BORUAK LAL – PAGE 9

44

RAM HRANG HRANGA RAMHUAITE CHÊTDAN

               China rama ramhuaiho chêtdan hrang hrang kan chhiar ta a. Khawvel ramdanga miten ramhuai hnathawh an lo buaipui dan kan tarlang vel leh dawn a. Ramhuai awm ringlotu tan chuan he bunga kan chhiar tur te hi puithuna âtthlak thil mai maiin a lang thei awm e. Amaherawhchu bung dang amite ang bawkin tuna kan tarlan turte hi ataka thil thleng ngei, a hmutute pawh mi pangngai leh mi rintlak tak tak te an ni. Chubakah hmanlai thil thleng ni lovin, tun kum zabi 20-na chhunga thil thleng ngei an ni hlawm a. Thuthlung Thar hun lai khawvelah khan ramhuai man tam tak an awm tih kanhria a, chuvangin Pathian thawkkhum Bible-hi tak tak a ni tih ringtute tan chuan he bunga kan sawi turte pawh hi a taka thil thleng thei an ni tih rin a harsa lovang. Hun leh hmun kan ren deuh avang erawh chuan duh angin entirna kan tarlang tam thei lo zawk a ni.

  1. Zanlai thâwm ri mak : Mexico

               Hmansanga Yucatan rama  chêng, Mayan mi an tih ho thlahte zingah kan cheng a. Chung Indian (Mayan) ho zinga rawlthar pakhat, kum 17 mi Fernando-a chu Lal Isua ringtu ṭha tak fapa a ni a, amah pawh ringtu niin a insawi, mahse ramhuaiin a man ta a. Chu tleirawl chuan a thil tawh chu Lalpa sawizawina anga a ngaih thu mite hnena a sawi vel dan aṭangin ringtu dik pangngai ni chuan a lang. Chutia Pathian zilhna a tawh hnuah chuan Kohhran rawngbawlin chak takin Pathianin a hmang a. Lalpa tana rinawm taka awmte chu chhandam an nih tur thute a sawi ṭhin a. Mahse tunah chuan a da ta der mai.

               Thim hlim aṭang hian zanlai thlengin Fernando-a chu ramhuaiin a rawn bei ṭhin a. A rawn thawh dawn chuan a thil hmuh reng reng hi a thim zut zut ṭhin a, rannung hmelchhe pui puite hian an rawn pan a, tichuan a awmdan a danglam ta vek ṭhin a ni. Chumi a lo reh chuan ringfe hian a han zai rawng rawng a, khawpum hriat phak tur khawpa ring hian, ‘Khawl zawng zawng a titliak e, i kawlbun pawh a chhuah thei a che,’ tiin a zai piap piap mai ṭhin a. Chumi zawhah zawng awmdan pangngaiin a lo awm leh ṭhin a.

               Hetianga a lo thawh dawn hian Fernando-a pum chu a lo na vak a, a tlai tial tial a, a na zual telh telh ṭhin. Vawi khat pawh inchung ditip leh khanchhuk vela rannung chi hrang hrang a hmuh thu mi lo hrilh a. Chuta ṭang chuan ramhuai ngei an nih ka ring ve ta a ni.

               Tlai khat chu ni tlak vel hian kei leh midang pasarihin khum bulah kan ṭhutpui a. Thawklehkhatah a mit chuan hmun hla tak hi a melh a, “Engatinge mi rawn tibuai tura i  lokal? tiin bang kil daih a awm ni awm tak hi a bia a. Chutah a khum vela thu keiniho chu min han enkual a. “Tutenge in nih hlawm a? Nangniho zawng ai pawhin ka chak a sin!” a rawn ti ta mai a. Kan inbuan chu a ni ta nghal der a. Patling pariatin kan chelh hneh lo a ni ber e. Darkar li teh meuh kan han inchai hnuah zawng a ngawi ve ta a, chuti chung pawhin a la harh hle a, amah chaitu mi 17 laite chu kan chau hnawp hlawm a ni.

