KAN HLIMNA TUR – PAGE 1

384

KAN HLIMNA TUR – PAGE 1

Min tibeidawng suh aw :

               Khawthlir khua hmun pakhat Chawngdawla Sikul kawn an tihah chuan Ṭhalaite chu inhmelhriattawnna leh intihhlumna neiin an ri ham ham a. Nula leh tlangvalte pawh an tel kimin an thawk ṭha hle a. Infiamna chi hrang hrangte an nei a, an zinga Val upa pakhat Piangliana chuan ‘Thil bo zawn’ tih Games a rawn buatsaih chu a han ti ve a, a ni fiamthu thianghlim thawh thiam tak mai a ni a, a thil tih rêng rêngah chuan an nui dar dar reng a. ‘Thil bo zawn pasarihna’ a han ṭan leh a, chumi ṭum chuan, ‘In zawng ringawt ang a, a hmu apiangin in nei hlen ang. Tin, thil bo nia inrin a piang in rawn dah khawm bawk tur a ni,’ a han ti a.

               Nula tlangval rual te chuan an han zawng ta mar mar a, a bo a sawi si loh avangin an thil hmuh a piang mai te chu an rawn dah khawm a, an ṭhiante inpte, pheikhawk, lukhum, thlèng, fian, no, hlabu leh thing hnah leh a rah an hmuh ang ang chu an dah khawm a. Mahse tuman a thil bo tih chu an hmu thei lova, zawn ngaihna an hriat tawh loh hnu chuan an zinga nula tleirâwl pakhat Chansangi chuan, ‘Khawinge nang pui roh hian kan thil bo zawn hi i kawl roh a niang’ a han tih chuan, a ni Piangliana lah chuan a kut chu a lo hum tlat bawk nen, Chansangi’n a kut a han phelh sak chuan lehkha thleh te tak tê hi a lo awm a, chu a lehkha thleh chu phelhin a han chhiar a, a ṭe ṭhat a, a ṭhiante hmuh ve hma chuan a paih ta mai a, a nuih a zain, a ṭhianten an han zawh pawh chuan a chhang mai thei lova, mahse a lehkha paih chu an han en ve chuan,’Keimah pui roh hi thil bo chu ka ni, hemi hmutu hian min nei hlen tur a ni,’ tih chu a lo chuang a. An nui dar dar a, a ni Chansangi lah fiamthu tlin ve tak a lo ni bawk nen, Val upa Piangliana chu a banin a zak hnuaiah vuanin a kai hrang a, nupa ni awm takin an ṭhu hrang a, an hlimpui hle a.

               bible Games lam mi dangin an rawn hmang leh a, nulate zingah, ‘Mahni pasalte ṭheuh zawn tur,’ an han ti leh a, mipaho lo ṭhu falte zingah chuan an lehkha ken a hming nen chuan an han en mil sap sap a. Lalnuntluangi pawh chuan chung zingah chuan phur tak, tih tur an tih ang tlin taka ti zel ṭhin a nihna la tilang chho zelin a zawng dan dan a. Mahse a lehkha kena hming leh Vanlalruata lehkha kena hming chu nupa an ni tih hre lo mah se, an ken ve ve kher nupa an han ni chu tuma hriatpui loh chuan a zak ru êm êm mai a. Chuvang chuan hmasa ber tur ni thei tur chuan a hel lui hram hram a, mahse, a ṭhianten an hmuh tak far a vang chuan Ruata pawh a kâi hrang ve ta nge nge a.

               A hrang ṭheuhin an ṭhut tir a, upa tak leh tleirawltê mai han ṭhu dun han hmuh chuan an hlimpui kher mai a. Chuti anga an han ṭhut far takah chuan Tluangi zahna pawh chu a reh ve mai bawk a. Amaherawhchu chuti ang hun, bible chhunga nupate in hriat ran siakna kawnga an ni pahnih kher kher an lo inkawp chu mak an ti duh hle a. Tluangi phei chuan, a rilru te te chuan, “Ruat lâwk” Pathian ruat lâwk kan lo ni reng mai te hi a niang a” tiin an inhmangaih dun ziate a ngaihtuah chuan a ring rum rum mai a ni.

               Chumi ni a Ruata leh Tluangi bible Games hmang chu mi hriat pui si lohvin an hlim ru dûn êm êm mai a. Ṭhalai lamahte a hruaitu lam ni lem lo mah se, Kohhran Inkhawmte leh Ṭhalai Inkhawmte ṭhulh lova a kul a taia ṭang ve ṭang ṭang an ni a. Hlim takin chu mi ni chu an hmang zo ta thuai a.

               Tluangi pa Aizawl kal lo hawng chuan Aizawl lama an chhúng chhuk thlâk a rawn ràwt thut mai a. Aizawl lamah inte an lo neiin mi luahtir ai chuan, àwma, chhungkaw inrelbâwlna leh hmasâwnna lam kawngah pawh a ziaawm zawk ang tih a hriat avangin chhungte rawn lawkna pawh nei lovin awm thlâk chu a rawn peih sa mai a. Awm thlâk hun zawng an la nei ang tih chu an hre sa a, mahse chuti teh thut chuan a nih pawh an ring lova, pa ber lah chuan, A remchang hmasa berah kan chhuk mai ang’ a ti mai si a, Tluangi chuan a rilruin a ngaihtuah thuiin a dawn thui hman hlê a ni.

