BORUAK LAL – PAGE 3

62

Ramhuai Keimi

                Ramhuaite hi an duh chuan ramsa chi hrang hrang an chang thei. Zoram buai hma engemaw hunlai khán chhim lamah sawn ramhuai pai an awm fo mai a. Vawi khat pawh Rev. Aihranga, South Vanlaiphai a miin mi pakhat kawchhunga ramhuai a hnawtchhuak a. Ramhuaite chuan khawiahnge an kal dawn tih an zâwt a. Ani chuan Mizoram aṭanga hla leh him tâwk tur nia a ngaih Bay of Bengal-a kal turin a tir hlawm a. Anni ramhuaiho chuan a hlat em avangin a aia hnaia kaltir turin an ngen a. Mahse Bengal tuipui kal tur chuan a tirlui ta hlawm a.

                1966 kumah khan ram a lo buai a. India sipaite chu Mizorama an rawn tam tâk êm avangin MNF sipaite tan hmun him zâwka insaseng a lo ṭûl tâkah khan East Pakistan (Bangladesh) ah an chhuk thla ta a. Bangladesh-ah chuan ramngaw a la zauvin, sapèl tûr a lo la tam mai si a. MNF sipai pakhat ramvâk chuan sakei a va kâp hliam a. Chu sakei chu ramhnuai a lo ni si a. A lo man ta mai a, ramhnuai court-ah a chungthu an ngaihtuah ta a. Vanneithlâk takin roréltu chuan kha ramhuai kha thiamloh an chantir ta zâwk hlauh mai a. ‘Engahnge sakeiah te i lo chan teh rêng? Ani silai nêna sapêl te chuan an k6ap mai rêng ang che chu’ tiin MNF pa chu an chhuah ta thên mai a ni.

                Kha ramhuai sakeia lo chang khan a sawi dânin tûn hma chuan a ṭhiante nên Mizorama chêng ṭhin an ni a. Pastor Aihranga hnawhchhuah an nih thu leh Bay of Bengal a kal tûra a tirh a, a hlat êm avanga an kal thlen peih loh thu leh helai Bangladesh vela chambáng ta mai an nih thu an lo hrilh a. He MNF pa hian Pastor Aihranga chu tunge anih a lo la hre ngai hauh lova. Mizorama a lo chhuah vêleh amah hmu turin South Vanlaiphai khuaah a han pan ta vang vang a ni. (Hemi chanchin ka ziak lai hian Rev. Aihranga chu a la dam a, kum 80 vel mi a ni tawh a. He thu hi dt. 27. 3. 93-ah rev. Dr. F. Hrangkhuma, UBS Pune (S.Vanlaiphai khawchhuak ve bawk)- in kan in (Pune) a min hrilh a ni.)

                Kohhran Pate nemnghehna

                Kristian kohhran hmasa hruaitu hmingthang ‘Kohhran Pa’ te thuziak hrang hrang kan hmuh aṭang hian an hun laia mite rindân leh milem biak an uar dânte bâkah, ramhuai pai tamzia te, ramhuai mizia leh hnathawh dân te, kohhranin engtinnge an lo buaipui ṭhin tihte kan tarlang dawn a. Ramhuai pai chungcháng leh ramhuai hnawhchhuah chungcháng te chu Kristian leh Kristian lote pawhin an lo hriat lârzia an sawi ṭheuh hlawm.

Tertulian-a (200 A.D.)

                Tertulian-a chuan Rom sorkar hotute hnênah Aplolgy tih lehkhabu ziakin ramhuaiten mi an bum dân tiang hian a sawi.

                “A hmasa berin tuemaw an han tina phawt a, chumi tidam tur chuan damdawi mak tak tak, mite la hriat ngai loh leh dangdai deuh an han chawh a, damdawi khan a ngeih ta ni awm takin an tihnat chawp (dawi nat/ ât) kha an han sût leh zaih a, tichuan thilmak ti an ni ta rêng a. Tin, mihringte hmuh theih tur leh bumnan mak sak deuh deuhin an han inlar kual vêl a, an thiltih dân vêl aṭang rêngin tute emaw milem biak thingbul lungbul ringawtte pawh khan thiltihtheihna an lo nei ve reng a ni” tia ngaih theih tura bumna hmanrua vek a ni a, Pathian dik tak an hmuh ṭhelhna tura an tih vek a ni si a.

