CHINGHNE – MIHRING (WereWolf)

309

CHINGHNE – MIHRING (WereWolf)

            Vawikhat chu France ram khawthlang lama ramngaw hmun pakhatah hian ram chhuakho rual khat chuan, mipa naupang ruang, saruaka lo let reng hi an chhar a. Mi ruang pangti chu a lo thlerin a pilh hnuang mai a, a taksa ah him lai rêng a awm lo. A hmutute chuan an han enchiang a, a kut leh kete chu a la lum thar thar a, a phu eih eih bawk a. Mi ruang an pan lai chuan an piah lawk thing buk kara tlan phe vuai hi an va hmu hman a. Chinghnia ni mai àwm hian an hria a. An va ûm a, an va man chhuah chuan, Chinghnia ni lovin mihring an va man ta tlat mai a nih chu.

            An mi man chu, pa khan sáng leh ria deuh, silhfen ṭawp tak inbel, a sam leh khabe hmulte chu hreu bem bum tak a ni a. A kut leh ke te chu thisen tharlám hian a lo bual sen súng mai a, a tin hriam karah te chuan mihring tisa them a bet luai mai bawk a. A hmutute chuan mak an ti nasa mai a ni àwm e.

            An han inzawh chian chuan, chu pa chu kutdawha vak vel ṭhin, Jacques Roulet-a a lo ni reng mai a. A chungthu ngaihtuah turin roreltute hmaah an hruai a. Rorelna hmaa a inpuanna thu chuan mi a râp hle a ni awm e. Court hmaah chuan, “Chinghnia ka ni,” a ti hmiah mai a.

            “I kut leh kete chu Chinghne tin hriamah a chang ṭhin em ni?” an tih chuan, “Aw, ni e,” a ti tawp mai a.

            “I lú chu Chinghne lú angin a lo awm ve mai em ni?” an tih chuan, “Engtin nge ka lú a awm tih ka hre lo. Mahse ka hate hi hriamhrei angin ka hmang ṭhin a ni,” a ti.

            Roreltute chuan Roulet-a chu, a insawi angin Chinghniaah changin, Chinghne-mihring (Werewolf) tak tak nge a niha a rilru buai avanga Chinghnia niin a inngai em ni zawk, tih an ngaihtuah a. A enga pawh chu lo ni se, Roulet-a chu khaihlum tura ngaih a ni hrim hrim a. Mahse roreltute chuan zahngaihna lantirin Roulet-a chu rilru buai niah ngaiin mi â dah khawmnaah kum hnih awm turin an ti ta lek a ni.

            Chinghne-mihring (werewolf) an tihte chu, mihring pangngai ni si, Chinghnia duh hun huna chang thei an ni a. Mi ṭhenkhat erawh chu an rilru buaina avangin Chinghnia niin an inngai a, Chinghne khawsak dan angin an khawsa ṭhin a ni.

            Werewolf dik tak chu mihring aṭangin Chinghniaah a chang thei a, a taksa péng hrang hrang te pawh Chinghne pangti ang maiin a inlet thei vek a ni. Eng ang chiahin nge werewolf-te hi an khawsaka mite hriat loh tura an inthup ṭhin tih hi ngaihdan a inang lo hlawm hle a.

            Engtin nge mihring hi Chinghniaah an lo chan ṭhin, tih pawh hi sawi dan a inang lo va. Mi ṭhenkhat chuan, Chinghne sehhlum sa – beram emaw bawng emaw ei te hi Werewolf-ah an chang ṭhin niin an sawi a. Chinghne thluak ei te, Chinghne rah hnu tui in te hi werewolf-ah an chang thei niin an sawi bawk.

            Ṭhenkhat chuan, mi beng parh veh vuh, zim zuih deuh nei te, ha kuh deuh ṭhe ṭhu nei te, tin kawm vên vûn nei te, mithmul buk leh sam buk deuh nei te, kut leh ke hmul ngah takte hi Chinghniaah an chang duh niin an sawi bawk. Vanduaina avanga chang ta mai pawh a awm theiin an ngai bawk. Titiah chuan, mi bawraw leh a tenawm záwnga hurherh deuh a khawsa ṭhin te hi, an thih hnuah Chinghnia angin an inlár ṭhin niin an sawi bawk.

