KAN HLIMNA TUR – PAGE 10

219

KAN HLIMNA TUR (PAGE – 10)

Ka hmangaih vang che a ni.

             Kristmas chak khai lain Aizawl Bazar velah chuan mi an tam em em mai a. Thingtlang lam aṭangin zin runpui hun lai hi a ni ṭhin reng a. Thingtlang pa berh te te mah ni se, sum lam chu tu dang an awt bik lo. Hnathawh kawr mai mai nen Bazarah leng mah se an thil han dawn che hneh tak an ni. Dawrkai hote pawh inring ṭhelh a mual mual pawh an tamin han bum te chu tum mah se an thei bik teuh lo mai. Chung thingtlang ṭanga Aizawl rawn dawrte chuan mahni khuaah ṭheuh Krismas chu hman an tum a, an nupui fanau te leh an bialnu leh bialpa te nen a hman ho ngei an duh avangin an hmanhmawh hlawm hle a.

             Ruata te pawh chu Serchhip aṭangin Bus-ah an lo chuang a, Aizawl chu thimah an rawn thleng a. A pute chhung nen an han inhmu khawm chu an hlim dar dar hle a. A han insil fai a, a han intih fel chuan a pi chuan,”Ruatte, haw leh mai turin em ni i lo kal?” tiin a han zawt a.

             Ruata chuan,”Shillong lamah ka zu kal zawk anga, Krismas chu hetah ka rawn hmang chho vang,” a ti a. Zan reite thleng chuan an meng a, a mut hma lawk chuan Ziri nen chuan an inkawm lawk a, Ziri hnen aṭang chuan thil awmzia zawng zawng a hre vek a, Tluangi te ina han len pawh chu  a zak thar dawn ta tlat mai a ni. Tin, office chawlh a lak avangin Kristmas a lo hnai ta deuh bawk nen, Tluangi chuan an dawr kha a nghak ṭhin a, a nu chu New Market lamah a in pho thung a ni, tihte pawh chu a hre thei vek a ni.

             A tuk ni chu a lo chhuak eng leh phut mai a, mite chuan, ‘Ka inhralh tam lo ang e’ tih hlau takin an phe leh ta suau suau mai a.

             Ruata pawh chu a mawl, mawi thei ang berin a inchei a, Tluangi’n Matric pass lawm nana a kawr pek rawng ang kha a ha a, Jacket nalh tak, sakhi rawng lam hi a ha bawk a, a inhmeh ngang mai si a, darthlalang a a han inen chuan ama lung pawh chu a awi hle reng a ni.

             Bazar pheiah chuan a phei zan zan a. Dawr tinah chuan bawr lat lat tawk hi mikhual an awm thei zel a. Tluangi te dawr a thlen pawh chuan mi pawh chuan an lo dawr nual hlawm a, chutia a buai hle lai chuan (Ruata lo kal hi Tluangi hian a la hre lo) “Ka pi, kawi hi nge Pi Rovi te dawr hi le?” tiin a han zawt a.

             A rawl a tihdanglam deuh avang leh mi ṭawng deuh nuai nuai kara hria a nih avangin Tluangi chuan, en pawh en lem lo hian, “Hei hi a nia, engnge i duh, ka nu chu Bazar thlangah a awm, lo chawl ta che,” a lo ti a. Ruata chu ngawi rengin a lo ṭhu a. Tluangi chuan “Hei hi metres-ah ₹24/-, hei hi ₹ 19/- hei hi chu a to ang reng khawp mai ₹ 45/- lai a ni, tiin a dawrtute chu a lo hrilh a. “Ruata chuan, “Ka pi he kakawr tur chi hi eng zat man nge?” a han tih ve chuan, Tluangi lo hawi pheiin, “Khawi ber kha……aw u Ruat, i awmna a rei tawh em? engatinge min hrilh loh” tiin thlahlel tih hriat ngawih ngawih mai hian a han en a.

