BORUAK LAL – PAGE 8

64

CHINA RAMA RAMHUAITE HNATHAWH DAN

               Ramdang ang bawkin China ramah khian ramhuai an tam hle. Ramhuai pai chungchanga lehkhabu râwn tlâk ber pakhat ziaktu John Nevius-a ziak ‘Demon Possession’ tih bu 1894 kuma chhuah tawh chu tûn thleng pawha râwn tlâk ber a la ni thova. Ani hi kum zabi 19-na tâwp khan China ramah missionary-in a thawk a, chuvangin China rama ramhuai hnathawh dân chungcháng a ziak ṭhenkhat kan tarlang dawn a ni.  John Nevius-a hian hmun hrang  hranga missionary-a thawkte hnena ramhuai chanchin an hriat dân ṭheuh ziak turin ngenna a chhuah a, chu ngenna chhánga missionary pakhat Rev. Timothy Richard-a English Baptish kohhran ami chuan tiang hian a rawn ziak.

                                Thlarau an rin-dan

               China mite rindan chuan thlaraute hi mitthi tawh thlaraute an ni. Thlarau zinga a ṭhamite chu dinhmun sang zawkah kaisangin pathian an ti hial a. Entirnan, milian hnathawk ṭha te, an lal emperor ṭha leh mipui fak tlâk khawpa felte chu an thih hnuah pawh emperor ang thovin, pathian angin an chawisang a, anmahni hriatreng nan temple te an sak sak a, miten pathian anga chibai an buk theihna turin an limte an tar a, an thiltih ṭhatte an puangzar ṭhin. hun a lo rei a, mipui vengtu angel an lo ni a, a tâwpah anlo ti-pathian nge nge ṭhin. Chutianga mipuite leh lalte chawimawina chang ve phaâk lo leh pathian dinhmuna ding ve pha lote chu tlema hnuai leh deuh, mahse thlarau ṭha chi ni tho si – lasi kan tih ang chi-ah te an ṭang a, mi tam berte erawh chu thlarau sual, ramhuai (demon) kan tihhote hi an ni.

               A dawt lehah chuan ramhuai bawlhhlawh pai an awm leh a. China mite chuan hetiang ramhuai pai (khawhring nei) te awmdan leh ṭawngdan aṭang hian mi â pangngai leh rilri kimlote awmdan an thliar hrang thiam hle. Khawia chêng nge a nih han zawh chuan ramhuai chuan – tlángah te, thlalêr pûkah te chêng ṭhinin a insawi ṭhin. Tûn hma lama a lo luhkhung mihring tuemaw kha a thih tawh avangin luhna t6ur (man tûr) midang a zawng leh ṭhin niin an insawi ve fo. Mpa pawh hmeichhia pawh, a tlángpuiin kum 15 aṭanga kum 50 inkár an man deuh ber. Chhùn leh zân an thlu chuang lo, ramhuaiin mi a man tawh chuan hai rual lohin, thli ang maiin a thawk thut a, an râk bual bual a, an bul vela an ban phak apiang an tichhe rum rum mai a, anmahnia phu lohin an chak a, an kar hâk laite an pawtsawm vek a. A cháng chuan kawtlaiah te, tláng lamah te an limchhuak thut a, vên zui loh phei chuan an intihlum hial ṭhin. Hetianga an tal bual bual hnuah hian engemaw chen an han chawl hlek a, a ngai bawkin a rawn thawk leh ṭhin a, a zing tulh tulh a, a tawpah phei chuan a sawisa hlum hial ṭhin.