           Mi ṭhenkhat chuan werewolf nih hi an châk viau niin sawina a awm. Chinghnia chang tur chuan dawithiamna thil eng emaw te hmangin an bei ṭhin a. Chinghniaa chan theihna hun ṭha ber chu thlahleinga zàn hi niin an sawi. Dawi thil eng emaw te hmangin dawi hla te an chhak a, ramhuai hnenah ngenna te an siam ṭhin a ni. An dawi hla chham leh a behbawmte an tihdik phawt chuan Chinghniaah an chang a, Chinghnia ang chiahin an khawsa ta ṭhin a ni. Chinghnia angin kut ke tin hriam tak an nei a, an taksa pawh Chinghne hmul ang chiahin hmul buang ther thur a khuh ta ṭhin a ni.

            Chutianga Chinghnia an chan theih tawh chuan zantin ni tlâk vel aṭangin Chinghniaah an chang a, zing khawvar tirh velah mihringah an inlet leh ṭhin a ni. Chutiang chuan an thih ni thlengin an ti tawh mai thin a ni. Thawnthu ṭhenkhatah chuan, Chinhnia aṭanga mihringa chang leh turin, vaivutah a tâl emaw, zing dai tlaa a inbual emaw a ngai ṭhin niin an sawi. Khawvar rualin mihringah an in-let leh mai a ni, an ti bawk. Tin, Chinghniaa an chan laia hliam an tuarin emaw, an thihin emaw mihringah an inlet nghal vat mai a ni, an ti bawk.

            Mihring aṭanga Chinghnia; Chinghnia aṭanga mihringa inleh chungchang hi hmasang mite puithùna leh rin dan âtthlak mai a ni a, a taka thil awm thei chi pawh a ni lo, tiin mi tam takin ngaihdan an siam thei ang. Mahse thil chhui chîk mite chuan an pawngpaw hnawl mai hauh lo tlat.

            Kum 1865 khan S.B. Clould-a chuan a lehkhabu ziah pakhat, “Chinghne-mihring : Puithùna âtthlak” tihah chuan, “Hmanlai ata tawh hetiang titi hi hmun hrang hrangah sawi tur a awm zel avangin, chhan ṭha tê a awm a ni ngei ang,” tih leh, “Khawvel mihring zatve laite hian Chinghne-mihring hi a taka awm a nih an ring,” tiin a ziak a.

            Ziaktu pakhat, Elliot O’Daniel pawhin chu chu a pawmpui thlap a. “Rilru buai ât vanga Chinghne lema changte hi chu awlsam takin an inpuang mai a, a tak tak erawh chu nasa taka dâwp sawisak an nih hnuah chauh an inpuang ṭhin a ni,” a ti.

           History ziaktu hmingthang, Father of History tia hriat ṭhin, Herodotus-a chuan, “Mihring aṭanga Chinghniaa changte hi, Chinghnia anga ni eng emaw zat an awm hnuah, an awmdan pangngai – mihring – ah an inlet leh ṭhin a ni,” tiin a sawi.

            Thil chik mite chuan, Chinghne-mihring hi a takin an awm ngei tih an sawi deuh vek a ni.