               Ramhuaiin a rawn man chang apiang hian Fernando-a chuan Catholic puithiamte sak ṭhin hla kha a rawn sa ṭhin. Khawi lam aṭanga chutiang hlate chu hria ni maw tiin a chhungte chuan mak an lo ti hle mai a. A harhfim laia a ṭawng hman thiam loh ‘Choutal’ ṭawngte chu a buai lai chuan nâl zetin a hmang thei si a ni. Lehlam hawi daih chung pawh hian kawngkaa lo lutte chu tutenge ni tih hi hming hmerhin a lo ko thei zar zar a. A tûka mi awmdante pawh a hriat sak thei zêl. Pa pakhat pawhin intithei takin Bible a rawn chhiar khum vei rawk a. Ani chuan, ‘Vei tak che chuan, nizanah khan khawnge i awm kha? Rose-i nen in awmdan kha le! a lo ti ta mai. ( Nupui nei reng chuing Rose-i chu nupui cheiin a lo chei reng chu lo niin. A hma zan lawk lah chuan chu pa chu lunginah a lo táng reng bawk a.)

               Fernando-a chuan a harhfim laiin ramhuaiin a rawn tihbuai leh huna ṭawngṭai pui turin mi  pathum a ngen a, ṭawngṭaina chauhin a pui thei niin a ngai. A buai hun a lo chhuah meuh hi chuan, chung mi pathumte chu zingdar thum apianga tihbuai ziahah a vau leh si a. Chung mi pathum zingah chuan ka nupui leh kei kan tel ve si avangin zing dar thum a lo rik hi chuan min ṭhawng tho ziah mai a ni. Chutih hunah chuan kan nupa hian kan ṭhu chhuak a, a chhan leh vang sawi tur hre si lo hian kan thla hi a phang em em mai ṭhin a. Thawmri mak pui puite kan hre zui a. Tukverh zawnah lah chuan Chingpirinu hi a rawn ‘kui’ dut dut a, bang awng aṭang lah chuan rûl hi a rawn thaw ri su su mai bawk a. Heng laia mi chengte pawhin heng rannungte hi an lo hmu hráng em em ṭhin reng a ni.

               Kan awmna in chawp chuan a auh ri ang tuarh tuarh a. Pindan chhungah ngei chuan ramhuai rawn lut ve tlata hriatna kan nei anih chu – kutin kan tawk thei lo a ni chauh mai. Pawnah chuan bur tla ri chawrh ang ri kan hria a, rûkru thawm ang taka ngaih theih a ni a. Mahse han en chian chuan chu thil tlâkna hmunah ngei chuan ui pahnihte chu tui takin an muhil bawrh bawrh bawk si a.

               Amaherawhchu chutiang boruak muan awm lo karah pawh Isua hming han lam zet hi chuan chung thil duhawm lo hnawhkian nan chuan a lo ṭha em em hi a  lo ni a. Rina lohin chu pindan boruak rit churh mai chu kar lovah a lo zang leh a. Engkimtithei Pathian nena inpawlna boruak nuam takah a lo chang leh ta mai a.

  1. Korea rama thil thleng –

               Japanese hovin Korea ram an awp laia hmar lam, Manchuria ramri bula kan awm laiin ramhuai thlarau hnathawh dan leh an mimante khawngaihthlak zia hi hrechiang khawpin ka hre fiah a. Korea mi (ringlo mi) te ngaihdanin boruak te, thing te, lung te, tui te leh tlangte hi thlaraute hian an luah khat vek a, mihring leh rannung kawchhungah te pawh cheng ṭhinin an ngai. Chuvangin kawchhunga ramhuai te hnawtchhuak turin an vaw ṭhuai ṭhuai a, a chang leh an hal a, damdawi an hmang bawk a, a chang chuan aienthiamte leh mitthi thlarau be pawp thei dawithiamte an ruai bawk ṭhin.

               ‘A chang chuan thlaraute chuan an chhuahsan ve mial a, rannung chi hrang hrang – bawngpa te, bawngpui te, ui te leh vawk kawchhungah te an lut a, an nat phahin an thih phah ṭhin.’

