih zia te chu pawn lamah chuan an lo nuihpui dar dar a.

            Nula ho pawhin Tluangi chu an awt ve tho mai, “Khutiang khawpa tlangval hmelṭha leh pian nalh han neih chu a vannei bik mang e’ te an lo ti ve tho a ni.

            Tichuan, an zai ṭhup ṭhup a, zai kar lakah leh thingpui in  laitein fiamthu thiam tak tak an lo che ve reng bawk a. MAhse mipui buai nuai nuai leh mi ti buai chi a lo che pawh hmuh tur an awm lo. Rilru hlim takin, thiam takin an zai a, kham lo takin leh ui tak chungin monu leh mopa te tan hun an kianin an ṭhin ta hlawm a.

            A pute in sira an inneih thar, sak thar kha a luahtu office te kha hmun danga an transfer avangin an in chu chu mi zan chuan Ruata te nupa mutna atan an lo buatsaih a. An ṭhian ve ve chuan mutna turin khum nuam tak an siam sak a. An present dawnte chu ṭhian te nen an han en ho nak nak a, nuih na tur pawh an lawmpuina thil pekah chuan a tam hle a niang an nui leh dar dar ṭhin.

            A awm hnufual te pawh an ṭin vek tawh hnu chuan Ruata te nupa chu an mutna turah chuan an kal dawn a. Tluangi chuan, “ka pi, anih leh hei kan kal e, Fakte, i u Ruata nena kan inkarah lo mu ta che,” tiin an in mangṭha a, an khum awmna lam chu an pan ta a.

            Tuma tihbuai lohvin, rinawm taka an lo nghah leh an duh ang ngeia an lo thlir hun chu an lo thleng ta a. Mi tam takin thlemna an do zawh loh avanga harsatna an chunga lo awm phahna te, fel taka an ngaihtuahna chu a lo dik zia leh an hlim phah tak ziate chu dik an ti dun hle a.

            Tunah hian an inhmangaihna hlu tak leh duhawm tak chu a rah an lo hmu ta a. Diklo taka awm an duh lohna chu an tan hlimna a lo ni a, an inhmangaihna tizualtu leh ti pungtu a lo ni ta a ni. Khum sirah chuan kut insuihin ṭhinṭhiin an ṭawngṭai a, lawmthu sawi chung in an hma hun atan an dil a.

            Tluangi’n, “Kan inneih hunah chuan i tan thianghlim taka ka lo vawn hi hlan a lo ni dawn tawh a ni,” a lo tih pawh chu a hlut zia a hmu chiang tial tial a. Tichuan an khum nuam taka an lo siam sakah chuan Ruata chuan Tluangi chu a kai ṭhu a, a fawp ngawih ngawih a. Ruata chu a inhlip malh malh a, a thawmhnawte chu Tlaungi chuan a ban sak a.

           Tluangi pawhin he mi zan hi chu zah a hun lo tih a hrechiang ve em em a, a pasal tana mitla thei ang ber chuan a hun chu hman a tum ran a. Lalṭin eng chu tlemin a her hniam a, a inhlip ve malh malh a, a sam kilhna te chu phelhin a sam mawi tak chu a tla hniang a. A mu tur khum bila a han ding chu Ruata chuan en kham har a ti hle mai a, a mize ṭhatna mai ni lo, pianphung duhawmna zawng zawng teltu a han ni bawk chu vannei a inti em em a. Tichuan rizai chu a han keu a, “U Ruat, ka lo mut i phal ve em?” a han ti a, Ruata chuan, “Phal mai dawn lawm ni le! mahse ninhlei vak loh i tum a niang chu,” tiin Tlaungi chu a inthawlh ve ta zal zal a.

           Reilote an ngawih chuan Ruata chuan, “Ka hmangaih leh ka duh ber, hetia ka nupui i han ni ta mai hi ka lawm tak meuh a, ka hmangaih che a, ka hmangaih reng dawn si che a” tiin Tluangi chu duh em em leh thlahlel em em in a kuah vawng vawng a.

            Tluangi chuan  lo chul hauh hauh pah chuan, “U Ruat, kei tak hi asin lawma hlim ni, min hmangaihna ka rinhleh laite kha ka ngaihtuah let hian ka zakin ka inchhir ta ngei mai. Khawvela ka duh ber ka neih che avang hian vannei ka in tiin ka lawm a ni. I mut tlun lohna ka neih pawhin min hrilh zel ang che aw, i ta ka ni si a,” tiin kuah chaih chaih chung leh lo fawh pahin a chul heuh heuh a.

