BORUAK LAL – PAGE 4

70

Ramhuai Man ( Demon Possession)

                Ramhuai man chungchang hi thilmak deuh mai a ni a, ngaihthah mai lova a hranpaa  chhui tham a tling. A hmasain a hming vuah dan tur remchang ber hi rawt chhuah a ngai phawt a. Thuthlung Thar hian sawidan pakhat mai a hmang lova, a changin ramhuai man (demoniac) a ti a, a changin ramhuai zàwl tih te, ramhuai man ‘demon possession’ tih hi Bible ṭawngkaa ni lova, A.D zabi khatna laia Juda historian Flavius Josephus-a ṭawngkam hman aṭanga lo chhuak a ni nghe nghe.

                Mizo pipute pawhin ramhuai hnathawh dan azirin sawidan chi khat maiin an sawi bîk lo. Ramhuai zàwl tih hi chu tûn thlenga kan hman lâr ber nimahse, mi duh lo chunga ramhuaiin an man luih leh sawisak vak ṭhin ang chite chu Khawhring an ti a. A thawndan danglam deuh leh mi sawisak vak chingin an mante chu Phungzáwl kan ti a. Ramhuaiten an ngaihzawng tute emaw an bum theih, a thlèmthlûk theih leh an thuhnuaia an dah theih angte chu ramhuaizawl emaw, lasi-zawl emaw kan ti ṭhin.

                Tichuan kan thu thlûr tûr hi Mizo ṭawnga dah dan ṭha ber engnge ni ta ang? – ramhuai man, nge, ramhuai pai, nge, khawhring leh phungzawl? A dik ber sawi a harsa àwm e. Tûn ṭumah chuan ‘ramhuai man’ tiin kan hmang ber dawn a, a remchan anga hman pawlh erawh chu a ngai fo dawn a ni.

                Thlarau sualho sawi nana ramhuai hming kan puttir pawh hian a tira a awmzia ang tak kha a phawk chhuak chiang tâwk lo bawk. Ramhuai kan tih chuan ramhuai a kawk daih a, mahse khawchhungahte pawh an tam tawh mai. Chanchin Ṭhain ramhuaite a hnawl bo kan tih lai hian Isua ring duhlo kan pung tial tial a, kan ṭhalaite nundan kan enchian deuh chuan ramhuai hnathawh hian a chhaih buai nasa tawh hlawm tih hi hai rual a ni lo. Hetiang taka ramhuaite an rawn huangtau ngam tâk avang hian ramhuaiho leh an hnathawh dan hi kawng hrang hranga zir chhoh a ṭûl ta a ni.

                                Ramhuai man hi engtihna nge?

                Thlarau sual, ramhuai eng pawhin mihring kawchhunga a luh a, a awmna chunga duh duha thuneihna a chan hian ramhuai pâi emaw, ramhuai man tia sawi a ni ṭhin. Mihring kawchhungah hian pakhat mai awm lovin, ṭum khatah ramhuai tam tak an awm thei. A lo inṭan dan hi entirna hmangin lo hrilhfiah ila.

                Liana chu mi pangngai ve mai, ṭawng tlém deuh, mi thuawih thei tak a ni. A naupan lai aṭangin mi aia a danglamna teh vak a lang chuang lo. Ruihhlo chîn ṭhan deuh hnuah chuan ṭum khat chu nikhaw hre lo hian a tlu der mai a, amah chu thi tur ang maiin a awm a. Nasa féa a chhungten an buaipui hnuah, a ka hmang chuan amah ni si lo, aw dang daih hi a rawn ṭawng chhuak ta a. Liana kut leh ke hmangin a rawn che vêl ṭhin a, chutih lai chuan Liana tak zawk kha chuan engmah a hre si lo. Mahse a han tâl tak tak chuan mi sawm dawn lai pawhin an chelh hneh mang lo hial si a. Nakinah chuan Liana chu a lo harh a, a bula miin an lo kil huai huai a hmuh chuan mak a ti a, engnge in tih? tiin a zawt zawk mah a. A buai laia a taksaa thil thleng kha pakhat mah a hre si lo. A kawchhungah ramhuai an luh vang a ni.

                Ramhuaihovin awmhmun an khuar ngheh chinah chuan mahni ina kan lut chhuak fo ang hian an in thar, Liana kawchhungah chuan an lutin an chhuak ṭhin a. Eng hunah pawh an rawn che chhuak thut thei a, Liana awm ṭha hle hlelaite hi mi â ang mai hian an tâl tir leh vak vak a. Liana ká aṭanga chilphuan a rawn chhuah buah buah ṭhin avangin mite chuan phungzáwl an lo ti a. A cháng chuan a ṭhiante chu anchhia a lawh buan buan a, mi tihhlum tumin hriamhreite pawh a lek uaih uaih ṭhin a. Namtu awm ang mai hian a tlu thlawrh a, a hnar aṭanga thi chhuak nguah nguah khawpte pawhin a insawh na thei a ni.