               Thingtlang khaw pakhat biakina Bible Conference kan lo neih laiin, chhungkaw khata an monu damlo va kan a, a damna tur leh chhandamna a chan theihna tura ṭawngṭaisak turin min rawn ngen a. Chawhnu lama kan va kal chuan leichhuatah hian a lo mu a. In neitu nu ber chuan min lo lawm vak lova. hla saa ṭawngṭaina kan neih zawh chuan an monu damlo chu a lo thova, a rawn ṭawng chhuak ta a. Mahse a aw chu a ma nu thi tawh aw chiah a ni a, a fanu ka hmangin a rawn ṭawng chhuak a ni. Chu aw chuan, ‘Ka fanu, nangmah tlawh turin vawiinah hian ka lo kal a nih hi. Thingrem aṭangin puan ném tawng thuma sei han la chhuak la, min lam (dance) sak rawh le,’ a rawn ti a ( chutiang chu Koreanho tihdan ve reng a ni).

               Chutah zet zawng an khaw dawithiamnu inah kan awm reng tih kan inhre ta a, an pastorin min lo hrilh lem lova. Chumite chhungkua chuan kum rei tak dawi an lo ching tawh a ni. Pindan chhungah chuan a lam ta a, a hah lutuk chu chhuatah chuan a tlu khu rum rum mai a. Chutih lai chuan keini chu thlarau lam hlate sain. Thuthlung Thara Isuan ramhuaite a hnawhchhuah thute chhiarin, chhanchhuah anih theihna turin kan lo ṭawngṭai a. Chu hmeichhia chu chhuat aṭangin a lo tho leh a, a ka aṭangin aw bawk kha, ‘Ka fanu vawiinah chuan ka rawn tlawh thei tawh lovang che. In inchhungah Kristiante an lo kal reng mai a. Nidangah ka lo kal leh zawk ang,’ a ti leh a.

               Chu mothar hnenah chuan a thlarau leh a taksa chhandama awm tura Isua ring turin kan fuih a, mahse thlarau sualin a la control tlat mai si a. Ṭum khat chu inkhawm turin kan sawm chhuak thei hlauh mai a. Biakinah chuan Kristian awmchhunte chuan Pathian fakna hla an sa a, an ṭawngṭai a. Reilote hnuah chuan chu nu chuan kawngkhar lam a pan a, mite chuan a haw dawn emaw an lo ti hman tawh a, ani chuan kawngkhar biang chu a uai a. ‘Tunah a kal liam ta,’ tiin a thaw huai a.

               A hmaia thlan tlate chu a hru hul a. A fa, nausen te, ina a rawn kalsan chu alam ruai a. A chhungte chu kan kohtir vat a. Midangte rualin a pasal leh a nu pawh an lokal ve a, Krista hnenah a inpe ta a. A tuk zing hmun danga kal tura kan insiam lai chuan mo thar leh a pasal nute chuan malsawmna an dawn tak avanga lawmthu sawi nan hmarcha kengin min rawn thlah liam a. Chumi hnua chanchin kan lo hriat zui leh danin, chumi kohhranah chuan harhna a lo thleng a, chu chuan rinna lamah mite a tichakin, ringthar pawh tam tak a hring a ni. ( China leh Korea ramahte hian ramhuai pai hnawhchhuah avangin Kohhran a ṭhan len phah reng a ni).

                                                                        – Olga C. Johnson                                                                                                           Andong, Korea.

Indona Ropui : Thim lalpa nen –

               A hma khan thim lalpa kulh nghet pui pui chhut chhat a nih thu kan chhiar tawh a. Tunah hian khang aia la nasa maha indona ropui chanchin kan chhiar leh dawn a ni. Hemi kan chhiar hma hian chhiartu apiangten, ‘Ringtu chu ka ni ve bawk a, hetiang indona hi Pathian ṭanchhanin ka tawn ve ngam ang em?’ tia rilrua inngaihtuah reng chungin chhiar ila, Krista kan rinna lamah pawh hma kan sawn sawt ang tih a rinawm.