            Ruata chuan, “Tluangi kei pawh hian mittlun lohna ka nei fovang, nang pawhin min hrilh ṭhin dawn nia. Ka lung i ti awi hliah hliah asin, nang ang hi nula awm ve tak ang maw, heit em ema hmeichhe fel leh ṭha ka nei che hi ka vannei a ni, khawvela ka duhthusam leh ka lawmna min thlensaktu tur atan ka hriat hauh hma aṭang tawh khan Pathianin a lo ruat lawk daih che a lo ni a.

            “Ka chak loh lai te, ka tlin loh naah te, lungngaih leh khawhar, mangang leh buaina, ṭanpui ngai ngawih ngawiha ka awm lai leh awm hun pawha min hnem tur leh min thihlimtu atan nang hi ka lo nei ta che a ni a. Hlimna leh lawmna ka chan hun laiah pawh min hlut sak thiam tur atana Pathian min thlan sak leh pêk chu i ni si a.

            “Mahse mihring nih chhung hian ṭhatnaa khat kan nih loh avangin kan nupa nunah inhriatthiam loh ni te, ngaih dan inmil loh hunte a lo la thleng ve mai thei a. Mahse chung hunah pawh chuan nupui duhawm leh dawhthei, ngilnei tak ka neih che avangin ka thla a muang a ni. He kan hlimna hi Pahitan nen hmang dun thiam turin kan hun hi i hmang dun ang aw,” ti chungin a nupui Lalnuntlaungi chu a kuah vawng vawng a.

            Tluangi chuan, “U Ruat, kei hi asin, hmeichhia zawng zawnga vannei chu ni, ka lawmzia hi ka sawi tam thiam zawk lo, mahse ‘Rin tlak pasal’ ka nei che hi a hlu ka ti lo thei lo. Hmeichhe awmnem zawk leh fing lo, chaklo zawk ka nihnate min hliah khuh thiam tur pasal ka nei che hi ka lawm tak meuh meuh asin. I nu leh pa leh unaute chunga ka awmdanah te pawh i duh loh zawnga awmna ka neih emaw, i chhung leh khat ṭhenrual unaute chungah ka awm dan ngainat awmlo a awm a nih chuan min hrilhin, min kawhhmuh zel dawn nia.

            “Hmeichhia hi zawng kan sualin kan â em mai a. Mahni ṭhatna tur leh mawina tur pawh hrethiam lova awm duh tlat mi kan ni si a. Kan tlin lohna zawng zawngah te min dawmkan a, hliah khuha, min zirtir a, dawhthei taka min puih ka duh a ni. Chung zawng zawngah chuan i sawi tawh angin kan nunna laipui ber atan chuan Pathian i nei tlat fo ang aw” a lo ti ve a.Tichuan thlamuang tak leh rilru hlim tak chungin an muhil ve ta siai siai a.

            Nu-ek, Nu-ek……. khawiah chuan nge maw i lo tlan leh hman phir pher ni. Inah hian awm hman ta reng reng lo mai, Nu-ek…”Eih”………..”Enge ni ka nu” ti chungin fanu Lalrinzuali chu a lo tlan thlak thlak a.

            A nu chuan. “Rawng lo bawl rawh, in lo haw chauh a in tlan chhuak daih mai ṭhin a, fing ve viau awm tak che, in â ang riai mai a, phi chawng tur a ni hlei nem” a lo ti a.

            A fanu Lalrinzuali (Nu-ek an tih mai chu) chuan a nu chu hlau tak leh ṭi tak chungin a thlir a. A nu chuan, “Engkim lo tifel ang che,” ti chungin engmah sawi leh tawh lo chuan a chhuahsan a.

            A nu kal liam tur chu ngawi rengin a en a, a mittui te chu a tling piau mai a. Ṭhenawm hre pha tan pawh an inbiak dan leh a fanu a tih dante chu mak han tih loh chi hi a ni lova. A fanu Rinzuali (Nueki) chu han en mai pawh hian inchhung han tifel dim diam tur leh rawng zawng zawng han bawl fel tur chuan a la rintlak loh hle mai si a. Mahse a nute chuan chutiang chu an tihtir bawk si.