               Aizawl lama an awm daih mai si chuan Ruata nena an inkar thû te, a hma ni lawka Ṭhallai intihhlim ni a a rilrua, ‘Ruat lâwk’ a lo ngaihtuah neuh neuhte chu a duhthusam mai mai, puitlin atana a duh vang chauh thil em ni dawn chu aw! tiin a rilru a buai hle a. ‘Pathian thû thû a ni’ chu han ti bawk mah se, Ruata nena han inṭhen daih mai chu a ngaingam lovin ama ṭawngte pawh chu a ‘amen’ thei meuh lo chu a ni.

               A tuk tlai lamah chuan Ruata te ṭhianho chu Tluangi te inah a pa lo hawngte kawm pahin an leng a. An inkawma, an titi na aṭang chuan Ruata te chuan Aizawl lama awm an tumte pawh chu an hria a. Ruata te chuan Aizawl lama awm an tùmte pawh chu an hria a. Ruata ngaihtuahna chuan Tluangi ang bawkin a chhui thui rang hle ani.

               Ruata teho an lên hnu reilotê ah chuan Tluangi nu leh pa chuan an lên chhuahsan a, Tluangi te chhungin Aizawl lama chhuk thlak an tum thute an hre ta zel bawk si a, chutia a nute an lên chhuah ve tak zelna remchang chu an ṭhiante tan chuan inkawmna hun remchang ṭha tak nia an hriat avângin an ṭhiante pawh chuan an chhuah san ve ta bawk a.

               Rin loh taka hun remchang an nei thei chu an lawm dun hle a, engmah an la inhrilh hman rih loh avângin an tana hun awm hmasa a nih hre rengin an ṭhian hova hlim taka an inkawmna ṭhin Tluangi te kawmchár, hmun nuam tak leh biru tak, an awmna aṭang erawh chuan hmun hla tak tak thlirna remchang takah chuan rilrua kamtu lian tak leh vei lian tak nei chung chuan an ṭhu dûn a.

               An ṭhiante mai lo chuan an induh zia leh an in hmangaih dan hi tuma’n an hriatpui lova, an nu leh pate lah an hrilh mai ngam bawk si lo. An pahniha an han sawi dun chang erawh hi chuan nu leh pa  te’n hre ve se, ṭha chu an ti hlê ṭhin a, mahse an sawi ngam mawlh silo. Tunah zet erawh chuan an tleirawl chhuah kuma ṭhian ang mai mai a an lo in entawn aṭanga in hmangaih si , inzah tawnna leh hlauhthawnna avanga, an hun hlu tak an lo hman liam tawh te chu pam  hmai an tiin, koh kir leh tak an duh a.

               Mahse, khang hun laite kha chuan mîte pawhin,’Nangni unau inngaih dan hi chu ’emaw, ‘Nangni ṭhian dun hi chu in inngái tawn awm mang e’, tia an lo fiam liam mai mai an lo ni a. Mahse khang hunlaite pawh khan an in hmangaih tawnna chu a lo alhchhuak ṭep tawhin, apakhat zawk tal kha chu zak lo thei deuh se chuan tuna, ‘Khang hun’ tih ngai lo khan an awm mai thei dawn a ni si a.

               Ruata chuan, ‘Heti ang teh thut a thil intum hi ka lo ring ngai lova, in thil tum chuan min ti mangangin ka rilru i ti-hah ngawt mai, min kalsan hun tur ka han ngaihtuah hian ka lungngái a ni. Engpawh nise, khawi  hmunah pawh awmin, eng thil pawh tiin thawk ila, Pathian hre reng chungin he kan inhmangaihna, tunah pawh min tihlim em em tu hi rinawm taka kan vawn reng ka duh a. Hmunpui zawka awm tur in ni a, i hmaah mi tam tak, duhawm tak tak, belh fâkawm leh nangma tan pawha nawmna ngêi turte pawh an la rawn inlár thuai ang tih hi ka hresa a. I tana ṭha ngei tur leh inchhungkaw tan pawha chhawrnahawm tak te an nih dawn avangin i nu leh pate pawhin kan inhmangaihna min hriatpui hauh lovin an la nawr chein, i lakah thinrimna hial pawh an la nei mai thei a, chungte pawh chu a awm lo hauh lova, i ṭhatna tur leh i nawmna zawk turte chu ka duhsak em em che a. Mahse ka hmangaihna che avang hian i lakah rinhlehna engmah ka nei dawn lova, tuna i rinawm ang bawk hian rinawm takin i awm dawn nia. Thingtlang ai zawngin khawpui chu  nun a ho duh ngê ngê ṭhin a, tuna i nun dan bak hi chu tihdanglam a ṭulin ka ring lo.

               Tin, kei pawh rinawm takin, i tan ka hun zawng zawngte hi ka lo hmang dawn a, i hmangaihnaah hian ka innghat mai dawn a ni,” a ti a.

               Tluangi chuan,U ruat, chung i sawi zawng zawng angah te chuan i rilru tihah lo turin ka duh che a, nangmahah ka nunna te, ka theihna leh ka hmangaihna zawng zawngte hi hlan a ni tawh a, kan taksa inkar leh kan chênna leilungte dang mahse nangmah ah chauh, tih hi hre reng la. Kei pawh heti ang teh thut hian kan chhuk ang tih ka hre bik lova, min barakhaihin, ka rilruah chuan nangmah hi ka ngaihtuah lo thei lo che a ni. Hengte hi kan rinawmna tilangtu leh fiahna ṭha tak pawh an ni mai thei a sin. Hawh khua a tlai lutuk ang e, kan kal hmain hun thawl zawk inkawmna kan la nei leh dawn nia,’ tiin Tluangi te in lamah chuan an chho dûn ta a. PAGE - 2 

Writter Lalengmawia Ralte.

                               

Comments