             A dawrtute nen chuan an han intifh fel hnu chuan, in hmuh lehna hmasa ber, inthlalel leh inngai ngawih ngawih, an inkarah harsatna a thleng dawn nia an hriat laia mangang taka an awm hnu an han inhmu chu sawi tur an ngahin an hlim hle a, dawrtu nei lo mah se pawi an tih loh hmel hle a ni. Mahse mikhual mai pawh ni lo, Aizawl mi mir reng reng te khawlai tam hun a ni a. Chubakah nula hmel ṭha, pian mawi, fel bawk si, chutiang dawr chu a nih avangin a lun lo thei si lova. Tichuan hmun dangah pawh kal ta lo chuan Tluangi chu a nghah pui a, nilengin an inkawm a, Ruata chuan Shillong lama kal leh mai a tum avang chuan hun remchang hmasa bera inhmuh a ṭhat zia te chu a hrilh a. Ruata chuan Shillong lama kal leh mai a tum avang chuan hun remchang hmasa bera inhmuh a ṭhat zia te chu a hrilh a. Ruata a awm rei hman lo tih a hriat chuan Tluangi chu a lungngai hle mai a. Ruata lah chuan a thang chin tur a hrilh duh bik lem bawk si lova, “Ka lo hawn chhoh chuan Kristmas a hnaih dawn tawh avangin tlang chhoh nghal a ngai ang,” a han tih phei chuan Tluangi chu a hmel alang khawpin a lungngai a, Ruata a thlakhlelh zia leh a ngaih zia chu a hriat a, chu chu Ruata chuan a hmu chiang em em a. A rilru te tein, “I van duhawmin, ka lung zawng i van ti awi teh reng em. Nangmah ang bawk hian ka ngai che in ka thlahlel si che a,” a ti neuh neuh a. Tichuan nilengin Tluangi dawr nghak chuan a awm ṭum tla ve ta a.

             Inrinni chu Aizawlah chuan Bazar ni ropui ber a ni ṭhin a. Dawrkai hote pawh an inpuahchah in hrlah tam loh hlau taka an hman hlelh hun a lo niin, Kristmas dawn hnaih lam a nih avangin thil lei tur hi an insul zut zut mai a ni.

             Tluangi chuan dawr nghah chu ṭul a ti hle mai si a, mahse, thawhṭan maiah Ruata Shillong a kal dawn si avang leh a lo hawn chhoh va inkawmna remchang a awmloh maite a hlauh bawk si avangin chimi ni chuan Ruata nen chuan inhmuh ṭha an ti a. Mahse a nu kiangah chuan a sawi ngam chiah si lo. A sawi loh chuan Ruata’n a lo nghak thlawn dawnin, an tan hun remchang awm chhun a ni bawk si a. Tih ngaihna tak pawh chu a hre lo hle mai a, a nute chuan an phal ngei ang tih chu a hria a. Mahse bialpa te hmu tura han dil meuh chu huaisen a har a ti hle a ni.

             A nau Zuali chu, “Zualte, lokal lawk teh,” tiin a han au va, Zuali chuan, “Ka u, eng atan nge min koh,” tiin a rawn zawt a. Tluangi  chuan zawite hian, “Vawiin engnge tih i tum dawr i lo nghak hman ang em?” tiin a han zawt a, Zuali chuan “Engmah han tih tur chuang ka nei lem lo, niminah kan insu vek tawh bawk si a, ka u, engnge i tih dawn? i hman loh chuan ka lo nghak mai ang. In lam chu Sangtei, ( a naute ho) hovin an lo enkawl thei vek a lawm, khawnge kal i duh?” tia a han zawh chuan, Tluangi’n “I e Zualte, i u Ruata a lo kal a, Shillong kal leh mai a tum si a, inhmuh lawk kan duh deuh a, i remchan chuan a tihzia khawp ang,” a han ti a.

             “Ka u, u Ruata a lo kal maw, engtikah nge a lo kal? Dawrah rawn hruai ang che aw. Dawr chu ka lo nghak mai ang, kal ang che, ka nute i hrilh tawh em?” a han ti a.

             Tluangi chuan, “La hrilh love, i hman leh hman loh ka la hriat loh avangin ka han zawt hmasa che a ni. Zualte, nangman ka nu chu va hrilh mai ta che,” “Aw” tih leh tlan chhuah a rual nghal a, “Chutiang chuan i han sawi dawn nia” han tih hman pawh a ni tawh lova, a hrilh dan ang ang chu ṭhaah a ngai mai dawn a ni.

             Tluangi nu inchhung lo lut chuan, “Mami, i u Ruata chu engtikah nge a lo kal? Shillong lamte a kal zel dawn a nih phei chuan naktuk chawlhni zingah chaw rawn ei turin han hrilh nghal la, thilte pawh kan thawn duh mai thei a. Tin, kan hmu chak ve reng reng bawk nen, i lo haw tlai lutuk dawn lo nia” tiin a phal zia chu a rawn hrilh a.

             Tichuan, Zuali nen an nufa ho chuan bazar lam panin an kal ho dal dal a. Hmelhriat leh ṭhenrual ṭhate an biak kar zawngah chuan a nu chuan a fate a fuihna leh a zilhna thu ṭha tak tak Tluangi leh Zuali chu a hrilh phei leh malh malh a. Dar an thlen chuan an mahni pan tur ṭheuh lam panin an darh ta hlawm a.

             Ruata chu ṭingṭang nen a lo zai vang vang a, thiam tak phei chu a ni lo nain a zai hian ngaih a la ve hrim hrim a. Mi ten “A zai mi nghawr dan chu ka lairil a khei riau” an tih ang hi a ni.