  1. Bolivia rama ramhuai bumhmang : Krista thisen thiltihtheihna –

               Daktawr ka ni lo na a. Bolivia (South America) ram rila missionary ka thawna hmunah chuan Pathianin mak takin ka rawngbawlna mal min sawm ṭhin a. Nikhat chu tlangval pakhat damlo kan turin min kova. Chu tlangval chu a na hle mai a, mahse a awmdan vel ka han zawt a, ṭawngṭaisakna ka neih hnu pawhin Lalpa hriattirna ka dawn tak mai si loh avangin damdawi ei tur pawh ka chawh duh ta lova. A zual zel a, thi mai dawna a lan tak avang chuan a chhungten Puithiam koh an tum a. Mahse damlo chuan, in duh leh Don Roberto-a ko zawk rawh u,’ a ti a ( Pathian thua kan rawngbawlnaah pawh a lo tel fo tawh ṭhin a)

               Kei chu lawm takin ka va kal a. Chanchin Ṭha sawiin, ṭawngṭaina pawh ka va neih sak a,nitin ka tlawh ṭhin. A fanuin midang hnena a sawi leh ka hriat danin. ‘Don Roberto-a lokal laia ka nuṭa pa ngawi hle hle thei mai hi amak ngawt mai,’ a lo ti a ni awm e. Hemi hun thleng hian rakhuaiin a sawisak lai ka lo la hmu ve lova.

               Tlai khat erawh chu khuma mu chung hian a hrawk lam aṭangin ri mak deuh hian a rawn ṭawng a. ‘Hemi hi ramhuai pai a ni thei lo maw?’ tiin ka rilruin a inzawt a. Mahse a damlohna dik tak ka hriat chian si loh avangin ka rihhlelhna thu chu ka sawi chuhak lem lova. Chumi hnun lawk chuan Cochabamba-ah an kal pui ta a.

               Thla engemaw zat ral hnu chuan Totora-ah an lo kir leh tih ka lo hria a. Chutih lai chuan ka awmna khawpui sumdawng pakhat chuan mitthi thlarau nena inbiak pawh chungchanga ka ngaihdante min zawt a. Kei chuan chutianga mitthi thlarau anga inlarte hi ramhuai bumna mai an nih zia a ruh lang rawt rawtin ka hrilh ta vek a. Chupa chuan, ‘Italian mi a lo kal a, mitthi thlarau biakna inkhawm ‘seance’ a buatsaih ziah ṭhin’ tih min hrilh a. Tunge anih ka han zawh nak chuan ka enkawl ṭhin tlangval kha a lo ni reng a.

               ‘Thlarau sual man a ni, mitthi thlarau a ni love,’ ka tih khan ani chuan. ‘E, a ni thei lo, a chhan chu bishop zahawm deuh mai thlarau pawh a ko chhuak thei asin. Chu thlarau chuan ṭawngṭai leh Pathian thu lampangte pawh a sawi tel ṭhin tih an sawi nia,’ a ti a.

               Kei chuan, ‘Thil chiang tak pakhat a awm, Lalpa Isua hming chuan a ṭawngṭai kher lovang ti rawh,’ tiin ka chhang a.

               ni chuan, ‘Chu chu engtinnge i hriat?

               ‘E le, ramhuaiten Lalpa Isua hmingin an ṭawngṭai ve ngai hlei nem. A hminga ṭawngṭai chu Pa hnen thlen theihna awmchhun a ni miau si a,’ tiin ka chhang let a.

               A ni chuan, ‘A ṭawngṭai dan lo ziak chhawngtu ṭhian ka nei tak e,’ tiin a tukah a thuziak a rawn lak chu heti hian a lo inziak a. “Engkim tithei Pathian, heng mi rethei tak tak, thil pek dan pawh hre lo, mahni hmasialnaa khattte chungah hian zahngai ang che. Khawngaihna hi an hre miah lo a ni,’ tih hi a lo ni reng a.

               ‘Kha maw, Lal Isua hmingin a ṭawngṭai miah lovang ka tih reng kha,’ tiin ka lo chhang a.

               Ni engemaw zat hnuah chuan thlarau biakna (seance) hmuna tel ve turin pawlho khat chuan min rawn sawm a. ‘Ka rawn kal zawngin in thlarau tih hian hna a thawk thei ngût si lovang,’ ka lo tihkhum a. Anni chuan, ‘Thawk thei teh reng ang chu le. Thlarau phalna la hmasain asin kan rawn koh che,’ an ti a. Ka duh ang zawng zawng ka sawi a, zawhna ka zawh theih dawn chuan kal ve ka intiam a. Zan dar riata kal turin hun kan ruat a.