            Roman ziaktu pakhat, Petronius-a chuan Chinghne-mihring chanchin hetiang hian a sawi –

            “Chhiahhlawh pakhat chuan a pu zin chhuak tur a zui ve a. A pu hi sipai a ni a, an zin chhuah hun, an chenna khua an chhuahsan hun hi tlai lam a ni. Khaw dai an thlen chuan sipai chuan a thawmhnaw inbel lai chu a hlip sawk sawk a, kawng sirah a dah a, Chinghniaah a chang ta mai a. Chinghnia angin a û ruah ruah a, ngaw chhung lamah a tlan lut ta a…

            “Chhiahhlawh chuan a pu nena an kalna tur khua chu amah chauhvin a va thleng ta tho va. Khua a va thlen chuan mite chuan, Chinghne pakhat a rawn kal a, bâwng a rawn seh a, mi pakhatin Chinghnia chu feiin a ngháwngah a khawh a, a tlânchhe ta a ni, tih thu an lo hrilh a…

            “A tukah chuan chhiahhlawh chu khawvar veleh a haw kir leh a. A hma ni tlaia a pu, sipaiin thawmhnaw a dahna hmun kha a va thleng a, thisen a lo luang zuih mai a. Tichuan in lam a pan a; in a va thlen chuan a pu sipai ngháwng chu doctorin a lo tuam búr mai a ni…” tiin.

           Kum 1558 pawh khan France ram laili, Auvergne hmunah chuan thil thleng danglam tak a awm a, chu chuan mi sawi a hlawh hle a ni. Hetiang hian an sawi –

            “Mi pakhat chu ram chhuak (sa pêl) turin a kal a, kalkawngah chuan an khuaa mi lian hausa tak nen an intâwk a. Mi hausapa chuan sa-hrang hawnsak ve turin a chah a….

            “Ram chhuakpa chuan ramhnuai chu a va thleng a, Chinghne pakhat hian a lo zuan thut mai a. Ani, ram chhuakpa chuan chemte a phawrh a, Chinghne ke-báwr chu a sah chhum-Chinghne ke-báwr a ah chu phawrh a tum a, rin loh tak maiin, Chinghne ke-báwr ni lovin, hmeichhe kutphah báwr no tak mai a phawrh ta tlat mai a nih chu….

            “Mi lian hausapain kutphah báwr a han hmu chu mak a ti kher mai. Zungṭang pakhat rangkachak zungbun a hmuh chuan a neitu a hre nghal mai a ni. Pindanah a tlan lut a, a nupuiin a kut hliam lo tuam mawlh mawlh lai chu a va phâwk ta a. Inzêp ngaihna awm hek lo, a nupui chu Chinghne-mihring a nih thu a inpuang ta ngawt mai a ni. An hal hlum ta nghe nghe….”

            France ram ngáwte khu werewolf tamna hmun a ni a, kum 1520 leh kum 1630 inkar khan werewolf chungchang report vawi singthum lai a awm hman a ni.

            Kum 1598 khan France khawthlang lamah, chhúngkaw pakhat chu Chinghne-mihring (Werewolf)-ah an chang vek, tih thu an sawi.

            Chumite chhúngkua chu unau hmeichhe pahnih leh, mipa pakhat fapa pakhat nei, an vaiin pali nei angin an tlan vel chiam ṭhin a ni, an ti. Vawi khat chu naupang phnih (unau) thei lo tur hi Paronet-i chuan a va bei thut mai a. A mipa zâwk, naupang kum li mi lek chuan, a nau hmeichhia chu chhan a tum laiin, Chinghnenu chuan Chemte a chuh lawk a, chemte chuan a rawn vit ta hrawih mai a. He mipa naupang hian a thih hma lawkin, amah vittu chuan ramsa kut ni lovin mihring kut a nei tih a sawi hman hrâm a, a thi zui ta a ni.

            Khaw chhung mipui thinrim chuan Peronet-i chu, thuneitu hnena an thlen hmain, an sawisa hlum dêr mai a.

            A laizawnnu pawh Peronet-i ang bawka pawi khawih ṭhina puhin, dawi pawh a thiam niin an sawi. Ramhuai pakhat pawh, mutpui fo ṭhinin an sawi bawk.

            An nuṭapa, Pierre-a pawh chuan, Chinghniaah a chang ṭhin niin a insawi bawk. A rilṭam chuan mihringte hi a ûm vak ṭhin ani. Pierre-a fapa pawhin Chinghniaa chang turin hriat hmangin a indawi ṭhin niin a insawi a. Tin, a ni te pahnih, Petronet-i te unau chu hruaiin, dai vela kêl tláte hi an phil ru ṭhin niin a sawi bawk.

