BORUAK LAL – PAGE 7

76

Kristian dik takte hian ramhuai an pai thei em?

              Kristian dik tak han tih chuan thlrauva paintharna chang tawh, Lal leh chhandamtua Isua pawmtute sawina a ni tih hre phawt ila. Piantharna nei lem lo, Kristian ve satliahte chuan ramhuai an pai theih zia kan sawi tawh a. Kristian dik takte chu he thil laka fihlim deuh awm tak an ni a. Krista neituten ramhuai an pai thei bawk si a nih chuan thil awm lo tak a ni zawk awm e.

              Amaherawhchu khawvel ram kilkhawr leh chengker deuh hmuna ringlomite zinga missionary tam takte ngaihdan chuan kristiante pawhin ramhuai an pai thei tho tih an sawi tlat mai. A chhan chu an thawhna hmuna ring thar, Kristiana inlet tawhte pawh ramhuaiin an man leh fo mai a ni awm e. Chuvangin kristianten ramhuai an pai theih leh pai theih loh chungchangah hian inhnialnate pawh a lo awm ṭhin a ni.

              Africa rama Missionary pakhat chu ringtute pawh ramhuaiin an man ve thei tho tih ngaihdan a neih tlat avangin an thawn haw phah a. Chutih laiin missionary pakhat chu thla 18 lai ramhuaiin a luhchilh ve thung. Tunhma lam chuan ramhuaiten Kristiante chu man thei pawhin a lo ring ngai bik lova, a thil tawn hian a hrilhfiah chiang hle a ni. South America leh China rama missionary te pawhin hetiang ngaihdan hi an pawmpui bawk. An sawi danin kristiana inlet tawhten ramhuai an pai lai chuan Pathian hming an sawi chhe buan buan a, alo reh deuh hnuah Isua hming an lam leh chul mai ṭhin. Philipines thliarkara bible zirlai pakhat pawh kum khat lai Kristian a lo nih tawh hnuah a buai leh a. Dr. Kocha’n a ṭawngṭaisak veleh a chhung aṭangin awin, “Keimahni ta asin. An chhungkua hian kum zathum aia rei kan kutah an awm tawh,” tiin a rawn ṭawng chhuak a. Kocha chuan, ‘teuh lo mai. Lal Isua ta a ni a, Lal Isua hnenah a inpe tawh,’ tia a chhanna chu aw bawk chuan “Chu chu a dik lo. A pi leh pute aṭangin kan hnena inpe vek tawh an ni. Chuvangin ani hi chu kan ta liau liau a ni,” tiin a rawn sawi leh a. He inbiakna aṭang hian he Bible zirlai thlahtute hian dawithiamna an lo ching ṭhin a, chubakah ṭhenkhat phei chuan ramhuai hnenah an thisen an thisen hial an lo hlan a ni tih pawh a chiang hle. Chutiang mite chu ramhuaite pawhin an hauh na bik hle reng a ni.

              Kristiante tan ramhuai pai theih tawh lo tia ngaitute erawh chuan – Thlarau Thianghlim ringtute a luahin, a chenchilh tawh a, ramhuai tan hmun a awm thei tawh lo an ti a ni ber. Mi tupawh thlarau thianghlima a khah tlat chuan ramhuaiten an khawih thei lovang tih hi Bible zirtir dan pawh a ni reng a. Engpawhnise hemi chungchanga thlir dan tawk kan thiam theih nan Dr. Kohch-a thlir dan hi i lo tarlang ang u.

              a) Pathian chauhin mihring thinlung dik tak a hria a. A langa Kristiana inlet fel ta anga kan ngaihte pawh hi thlarau lama piantharna la chang chiah lo pawh a ni mahna.

              b) Kawchhunga ramhuaiin a luhchilh (possession) leh, ramhuai thlêm thluk, luhchilh em lova an control tlat (obsession) hi ngaihpawlh a awl pawh a ni mahna. Pawn lam aṭanga ramhuaiten an rawn control na hi ramhuai pai hmuhin kan lo hmu ta mai pawh a ni thei.

              c) Ringtu chapo leh thinlung sak tak tak hi kan tam a. Chung mite sawizawi tur chuan Pathianin a tir pawh ani thei bawk. Joba chanchin aṭang khan hei hi a chiang thei awm e. Africa rama missionary pakhat thla 18 lai ramhuai pai kan sawia pawh kha chutiang deuh chu a ni. Ramhuaiin a chhuahsan hnuah, ‘Ka ngaihdan dik lo mi sawhsawn sak turin Pathianin min zirtir niin ka hria,’ tiin a inpuang hial.

              d) Ka hriat phak chinah ringtu ramhuaiin a man lehte hi reilote chhung chauh a ni ṭhin a, chhanchhuahin an awm leh mai ṭhin. Ringlotute erawh chu an dam chhung pawhin a man reng thei.

              e) Paulan Korinth mite a hrilh ang hi a ni thei bawk ang e. 1 Korinth 5:5 ah chuan Paulan ‘mi chutiang mi chu, a thlarau Lalpa niah chuan chhandamin a awm theih nan a tisa tiboral turin Setana pe ila ka ti a ni’ a tih kha.

              f) Ringtute pawh hi kan hnungtawlh thei hle tih hi theihnghilh hauh loh tur a ni. Thuthlung Tharah pawh mi hnungtawlh Humenaia te, Alexandra te leh Dema te kan hmuh kha.