               Tunah chuan mi ṭhenkhat, duh avanga ramhuai pai ni chuang lo, mahse ramhuai thuawi a, ramhuai hnena intulut zui an awm bawk. Ramhuai thu a awih dawn phawt chuan a sawisak ṭhin chu titawpin, lawmmanah hausaknate pawh a tiam ve ṭhin. A awih loh erawh chuan a hremin, a sawisa rethei tial tial ang a, a thil neihte reng reng pawh a chhuhsak mai dawn a ni. Chutianga ramhuai sawisak hnute chuan an chaw ei turte hi anchhelawh hnu niin an ngai a, ei tlâk loh turin boruak aṭangin a rawn bawlhhlawh zel a, an tuichhunchhuaha tuite chenin. In chhunga thawmhnaw dahna (Wardrobe) te chu a lo kâng a, an pawisa te pawh a titu hriat si lohvin a lo bo leh mai ṭhin a. Theihtawpa ramhuai hnawh bo tuma an beih fat fat a, an hlawhchham dêr hnuah chuan tihngaihna dang hre lovin, ramhuai hnênah an intulut leh nge nge a, ‘Lo ngawi rawh, i mi sawisakna hi titawp la, i thu thuin ka awm tawh ang,‘ an ti ruai tawh mai ṭhin a ni.

               Ramhuai thuhnuaia an inpekluh hnua an tihdan ṭhin chu Rev. Timothy Richard-a chuan heti hian a sawi zel a. “Bangah chuan mipa emaw, hmeichhia emaw an han tár a, rimtui halin ṭhingṭhiin chu milem chu chibai an han bûk ta zak zak a. Chutianga zahna an han entir hnuah chuan engtin tin emawni hian pawisa te hi an lo nei ve leh mai ṭhin a, an hausakna hloh tawhte pawh mak takin a lokir leh a. Mahse chutiang avanga hausakna chu a tlo lo kher mai. A neitupain duh anga han chên vêlte chu a teuhin a hnai lo, vanduaina chi dangin a tlâkbuak zui leh mai ṭhin.

               Chutianga a thuhnuaia a dah theih tawh chuan ramhuai chu a duhâm zel a. A huantau sawt hle a, ‘Nangmah maia chibai min buk hi a tawk lo, in chhungkuain chibai min buk tur a ni. Ka thiltihtheihna hi in ṭhenawmte hnenah pawh puangchhuak tura in kai chhuah a ngai a ni,” tiin a ngiat sáng zel a. Ani ramhuai man lahin duhdan engmah a sawi thei tawh si lova, a tirhna apiangah a kal vut vut tawh mai a ni. A hma zawng chuan mi hriat lohin ramhuai chu a be ṭhin a, tunah erawh chuan ramhuai thiltihtheihzia chu a uanpui a, ramhuai ṭanpuinaa damlote tidam theiin a insawi hial ṭhin.

Kawchhunga ramhuai awm hnawhchhuah dan –

               Mi kawchhunga ramhuai bawlhhlawh pai an hnawhchhuah dan tlangpui chu hetiang hi a ni. A hmasa berin daktawrte an han ko ve ngei a. Ani chuan ramhuai pai kutzungṭang hmawrah te, hnarah te leh nghawngah te hriau zumin a han chhun a. Damdawite pawh an hmang ve a. An tihdan chu, kutzungṭang hmawrah te, hnarah te leh nghawngah te hriau zumin a han chhun a. Damdawite pawh an hmang ve a. An tihdan chu, kutzungpui ve ve kha an ṭawn bet a, zungpui tin chhungah chuan damdawi an hnawh lut a, meiin an mût kang a, pangti a kan tel thlengin an mut reng ṭhin. Hetianga an sawisak hian ramhuai awm kha a lo mangang ta a. ‘Ka kal dawn, ka kal chhuak thuai dawn. Ka loir leh ngam tawh miah lovang. Tunah chauh hian zahngai luh teh u. Ka lokir tawh ngai dawn lo nia!’ tiin a au chêl chûl ṭhin a ni.

               Daktawrten an hnawhchhuah theih loh erawh chuan thlarau be pawp theitu an pun ṭhin. Anni thlarau betu (medium) takte hi chuan ramhuaite chu an hnawtchhuak lova, a ti turin ramhuai dangte an pun zâwk ṭhin. Confucius leh Tao sakhaw zuituten hetiang tih hi an ching ve ve. Dawihlâ an ziakna lehkha phek kha an hal ṭhin. Rimtui engemaw te pawh halin an ṭhingṭhi ṭhin a. Chutiang thuziak an hal ral chuan thlarau khan hming a neih loh chuan, a bul hnai bera thlarau kha a lokal mai ang. A chang chuan hêng thlarau hi enkawl an khirh khawp a. Dawhkan te, chair te hi an titlu rum rum a, anmahni ko chhuaktu zawlnei te pawhin an hlau hial ṭhin a ni.

