HMEICHHE DOCTOR LAK TLÂK LOH TE

261

HMEICHHE DOCTOR LAK TLÂK LOH TE

  1. A dam lo te saruak thla la ṭhin Arkansan doctor : Kum 68 mi, Paul Becton Jr.-a chu, a enkawl lai dam lo pakhatin a check up laia a thlá lâksak leh video siama a puh avângin man a ni a, Becton-a hian April, 1, 2014 khan a dam lo enkawl lai phalna la lovin a kap leh mawng báwr vêl thlá a lâk sak nia sawi  a ni. Tichuan, he doctor hi police te chuan 10 April, ah an man ta a, a manna warrant-a a lan danin, a phone Hard Drive an check-na aṭangin a thlalâk delete tawh te an check a, chutah chuan damdawi in a lâk niàwm tak hmeichhe saruak thlalâk an hmu chhuak ṭeuh a ni. Chûng thlalâk zingah chuan amah puhtu hmeichhe saruak thlalâk pawh an hmu tel nual bawk. Becton-a hi thiam loh a chang a nih chuan kum 30 thleng lung In a táng thei dawn a ni.
  2. Chemical hlauhawm hmangtu hmeichhe doctor : November 2013 khan Ohio hmeichhe pakhat chuan Doctor John Black-a chu a serh chhunga chemical hlauhawm kâp lûtah puhin court-ah a khing a, a chemical hman hi Drain Cleaner vêla an pawlh ṭhin ang nia sawi a ni. Amah khingtu nu hi Lora tih chauhva sawi a ni a, in check up tûrin doctor Black-a hi a clinic-ah a pan a, a serh báwr vêl a check lai chuan, búr pakhat, ‘Venegar’ tia a káwma inziak chu a serh chhungah a kâp lût a. Chutia a tih veleh chu nu chuan sá leh thîp a hre nghal a, a na ta vak bawk a. Ná a tih chu Black-a chuan a hriat veleh a thil hman chu no-ah tlêm tê bun chhuakin, a lei hmawrin a liak chhin a, Black-a lei pawh chu a kâng ang maiin a na ve ta bawk a ni.

                Chu veleh Black-a chu a che buai ta, ‘Ka thil tih dan hi a dik lo tawp mai,’ a ti a. Lora-i serh chhung chu hmanhmawh takin Saline solution bur 3 hmangin a ṭhuah nghâl chûk chûk a, cream te a hnawih bawk a, heng te hi kut kawr (glove) bun lovin a ti vek a ni. A hnua an test lehna aṭanga an hriat chhuah chu, Black-a’n venegar emaw a tih chu potassium hydroxide, mihring tîsa ti ṭawih thei chemical hlauhawm tak a lo ni.  

                Clinic aṭanga Lora-i a haw hnu rei lo têah Black-a chuan va phone leh nghalin, damdawi In emergency room-ah kal vat tûrin a hrilh a, chutah chuan doctor ten lo enfiahin, a serh chhungah chuan bottle tereuhtê chhin an hmu chhuak a, hei bâkah hian, a serh chhunga chemical lût chu a hlauhawm loh chin, 7.5 level a pêl lo nia Black-a’n a sawi laiin, 12 level aia sáng daih a ni tih an hmu chhuak a, chu chu mihring taksa tan chuan hlauhawm tak a ni.

                Lora-i leh a pasal chuan Black-a leh a thawhpuite chu hmanraw dik lo leh hlauhawm tak hmangah puhin an khing zui ta a, a thawhna company Paragon Health Associate te chuan he an puhna hi an pha a, mahse, Black-a chuan venegar nia ngaiin tihpalh vâng liau liauvin thil a tisual palh tih erawh an pawm thlap thung. He thil thlen hnu hian Lora-i chuan mumal lo tak takin thi a nei thut thut ṭhin tih a sawi a, a pasal nên nupa nun pawh an hmang thei tawh lo bawk. A chhûl pawh chu paih a ngaih a rin thu a sawi chhuak bawk a ni.

  1. Dam lote mawi lo taka khawih ṭhin a puh doctor : Kum 2013 khan New york hmeichhe doctor Robert Hadden-a chu a dam lo enkawl lai engemaw zât leh a hnuaia thawk hmeichhe pakhatin mipat hmeichhiat hman khaw loh thubuai siam sakin an man tir a. Hadden-a hi New York – Presbyterian / Columbia Hospital-a thawk niin, a hnêna inentir tûra lo kal te chu mawi lo takin a lo khawih vêl ṭhin ni a puh a ni. Amah puhtu hmeichhe dam lote hian an sawi danin, a tirah chuan fel fai takin nurse te hmuh laiin a endik ṭhin a, nurse te nêna an chhuah hnuah chhuanlam siamin, endikna room-ah chuan a lût leh ta ṭhin a ni. Chuta hmeichhe dam lo mu, an kawng chin hnuailam puana la khuh te chu a va khawih leh vêl ṭhin a ni.

