BORUAK LAL – PAGE 5

79

Tunlai mitthiamte ngaihdan (Psychological Theory)

                 Ramhuai emaw, ramhuai man chungchang emaw te hi sakhua leh thlarau lam thil an nih avangin sakhaw thil aṭanga thlir tur an ni tlat mai. Sakhaw ngaihsak lohna, tunlai khawvel thiamna leh tisa thil (materialism) chuan thlarau lam thil reng reng in a hnawl hmiah si a. Science thiamna hmanga mihring rilru leh nungchang zirna, psychology leh psychiatry te inzirtir dan chu ‘thlarau kan nei lo’ tih a ni.

                 Science thiamna lam aṭang chuan ramhuai awm te, thlarau khawvel awm hrim hrim pawh hi inzirtir anih loh avangin, mihringa thlarau hnathawh emaw, ramhuai hnathawh emaw hi hrilhfiah ngaihna an hre lo. Psychology leh medical lamah pawh chuti bawk. Chuvangin thlarau sual hnathawh avanga mi an lo tal buai  hian, medical science in a la hrilhfiah theihloh natna (disorder) a ni an ti ṭhin.

                 Mi thiam pahniih Dr. Hammond-a leh Dr. Taylor-a te chuan ‘ramhuai man’ chungchang hi hnam mawl leh hnuaihnung, ngaihdan fingvar pawh nei thei lo khawpa puithuna âtthlakin a buai-âtte buaipui tawk lek niin an sawi. Hei hi tunlai mithiam mimir reng reng ngaihdan tlangpui a ni nghe nghe awm e. (Bible ringtu Kristiante an nih nghal loh chuan). Mak angreng takin Pathian thu zirtuho zinga ‘Liberal’ an tih pawlte pawhin ringlomite ang tho hian thlarau khawvel awm an ring bik lova. Tuna kum zabi 20-na chhunga theologian thûk bera an sawi ṭhin Rudolf bultmann-a phei chuan Setana hi thawnthu phuahchawp mai, ataka awm si lo (mythological figure) ang lekin a ngai ( Kerugma and Myth. 1961, p.39)

                 Tun hnai lawka America rama mipui ngaihdan (gallup poll) an siamah chuan America mipui zaa 70 dawn laite chuan Setana hi a awm tak takin an ring tih hmuhchhuah a ni. A awm ringlotute chu sakhaw dang bia emaw, sakhaw neilote emaw an ni ṭhin. Rilru daktawr (psychiatrist) pakhat M. Scott Peck-a pawhin a lehkhabu ziak hmingthang tak ‘The People of the Lie’ ah ‘Psychiatrist za zela 99 te leh sakhaw puithiam tam zawkte ngaihdanin ramhuai awm hi ka lo ring ngai lo’ tih thu a ziak a, mahse setana hi a taka awm ngei a nihzia a lo hriatchhuah hnuah chuan Peck-a leh scientist ṭhenkhat chuan kristianah an inleh phah ta zawk a ni.

Scientist, ramhuai man –

                 Ludwig Taudenmaier-a chu German scientist a ni a, Sigmund Freud-a (psychoanalyst) ngaihdanin ramhuaite hi chu dawtthu (myth) mai niin a lo ngai ṭhin a. Chemistry, zoology leh theology subject hrang hrang aṭanga doctorate degree sang tak a zir zawh hnu chuan thlarau khawvel thil an tih fo hi a awm tak tak nge dawtthu mai tih chhuichhuah chakna a lo nei ta a.

                 A ṭhianpa thurawn angin Staudenmaier-a chuan tisa pawnlam thlarau khawvel biak pawh tumin ‘automatic writing’ an tih chuan a han enchhin ta a. Chumi zawmzia chu dawimut ang hian (zel angin) a han awm phawt ang a, chutia nikhaw hre lova a awm lai (muthilh lai) chuan titheitu thlarau an awm phawt chuan a kut hmangin an duh duh rawn ziak mai rawh se tiin a inpe tawp a ni ber mai. Mak tak maiin a kut hmang chuan thuziak mak tak tak, a la hriat phak ngai miah lohte chu a inziak zung zung ta mai a. Mahse ani hi chuan heng thilte hi hmuh theihloh thlarau hnathawhah a la ngai thei chuang lova. Freud-a zirtirnain a lo hmin tawh bawk a, chuvangin a rilru chhungrila inphum (unconscious midn) aṭanga lo irh chhuak niin a ngai tlat thova. Sigmund Freud-a zirtirnaah chuan, kan rilrua kan thil hriattheih chin (conscious mind) hi tlemte, zaa 10 vel chauh a ni a, a bak za zela 90 lai chu rilru chhungril zawk ‘subconscious mind’ ah a inkhung bo daih a, chu hriatna bawmah chuan eng eng hriatna lek nge inphum tih hi hriat phak a ni lova. Chu hriatna bawk aṭanga thiamna leh hriatna la chhuak thiam te chuan mi pangngaite aia thiltihtheihna nasa tak hi an nei ta a, kei ni chuan mi pangngaite aia thiltihtheihna emaw, ramhuai thiltihtheihna (supernatural power) emaw tiin kan sawi ta mai ṭhin a ni’ an ti. A awihawm ve viau ni tur a ni. Hei vang hian Pathian ṭanpuinaa miten thilmak an tihte emaw, dawithiamten thilmak an tihte hian mithiamte chu niin an ngai mai ṭhin a, mahse engang thil nge inphum tih chu rinthu mai a ni leh bawk si a ni.