               Ramhuai hnawtchhuaktu dawrpu (exorcist) te hi thlarau sualte hian an haw bik a. Chuvangin an sawisa ṭhin. Chutianga an sawisak chuan a vawtu awm mang silo hian vuak hrep nite hian an inhria a. Lungtumte leh leirawhchan tlangte hian inchung aṭangin emaw, van lam aṭangin emaw a rawn tlâk mai thei a, kawnga an kal laite pawhin chirhdiakte hian a rawn phuh berh vek thei bawk a. tui bula an kal phei chuan hotêa tuia tlâk hlum mai theih a ni. Hetianga an nunna atan a hlauhthawnawm bik avang hian thlarau sualho tihnat tur laka lo invenna hmanrua, magic awmphaw (talisman) emaw, nghawngawrh emaw, indawina dang eng engemaw keng tel lo chuan an chhuak vak ngam lo. Hêng magic (dawithiamna) hmanruate hian ramhuaite thiltihtheihna kha lo sût lêt theia ngaih a ni a.

               China ram thingtlang hmun tam takah chuan natna leh chhiatna lo thleng hi ramhuai hnathawha an la ngai. Ramhuaiin a zar buai chhên ṭhin papakhat chu motor lo tlan lai hmakhalh chiah hian kawngpui a lo kan thuak mai a, chumi atihna chhan chu amah zarbuaitu ramhuai kha motor chilhlumtir a tum vang a lo ni a. Pa pakhat leh pawh a pumpui zaitu daktawr hnenah a pum chhunga ramhuai a hmuh leh hmuh loh leh, a paih bo leh bo loh te a zawt chawt mai bawk.

               Kawng tinrenga thlarau sualte hnawhbo tum a, an beidawn tawpah chuan Kristiante hi an ko leh nge nge ṭhin, koh phaka ringtute an awm chuan. Chûng kristiante chuan ṭawngṭainate an hmansak a. Ramdang mi emaw, tualchhúng mi emaw an dang chuang lo. Thuthlung Thar Bu neitu ringawt pawh, Bible phêk ṭhenkhat chauh nei emaw pawh ni rawh se, chubâkah Kristiante Pathian biakna bul hnaia awm chauhte pawhin ramhuai paite chu tidamin, Pathian fak theiin an awmtir thei leh mai ṭhin a ni.

               Hêng thlarau sualho tam zawkte hi Chinese-ho ngaihdan chuan sihal te, phivawk te, rulte emaw nia sawi a ni. Kum 1765 khan Chinese mithiam ziak, tûn thleng pawha lehkhabu ràwn tlâk LiaoChai chhuah a ni a. Tah chuan sava te, ramsa te, lungpui te, pangpar te leh thil tinreng deuhthaw mai hian thlarau pai vek a, a cháng phei chuan mihring ruangam pu anga lang thei hialin a ziak.

Nu pakhat khawhring nei tihdam thu –

               (He thu hi China rama rawngbawltu hmingthang leh zahawm tak, Shantung khuan English Baptist Mission a thawk, Wing Wu Fanga’n John Nevius-a hnena a rawn report a ni).