                Police ten Hadden-a chungchang an chhuinaah hian 29 June, 2012 ah pawh hetiang lam thubuai avâng tho hian man a lo ni tawh a, thu kimchang erawh thup tlat a ni thung. Hadden-a chu man a ni lem lo va, mahse September, 2013 aṭangin dam lo enkawl tawh lo tûra a chungthu rèl a ni ta a ni.

  1. A dam lo pawngsual vânga kum 18 táng : Chicago-a hmeichhe doctor pakhat Bruce Silvester Smith-a chu a dam lo pakhat enkawl lai a pawngsual nia puh niin, kum 18 táng tûra a chungthu rèl thlûk a ni. He thil hi kum 2002 daiha thleng tawh kha a ni a, mahse Smith-a chu kum 2010-ah man a ni chauh thung. Procecutor-te sawi dan chuan kum 2002 khan Smith-a chu man a ni tho nâ a, a DNA sample te chu lâk sak a nih loh avângin a hmeichhe pawngsualin thubuai a theh luh chu bawh zui a ni ta lo a ni.

                A chungthu an rèlnaah hian Smith-a chuan a dam lo mut pui nên intih luihna engmah a awm lo va, an duh ve ve vânga ti an ni tiin a insawi a. Hei hi nimahse, hmeichhe dang engemaw zat an rawn ding chhuak a. Pakhat chuan Smith-a chu a kiangah mawi lo tak taka chêin, a kuahin a chúl vêl ṭhin a, a hmel ṭhat thu leh a pasalin a mut pui ngai loh avânga mak a tih thu te a hrilh ṭhin niin a sawi a. A dang pakhat leh chuan, a serh báwr vêl endik a nih laiin, Smith-a chuan a nih dan tûr ang ni lovin a khawih chiam niin a sawi ve bawk.

  1. Kum 17 kalta a dam lo pawngsuala puh doctor : Kum 2013 khan Lincolnton, North Carolina-a doctor pakhat chu pawngsual leh phiarrûk thubuaiah man a ni a, he thubuai hi kum 1996-a dam lo pakhat chunga a thil tih vâng a ni.

                Hmeichhe doctor John E. Marshall-a thubuai hi an chai rei hle a, amah puhtu hmeichhia hian kum 1996 khan a pum nuam lo endik tûrin Doctor John-a hi emergency room-ah a ráwn a, thuneitute hnêna a sawi danin, Doctor John-a chuan chu nu chhûl leh chi kawng vêl chu a fel lo nia sawiin, eng damdawi emaw ni a pê a, chu thil chuan a taksa chu che thei lovin a siam a, amah erawh a harh reng thung, chutih lai chuan doctor chuan a pawngsual niin a sawi a ni.

                Kum 2011 khan doctor John-a license chu tiam chin awm lova tihtâwp sak a ni ta chauh va, a chhan chu, nurse pakhat mawi lo taka a khawih bâkah, a dam lo enkawlte chanchin fel fai takin register-ah a ziah luh loh vâng a ni. Doctor John-a hi intiamkamna siam pui a ni a, a bawhchhiat chuan dollar 1,00,000/- a chawi thei dawn a ni. Hei bâkah hian a dam lo enkawl ṭhin hmeichhe tam tak te chuan Doctor John-a’n a khawih dan te chu an rawn puang hlawm bawk a ni.

  1. Damdawi dik lo chawh ṭhin leh dam lo te khawih ṭhina puh doctor : Indiana hmeichhe doctor, Paul Kelty-a chu thuneitute hnênah inpein, dam lo te hnêna damdawi sáng tak chawh ṭhin, dâwt hmanga report ziak ṭhin leh a dam lo enkawl lai te mipat hmeichhiat hman khaw loh pui ṭhin nia an puh vâng a ni.

                February, 2013 khan police te chuan doctor Kelty-a office chu an dap a, finfiahna tûr thil tam tak an hmu chhuak ta a ni. Hei bâkah hian kum 3 chhungin hmeichhe nau pài engemaw zat chu nachhâwkna hlauhawm leh an ei chi loh damdawi nuai engemaw zat a lo chawh tawh ṭhin tih an hmu chhuak bawk. Tin, Doctor Kelty-a hian a dam lo hmeichhe enkawlte chu mawi lo tak leh mipat hmeichhiatna lam hawiin a khawih fo ṭhin nia rinhlelh a ni bawk. Hei bâkah hian dâwt sawi tûr leh report dik lo ziak tûra thamna pawisa la ṭhina rinhlelh a ni bawk. https://ekhai.com

                Dr. Kelty-a hi damdawi ruih chi kawl thubuai te, medical report tihkhawloh thubuai te, rûkrûk thubuai te, mawi lo tak taka hmeichhe khawih thubuai leh midang kut thlâk thubuai te a awrh tir ta a ni.

                – Zahawmna chu hlawh chhuah a ni ṭhin a, thudik chuan lawm a hlawh a, rinna chu hlâwkna a ni a, rinawmna chu rulh lêtin  awm ṭhin.

 

English Source  : http://www.oddee.com/item_98893.aspx

 

Thulâk chhuahna : “D Zun”