            An ṭhenawm lawka awm an ṭawng vel ngawi renga lo ngaithlatu Lalnuntluangi chuan Rinzuali chu a khawngaih em em mai a, an fanu neih chhun ni bawk si a nuin-a a tih vel dante chu fahrawn hrawn ang a ti em em a. An pa lah chu rui lova hawn lai nei miah lo, hawn a pianga inchhung tihbuai dan ringawt mai zawng a ni a.A nupui lepchiah leh len ruk ṭhin avang inchhung enkawl lam pawh buarchuar leh eirawng bawl chena naupang chhia mai rawng bawl ring an nih lah hre phak si lovin, thinrim a ân tun tun leh an fanu chunga kut han thlak deuh uai uai chang nei ṭhin mi a lo ni si a. An ṭhenawmte chhung chu a khawngaihin a vei em em mai, chulai karah chuan an fanu hmel fel ren rawn, an fa tak a ni lo vanga tih hial tura an enkawl chungah chuan a rilru a lut zel a. Chutiang din hmuna ding an nih loh avang leh nupa inkawm thiam leh hlim thei tak mai a an han awm chu vannei a intiin a pasal Vanlalruata ngilneih zia leh ṭhat zia te, a dawhtheih zia leh a ngainatawm zia te, pian phung ṭhatna baka a nin Pathiana a hman dan zawng zawng te chu ama fel leh fin vang ni lovin Pathianin a hmangaihna avang a ni tih chiang takin a chhui chho zel a, vannei ain tiin a lawm avangin a muttuite chu a tla hial a. Rilru taka Pathian hnena lawmthu sawiin leh ṭhahnem ngai takin an ṭhenawm Pu Roluahthanga te chhung tan chuan a ṭawngṭai zui a.

            Lalnuntluangi chuan a pasal duh tak Vanlalruata nena an fapa duhawm tak chu kuah hla hla chungin an pa office bang lo haw tur chu an bathlar aṭang chuan a thlir vang vang a. Hla deuh taka an pa lo haw a hmun chuan, an fapa hnenah chuan “Mante, khi ta khi i pa thlakhlelhawm tak a lo haw, keini nufa chu kan hlim leh dawn mang e aw! tiin. An fapa pawh chu a pa a hmuh veleh chuan a nu kuahna aṭang chuan a tal thla a, a pa lam pan chuan a tlan ve ṭai ṭai a. A nu chuan a um zui a, an pa chu gate bulah tawkin a thil ken velte chu a laksak a, Vanlalruata chuan an fapa chu a pawm a, hlim tak leh lawm tak chungin inchhung an lut ho ta a.

            Tluangi chuan, “Matea pa, hei i lehkha, vawiin in buai em? I chau viau lo maw? Tui lum pawh a awm a nia” ti chungin Choka lamah chuan a luhsan a. Ruata chuan, a rilruin, “Aw, i van ngainat awm tak, i kianga awm hi a hahdam mang tak e, ka mamawh leh ṭul turte hi ka sawi ngai lo hian i hre vek tak si a.” ti chungin a lehkha thawn chu a fapa kuah chung chuan a chhiar a.

            A han chhiar chuan hun rei deuh tak tawh lam a mi, a lo ngaihtuah leh hriat tawh lohin lehkha a rawn thawn hi a lo ni a. A chhiar chhung chuan a thin phu deuh dat a. Mahse hlauh thawnna leh diklo intihna lam phei chu a nei hauh lova.

            A ṭhiannu chuan thingpui a rawn lak sak a, “Matea nu, tui lum a awm chuan ka inbual ang e, a lum deuh ṭhin a, inbual chu ka duh khawp mai. En teh, ka lehkha thawn hmuh hi han chhiar ve teh,” tiin a pe a.

                                To,

                                Unaupa duh tak u Ruata,

            Pathianin in chhungin a enkawl che u ka beiseiin ka duhsak a che u, U Ruat, i hnenah hian lawmthu sawi ka duh bakah, tunhma hun avanga Pathian hnena ngaihdam min lo dil pui turin ka han sawm daih duh che a. Nangmah mai ni lo, i ṭhiannu ngei pawh hmuh ka chak em em a, a chhan chu nanga ṭhiannu meuh chu rintlak leh laizawn ṭha tak a ni dawn tih ka hriat vang a ni.

