HIGH SCHOOL THLENG KHA LO INHRIA ILA, ṬHA ZÂWK TÙR.

113

HIGH SCHOOL THLENG KHA LO INHRIA ILA, ṬHA ZÂWK TÛR…

                Ka ṭhianpa nupui neih ni chuan mihring kan tam nangniang mai. Fapa mal a nih mai bâkah, an khawsak phungin a chaldelh ve hrim hrim bawk a, chuvâng chuan an sawm zau hle tih a hriat theih.

                College kan kal laia kan ṭhian zaho mai bâkah, high school-a kan kalpui ṭhin te hmél pawh ka hmu nuk hlawm a, chûng mipui zi nuai nuai kárah ka mit latu pakhat ka tawng ta tlat mai. Amah chu tu dang ni lovin, high school kan kal laia ka lo star rûk ṭhin êm êm, mahse zahzum luat avânga ka duhna tilang ngam lova ka lo thup bo pui Jane-i ngei mai chu a ni. Tûnah chuan kum pawh zah ṭih ṭeh hun lai a kal pêl ve ta bawk a, amah chibai tûr chuan Jane-i lam chu ka pan ding ta nghal a, ani chuan min lo hre tawh lo pawh ni se, mahni ka insawi chawp mai ang tiin zahna vânga ka hun ṭha neih leh chu bawh pelh ka tum tawh hauh lo. Ka pan hnai zêl a, chutah kan koh a, ṭawng hmasatu zâwkah chuan ka hming ngeia min hria tih ka hriatna chuan phûrna min pe nasa lehzual a, mut hmanga inchibai mai duh tâwk lovin, amah ka hmuh leh avânga ka lawmzia hrilh pahin ka kuah ta hial a ni.

                Jane-i nên hian kum tam kan inhmu tawh lo va, hmel leh pian phung pawh nasa takin a danglam ve tawh a. Mahse, a aw ngaihnobei chêk erawh kum tam liam hnu pawhin a la ngai reng si. A awka chhuak tawh phawt chu ala ngaihnawm êm êm vek a ni.

                Hetia kan inhmuh leh aṭang hian kan inkawm nghal deuh chawt a, a ṭhiante bula min pên san a tum lo ang bawkin kei pawhin a kianga awm chu ka thlahlel ru ve êm êm bawk. High sikul kan kal lai chanchin te sawiin kan hlim dûn ta phian a, ka star rûk ṭhin dan leh ka biak ngam bawk si loh dan te thleng chuan zêp nei lovin ka hrilh fai ta vek a. Ani pawhin min lo star rûk ve tho dan te chu a sawi chhuak ve ta roh va, ka biak hmasak nghâka hmun remchang deuhva a lo awm ṭhin dan te thleng chuan a sawi ve ta vek mai a. A rûka in star, mahse be hmasatu nih hreh avânga lo inkawp lo mai mai kan nih dan te chu kum engemaw zât liam hnu chuan kan hre ve ta chauh a nih chu! Chutianga thu kan han sawi chhuak chuan min tihlim ta phian a, ka ṭhianpa nupui nei ai mahin kan hlimna chu a nêp chuang bik awm lo ve ti ila kan ti mah mah mai thei.

                Inneih ruai kan ei hnu pawh chuan ṭhian za hovin zan thleng kan la awm a, intihhlimna hun te neiin boruak dang siam thei thil te pawh an rawn phawrh chhuak hlawm ta nulh nulh mai. Keini pawh chuan an hlimna chu ṭawmpuiin, zu no khat ve ve chu kan dawm dûn ve ta ràn mai. Dar 8 vêl chuan kan ṭhiante nupa chu kan ṭin san ta hlawm a. Jane-i thlah haw tûr chuan ka motor-ah chuan kan lût dûn ta. Zu in ngai lo tih takah, zu no khat lek pawh chuan min lo tiphûr pha teh reng mai a niang chu, haw nghal mai chu ka la ui ru deuh tlat a, chu lovah, Jane-i bula awm chu ka la kham lo va, ni dangah kan inkâwm leh ang em tih pawh ka hre bawk si lo. Ka zah theih loh chhuahin lên kual puiah ka sawm ta tawp a, ani pawh chuan a lo hreh bik lem lo.

                Dai pawnah tlân chhuakin khaw lan chian theih deuhna hmunah chuan kan châwl ta a, zan khawvâwt hnuaia léng kan nih avângin kan han inkuah a, dip dâltu awm lo leh tleirâwl chhuah aṭanga lo in star ru ve ve tawh kan nihna chu kan tilang chhuak dûn ṭan ta a. A aw ngaihnobei tak lo chhuahna hmun ngei mai chu ka hmaah rawn dawhin, kei pawhin ka tih tûr chu ka hai bik mawlh lo. Kum tam liam tawh hnua tleirâwl thinlung mu hnu kan han thar tawh leh chu a boruak a dangin, a mi deh dan pawh a dang bik zar mai. Kan han in en a, sawi tûr pawh nei chuang lovin kan innuih var var a, kan awmdan vêl chu kan tleirâwl ṭha leh ni berin a lang. Rei tak kan awmdun hnu chuan zan tlai tawh takah haw zai kan rel ve thei ta hrâm a.

