Egypt : Christian hmeichhia te tan khawvêl hremhmun

288

Egypt : Christian hmeichhia te tan khawvêl hremhmun

                “Egypt ramah chuan Muslim mipa te hian Christian hmeichhia te chu mihur ang vekin an en a, chutiang a nih vâng chuan Egypt ram a Christian hmeichhiate tan chuan nitin mai hi hremhmun a ni ringawt mai a ni” tiin Egypt Coptic Christian Journalist hmeichhe pakhat chuan a ziak a.

                “Khua mipui tam zâwk te’n hmeichhia te chu mi zahpuiawm anga an thlirna hmun, a en sáng ber paw’n mipat hmeichhiat in hrîkthlâk nân lek a tihna ramah hmeichhia nih hrehawm dan tûr chu han ngaihtuah teh, chuta chhapah Christian hmeichhia leh lek phei chu an dinhmun a chhe leh zual êm êm a, an tan nun a harsa tak zet a ni” tiin Catholic news website The Tablet-ah Engy Magdy chuan a ziak a, “Hremhmun a  ni mai” tiin a ziak a ni.

                Cairo based Journalist nu chuan Egypt ram a hmeichhia in sexual harassment a tawrh zozaite chu ram pum anga hripui hlauhawm leng ang taka enkawl a ngai tawh niin a sawi a. 2013 United Nations study-ah chuan Egypt ram hmeichhia 99% hian sexual harassment an tâwk a ni. Magdy-i chuan “Hmeichhia hrim hrim 2nd class citizen anga en an ni a, Christian an nih ngat pheic huan an chung a rip leh zual ṭhin a, Christian hmeichhia te hriat hran an awlsam ropui si a, an tan a hrehawm hlê” tih a sawi a, “Muslim hmeichhia te chuan an lu an khuh (hijab) ṭhin a, hetiang a lu khuh ve lo hmeichhia chu Christian ni tur a ngaih a ni nghal tawp a, Egypt mipa te chuan Christian hmeichhia te chu ring lo mi leh mihur angin an en a, an duh duh a chhaih leh tih nawmnahna Rights nei emaw an inti tlat tawh ṭhin a ni” a ti. A nihna takah chuan Egypt mipa te chuan Coptic Christian hmeichhia te chu target berah hmangin a rilru thlâksak thei a, amah kha pasalah a in neihtir thei ngat a nih phei chuan Vanramah Lal lukhum lian tak a chhêk khâwl dawn ni a inhriatna an nei a ni.

                Christian hmeichhia tinawmnahtute hian dem an hlawh ngai lo mai ni lovin Egypt society hrim hrim hian hetiang mi te hi a ṭan tlat a, thuneitute kianga report an tum ve chang pawhin ‘I report chuan i chungah zahna nasa tak a rawn thleng dawn” tiin an lo sawi ṭhaih ṭhin a ni. Victim kha Christian hmeichhia a lo nih hlauh phei chuan thuneitute chuan a report tu chu lu pawh khuh duh lo, inchei dan in a zir loh vanga a chunga thil thleng, amah dik loh in a hrin chhuah tiin thiam loh a lo chantir zêl ṭhin tiin Magdy chuan a ziak a, 2017 UN report kan thlir chuan Madgy-i thusawi hi rinhlelh rual a ni lo, Egypt mipa 64% chuan khawlaiah hmeichhia an chhaih/tinawmnah ṭhin tih an pawm a, hetiang an chunga thil ṭha lo thleng hmeichhia te hi an in puan emaw an report chuan nasa taka tih zah an ni zâwk ṭhin. Egypt a mipa te chauh hian rilru dik lo an pu lo a, hmeichhia 84% te chuan “Hmeichhia in a inchei dan uluk loh vanga a chunga thil thleng a awm chuan a phu ve rêng a ni” tih ngaihdan an nei a ni tiin report chuan a tarlang.

                Hetiang a nih vàng hian Christian hmeichhia tam zâwk hi chuan an chunga thil duhawm lo (Muslim mipa thlen tir) a thleng a nih pawhin khua mipui leh Police ngei te aṭanga enhran/ensan an hlauh avângin an report ngam ngai lo a, 2016 pawh khan Coptic Christian hmeichhia kum 72 mi chu khawlaiah phelh ruah vek a ni a, tichuan ruakin khua fantir a ni a, thuneitute chuan hetia titute hi pakhatmah an man lova, tûn thlengin thiam loh chantír an awm lo. Engy Madgy-i chuan “A pawi ber mai chu hmeichhia te leh zêl hian an hmeichhiatpui te rah beh a an awm naah hian ṭhahnem an ngai êm êm hi a ni” a ti a, “Sakhua ngaihdan filawr tak aṭanga an thlir in an hmeichhe pui, tih duhdah tuar te tiin an lo dem ve zêl ṭhin hi a ni” tiin a ziak. Khawvêl hmundanga kan ringtu puite tan hian tih theih kan nei a ni, chu chu ṭawngṭâi hi a ni. Khawvêl hmun hrang hrang a kan Christian pui te tan hian i ṭawngṭai ṭhin ang u tiin Zonu magazine ah chuan an ziak a ni.

Comments