               Chumi ni chawhnu zawng chu ṭawngṭai nan ka hmang a. Zan dar riata ka va luh chuan thlarau zawl (medium) chu zel angin a lo awm a, ‘Minister a lo lût e,’ a lo ti a.

               Pindanah chuan mi an lo khat ṭhup tawh a, hawihhawm taka min lo dawnsawn zawh chuan a hotu ber Italian pa chuan tunhma lama ka lo awmdan zawng zawng min hrilh sak vek a lo tiam a. Kei lah chuan chutiang thil ho mai maia hun khawhral tura kal ka nih loh thuin ka chhang a.

               Zawlnei chuan kil khata chair inhungah chuan ṭhu tur leh tuma chawikan miah lovin, inchung (ceiling) thlenga boruaka tih kan theih ka nih tur thu min hrilh leh a. Mahse chutiang thil entir mai mai tura lokal ka nih loh thuin ka chhang leh a.

              Tichuan thlarau ko chhuak turin an inbuatsaih ta a. Krista thisen rinchhana ṭan ka lo lak ve chuan an hlawhtlin theih ka ring lova. Tichuan ‘êng’ chu an han tithim ta khap mai a. Zawlnei (Italian) pa chuan Engkimtithei Pathian Fapa thisenin sual zawng zawng a tlengfai,” tih thu chu sawi chhuah ka lo tum ve bawk a. Mahse a mak khawp  mai, ka rilru chu a chawmawlh ringatw mai a, harsa fe chungin, hriat tham mang loh hian ka han sawi nawn thei ṭawk mai anih chu! Lehlamah pawh chu ramhuai-zawl (medium) pawh chuan ka tih ang chuan a hrawkah ri mak deuh hi a tiri chhuak ve a, chumi zawhah chuan mi dang daih aw hian chu pa ka hmang chuan a rawn ṭawng chhuak ta a ( A hnua ka chhut leh danin ramhuaite hian min hneh thei viaunaa, kan ngaihtuahnate hi an rawn hre thei lo, tih leh, chuvang tak chuan ka rilrua ka chang chhiar khan awmzia a nei hran lo niin ka ngai).

               Ramhuai chuan, ‘Good Evening ! kan zinga Minister lai a lo tel ve hi kan lawm hle mai. He taksa (a rawn ṭawng chhuahna ka) ṭha taka a lo enkawl tawhna avangin kan lawm bawk a ni,’ a han ti a.

               Kan han indinchilh ta mai chu hlauhna namenlo hian min man ta a, ka khur ta zawih zawih mai a. Ka rilruah chuan, ‘Ramhuai chanchin i lo hre tawh ṭhin a, tunah hian ramhuai bul ngeiah chuan i awm ta le, Lalpa a huat avangin nang pawh a haw ve che a ni,” tih hi a lo lang a, min rawn khawih sawk mai ang tih pawh ka hlau hial a ni.

               Chutih lai tak chuan rilruah, ‘Ramhuai chu a kawchhungah chuan a awm ngei mai, mahse ani hnena awm ai chuan, keima hnena awm (Isua) hi a ropui zawk,’ tih thu hi ka ngaihtuah chhuak ta hlauh mai a. Hlauhna chuan min kiansan ta, chakna leh huaina ka lo nei leh ta a ni.

               Tihian a rawn sawi leh a. “He taksa chunga i thil lo tih tawh avangin kan lawm em em a ni (chu taksa a rawn ṭawng chhuahna leh amah thlarau chu mi hrang daih an ni tih a sawi chiang a), mahse hnialna pakhat kan nei che – Nula thianghlim i ring ve lo hi a ni. Pathian mi tirh ka nih hi a han ti zui a. Kei chuan, ‘Isua Krista hi taksain a lokal tih hi i ring em?’ tiin ka zawt ta chawt a. Rinloh takin dawt a sawi a, ‘ring e’ tiin min chhang a. Chu chuan ka ngaihtuahna a han tibuai deuh hlek a, a chhan chu ‘thlarau eng pawh Isua Krista tisaah a lo chang tih ṭan chu Pathian laka mi a ni, thlarau engpawh Isua ṭan lo chu Pathian laka mi a ni love’ (1 Johan 4:2) tih a nih vang a ni a. A hnua ka chhut zuiin he a chhanna, ‘Ka ring’ tih ngawt a, ‘ṭan’ tlat (confess) si loh chuan mi a hruai dik lo thei dawn reng mai a lo ni a.