               25 January, 1880. Nu pakhat kum 23 leka upa, pasal nei hlim chuan khawhring a nie a. Ramhuai hnathawh a rawn lan tawh chuan tihngaihna awm lo khawpin a tâl buai vak ṭhin a. Reh lawk pawh awm chuang map lovin ni ruk lai a awh tehreng anih chu! A chhungte mangang chuan hmeichhe dawithiam hriau zum hmanga tidam thei an tih chu an ruai a, mahse a sâwt miah lo. Tinngaihna dang an hriat tawh loh hnuah chuan nu pakhat. Li Tso Yuen-a chuan min rawn kova. Ka kal duh lova, mahse a hmél hmu tur tala min nggen tlat avangin ka kal ta hrâm a. Inchhung kan va luh chuan damlo chu mipuiin an lo kil tuau va, a lo au ruai ruai mai a. Kan va thlen tâk chuan mite chuan kawng min lo kian a. Khawhring neitunu pawh chu ṭhutthlengah chuan fel deuhin a ṭhu ṭha ve mai a, a sam thur bepbupte chu an ch6ul mâm a, mak ti deuh mai hian ‘Engatinge hetia mi tam tak an awm khawm a?’ tiin a zâwt zâwk mah a.

               A pasal chuan ni engemawti chhunga a awmdan rapthlâk tak a han hrilh chuan makti deuh mai hian, ‘Engmah ka hre miah hlei nem,’ a ti mai a. Ka va luh veleha chutia a lo dam ṭha ta mai chu ka lawm hle a. Heta ṭang hian China ramah Kristianna chu chak takin a darh zau ta a, hmun tam takah Kohhran pawh a ding chho zêl a ni.

               Ni sawm aia tam mah  a kal tawh ang chu tihin chu nu chuanj khawhring bawk chu a nei leh a, min rawn ko leh a, Kristian pakhat hruaiin ka va kal leh a. A hma ang mai khan an ina kan luh veleh a lo harh chhuak lehnghal a, a lo ṭhu chhuak a. Chu hun remcháng chu lain, an chhungkaw hnêna Pathian thuhril nân kan hmang ta hlauh va. Kan haw kawngah pawh chuan ka ṭhianpa chuan ‘ramhuaite pawhin kan thu an awih ta.’ (Luka 10:17) tiin hlim takin a au chhuak a.

               Ni sawm hnuah zankhat chu kawngkhar hi an rawn kuk dawt dawt mai a. Li Tso Yuen-a mitirh zualko hi a lo n ia. Chu zualko chuan ramhuai pai nu kha t6unhma zawng aiin a zual zawk a, a hmai te chu a duk tluk a, a taksa a khawng vek bawk si a. A pangti lah a hit tlat a, a thaw chhuak hleithei lova, a thi lo chauh a ni tawh mai tih a rawn sawi a. Chu veleh chuan ka ṭhenawma awm, bible zirlai Kristian ṭha tak hruaiin kan chhuak leh ta a, damlo in kan thlen hunah a hma ang khan a lo ṭhat chhuah leh mai ka ring deuh va, mahse alo chuti awzawng lo mai a. Chu nu chu thi ang derin a lo let hlâwm reng a. A hmel awmdan reng reng pawh chu ṭihbaiawm khawp a ni. Kan ṭawngṭai ta char char a, chutih lai chuan min hnuchhawn zawngin a lu a her sawn sawk a, chutia a che thei an han hmuh chuan an chhungkua chuan, ‘A, a lo nung leh ta!’ tiin lawmin an lo au chhuak a. Fakna hla kan sa a. KAn sak zawhah zawng, a lo thaw chhuak a, a ni lah chuan engtinnge a awm tih pawh a hre si lova. A laizawnnu chuan ka (thuhriltu) hnenah, ‘ramhuai khan i hming a hria a, i lokal chuan a chhuahsan chauh ang tih a sawi a, i haw hunah a rawn lêt leh ang tih pawh a sawi bawk a, hetiang hi engvanga lo awm nge?’ tiin min zawt a. Kei chuan, ‘Isua ringtute chuan ramhuai te an hnawtchhuak thei a sin. Nang pawhin i rin chuan ramhuaiten an hlau ang che,’ tiin ka chhang a. Chumite chhung chuan Kristian lehkhabu min dil a, pêk pawh ka tiam a, ka va thawn ta a. Hemi hnu hian ramhuai kha a lo kir leh tawh lo. He thil hi keiman ka va tawh ve ngei a ni e. (Tranlation of extracts from a Communication of Wang Yung ngen of Peking)