            Hemite chhungkaw hnaisai lo tak mai hi roreltu chuan an tânna lung inah a va tlawh a. Dawi-hriat an neih tawh loh avangin lung in chhungah chuan Chinghniaah an chang thei tawh lo niin an insawi. An hmelh leh an fuke te chu him dam lai pawh a awm lovin a ráng nian nuan mai a. Pierre-a hmel phei chu râpthlâk khawpa chhia a ni a, hmuh a nuamlo hle. Roreltu thupek angin he mite chhungkua hi hâl hlum an ni ta.

Kum 1589-a an man, Peter Stubb-a chu Germany rama Were Wolf hming ber nia sawi a ni. a inpuan danin Peter Stubb-a chuan ‘Dawi kawnghren’ (Magic Belt) a nei a. Chu kawnghren chu a hren apiangin Chinghne koham êm êm, chak tak leh thiltithei tak, kareh zau huam mai a ni ta ṭhin a. Zanah chuan a mit chu a ling vâm ham mai a, a ka reh a zau va, ha hriam tak tak a nei a. A taksa a lianin a ke tinte chu a hraw hruk mai a. Chutiang chuan dawi-kâwnghrên an hrên phawt chuan a awm ṭhin a ni.

            An man hnua dawi-kawnghren dahna nia a sawi chu an va zawng a, mahse an hmu zo lo. An rin dangin, a petu ramhuaiin a la kir leh ta a nih an ring. Peter Stubb-a chu a na thei ang berin an hrem phawt a, chumi hnuah an tihlum ta a ni. An tihhhlum dan erawh chu hriat a ni lo.

            Werewolf chanchin hi, a râpthlâk záwng hlirin kan hria a, mahse Werewolf zawng zawng chutiang an ni vek lo. Portugal ramah chuan werewolf-te hi mihringte leh ransate tan a hlauhawm ve ngai lo.

            Tum reng vang ni lova Werewolf-a changte hian mihringa chan leh theihna a nih phawt chuan eng anga  hliam tawrh pawh pawi an ti lo. Hliam an tuar hian mihringah an inlet nghal mai ṭhin niin an sawi.

            Kum 1214 khan Britain ramah Mistiri pakhat chuan, Chinghnia nena an insualnaah, Chinghne ke ṭang a sah thlaksak a. Chuveleh Chinghnia chu mihringah a inlet nghal thawk mai a ni. hliam na tak a tuar na a, mihringa a lo chan leh theih avang chuan Mistiri hnenah lawmthu a sawi hial a ni, an ti.

            Thawnthu pakhat an sawi lâr tak a awm a. Roman puithiam pakhat hian zu a in hnem lutuk a, a lú aṭang chuan thi a chhuak pur pur a. Thisen rim chuan Sanghar rual a ko khawm a. An rawn seh hmain Chinghne pakhat a lo kal a, a rawn chhan a. Chinghnia chuan a chênna ( Monastery) thlengin a hruai haw a. Mite chuan Chinghne thil tih dan chu an hmuhin an lawm hle mai a, a taksaa pemte chu an lo enkawlsak ve a. A tuk khua a lo var chuan, chu Chinghnia chu mihringah a lo chang a. Rin loh tak maiin an kohhran hotu khirhkhiap zet mai kha a lo ni reng mai a. Ani chuan puithiam zu rui a hau hrep a, a puithiam nihna pawh a hlihsak hial a ni, an ti.

            Kum zabi 16-na leh 17-na lai vel khan Roman Catholic mipui tamna France ramah sakhaw thila indona râpthlâk tak a awm a. roman Catholic-ho chuan Protestant pawl tlêmte, Heguenot-hote chu an suat chiam mai a.

