BORUAK LAL – PAGE 6

88

India Rama Ramhuaite Hnathawh Dan Thlirna ( Demonology)

               Madras khawpuia Kristian mithiam pathumten ramhuai chungchanga an titi hona aṭang hian India rama ramhuaite hnathawh dan tlangpui a fiah khawp mai. Chung mithiamte chu Professor H. Enoch, University of Madras te, N. Daniel, Laymen, Evangelical Fellowship te leh Paul Gupta, Hindushtani Bible India Institute president te an ni. An titi tlangpui i lo ngaithla ang u.

                “Kan titi khawmna chhan hi ramhuai chanchin ‘demonology’ chungchanga ngaihdan thawhkhawm  hi ani ber a. Kan ngaihdanin thlarau sualte hi an awm ngei a, Setana leh a tirhchhiahte an ni tih hi Thuthlung Thar hian a sawi chiang hle a ni. Heng ramhuai hote hian natna chi hrang hranga mi tihnat theihna neiin, rilru pawh an tibuai thei tih kan fiah tlang bawk. Mahse mi ṭhenkhat chuan tihian an sawi a. ‘Kan Lalpa leh a zirtirte khan ramhuai chungchang an sawi reng rengin, an hun laia Judate rindan an pawm zam ve lek a ni’ an ti ṭhin (anmahnin ring tak tak ni lovin). Amaherawhchu Thuthlung Thara thil thleng hrang hrang kan thlir hian kan Lalpa hi Pathian fapa a nih zia hria a. A hmingin thiltihtheihna a neihzia pawh hretu thlarau khawvel mite (ramhuaite) hi a taka awm an nih zia a chiang.

               “Heng thilte hi tun thlengin an la dik zel em tih hi kan hre duh a, India ram chhunga chutiang thil lo tawk tawhte kan zawt kual a. Chuvangin ramhuaite inlar dan hrang hranga zawhna pawimawhte chu kan zawt ṭan dawn a. Mr. Daniela hi upa chancang leh chinchang hre ber a ni bawk a, kan zawt hmasa ang a, chumi zawhah Mr. Gupta ka zawt leh ang. (Zawttu hi Scientist hlun tak, Madras University a Science Professor leh lehkhabu hmingthang ‘Evolution or Creation’ tih ziaktu Enoch-a a ni.)

Enocha zawhna : Ramhuai pai an tih hi i hmu tawh reng em?

Daniela chhanna : Hmu tehreng mai, za tam tak ka hmu tawh. Milem pathian leh thlarau biakna ramah chuan ramhuai pai hmuh hi a harsa lo. China leh India ramte hi an tamna hmun a ni.

Zawhna : Ramhuai man (pâi) chu engtinnge i hriat theih?

Chhanna : India ramah hian mipa aiin hmeichhia ramhuai man (khawhring nei) an tam zawk. Chutiang mite chu a rawn hruaitute ngei pawhin khawhring nei an ni tih an sawi mai a. Inkhawmpui kan neih nikhuaahte hian Isua hun lai ang mai khan ramhuai bawlhhlawh paite chu an lokal chhuak mai ṭhin. An rawn au chhuak a niih loh pawhin an rawn ṭap chhuak a, an tlu tawp mai ṭhin a ni. A chang chuan a lu hi hnung lam leh hma lamah an thing vak vak a, ramhuai pai an nih hai rual a ni lo.

Zawhna : Engtingnge in tih ṭhin?

Chhanna : Krista hming ramhuaite chu kan hau ṭhin. Hetianga ramhuaite hnawtchhuak tur hian min puibawmtu tur rawngbawltu ṭhahnem tak ka nei a. An awm loh chuan keimah pawhin ka thawk chhuak ve mai.

Zawhna : ramhuaite chu an chhuak vat ṭhin em?