Tihdam hnua ramhuai pai nawn lehte – 

(Hei hi China rama rawngbawltu Ho Yuing She-a thil tawn ama report aṭanga laktawi a ni)

               Fu – San khuaa rawngbawltua ka awm laiin khaw ṭhenawma mi pakhat chuan a au kawchhunga ramhuai awm hnawtchhuak turin min rawn kova. Dâwi chi hrang hrang hmanga hnawhchhuah an tum pawhin an hlawhchham zêl si a, tihngaihna dang an hriat tawh loh hnuah chuan mi pakhat, khawvel chhandamtu Isua a awm tih mi sawi thâwm a lo hria a. Chu Isua hminga ramhuai bawlhhlawh hnawtchhuak turin kei a zirtir chu min rawn beisei a ni. Chu zualko hnenah chuan, damlo chhungkuaten an milem biakte kalsan a, Isua, Pathian dik tak an zui dawn leh dawn loh va zawt hmasa turin ka tir haw a, an duh dawn phawt chuan lawm taka va tlawh chhuah ka tiam a. A tukah chuan chu pa chu a lokir leh a. Damlo chhungte Kristiana inleh vek a, Isua zui an remtih thu a rawn sawi, tichuan ani rual chuan kan kal ta a.

               Inchhung kan va luh chuan damlo Tsaise-Hiang-a nupui leh fate leh chhungkhatte chu lungngai takin an lo ṭhu a. A nupui chuan, ‘Hetianga kan pa a awmna hi a rei tawh a, daktawrte hnenah pawh neih zawng zawng kan insengral tawh a, engmaha sawt bawk si lo. Tihian nilengin a phun mur mur reng mai a, mihring pawh a tling tawh lo a ni ber mai. Zanah phei chuan a natna hi a zual zel leh nghal a. Isua hminga i hnawhchhuah turin kan mangangin kan rawn kohtir ta mai che a ni. He in chhungah hian hlimna leh muanna min rawn thlen theih hlauh chuan a lawmawm dawn em mai,’ a ti a.

               Chu nu hnenah chuan, ‘Isua Krista chu i ring em ni?’ tiin ka zâwt a. Ani chuan, ‘Ring e,’ a ti a. ‘Chuti chu ṭhingṭhi ve la, i ṭawngṭai ang,’ ka ti a. Ṭawngṭai zawha damlo Tsaise-hiang-a kan han en chuan mi pangngai hmel puin thlamuang takin a lo awm reng tawh a. Chuta an chhungkaw hlim zia leh mak tih zia chu sawiin a siak lo. Reilote hnuah chuan ka hawsan ta a.

               Chutia ngaihṭha a ni sawm vêl kan awm hnu chuan beisei loh takin Tsaise-Hiang-a nupui chuan milem pathian a be zui leh ta mai a, an pa pawh chu ramhuai ngai khan a rawn man leh, a buai ngai bawkin a buai leh ta a. An nu hlauthawng chuan a pasala nau, zualko ngai bawk kha a rawn tir leh a, damlo tlawh turin min rawn ngen leh a. Mahse hemi ṭum hi chuan a chhan leh vang a rawn sawi chiang bawk a, kan kal ta lo. Damlo nupuiin tihtak taka inchhir a, inlamlet a, Isua thiltihtheihnaa innghat a, bang lova a ṭawngṭai chuan a pasal chu chu a lo dam ṭha leh mai ang tiin ka chah ta thung a. Ani pawhin ka thu awihin chhun zan zawmin a ṭawngṭai ta ngat ngat a, a tawpah chuan thlarau sual chuan a pasal chu a chhuahsan ta a ni. A nat buaina zawng zawng chu a lo dam ta viah a. Vawikhat pawh lawmthu sawi turin Chapel-ah thilpêk kengin a lo kal a. A lawmthu sawite chu hlim takin ka lo dawngsawng a, a thilpekte erawh chu ka dawn sak lo.    – Ho Yuing-She

               Johna Nevius-a sawi pakhat chu, China rama Changlo district ah mi pakhat ramhuai pai ṭhin a awm a. Krista ringin Kristian-ah a rawn inlet a, ramhuai controlna aṭang chuan a fihlim ta hmiah a. Mahse thutak chu a kal pensan leh a, Kristian sakhua pawh chu a chhuahsan ta hial a. Chu chu hriain a kawchhunga ramhuai awm ṭhin pangngai bawk kha a lokir leh a, tun ṭumah chuan a hma aia nasain a sawisa ta a, a tawpah phei chuan a sawisa hlum ta ṭhak mai a ni.