                An in kan thlen dawn chuan kan inhmuh leh hun tûr ka zâwt a, ani chuan an hna avânga kar khat a zin bo tûr thu chu min hrilh ta mai. ‘A nih chuan engatinge zan rei tak thleng min pui? I chau lutuk ang a sin,’ ka han ti a. ‘Ka hria a lawm, mahse, zanin a ka hlimna hian chauhna ai chuan chakna min pe nasa zâwk ngei ang,’ tia min chhanna chuan mipa rilru a va fan thûk tak êm. Duh thawh taka kan inkuah leh vawng vawng hnu chuan kan inmang ṭha ta a.

                Hàw kawngah chuan thil tam tak ka ngaihtuah a, Jane-i nên chuan kum engemaw zat inhmu tawh lo kan ni a, rilru leh thinlung pawhin a hriat rengnaah a dah tawh lo. Mahse, kum tam liam hnuah intawng lehin, a rûka kan lo induh tawnna chu a lang chhuak ta chauh mai si. Keini pahnih hi Khuanu samsuih kan ni thei mai ang em? tiin ngaihtuahna chu a vâk vêl a. Tu hriatpui lohvin thinlung chu a nui ver ver reng mai.

                Jane-i nên chuan kan inkawp rei telh telh a, kan duh zawng leh mizia, kan nuam tih zawng pawh a lo in ang khawp mai. Chutih rualin hna hrang ve ve thawk kan nih avângin duh angin kan inhmu tam thei lo va, a chang phei chuan zin chhuah a ngaih ṭhin avângin, kar hnih dawn te inhmu lovin kan awm ṭhin. Mahse, hman hun a rual chang erawhin, thlarau khawvêl mite en ngam loh khawpa chêt nat cháng kan nei fo bawk.

                Thil mak ve deuh pakhat chu, inngaihzàwn kawngah hian a inngaihzawnga te aiin, an ṭhiante emaw, midang tute emaw hi an lo buai zâwk tlat ṭhin hi a ni.

                Jane-i chanchin pawh chu an office-a an thawhpuite ká aṭangin thu bengverh tak tak ka hre ta fo va, ‘Director Toy a ni,’ tih te leh a dang pawh. A tir chuan an tluk loh vanga sawi chhiatna remchang an zawn vangah ka ngai mai a, mahse, an thusawi nêna ngaihbel theih tûr thil ka hriat tâk zeuh zeuhah chuan finfiah châknain ka tuihal ṭan ta.

                Ka thiam ang tâwk chuan ka han chhui ru ṭan ta a, an Director chuan a zin chhuah a piang deuh thawin a lo hruai tel ziah a, hmun hla deuh leh rei deuh chàm ngaihna hmunah phei chuan a hmaih ngai lo chu niin.

                An thlenna hotel-ah pawh room khatah an lo riak dûn fo va, room hrang an book a nih pawhin, a pu mutna siam fel hna chu a pu chuan a tih tir ṭhin niawm tak a ni. Tin, a hnathawna a an hotute lakah chuan a tlatlum hlawm hle bawk a, a thusawi tawh chu India Prime Minister thu ang maiin a kal tluang ṭhin bawk. Chu zawng aia mak chu LDC ni siin, a hna chanpual erawh, bodyguard ang maia an hotute hnaiha a awm reng mai chu a ni.

                Ka thil hmuh chhuah aṭanga a lan dan chuan a thawhpuite thusawi kha dâwt muhlûm a nih a rinawm loh ta rum rum mai. Mahse, rilruin chutiang mi ni tûr chuan Jane-i chu ka ring phal bawk si lo. FInfiahna chiang tak ka neih hma loh chuan awih loh luih ka tum ta zâwk a. An zin chhuah leh tûr thu ka hriat chuan kei pawhin ka hnathawhna lamah chawlh ka la ve nghâl a. ka thinlunga zawhna tam tak riak fiah tûr chuan ka zui ru ve ta tawp mai a ni. Ka thil tih dan chu ka chunga thleng tûrah ka han ruat chhin a, ka duh loh leh huat zawng tak chu a ni nameuh mai. Mahse, duh thlan tûr dang ka nei miau si lo va le.          