Chhanna : A tlangpuiin an rawn chhuak deuh mai ṭhin. Mahse Krista hming lamtu chu rinna lama mi chak, thinlung thianghlim, chhia leh ṭha hriatna lama rilru thiang tak nei nih a ngai. Ramhuai luhlul ṭhenkhat erawh chu an chhuak duh mai lo ṭhin. Mi chi hrang hrang an ni ve a, kawchhunga ramhuai tam tak an awm phei chuan an chhuak duh lawk ṭhin lo. A chang phei chuan tam tak an awm ṭhin a, a buaithlak bik hle. Ṭum khat chu nu pakhat kawchhung aṭangin ramhuai sawmli ka hnawtchhuak. Hun neih tam tawk si lohva, ramhuai pai chhungten thudik tak an puan duh loh hian ramhuaite hi an lo chhuak duh ṭhin lo. Mahse chutiang chu an vang hle.

Zawhna: Kristian-te hian ramhuai an pai ve em?

Chhanna : A hming maia Kristiante hian an pai ve tho. Chutiang mite chuan Hindu templeah te, Hindu kûtpuiah te an va kal a, chuta ṭang chuan an va kai ṭhin. Ṭhenkhat chuan milem pathian hnena hlan tawh chawte an va ei a. Chubakah Hinduho thingserh (thingbuk) hnuaia an va awm laite pawhin an lo kai thei a. Thlanmual bula kaite an awm a. Ringlo mite pathian biakna bula kalten ramhuai bawlhhlawh an pai (kai) bawk ṭhin. A chang chuan phungzawl ang tein an lo awm thut a, a changin natna dang tein. Heng thlarau sualte hian a hming maia kristiante chu ringlomite ang thovin duh duhin an tawk thei a ni.

Zawhna : Chuti chu milem pathiante hi ramhuai i tihna a ni maw?

Chhanna :  Madras a pastor fanu pakhat pawhin phûng a zâwl thut mai a. A tet laia nei ngai pawh a ni si lova. Hindu temple a a kal ṭhin leh kal ṭhin loh ka zawh lahin a kal ngai loh thu a pa chuan a sawi si a. Mahse a nitin sikul kawngah Hindu temple a lo kal tlang ṭhin tih hriat chhuah a ni a. Hriak ka hnawih a, Isua hminga thlarau sual ka hauh hnuah zawng phûngzâwl a nei ta lo.

                                Heng milem pathian phênah hian thlarau sualte an awm a. Hindu in tam takah chuan an pindan te hi milem tar nan leh chibai buk nan an hmang a. Chung milemte phih thlak a, silfai hnua ṭawngṭainaa thenfai a ngai ṭhin. Chutianga milem chibai bukna thil reng reng thenfai a, Pathian thlarauvin hna a thawh chuan ramhuaite awm ngam lohna hmun thianghlimah a chang leh mai thei a ni.

               Zirtirtu lehkhathiam deuh pakhat pawhin Hindu temple a vut thianghlim chu pawisa lo takin a la a, ha nawh fai nante a hmang vei rawk a. A ât phah ta a. Ka hnenah an rawn hruai a, ka lo ṭawngṭaisak hnuah a dam ta a, mahse Lal Isua a ring zui si lova, reilote hnuah a buai phah leh ta a ni.

               Nu pakhat pawh aintih Kristian avang leh thilṭha ti nia inngaiin milem a vawkeh rawk mai a, ramhuaiin a man nghal der mai. Ka hnenah bawk an rawn hruai a. Chu ramhuai chuan, “Ka milim mi tihchhiatsak a, chuvangin ka man ta a ni” tiin a sawi. Chu nu kawchhunga ramhuai chu ka hnawhchhuah sak a, mahse a inchhung chu rinna din ngheh a ni lo tih ka hre zui leh a, chu nu hnenah chuan ramhuai chu a rawn lang leh fo tih an sawi.

Zawhna : Ramhuai kut aṭanga chhanchhuanten Kristianah an inleh phah em?

Chhanna : Inlet fo e. Hindute chu Kristianah an inlet ṭhin a, a hming mai a Kristian ve mai maite nun pawh a inthlak danglam ṭhin. Dawithiamna hlauhawm chi (black magic) hmanga mi tihhlum ching mi pahnih pawhin Krista an rin phah.