               Malaysia rama Moslem sakhaw zuitu mi pakhat pawhin natna khirh zet mai a vei a, an puithiamin a lo tihdam sak thei si lova. Amh ṭanpui turin Kristiante hnenah a kal ta a. Kristiante chuan Isua chanchinte an lo hrilh phawt a, a tan an ṭawngṭaisak a. Pathian chuan a fate ṭawngṭaina chu a lo chhân sak a, chu moslem pa chu alo tidam ta a. A hnenah chuan Kristiante chuan, ‘Hei, Isuan a tidam ta che a. Amah chu i zui ve tawh aniang chu,’ tiin an ngên zui a. Mahse chu moslem pa chuan a dam tâk siah chuan, ‘Isua hi ka pawm hlei nêm. Min tidam turin ka rawn pan mai che u a lawm,’ a lo tihsan ta mai a. Chutianga a tih avang chuan a natna pangngai bawk kha a rawn tlâkbuak leh ta tak tak a. Chu natna zet chu ṭawngṭaisak pawhin a dam thei ta awzawng lo mai. Isua hi ngaihnêp mai chi zawng a lo ni love.

Buddha nge Krista?

(John Nevius-a lehkha dawn pakhat chiah han tarlang leh hram ila. Hetah hian Budha sakhua hi enge a lo nih tehreng tih pawh a tifiah thei awm e. (Ziaktu : Chang Ah-liang China Inland Mosson)

               Yang-fu-Miao khuaa chhungkhat chu Buddha sakhaw vuantu nghet tak an ni a, an fapa naupang lam pakhat erawh chu Kristian ṭha tak, Tai-Chao kohhran a mi a ni ve thung a. June 1876 khan an fa u ber nupui chu a awmah natna mak tak hian a man thut mai a. A nau Kristian chuan ṭanpuitu zawngin khaw ṭhenawm mêl sariha hlaah a kal a. Chutia a thang chhung chuan darkar khat vel alo thidang a, a lo harh leh chuan a pasala nupui hmasa zawk (thi daih tawh) chuan amah leh a pasalte chu lâk bo daih a tum tih a lo sawi a. Chuta lo awm ve midangte chuan chu thu chu an hriatin an hlauthawng a, ramhuai hnenah chuan chu mi chu a chhuahsan dawn phawt chuan Buddhist puithiam paruk kova, ni thum chhung sakhaw hla sak sak an tiam a. A chhan chu, ‘A la tawk lo’ tih a ni. Chutah mite chuan Buddha hming nasa tak a chhampual khumna lehkha tam tak halral turin an tiam (thlêm) leh a. A hma ang bawkin, ‘Chu pawh chu a la tawk chuang lo,’ tiin alo chhang leh a. A pasal mangang  chuan puithiamho chham chi chuanna hlabu a rawn la a, a han chham bal bal a, ramhuaiin a chhuahsan phah mial takin tiin a awm zawnah chuan hlabu chu a dah a. Ramhuai chuan ani ka hmangin, ‘Heti mai maiin min ti chhuak hlei lâwng e,’ a rawn ti a.

