HMANGAIHNA LEH HUATNA

48

HMANGAIHNA LEH HUATNA

                Kumhlui kan han thlah liam  dawn meuh hi chuan mitin rilru hi engemaw ti tak hian a awm a, a ṭah zawng leh ṭha lo zawng pawhin kan sâhâwk ru deuh tlat ṭhin. Ngaihzawng nei ten an kawppuite nêna kumhlui thlah liam kher an tum a, ‘Zanin na nâ nâ chu’ ti niâwm takin mahni in lum chhuahsanin khawlaiah an intheh ṭil a, kum hlui thlah liam pui tûr nei lo bik nih hlau niâwm hrimin beiseitu mitmeng a zawng ruai a, a tàwpah chuan a rilru ang pu mi chu a tawng ve ta nge nge ṭhin. He kumhlui liam tûr hian mitin rilru tiphâwklêkin, zahawmna pawh hnuh hniamin a awm a, chu chuan mihring mihrinna chawk chhuakin, nawmchen duhna khurah a hnûk lût ta ṭhin a ni. A enga pawh chu nise, indem tûr chuang bik kan awm lo ve. Kumhlui liam mai tûr hian boruak engemaw tak zawng kengtelin, huháng a lo ngah ru êm a tin ni.

                Thingtláng tleirâwl pakhat, hlawhtlin tum vânga khawpui rawn bêl chuan ti hian a sawi a, ‘Kumhlui thlah zàn hi awm lo se, min hmangaihtu ka nu kha thlamuang tain a châwl ve tûr. A ṭawngkam chhuak hnuhnunga ka hming a lam lai khan a kiangah ka awm si lo,’ tiin a kumkhaw inchhîrna tûr thu a chhâk chhuak a.

                He tleirâwl hian an chhungkaw dinhmun harsatzia chu a hmuh hmaih bîk awzáwng lo. Mahse, zirna chhunzawm tûrin khawpui lam a pan chhan erawh, a hmá lawkah hlawhtlinna ropui a awm tih a hmuh tlat vâng a ni. A nu leh pa hmangaihna a chhût a, vâr ṭian pawh sawi lo va, a fate tána an thawhrim zia leh hah zia pawh a hmuh hmaih bik lo. Chu hmangaihna chhânlêt nâna a nu leh pa te nuamsa taka siam chu a thil tum lian ber a ni tawp mai. Mahse, khawvàr dáwna thim zual bik lai a awm ang bawkin, hlawhtlinna duhawm tak hma chiah hian thim chhah tak a awm duh fo ṭhin si.

                An neih zawng zawng sáwr chhuak tak meuhvin, an fanu duhthusàm tihhlawhtlin tumin an retheih zual phah reng bawk a. Mahse, chu retheihna phèna hlawhtlinna chu he tleirâwl hian a en tlat avângin, a thil tum chu ṭhulh a tum lo thung.

                Lehkha zir chungin a inhlawh pah a, a in luah man leh ei leh in pawh mahnia intodelh tumin a bei ve fat fat ṭhin. Tleirâwl ṭhang duang leh mahni kum phu lo va hleitling a ni a, a mitmeng mawi tak leh a hmui invuah dan mawi tak chu mite sawi a ni fo ṭhin. Chu a hmel ṭhatna thurûk chu khawpui tlangvalte pawh chuan an lo hmuh hmaih bîk hauh lo. Khawpuia a awm aṭanga ni rei lo têah inléng a nei ṭan nghal a. Duhsaktu leh thil pêk petu pawh an kal ta nuk mai. Ani thingtláng aṭanga sei lian, retheih luat vânga ngaihzáwng pawh la hmelhriat thiam lo tán chuan chûng mite lo dawnsawn chu hriatthiam a harsa a, an duhsakna phèna an rilru awmdan tûr phei chu a man thiam pha mawlh lovang le. Thil pêk petute chungah chuan thinlung takin a lawm a, amah hmangaih tak taktu angah ngaiin a thiam ang tâwkin an chungah pawh ṭhat a lo chhuah ve ṭhin a ni.