               Zawhna dang, chhandamna hi rinna avang chauhva awm a ni tih a rin leh rin loh ka zawt leh a. A ni chuan, ‘Ni e, chhandamna hi rinna leh thiltih avang a ni tih kan ring,’ a ti leh zaih a ( ramhuaite thurin a ni ve thova)

               A tawpah chuan, ‘A nih leh thisen chhuah lohvin sual ngaihdamna a awm lo tih hi i ring em?’ tiin ka zawt leh a. Hetah hi chuan mi a chhang ta hauh lo mai a, ‘Ka kal tawh dawn,’ a ti ta ruai mai a ni. Chu tlangval (Italian mi) chu chau hnepin a chhuahsan a, a lo harh chhuah hma chu an bawihsawm ta laih laih mai a ni.

               Thlarau dang an han ko leh a. Thlarau dang tak, a mizia pawh dang daih mai hian aw – ki dang daihin a rawn chhang a. A vawithum nan thlarau dang an ko leh a. Chu chuan aw ring takin ‘Hetah hian hmelma a awm a ni, chuvangin engmah ka ti lovang,’ a rawn ti a.

               Chutah zet chuan an duh dana thlarau biakna chhunzawm zel theih a ni ta lo tih an hria a. Chu veleh ka Bible ka keu va, Deuteronomy 18 aṭangin Pathianin mitthi biak a khap zia leh chutiang thlaraute chu ramhuaite thlarau mai an nih zia ka chhiar chhuak ta a. Chutiang thil laka fimkhur ṭulzia ka han sawi takah chuan anni ngaih chuan mi huatthlala ka ni ta awm e. Chu thlarau biakna chu ka tihtawp sak mai ni lovin, Pathian thu ka puanchhuah phah ta hlauh a ni.

               Thu ka sawi zawh chuan kan in mangṭha a, ka chhuahsan ta a. Ka chhuahsan hnu khan thlarau pakhat chu an lo ko chhuak leh tih a tukah min hrilh a. Kal pawh a lo kal ngei a, mahse control zawh loh khawpin thlipui ang maiin a thawk buan baun a. Chu thlarau chu a au ruai ruai a, chair te chu a vai thuak thuak a, mite chu a tihṭhaih chiam chiam mai a. Hmeichheho phei chuan an hlau lutuk a, a kil lamah an inhnawh khawm tut mai a. Mipa zinga  a huaisen pawl chu kawtzawlah an tlan chhuak ngam hram bawk. Thlarau an han hnawh kian meuh chuan an zawlnei ber kha a chau chhe der a, rei tak khum betin a awm phah a ni.

               A chhungte hnenah chuan, ‘In tlangval hi ramhuai – zawl a ni a. Lalpa hminga hnawh chhuah sak vat a ṭul a ni,’ tiin thu ka va sawi dek dek a, a hmel hmuh pawh min phal sak ta lova. Ka thusawi chu awih lovin a natna chu Pathian hnathawha an puh hlauh mai. Thlarau kohchhuah dan han thiam famkim deuh te te se la, tichuan Buenos Aires khawpuiah sum tam tak hai luh nan ( sumdawn nan) ṭha dawnin an lo beisei reng a lo ni a. Mahse thlaraute chuan sum leh paiah ṭhahnem an lo ngaihpui i-khawlo mai a, mipui hmaah thlarau an ko chhuak hlawhchham ta fo mai a, hlawkpui ahnekin an mualpho phah ta zawk a ni.Kan tih theih awmchhun chu he tlangvalin Pathian chhanchhuahna a dawn theihna tura ṭawngṭaisak hi a ni ta mai.

                                                                                  -Verne D. Roberts
                                                                                  Bolivia Indian Mission
                                                                                  South America

By- Dr. P.C.Biaksiama

PAGE 10 >>