Zawhna : Inchhunga naupang dangte awm ve laia ramhuai hnawhchhuah hi a him em?

Chhanna : A awmzia chu hetiang hi a ni, ramhuaite hian sual tih ngainatu kawchhunga an awm hian duh duh a an khawsak theih avangin chhuahsan an duh ngai lo. Rinna lama chaklo mite, pawisawilo naupang kawchhungahte hian an pakai duh hle. Chuvangin ramhuai lo do ve thei lo naupangte awm ve laia ramhuai hnawhchhuah hi a ṭha lo. Inchhunga ramhuai p ai an awm lah a ṭha hek lo. A chhan chu ramhuai pai a thih veleh a chhungte zinga zuamawm deuh berah a pakai ve nghal mai ṭhin. Keini Kristaa awm tawhte hi chuan thim lalpa ram aṭangin Isua Krista lalna ramah, êngah kan lut tawh a. Rinna lama kan chak a, a thu kan awih a, Kraws hnehna kan rin phawt chuan kan dinhmun a him tawk a ni. Mahse ramhuaite hi phuba lak hmang an ni a. Anmahni hnawtchhuaktu laka phuba lak hi an tum tlat a. Tihnat theih dan ngawt zawngin an mitmei ran mai a, a theih phei chuan a chaklohna lai ber hmangin a kawchhunga luh a tum ṭhin. Kan evanelist zinga pakhat pawhin ramhuai chak deuh deuh pakua lai hnawhchhuah a tumna lamah amah chu an man tel ve a. Ṭawngṭaisak turin mel 300 laia hla aṭangin ka va pan a, tunah zawng a ṭha leh ta.

                                Krista thisen chauh hi kan himna leh kan thiltihtheihna awmchhung, ramhuaite pawhin anhlauh ber a ni. Naupang zingah pawh Pathian ṭih a. A thuawihtute hi an him bik em em. Krista leh Chanchin Ṭha chenna hmunah ramhuaite an lokal ṭhin lo.

Zawhna : Kristian tupawhin thu pe se, thlarau bawlhhlawhten awihin an chhuahsan ve mai ang em?

Chhanna : Chhuahsan lovang. Ramhuai hnawhchhuah hi tihnamai a ni lo. Kristian zawng zawngte tih theih vek chi pawh a ni bawk lo. Thilpek a ni ve a, thlarau rah emaw, rinna thiltihtheihna ropui tak an nei ṭhin a. Mahse Kristian inkhawmho leh rinna pangngai neiten chaw nghei a an ṭawngṭai chuan ramhuaite chu an chhuak ṭhin.

Zawhna : Kawchhunga ramhuai pakhat aia tam an awm qhin hi engtianga lo awm thei nge tih i sawi thei em?

Chhanna : Thei. Ramhuai pakhat hianramhuai dangte pawh an rawn hruai lut fo lawm. Pakhat kan hnawhchhuah hian an chhuak ta vek anga ngaih tur hian a dangte hian ngawih an chuh ṭhin. Mahse a la chambang reng rengte kha hnawhchhuah vek an nih loh chuan a chhuaka ngei pawh kha a lo kir leh pawh hman mai tur a ni. Hnawh chhuah vek hma chuan duh tawk mai chi a ni lo.

Zawhna : Ramhuai pai i enkawl dang chanchinte han sawi teh.

Chhanna : Vawi khat chu communistho chuan engtinnge a awm tehreng tiin min lo thlir a. Chu hmeichhe lu-ah chuan kut ka nghat a, ramhuai chu chhuak turin thu ka pe a, chu veleh a chhunga ramhuai chu aw ring taka auvin, ‘Hetah hian kum 12 lai ka lo awm tawh a, ka kal chhuak dawn lo,’ a ti a. Keichuan, ‘I chhuak ngei tur a ni. Ka Lalpa Isuan thu a pe a che. Keima thupek che a ni lo. He nu hnenah hian tihtur engmah i nei lo,’ ka ti a. Ramhuai chu a chhuak bo ta a, chu hmeichhia chu thi ang derin a tlu a. Communistho chuan chu chu ngawi rengin an lo thlir a, tik pawh an ti eih lo. An hmuh theih lohah thiltihtheihna ropui tak a awm tih an hria a, min rawn tibuai leh ta lo.