                An college kal pui mi pakhat, an veng ṭhenawm maia awm, chhungkaw hausa tak mai fapa Francis-a chuan mipa dangte ang bawkin a ngaizawng ru ve êm êm bawk a, a class kal lam leh haw lam te chu motor-in a hruai ziah nghe nghe a ni. Chu mai a ni lo, a in luah man leh a ei leh in tûr te pawh a tum sak fo ṭhin bawk a, hun àwl a neih chángin hmun hrang hrang fan puiin a lèn kual pui bawk ṭhin. Chutiang taka inzui ngun ta chu Tluangi pawh chuan a ngaina hle a, a chungah rinna nghatin, a mipa hmangaih hmasa ber a ni hial nghe nghe a ni.

                Hmangaih hmasa ber te hian rilru leh ngaihtuahna an ei nasat zia chu tu mai pawh hian kan hre ṭheuh àwm e. Tluangi pawh hian chu nun chu tem vein, hmangaihna chuan a buai â zo ta. Kawng dik zawh tûra kawng kawhhmuh ṭhintu nu leh pa te tel lovin hmangaihna kawng chu a zawh ṭan ta. A bumboh zia leh mi tam tak mittui luanna ram a nih lam rêng hre lovin, thinlung thianghlim takin a zuang lût chu a ni ta si.

                Amah lo ngaizawng ve êm êmtu leh a inleng dangte lakah pawh a bialpa neih chu hriat theih khawpin a tilang ta mai a, rei lo têah in leng dangte pawh an ṭil ṭiak ṭan ta. Chu chu remchángah làin, an pahnih chuan chimbuaitu leh dîp dâltu awm lovin, hmangaihna pár chu an tlân a, mahse Tluangi erawhin an dinhmun inthlauhzia a ngaihtuahin phu lo a inti a, mahse, kalsan erawh a thei bîk si lo. Chu a rilru kaptu avâng chuan vawi tam rilru hahin a awm a. Francis-a kianga a sawi lahin, ‘Hmangaihna aia hlu leh ropui hi a awm lo,’ tiin a lo chháng sam êt zêl bawk si. Chu ṭawngkam ngaihnobei tak avâng chuan a thla a mùan phah a, rethei tak chhungkua aṭanga rawn chawr chhuak a nihna pawh theihnghilh tirin, lal nu ang maia ropui ni ten a inngaih phah hial ṭhin a ni.

                Mihringte hi zawng neih loh apiang awt ṭhin kan ni miau va, Francis-a pawh hian Tluangi thinlung nei tumin a theihna zawng zawng a sáwm khâwm a, a thil duh chu a han nei ta chèng a, mahse, a dang neih belh leh châkin a tuihâlna chu a reh chuang lo. Tluangi duhawmna leh mawina te chu a tak ngeia chên a châk leh ta tlat a, hmangaihna kawng la dai ngai lo leh hetiang lama zilh leh fuihna la dawng ngai lo Tluangi tan chuan invèn dàn thiam a harsa ngei ang le. Tichuan, hmangaihna tui a fâwn lai tak chuan Tluangi thianghlimna leh hlutna pár chu thliahin a awm ta.

                Tluangi khawpui awm chhan leh tûna a awm dan chu a inpersan chho ta zêl a, a thuam inbel duhzawng leh ngainat zawngte pawh a inher danglam hret hret reng bawk a. Mirethei fanu ni mahse, Francis-a’n sum leh paia a chàwm hneh êm avângin a nihna dik tak pawh a theihnghilh ta fo mai. A nu leh pa, a chhungte ngaia kúr ve nguai ṭhin kha, tûnah chuan an khaw lamah a haw ngai ta meuh lo bawk. Francis-a chu a tán khawvêl thar a ni a, a tel lova rei lo tê awm hran pawh thih hreh takin a hreh bur tawh a a ni ber e. Hetiang taka hmangaihna bual ât a an han awm ta mai chu, Fracis-a an a âtchilh bawk si, Tluangi lahin a âtchilh ve tawh laklawh bawk si a, a tâwpah chuan an â dûn ta a nih chu! A va râpthlâk tak a ni… 😀