                Ramhuai pai ṭheuh ṭheuh thawk nasa leh nêp deuh an awm. Liana kawchhunga mite hi an kawlh deuh vang pawh a ni mai thei. Ṭhenkhat pai chu an zaidam kan ti dawn nge, a kawchhungah ramhuai a awm tih pawh hriat theih loh hialte pawhin an ngawi thei. Hetianga an ngawih lai hi chuan, emaw, pawn lama an chhuahvah lai chuan Liana chu mi pangngai ang chiahin, rilru pawh buai miah lovin a awm leh thei bawk si. An rawn l6ut a, a ngai bawkin Liana taksa chu an sawisa leh a. Ramhuaite ngamloh Isua Krista hminga hnawhchhuah sak an tum lo rêng rêng a, a thlarauh pawh thim Lalpa chanpualah an hauh tlat a. Chhanchhuaktu a hmuh loh chuan ramhuaiho ruala chatuan boralna hmuna kal ve tur a ni.

                                Ramhuai hnathawh hriattheihnate.

                Natna leh rilru buaina nazawng h ramhuai hnathawh an ni vek kher lo tih kan sawi tawh a. Hei vang hian hetiang natna vei enkawl tur chuan natna pangngaia na nge, ramhuai man tih thliar hran a ṭul hle.

  1. Ramhuai man a ni tih hriattheihna (chhinchhiahna) langsar ber chu  a awmdan ṭangin mize hran daih a rawn put aṭangin a ni. Entirnan, kan sawi tak Liana chu mi zaidam leh ngawichawi tak anih ṭhin vei nen, natna mak takin a beih lai chuan ṭawng bawlhhlawh pui pui hi a hmang a, a hr6amthlahawlh êm êm mai a ni. A ṭawngkam rêng rêng chu Liana ṭawngkam pangngai nên chuan inanglo lutuk a ni a, chu bakah ramhuai a ni tihte pawh a rawn inpuang hial a, a chang phei chuan ama hming leh a chenna hmunte pawh a sawi chhuak ṭhin.

                He ‘midang’ hian ṭawng chi dang, Sap ṭawng emaw, French ṭawng emaw pawh a hmang daih thei. Vai nu pakhat, thingtlang kilkhawra mi, mawl êm êm pawh hetianga a buai lai hi chuan Sap awphawi dik tak mai hian a dak zung zung mai a ni. ( a chhan chu a pai ramhuai khan sapṭawng a thiam vang a ni). Ramhuai hnathawh a nih lan fiahna chu a ṭawngkam hman aṭangin a ni. Amah chu ‘Kei/keimah’ a inti a, a bula mi dangte chu ‘nangni’ tiin a bia (address) a, a awmna Liana erawh chu ‘amah’ tiin (third person) in a sawi a. Chutianga a awm lai chuan a awmna taksa neitu (Liana) chu engmah hre lovin a tlu der si.

  1. Ramhuai man tih hriatna dang leh chu a man mihring (Liana) a hriatthiam ph6ak miah loh tur finna leh thiamna sang tak a rawn nei thei a. Thuríl pui pui, Liana te ang mi mâwlin an ngaihtuah phâk loh tur angte kha a rawn sawi chhuak ṭhin a, Liana ka hmangin. Kohhran mi angah phei chuan ṭawng hriat loh pawhin a rawn ri chhuak vak thei. Hêng thil titu hi Liana kha ni lovin, amah chênchilhtu ramhuai zâwk a ni.

                A châng chuan ramhuai mante namên lovin an chak a, mihring tihtheih rual lohte pawh an tithei a. Entirnan, 1853 khan France rama thingtláng khaw pakhata ramhuai pai mi pakhat chu thehlei ang maiin thingzarah a tlan lawn zawi zawi mai tih John Neveiusa’n a ziak. Serzawl pitar thingtheih zia kan tarlan tak ang mai kha a ni awm a.

  1. Ramhuai hnathawh a ni tih chhinchhiahna dang leh chu Pathian thu lam reng reng an dodal tlat ṭhin a ni. He nungchang lo inthlak danglam ta hlauh aṭang hian a luahtu ramhuai mizia a lo inlar ta ṭhin a ni. Ramhuai ṭhenkhat chu Thlarau Thianghlim lemchang thei hial khawpa khawsa changkan thiam an nih laiin, ṭhenkhat kawchhunga mi chu ramhuai bawlhhlawh, bâwraw tak leh râwva takin an che ṭhin a, hetiang hi ramhuai zingah a bengtlalo leh khawsa hniam chi an ni. An mi man duhzawngte reng reng pawh bawlhhlawh taka che leh inhmang ṭhin mi an ni deuh ngei ṭhin. (Chhunzawm leh tur.. Tunlai mitthiamte ngaihdan )(Psychological Theory)

    PAGE 5>>