Zawhna : Mi bawlhhlawh ve thoten ramhuai hnawhchhuah an tum a, ramhuaiin a lo man zawk hlauh hi thil awm thei a ni em?

Chhanna : Thei tehreng mai. Tam tak an awm. Chutiang an tih lai chuan nasa takin an tuar pahah a ni. Chuvangin fimkhur hle a ngai, a chhan chu Thlarau Thianghlim ang bawkin ramhuaite hian mihring rilru an hre ve thei niin a lang a. Fimkhur lo taka beih mai chi a ni lova, ṭawngṭainaa do tur a ni. Entirna remchang tak chu Thuthlung Tharah kan hmu a, Paula ten ramhuai an hnawhchhuah ṭhin angin Juda puithiam lal pakhat Skeva fapa ten tih ve an tum rawk a, ramhuaite chuan, ‘Isua ka awih e, Paula pawh ka hria e, nangni erawh chu tunge maw in nih le? tiin a zuan thlu ta hlawm a. Saruak leh inhliam pheng phung chungin an tlan chhe thei hram a nih kha ( Tirhkohte 19:13-16)

Zawhna : Engvaninnge ramhuaite hian an awmna kawchhung chhuahsan an hlauh viau?

Chhanna : Nia. Ramhuaite hian an awmna taksa hi chhuahsan an duh lo reng reng a, theihtawpin ṭan an la ṭhin. Kawchhung aṭanga hnawhchhuah an hlauhna chhan ber chu, nakina an kalna tur hremhmun hlauhawm zia an hriatchian em vang a ni. A chang chuan ramhuai pai luchunga kut kan han nghahte hian, “Hremhmunah ka tla ta, a sa lutuk, a sa lutuk,” ti te hian an au chul mai ṭhin. Leilawta paihthlak hun an engto zia chu – isua hnenah pawh khan Leilawta kal thu pe rih lo turin an ngen lawm lawm anih kha ( Luka 8:26-33, Mt 8:28:-34)

Zawhna : Ramhuai i hnawhchhuah hian an lokir leh ṭhin em?

Chhanna : Kir leh fove. Ramhuai paitu khan chhanchhuah anih hnuah a fimkhur zui loh emaw, Krista a rin bawk si loh chuan ramhuai kha a lokir leh ṭhin. Chuvangin an sualte puangin Pathian hnenah an tlu lut tur a ni. Chutianga anmahni venghim theitu an belh loh chuan ramhuai tan chuan belchhung sa a ni lehnghal mai a, an chungah thu a la nei zui reng. Hei vang hian ni thum emaw tal Chanchin Ṭha an ngaihthlak a. Krista rindan kawngte kawhhmuh an nih hnu chauhin kan hnawhchhuah sak ṭhin reng a ni. A chang chuan Pathian thu ngaithla thei lo turin ramhuaite hian an mutthluk tir tlat a. Chutiang mite chu inkhawm ṭan hmain hriak kan thihsak hmasa ṭhin.

Zawhna : Ramhuaite hian anmahni chanchin leh awmdante hi an sawi ve ṭhin em?

Chhanna : A tlangpuiin an luhlulin an ṭawng duh lo tlat thei a, mahse Lalpa mite chuan ṭawng chhuak turin thu kan pe thei a ni. Vana lalber tunge ni? ti te hian ka zawt fova, LAl Isua Krista a ni tih min hrilh ve mai. Vanram leh Hremhmun awm thu pawh an hria a, chung hmun chanchinte pawh chu an sawi ṭeuh mai. Isua Krista hming mak tak mai hmang hian heng ramhuaite hi kan thu thuin kan dah thei a ni.