            Chutiang suattute zinga sipai hotu pakhat chu tuiah a tla a. Mi tuemaw hian a lo chhan chhuak a, vaukamah a hnuk chhuak a. https://ekhai.com

            Sipai hotu chuan amah chhan chhuaktu chu lawmthu hrilhin chibai a han buk dawn a, rin loh tak maiin ramsa ke hmul ther thur hi a vuan ta tlat mai a. Heguenot-ho a suat nasat avanga hremna a nih ringin ramsa ke bulah chuan a bawkkhup a, Pathian ngaihdamna a dil ta a ni.

            Chinghnia chuan a lo nghak reng a. A kaitho va daipáwna ama inah chuan a hruai a. In chhunga an luh hnuah khawnvar êngah chuan sipai hotu chuan Chinghne hmel awm dan chu a hmu chiang thei ta a. Tlan chhuah mai a tum a, chhuatah a tlu bawkkhup ta thlawrh a. Chinghnia chuan zaidam takin a kaitho leh a. Ei tur te a pe a, pindan pakhatah a hruai lut a, kawng a khar khum ta hmiah a.

            Sipai hotu chuan a awmna pindan tukverh chu a hawn theih emaw tiin a pan a, mahse alo inkalh tlat mai si a. A han hawi vel a, pindan kil khatah chuan hmeichhe taksa bung sawm rum mai hi a va hmu ta a. Chutiang chu a chan ve tur nia ringin a hlau ta 6em êm mai a.

            Mahse, a tuk zingah chuan Chinghnia chu mi pangngai ang chiaha awmin pindanah chuan a rawn lut a. Huguonot Pastor a lo ni reng mai a. hmeichhe ruang bung sawm rum chu a nupui a ni a. A hma ni lawk k han sipai hotu leh a hoten an khua an rawn rùn khan a nupui hi an that a. Amah, pastor pawh chu sawisaka tuia paih thlak atan lawngah an khalh lut ve a ni.

            Pastor chuan, “Engpawh nise, Chinghne-mihring ka ni a. Hman deuh khan kan khaw bul lawk ngaw chhunga chêng dawithiam hmeichhiain min dawi a. Tlaia khua a thim veleh Chinghniaah ka chang a, chutih lai chuan lawng chu vaukamah a kai a, mite chu vaukamah an zuak thla a. Nang erawh chu tuiah i zuang thla a, ka chhan chhuak ta che a ni. Nangmah ngei hi ka nupui thattu leh ka in chhung mi tihchhiat saktu i ni a. Chuti ni si, engvanga chhanchhuak che nge ka nih ka inhre lo. Duh ila chuan tuiah khan ka hnim pil daih thei che a ni. Mahse, chutiang chuan ka ti duh lo a ni. Mi tihhlum hi ka duh záwng a ni ve tlat lo, ” tiin thil awmdan a hrilh ta a. https://ekhai.com

            Pastor thusawi chuan sipai hotu rilru chu a khawih ta êm êm a. Chuta ṭang chuan thih thlengin Huguenot-ho ṭhian ṭhaah a awm ta a ni.

            Werewolf chanchin kan sawi tak azarah, Sakei-mihring te, Keite-mihring te, Awlê-mihring te pawh an awm thu sawi a awm nual a. India ram leh a chheh velah chuan Sakei-mihring (keimi) tih hi a lâr hle a. Ziaktu pakhat Elliot O’Daniel chuan a lehkhabu pakhatah India tlangval pakhat chu Sakeia a chan chu leh, Java thliarkara naupang pahnih, Keitea an chan thu, mit ngeia a hmutu te ṭawngka nen lam a ziak a ni. Naga-ho zingah pawh sawn tun thlengin Keimi an la awm reng niin an sawi. Africa ram lamah chuan keite-mihring leh Awlê-mihring an awm ve thung a. russia ramah pawh Savawm-mihring an awm thu an sawi bawk. Mizote pawhin hetiang thawnthu hi kan nei ve a, “Kei-mi” kan tih fo hi a ni. Chu chu “Keimingi leh Khualtungamtâwna” thawnthuah a lang a, “Lalruanga leh Keichala” thawnthuah a lang bawk a ni.

Comments