                                Mizorama Ramhuaite –

              Chanchin Ṭha ramhuaite a hnawt bo kan ti a, ngaihṭha taka kan awm lai hian Mizoramah hian ramhuai engzat tak awm leh tawh ang maw tiin ka ngaihtuah ṭhin. A lang apauva kristian inti Mizo zingah hian khawvel thil chauh ngaihtuah, Pathian thu lamin an rilrua hmun chang thei miah si lo hi chhiar peih awm lo khawpa tam kan awm leh tawhin a lang tlat. Thlarau Thianghlim hnathawh avangte, veng chhunga ringtu mifel tak takte rawngbawlna avangtein tunhma ang bung bungin ramhuaite hi an inlar lo mai pawh a, hmun tam takah chuan hmun kilkhawr deuh leh mi rilru chhungah bu khuarin, an inbengbel leh nasa tawh teh a nia. Zu leh Drugs ngawlvei zingah phei chuan ramhuai hmu an tam em em reng a, ramhuai chanchin a chuan tawh chuan chanchinbute hi hralh a kal phah hle tih editor ṭhenkhat chuan an sawi. Kawng hrang hranga chhutin Mizoram chhung ngawta ramhuai ‘population’ tam tawh tur zia hi rura tak a ni.

              Nula pakhat pawh hi mi tihdan ang bawka inkhawm peih ve tak a ni a. Thusawituin Isua Krista hnena inhlan tura sawmna a han siam lai chuan a ṭhiante inpe tur chu tihbuai tumin a lo dek vel a, a tiho zo takngial dawn a. Mahse engemawti tiin amah pawh chuan Pathian thu chu ngaihthlak ve tak tak a, pianthar chakna a lo nei ve ta a. Chuveleh chuan a kawchhunga ramhuai pai chu a lo che chuhak ve vat mai a. A awmdan a danglam ta. A mengpual ta rum rum mai. ‘Ka ngaithla duh lo’ tiin a tho uaih uaih a, a tlan kual ruai ruai a, tukera zuan thlak te a tum a, mite chuan an um dur dur a ni.

              He nula chanchin sawitu Evan. C.Lalenga, synod revival Speaker ka kawm zuinaah ne nila hi an chhung khat hnai tak a nih thu a sawi nghe nghe a. A hming leh khua erawh chu tarlang lo mai ila.

              Kristian ṭha, piangthar tawhte meuh pawhin ramhuai pei thei ve tho anga ngaih chu hriatthiam a har reng awm e. Mi tam tak chuan hetianga ramhuaiin a man theihte hi chu Kristian pawh nise, a hminga Kristian ve mai, thlarauva piantharna la chang tak tak lo an ni ang an ti a. A dikna chen a awm. A chunga nula kan sawi pawh khi a la piangthar lo tih a chiang awm e. Mahse a hma lama missionary kan tarlan tak angte erawh chu piangthar lova sawi rual a ni lovang. Ani chauh pawh ni lovin midangte pawh sawi tur an awm ve nual.

              1952 kum khan Bible a ramhuai chanchin (Biblical Demonology) tih bu ziaktu theologian hming thang Merril F. Unger. Th. D, Ph.D chuan “amhuai pai hi  ringlomite hnena thleng thei chauh a a ni”  tia thu a keuh thlu mai chu khawvel hmun hrang hranga missionary ten an rawn kenglet nak nak hlawm a. Ringtu dik takte pawhin ramhuai an pai ve theih tho zia mit ngeia an hmuh thute an rawn sawi hlawm a ni. Chuta ṭang chuan Dr. Unger-a meuh pawhin a ngaihdan a sawhsawn ve ta hlek a ni. Chutiang bawkin keini pawhin kan ngaihdan awmsa hi ṭha viau mahse sawhsawn hreh lem lo ila, hmasawnna a ni zawk awm e.

              Kan hriat theih chinah chuan ringtu ṭha ramhuai pai chu an vang hle, an awm anih pawhin ringlotute ang chuan an duh duhin an sawisa thei lo deuh ngei ang. Krista ta an nih tawh avangin Pathian chhanchhuahin an awm leh thuai ṭhin a ni. Amaherawhchu mi piangthar tawh pawh ni tehreng ila. Setana duhzawnga kan nun luih tlat si chuan ramhuai tan belchung sa kan ni mai. Ringtu dik tak nia inhre si, Setanan duh duha a thlêm thluk theih leh hmanruaa a hman theih reng bawk si hi kan tam viau awm ania. Hei vang hian tihrkoh Petera chuan, ‘Ngaihven ula, fimkhur rawh u, in khingpui Diabola chu sakeibaknei rum ṭhin angin a ei theih tur zawngin a phi ruai ṭhin,’ ( 1 Petera 5:8) tiin min zilhlawk reng a ni lawm ni?

By P.C.Biaksiama

PAGE 8 >>