Zawhna : Pu. Daniel, heng ramhuaite hian Pathian Lekhabu hi engtinnge an ngaih?

Chhanna : Pathian Lehkha thu te hi an ring ve a, an awm laia Bible kan chhiar hian hlauvin an khur a, Luka 10:18, 19. han chhiar phei chuan hlauh taktein an hlau ṭhin a ni.

Zawhna : Isua Krista hi mi zawng zawng Lalpa a ni tih an hria tihna em ni?

Chhanna : Ni e. Amah (Isua) chungchangah dawt an sawi ngam miah lo. Krista hming lam ringawt pawhin hlauvin an tlanchhe mai a. A hming hre lo tur a beng hup tak an duh ṭhin.

Zawhna : Aw le, tunah Pu Gupta, nang, i thil tawh leh hriat te min han hrilh ve tawh rawh le.

Gupta : Ṭawng chi hrang hrang thiam ramhuai hriat ka nei nual. Vawi khat pawh thuhril rawngbawlna kan neihna hmun pakhatah chuan thingtlang nu mawl deuh mai pakhat hi kan hmu a. Chu nu chu kan (India) ṭawngin ka han bia a, tunge anih ka han zawt a. Rin loh deuh maiin English awphawi nalh tak mai hian min lo chhang puam ṭalh mai a niih chu. ‘Tunge i nih i tia lo? Ka hming chu Camelia a ni a, sikul zirtirtu ka ni e,’ a lo ti zaih mai a. Chutia  thingtlang nu mawl leh lehkhathiam hawt lovin sapṭawnga mi han chhang hnehsawh lutuk mai chu mak ka ti a. Zawhna dang tam tak ka zawh hnuah chu nu chu chhuahsan turin ka hrilh ta a. Chu ramhuai (Camelia) chuan, ‘Khawiahnge ka kal tak ang?’ a ti a. ‘I hmu tur chu hremhmun a ni. Chutah chuan kal rawh,’ ka ti a. Chu veleh chu hmeichhia chu a let but a, a tlu tawp a, reilote hnuah chuan a lo harh leh  chuan ramhuai man chuan a lo chhuahsan fel fihlim tawh a. Sapṭawngte chuan a ṭawng thei tawh teuh lo mai!

(He ti ti hona thukhawchang hi keini India mite tan a pawimawh a, a bengvarthlak bawk avangin sei deuhin kan chhuah a ni).

Andra Pradesh thingtlanga thilthleng –

               Pune ka chhuahsan dawn kum 1992 khan ṭhian thar Pu. Krickwin Marak-a te chhung, Union Biblical Seminary (UBS) Pune-ah an lo awm ve a. A nupui chu Pi. Lalhmingthangi, Lungleng khawchhuak a ni. Yeotmal a B.D. an zir laia inhria a, innei ta an ni a. An fate leh ka fate pawh an inkawmngeih hle.

               Lehkhabu chhiar tur min hawh zinga sap pakhat V.G. Harley-a ziak Out of Darkness (Stories from India) 1988 bu-ah chuan an nupa chanchin, an seilen dan, Kristian an lo niih dan leh rawngbawl tura an inpek dan chanchin ngaihnawm tak a chuang tel a. Pu Maraka chanchina chhinchhiah tlak deuh mai chu – November 1977 a Andhra Pradesh a cyclone thlirpuiin mipui singthum zet a tihhlum ṭum a, in leh lo nei lova mi sang tam taka awm te chhawmdawltu Kristian pawlho khat zingah a zu tel ve a. A zu thawhna thingtlang khuaa mite chuan an lo lawm mang lova. An ṭawng a thiam si lo. inbiak a hrsain tihngaihna a hre lo thle mai a. A han beidawn viau dawn lahin Krista kohna chhanga kal chhuak niin a inhre tlat bawk si a.