                                “Isu kan hnenah lo cheng la,

                                Zantlai khua rei pawhin,

                                Lawmin tlaikhua min varpui rawh,

                                I hming chawimawi turin.” tih lai chang a sak mek lai chuan Tluangi chuan ngai thla chungin kawngkhar bulah chuan a ding a. “Aw Bethlehem a han tih chiah chuan kawngkhar kik ri a hriat tak avangin Ruata zai chu tawpin kawng chu a hawng thuai a. Nghakhlel taka a lo thlir ṭhin TLuangi chu a kai lut a. https://ekhai.com

             Ruata chuan, “Ka zai tui lai min tihbuai aiah, ka hla sak chang thumna aṭang hian kan pahnihin kan sa tur a ni,” a han ti a.

             Tluangi chuan hreh bik lem lo tak hian, ‘i thu vek a lawm,’ tiin Ruata chuan a han tum thum leh a. “Isu kan hnenah lo cheng la…” tih aṭang chuan lungawi, hlim tak, thurual tak chuan an han sa dun a.

             Tichuan kumtluang hmelma, intawng lehte chuan an hun pawimawh tak chu tumah dang ngai lovin an hmang chho dun leh ta a. Mahse tunhma hun anga an hman dan tam tak kha chu a tleirawl an ti deuh a niang. An inkawm dan chu a puitlingin, an hlimna chuan hlim tak tak leh lawmna nasa tak thlen ngei dawna an inhriat avang chuan an hlim hle mai a.

            

Han inkuah vel leh infawh velte chu tupawh mai hian ti lo an awm lova, anni pawh chuan mualza kar dana an len lai leh an inkara, midang thuneihna avanga khawharna leh rilru manganna an neih zawng zawngte chu tihbo leh an inhmuh loh kar zawng hunte kha kep tum ni awm takin an hun chu an hmang chho dun ta. Tisa nawmna ringawt zawngtu te chu ni ve selang chuan, an inkawm dan leh an inkuah vel dante chuan unsum zawh a har hle ang le! Tluangi taksa nalh tak leh  mi tin te mit la fo ṭhintu chu Ruata tan chuan rilru ngaihtuahna zawng zawng kal bopui thei khawpin an duhawmin, chungte chu tuma ta ni lovin a ta a ni si a. https://ekhai.com

             Mahse nupa an nih hmain, an tisa chakna chu lo hmang ta mai se, an rilru a nuam ang em le? Kohhran lama an lo inhman dunna zawng zawngte pawh, nakin hun thlenga an hlim zelna tur chu an inneih huna Tluangi chu nula thianghlim a nihzia a hriatna chu a ni dawn si.

             Tluangi’n, “Kan inneih hma a, thil ṭha lo tak kan tih mai chuan, tun hma aiin nang hian min ngainep ang a, min hmusit ang a, i theih hnu chu nupui atan i duh kher dawn si lo va, Chuvangin ka thianghlimna leh ka zahawm vena chu min venpui zawk tur a ni. Kan hlim zelna zawk tur a ni a. A hunah chuan i tan tuma chuhpui theih lohvin, thianghlim taka i tana ka lo vawn him hi hlan a la ni dawn a ni. I ta reng tawh i tih chhiat a, khawih chingpen leh, tih mualpho chu nang pawhin i duh lovin i phalin ka ring lo a ni” a lo ti tawh a.

             Chu chu, Tluangi chung thuah mai ni lo hian, mi tin chungah nupui pasal zawn meuh chuan dik a lo tih fo ṭhin a ni a. Tin, a ṭhian te chungah te, Shillong-a a awm lai a nula tlangval  induh takten an tihsual fo ṭhin chu a hre hneh em em a. Mipa ten an nula kawm tawh chu theih vek an tum a, nupuiah erawh chuan an theih hauh lohte hi an duh leh si a. Nula an theih hauh lohte chu rel rel mahse an ngaisang em em tih hi nula te hian an hre si lo.

             Chuvang chuan Ruata leh Tluangi hi chuan a bak sawn ngai ti lovin a hma lam nuam an tih ang chin chinah chuan serh leh sang nei tak chungin a bak sawn erawh chu hun lo la kal zel tur a an hlimna hliahtu ni dawna an rin avangin an tum chhin ngai lo. https://ekhai.com

             Ruata leh Tluangi chu an hlim dun hle a. Dawla’n a beisei dan leh thil kal dan te, engtianga palai tir mai nge a nih tihte, Tluangi ṭawngka hmu la ni silova, palai han tirh mai chu ṭawngkam keutu an awm em ni le, tih ang te chu Ruata chuan a zawt vel a. Mahse fel takin Tluangi chuan a hrilh fiah zel a. PAGE - 11 

Comments