               Ramhuai man tum ni awm takin lenin hmeichhia chu an han khuh leh a. A ni chuan, ‘Hetiang thilin min hling thei ngût ang maw?’ a rawn tiel v6el a. tihdan chi hrang hranga an tihkual vêl hnu chuan an nau Kristian tlangval kha a lo kir leh tawh a, thil awmdan chu an lo hrilh a. A ni chuan, ‘Engatinge hetianga buai nuaiha i ṭawng ni?’ tiin a han z6awt ve a, ‘Ka ṭawng buai love, I u nupui thi ta kha ka nih hi,’ a rawn ti lêt a. Ani chuan, ‘Teuh nang aw, thlarau sual i nih hi, amah hi chhuahsan vat rawh!’ a ti rum ta al mai a. A u nupui hnenah chuan Thuthlung Thar chu a chhiar khum a, mahse lehlam a lo hawisan daih a, hriat pawh a hre duh  miah lo. Châng hniih thum vêl a chiar hman tihin a kawchhunga nu chuan, ‘i thil chiar khan min tihlum tak ngial dawn. Chhiar tawh suh, ka kal mai ang,’ a rawn ti ta mai a. Tihtak nangialin chu nu chu a lo tho va, a tihdan pangngaiin sekrek a rawn khawih thei ta mai a. Kum 1878 kum tawpa Tai-Chao ka chhuahsan thlengin rilru leh taksa hrisel takin a awm chho ta zel a ni. A pasal pawhin Pathian thiltihtheihna chu a lo hmu fiah ta hle mai a. Krista zuitu a lo ni ta hial mai a. an ṭhenawm hote pawhin chu thil inthlâk danglam tak chu hmuin mak an lo tive khawp a, an zinga tlangval pakhat phei chu ringtu a lo nih phah hial a ni.

China rama ramhuai mante leh Israel rama ramhuai mante Khaikhinna –

               Kum 2000 liam taa Palestina (Israel) rama ramhuai mante awmdan leh tun hnaia China rama ramhuai mante awmdan inanna hrang hrangte lo tarlang ila :

  1. Hmeichhia leh mipa, naupang leh puitling thliarna awmlovin ramhuaiin a man thei ve ve.
  2. Ramhuai sawisakte chu a khat tawka lo awm ṭhin an ni ve ve.
  3. Taksaa tuarten hliam an tuar ve ve.
  4. Ṭhenkhat chu awlsam taka hnawhchhuah an ni a, ṭhenkhat erawh chu harsa taka hnawhchhuah an ni ( An mimante an chhuahsan hmain an sawisa hrep phawt ṭhin)
  5. An thawmhnaw hâkte an pawtthler a, vantlang hmaah mawihawih zawng miah lovin, ṭawng bawlhhlawh hman an ching.

China rama ramhuaite hnathawh dan –

  1. Hrilh hranpa ngai lovin Pathian leh Isua Krista hi an lo hre sa em em. Anni aia thiltithei, thunei leh chungnung zâwk a nihzia an hre lâwk vek ( Mt 8:27-28)
  2. Mi pakhat kawchhungah ramhuai pakhat emaw, a aia tam emawin an luhchilh thei ve ve.
  3. Thuthlung Thar hunah leh tûn hnai China ramah hêng thlaraute hian chawlhna tur an dap ṭhin a, mihring kawchhung anhmuh loh pawhin rannung hnuaihnung zâwkte pawh an man ṭhin ve ve.
  4. Thlarau hnawhchhuah tawhten an awmna ngai bawka luh leh an tum ve ve.
  5. Isua Krista hminga hnawhchhuah theih an ni ve ve.
  6. China rama ramhuai mante hi thingtlang kilkhawr lam ami an ni deuh zel a, khawpui chhunga awm sawi tur a awm mang lo. Israel ramah pawh an khawpui Jerusalemah ramhuai pai an awm thu a lang hauh lo. A awmna hmun – Kapernaum te, Gadara khua te, Tura, Sidon leh Kaisari Philippi khuate kha khawpui lian aṭanga hmun hla tak hlir an ni.
  7. Kohhran hmasaa ringtute (Apostol ten) Isua hminga ramhuaite hnawtchhuak thei khawpa rinnaa Krista tâna ram an lâk zau zêl ang khan, China rama rawngbawltu rinawmten sakhaw dang puithiamte tih theih loh, ramhuai hnawhchhuah theihna, Krista thiltihtheihna an hman tlat avangin Chinese ho zingah Kristianna a lo darh zau phah a ni.

By- Dr.P.C.Biaksiama

PAGE 9 >>