               Chutianga mumal mang lova ni engemawzat a ral hnu chuan chung thingtlang mite hnenah chuan engemawti tala thuchah puan dan a ngaihtuah ta a. Zan khat chu a puaninah chuan petromax a chhi a, ṭawnglettu hmangin tihian a han sawi a. ‘Kristian ka ni a, heti hian Pathian ka be dawn a, tuman ngaihloh lamah lo ngai lo ula. Zan tin ka tih ziah dawn avangin a duh apiangin min rawn zawm ve dawn nia,’ a ti a. Rin loh takin zan tin chuan mi engemawzat an rawn inkhawm ta ziah a. Pathian hmangaihna thu chu awmhmun aṭangin a puang chhuak thei ta reng mai.

               Zan khat chu chutia thu a sawi lai chuan nuho hi an rawn rak phei hlut a. Engtizia nge ni ta tia a han zawh chuan an ṭhenawm lawka ramhuai man nu pakhat a awm thu an rawn hrilh a, ‘I Pathian in a tihdam theih takin kan rawn hruai a nih hi,’ tiin an rawn hruai ta mai a. Chu ramhuai pai nu chu pasal nei hlim deuh hlawt a ni a, ramsa rapthlak deuh ang mai hian a meng pual rú mai a. Pu Maraka bulah chuan an rawn hnutchhiah lawk a, chu veleh bak lengin an tlan san leh ta diak a. Chu mai pawh chu duh tawk lovin, kha nu kawchhunga ramhuai kha an inah a rawn lut ve ang tih hlauvin kawngka an inkalh hnan vek mai a ni.

               Engtinnge a tih dawn tehreng hriat chakin a thusawi lo ngaithlatute chuan Pu. Makraka chu an thlir ṭhup mai a. Ani lah chuan ramhuai em han hnawtchhuak turin mang lamah pawh a la mang ngai si lova. A hnial dawn lahin Pathian thu a sawite kha a sût leh dawn a ni ringawt mai si a. Sual ngaidamtu, damlo tidamtu Lal Isua chanchin a lo sawi khan tun hunah ngei hian a tihdam theih si loh chuan an milem pathian aiin thil  a tithei bik lo tihna a ni dawn a. Isua hi rintlakah an ngai dawn lo tihna  ni. Engtinnge a tih tak ang le? Chutia mangang taka a inngaihtuah lai chuan “Nangmah chauhin i awm hlei nem” tih thu hi a thinlungah chuan  a lo lang tlat mai a.

               Lalpa hmachhuanin chu hmeichhe ṭap hawm hawm lu chungah chuan a kut kh6ur dar dar chung chuan a zuk nghat a, tihtak zetin minute nga emaw, minute sawm vel emaw chhung  a ṭawngṭaisak ta a. Engmah a danglam phah chuang loh avang chuan a beidawng rilru hle mai a. A ṭawngṭai zawha chu ni tlan haw leh ta chu mite chuan an en zui sup sup a.

               A tûk zing varṭianah chuan thawm a rawn ri leh chel chul mai a. Puanin chhunga a thawhpui pakhat lo tlan lût chuan, ‘Nizana i ṭawngṭaisak kha a dam ta,’ tiin a rawn au lût a. A sawi ang tak takin chu nu chu a lo dam tak tak reng mai a, mi pangngai hmêl a lo pu ta a. Chumi ni tlai chuan a pasal nen Chanchin Ṭha ngaithla turin an rawn inkhawm ve nghe nghe a. Chung thil vel an han hmuh chuan chu khuaa mite chu an ṭha ta khawp mai a, thla hnih chhung lekin thlipui lenchhiat tawh an insak ṭhat turte chu an sa zo ta vek mai a. A haw dawn phei chuan an chelh rei theihna tur ngaihtuahin a thuamhnawte chu an lo thuhruk sak vel a ni. (He thu hi a bua inziak bakah dt.18.4.93 chawlhni inkhawm ban a, an chhungkuaa chhunchaw an rawn ei laiin Pu.Maraka ngeiin min hrilh a ni).

By. P.C. Biaksiama

PAGE 7 >>