                Ka hlauhthâwnna rûk ang ngei chuan, ka thil hmuh duh loh leh hriat duh loh chu ka mit leh beng ngei mai chuan a hre ta zêl a. Nunnêm leh zaidam, rilru thianghlim tak nia ka lo hriat ṭhin kha, khaw dangah chuan a lo ni ta hauh lo. Zu leh sa te nên nuam tâwlin, ‘Director toy’ tia an lo sawi ṭhin chu a dik zia ka hmu ve ta. Rilru nat avângin biangah mittui a luang a, ani nêna kan lo intawng leh kher kher te chu pawi tihnain ka khat ṭan ta. Engvâng nge nun bawlhhlawh tak nei chung renga kei hi mi kawp tho si? Hmangaih biahthu min hlàn a, ka kianga awm ning ngai lo inti tu khan, mual hranah erawh min ngaihtuah chhuah nachang a hre ta lovem ni? Nge? Derthiam lanu an tih ang hi a lo ni zâwk?

                Ka thil chhui lai chu ka chhui chhuak ta ngei a, mahse, chu chuan thinlungah nasa takin min hliam ta thung si. Engvânga a pu laka sihhnip êm êm mai nge maw a nih le? tih chu rilruin chhui leh law law châk hle mahse, rilru natna belhchhah tûra mahni insiam chu ka ngam tawh ngang lo a ni.

                Kan intawn dan ka ngaihtuah a, Khuanu samsuih ni ang hial te a ka lo inruat hman te chuan thinlung a ti na zual a, kan intawn tirha ka hlimna aia nasa zâwkin lungngaihna leh beidawnna, rilru natna chuan min hliam leh ta thung si. Ka chanpual emaw tia ka lo ta neih chu midang pawhin an lo ta neih ve hlawm si a maw!! Rilru ná leh zak ru tak chung chuan an zin kawng chu ka zawh chhunzawm pui ngam ta lo.

                An rawn hàw leh ni chuan min ngai ber niawm hrimin an thlen chin te chu a khât tâwkin phone-in min rawn hrilh reng a, mahse, a aw ngaihnobei chêk te chu ka rilru ti na zualtu an chang zo ta si. In an thlen hnu pawhin vawi tam min rawn phone leh a, mahse, an in lam pana ke pên erawh ka tum tawh bik lo.

                A tûk zan chuan amah zâwk chu a rawn leng ta hlawl mai a, min ngaih tawh zia leh a zin haw a ka lèn loh avânga a thinrim zia te chu a rawn sawi nghal bawrh bawrh a. Mahse, chung thu te chu ka tan awih ngam chi a ni tawh si lo. Amah chu ka en vang vang a, duhawmna tinrengte hian mal an sawm tih chu hai rual a ni lo. Mahse, chu malsawmna chu hmang thiam lovin, nun khaw loh phah nân a hmang ta si. Thu tama kan inbiak hma chuan, ‘high school kan kal lai thleng chiah kha lo inhria ila ṭha zâwk tûr,’ ka ti chhuak ta phawng mai a. Mak tih hmel taka min en reng lai chuan, ‘Ka zin report ka hrilh ang che…’ ka han ti a. Ka thil hmuh leh tawn te chu ka hrilh ta vek mai.

                A mit aṭang chuan mittui a rawn luang chhuak a, insawifiah tumin, a tir tê aṭanga thil awmdan zawng zawng chu min hrilh a han tum a, mahse, ngaihthlâk sak tûrin beng hian rilru natna lam rêng rêng hriat belh a ngam tawh rih si lo. Mittui far ṭeuh chung chuan kan in en dûn reng ringawt a, chumi hnu chuan min chhuahsan leh ta a ni.

                Ka ṭhutna ngaiah chuan ka rilru kâwmin rei tak ka la ṭhu zui reng tho va, mahse, thil pakhat theihnghilh ka nei tih ka hre chhuak ta zawk mai. Ka motor chahbi chu lain páwn lamah chuan ka tlân chhuak ta vat a, thui pawh ka tlân hmain Jane-i chu ka va hmu ta. Kawng thlang Lung dawh chungah hian a lo ṭhu a, awrawl chhuah meuhvin a lo tap chu niin. ‘Jane, tirawh, ka va thlah ang che, in veng a hla êm mai,’ tiin motor chhungah chuan ka kai lût a, tichuan an in kawt thleng chu ka thlah ta a. Kalkawngah khan vawikhatmah kan inbe lo va, motor aṭanga a chhuk hnu, an gate kawngka aṭanga kan inmang ṭha na bâk chu kan la inbe leh ta lo a ni. https://ekhai.com

                Jane-i chuan engtin nge nun a hman chhoh tâk zêl ang tih ngaihtuahna nên, ani chu tûn thleng hian – ka la theihnghilh thei ta bik lo chu a nih ber hi.     – Vena pa

Thu lâkna ‘D zun’