                 Mahse thudik tak chu he scientist hian a hre dawn chauh a ni. Chutia ramhuai biakna hmanrua ‘automatic writing’ a han ṭan hnu lawk aṭang chuan phung hlauhawm pui pui hi a hmu ta fo mai a, an rawn inlar zing tial tial bawk a. Zan khat chu khuma a mut laiin a nghawngah chuan khaidiata rawn thlung bet ta tlat hian a hria a, a fiah hle mai si a. Chubakah kât rimchhe deuh mai hi a nam huam mai bawk a, awri rapthlâk deuh mai hian “Tunah chuan ka saltang i ni ta. Ka chhuah tawh ngai lovang che.ramhuai ka nih hi,” tiin a rawn hrilh ta mai a.

                 Staudenmaier-a chuan a ngaihdan pangngai chu la thlahfel chiah lo mahse thil kalhmang a han ngaihtuahin, a lo ngaihdan rawk chuan til a kal dawn lo tih a hre chhuak ta. Tihian a ziak a, “Medieval hun lai ngaihdan mawl dinhmun aṭang thlir chuan ‘ramhuai man’ an tih ang hi ka ni ta chiah mai le. Chuvangin tihdan tur kawng hnih chauh hmabak ka nei ta. He hringnun awmdan mak tak hi thlirna kawng hran daih aṭangin ka hmu chuhak dawn ta a nih loh vek chuan, mi â, ṭul lova hun leh hriselna leh nunna hial pawh khawhraltu mai ka ni,” tiin.

                Hetiang thil thleng danglam tak a tawh hnu kum reilote hnuah Rom khuaa a thih ni thlengin thil rapthlak pui pui a hmuh ṭhinte chuan an zar buai reng tawh mai a ni. Staudenmaier-a thil tawh ang hi thilthar leh hriat ngai loh thil a ni lo. Hetiang hian thlarau sualho hian mi sang tam tak nunna an lo laksak tawh a. Hei vang hian khawvel hnamtin zingah ramhuai hnathawh leh ramhuaiho hi a taka awm ngei a nihzia tuman an hai lo reng a ni. Tun hnaiah khawvel finna leh science thiamna hmangtuten sawibo an tum mai zawk a ni. Sawia bo thei nisela an bo daih tawh ang chu.

Red Indian nula khawhring nei kha –

                 Hei hi thawnthu tak tak, Red Indian nula ramhuai pai, bible school-a zirlai chanchin a ni. New York biala Indian hnam zing ami a ni. 1947 khan Kristian a lo ni a, chu Bible schoolah pawh chuan kum hnih lai a lo zir tawh a ni.

                 Kum 9 mi lek anih laia, a pa dawithiam daktawrin amah rawn man tura ramhuai lalpa hnena a ṭawngṭai aṭanga ramhuaiten rawn luhkhung ṭan ta niin a inngai a. Mahse tun hnaiah chauh ramhuai hnathawh a ni tih a lang chhuak a ni. Mi â anga an ngaih tawh chu karhnih thum hnu lekah dam ṭha varin hospital chu a chhuahsan ta mai a ni.

                 He nula dam loh ṭanna hi bible sikul a luh tawh hnu a, Krista Thurin chungchang a zir laiin, zan lamah hian a damlo hluah mai ṭhin a. Damdawiinah pawh vawi tam tak an hruai tawh a, chutianga a damloh lai chuan a sam hi a tho huang a, a hmulthite pawh an ding sung mai ṭhin a ni. Chutianga awm tak fo hnuah chuan zirlaite leh hotute chu an inhmukhawm a, an zai a, ṭawngṭaina an neih sak a. Chumi hnu lawk chuan ramhuaite chuan an rawn luhkhung ta tak tak a amah buaipuitu keith Bailey-a, Indianho zinga missionary a thawk chuan hetiang hian a sawi.

                 Chu nula kawchhunga thlaraute chu Pathiana chhuak thlarau dik an nih leh nih loh fiah turin Lalpa’n min tir a. Ka fiah ta ngei a. Aw pakhat (nula aw ni lo, a hrawk chhung, thuk tak aṭanga lo chuhak awri) chuan, “He hmeichhe kawchhung aṭangin kan lo chhuak lovang” tiin vawi thum lai a rawn sawi a. A hnua he nulain a sawi leh danin a kawchhunga ramhuaite chu tunge chhuak hmasa ber ang tih an inhnawn kual nawk nawk thawm pawh a hre reng a ni. Ramhuaite chhuak tura thu ka pek lai chauh chu chaw leh tui a lem theih lai a ni. Luka 10:17 kan chhiar hnuah erawh chuan ramhuaite pawh kan thu thuin an awm tih a lo chuang ta a.