            I Shillong kal tur nena Silchar a kan inhmuh ṭum a, rilru thianghlim lo tak leh sual nasa tak tihduhna ka neih laia, min hmangaih tak leh ka la inchhirna tur leh ka thlarau min ven sak tak chunga thilsual tih a ṭhat lohzia leh a tlo loh zia min hrilh laite, zan rei tawh lama ka muhil ṭhang harhin ka tana Pathian hnena i dil rukte ka hmuh avang khan tunah chuan ka awmdan ṭha lo tak leh ngaihtuahna sual tihpuitlin duhna mai ang chi kha chu min hmangaih tu Pathian avangin ka bansan ta a sin.

            U Ruat, tun hnu thlenga ka chhut kir hian i rinawmna leh i dinnghehzia hi ropui ka ti a, a rawng i bawl sak Pathian tan chuan i hlu hlein ka hria. Ka duh ang te kha ṭha min lo tihpui ni la chuan tun ang dinhmunah hian ka ding theiin ka inring lo. Ka ngaihtuah chian poh leh i hnenah leh Pathian chungah ka lawmna a zual ṭhin.

           “Eng hunah emaw chuan, i unaupa emaw, i pasal emaw, i ṭhian ṭha tak ka la ni mai thei, chuvang chuan rilru diklo hi chu an pu ngai lo, min hmangaihtu kan tana a nun petu lawm zawng a ni bawk si lo, i tih lai te ka hre reng ṭhin.

            Tunah chuan u Ruat, mi thar ka ni a, pasal duh tak, nang chu tluk lo mah se, nangmah anga Pathian lama inhmang mi ka nei ve dawn a, rei a ni lovang. Heng chanchin leh ka awm dante hi ka hrilh chak che a, nangmah avang liau liaua nulat tlangval kawnga thianghlim taka awm thei leh, ka rilru zawnga ṭha ka tihna ni lvin, pasalte duh ang tling phaka ka nulatna ka lo vawng thei hi ka lawm a, ka chhiat teuhna pawh nangma dikna leh rinawmna avangin chhe lovin ka awm phah ta bawk si a. Hetia ka chhut thui hian ka awm em a ni. https://ekhai.com

            Heng thilte hi sawi lan zahthlak tak ni mahse ka sawi lo thei lo a ni. Pathian leh i chungah ka lawm tak zet a ni. Min ngaidam la, i farnu tak takah min enturin ka ngen che a ni. Tin, i ṭhiannu ( ka laizawnnu) pawh ka mi la hriat ngai loh pawh nise ka hmu chak em em a, tunah phei chuan fa duhawm tak in nei tawh ang chu. In chhung thla te min han thawn thei ula ka lawm ngawt ang.

            Keini pawh eng hunah emaw chuan ka ṭhianpa nen kan inneih zawhah chuan kan lo la chhuak ve ang. Dam taka kan inhmuh ho theih nan Pathianin min awmpui rawh se.

 

                                Dam takin in chhungin mangṭha u.

 

                                                                                                                                I farnu atan,

                                                                                                                                Lalmanliani

                                                                                                                                Calcutta.

                               

 tih hi a lo ni a. https://ekhai.com

            Tluangi’n  a han chhiar zo chu, a pasal chu a pe kir a, a mittui chu a tling piau a. Matea pa, i inbualna tur chu ka han siam tawh ang e, tiin Choka lamah chuan a luhsan a, chutih lai chuan Ruata pu fapa Faktea chuan an fapa chu an in lamah a hruai a. Tluangi lut kha a lungchhia tih a hriat avangin Ruata chu chokaah chuan a lut ve nghal a. A va luh chiah chuan Tluangi chuan Ruata chu a lo kuah chawt a.

            “Matea pa, a mak ka ti em mai, heti tak maia pasal rinawm leh dik, ngilnei leh rintlak ka nei che hi ka vannei em mai, aw ka rinhleh ṭhin lai che kha. Keimah hi ka thiam lo ṭhin a ni. I rinawm zia chu i lehkha hmuh khan a ti chiang leh zual si. U Ruat, ka tlin lohnaah chuan min ngaidam ang che aw,” tiin a mittui tling piau chu a hru hul a.

            Ruata chuan, “Chuti maw, ka hlauh thawn nen, ka lawm e, ti chungin a nupui duh tak chu a kuah vawng vawng a. PAGE 12 

Comments