                 Chutia kan buaipui chhung chu darkar 30 vel lai a ni. Chutih laia inchhunga awm ve theite chu Pathian nena inrem taka awm (ringtu takzet) te chauh an ni. Pathian rinna kawnga rinawm tawklote chu ramhuaite hian an nuihzat ve tlat a, an hlau therte lo. Ramhuaite chu anmahni hming sawi luih tir phawt loh chuan hmeichhe kawchhung aṭangin an rawn chhuak duh lo. An zinga pakhat hming chu ‘hlauva’ (Fear) a ni.

                 Ramhuai thawm nat tak tak lai chuan a baksamte chu a ding kawh sung mai a. Red Indianho lâm danin khum chungah te chuan a ṭum kual ulh ulh mai a, kan ṭawngṭai lai mekte chuan chhuatlaiah a tla ri chawrh mai a. Kan lu chung zawna boruaka min han zuankahlen zawngte chuan a kawchhunga ramhuaiho ṭap rite chu kan hre thei a. Chumi khap daih theihna ber chu Pathian thu chhiar a ni. Sam 91 leh Luka 10:17-19 te chu bible chang min puitu ṭangkai berte an ni. Chhuak tura ramhuaiho thu ka pek lai chuan midangte hnena an luh leh loh nan khuarkhurum (leilawt) a kal turin thu ka pe ṭhin. Leilawt rapthlakzia an hriat avangin an kal hreh chu theihtawpin an ṭang ve a, mahse an kal ngei tur a ni tiin Isua hmingin thu ka pe tlat mai si a, lungngaiin an rum vawng vawng hlawm a ni. (Hetih chhung zawng hian nula kha chu nikhaw hre mang lovin a awm reng thung)

                 A tawpah zawng Pathianin hmeichhe pakhat a rawn tir hlauh a, ani chuan nula kawchhungah ramhuai tam tak an awm tih a hre thei mai a. Ramhuaiho lahin dawt tam rak an sawi a. Ṭhenkhat chu Red Indianho ṭawngin an ṭawng a, chungte chu Englisha let turin thupek hi a ngai lehchhawng a, ramhuai zinga sapṭawng thiamte chuan dawt ringawtte an han letling vel ṭhin.

                 Pindan chhunga awm ve dangte chuan Isua hmingin ramhuaite an be ve thei lo. Krista tel lo chuan engmah tithei lo, chakna nei lo mai kan ni a, chu chu ramhuaite pawhin an hai bik nahek lova. Tihtak nangialin ramhuaite pawhin Isua hi hlauvin, a hmaah chuan an lo khur ṭhin tak tak a lo ni.

                 He nula kawchhungah hian ramhuai 79 lai an lo awmkhawm reng mai a lo ni a, a hnuhnung ber hming phei chu Nuaia (Legion) a ni. A lo chhuak duh lawk lova, a hming lah a sawi duh hek lo. A han khek ring rapthlak khawp a, beng a khawk ri rum rum mai a ni.

                 Hun liam chak dan pawh kan hre pha tawh lo. A chang chuan reilote emaw hla kan sak kan tih laiin, pawn lamah chuan dar thum vel  lai a liam hman ang. Ni pawh hriat loh karin a lo liam mai a.

                 Ramhuai pakhat ‘Chaklova’ an tih chu phun se se bakin a ṭawng ring thei lo thung a, a han phun sup tawh chuan pindan chhunga awm zawng zawng kha kan chau em em hlawm mai ṭhin a. Thil kalhmang kan han hriatchian takah chuan kan tihtheih la awmchhun chu ‘Thisen Hlu’ tia Lalpa fak a ni mai. Chutin kan zai lai chuan ramhuaite chuan, ‘Ka kal ang, ka kal ang,’ an ti chul mai a. https://ekhai.com

                 Mak ang reng takin chu nula chuan Isua Chungchang Thurin zira class chhunga a awm lai khan engmah a hrethiam thei lova, mahse examnaah chuan mak 100 a hmu ziah lawi si a ni. A hnua blackboard emaw hmu thei lo turin a mitah  phuhlip ang ang deuh hian a hliah tlat mai ṭhin hi a lo ni a. A harhfim lai erawh chuan a rilrua ṭawngṭaiin, bible changte pawh a lo ngaihtuah zui reng ṭhin tih  a sawi. A taksa chu Isua ta a nih tawh avang a chhuahsan a ngai tawh tia ramhuaiho titite pawh a lo hre reng a ni. Ramhuai dang an chhuah vek tawh hnu a, a hnuhnung bera nuaia a lo chhuah hnuah chuan a taksa a lo harh chhuak leh a, a lo thova, tuite a in a, Pathian hmaah a ṭap chhuak rawih rawih mai a ni. “(Chhunzawm leh tur…India Rama Ramhuaite hnathawh Dan Thlirna (Demonology)”

By – P.C. Biaksiama

PAGE 5