                “……..Chubâkah ramhuai ṭanpuinain dawithiamten thlarau an han ko haw a, mitthi thlarau ni awm ang taktein mi an dawivaiin thilmakte an ti ṭhin…. miten pathian thiltihtheihna nei anga an lo rin theihna tura an bumna thil mai a ni… Khawinge i han finfiah tak tak leh ang hmiang. In (Roman) rorêlna hmaah ngei ramhuai zàwl tuemaw han hruai teh u. chutiang thlarau sualte chuan mipuite hnenah pathian angin an lo inchhàl pawh a ni mahna; mahse Krista zuitute chuan an nihna dik tak, ramhuai bawlhhlawh mai an nihzia an inpuantir mai ang.” tiin, Krista ringtute hmaah ngawt pawh ramhuaiten dawt an sawi ngam loh turzia Tertuliana hian a sawi huai hle a ni.

Justin Martin-a (150 A.D.)

                Justin Martin-a pawhin Apology II-ah Roman rerêltute hnenah tiang hian a ziak. “Khawvel ram zawng zawngah leh in khawpui chhungah ramhuai pai chhiar sên loh an awm a. Keini Kristian mi tam takte hian, Pontia Pilata khenbeh tâk Isua Krista hmingin kan chhanchhuakin, dawithiam dangten damdawi leh dawihla chhampual tinreng hmanga an beih a, an tihdam theih loh hi kan tidam ṭhin a ni,” tiin.

Athanasius-a (297-373)

                Athanasius-a (297-373) pawhin Kraws chhinchhiahna ringawt pawhin ramhuaite bumna leh mitdawivaihna thil a tihbo theih thu a sawi. Heti hian a belhchhah a. “Finfiahna hmu duh chu lokal rawh se, ramhuai dawivaihten Pathian be pawp ni awm taka an lemchanna ah te, dawithiamin mite hmuha thil mak tak tak an tihna zingah ringlotuten an nuihzat em em Kraws chhinchhiahna hi kan hman vaih chuan ramhuaite chu hlauvin an thlanchhia ang a, an pathian biak laite ngei pawh khawloh phahin, an dawi hla chhamphualte ngei pawhin awmzia an neih theih loh phah ngei ang tih hi an mut ngeiin an hmu dawn a ni,” tiin Kraws thiltihtheihna hi huai takin a lo puang ve tawh bawk a ni.

Luthera leh Setana

                Martin Luthera (1483 – 1546) phei kha chuan tunhma lama mite zawng ai khan Setana leh a thiltihtheihna chungchang hi a sawi uar a. Amah ngei pawhin he thim thiltihtheihna hi a lo tem tawhin, Setana ngei pawh hi hmu tawhin a insawi.

                A lehkhathawn pakhata a ziak danin ‘Setana hian a hmél lanân tak chu a thup ṭhin a, vawk ang te, chhawihfa ang tea a insiam hi ka mit ngeiin ka hmu tawh a ni, Wartburg hmunah pawh diabola hian mi thihlum tumin mi lo châng a, sanghal dumah te changin huanah te pawh ka hmu fo mai.’ tiin a ṭhianpa Myconius-a a hrilh. ‘1530 kum pawh khan vana arsi zingah ka han man chhuak nalh thei a ni’ tiin a sawi bawk. ‘Pindan chhúngah te hian min zui lût a, ka kalna apianga min enthla turin ramhuai pahnih a ruat a, chungte chu mi enthlâk ching ramhuai an ni’ a ti bawk. Diabola nena an inbiak dan pawh chipchiar takin a ziak a, a ṭhianten Setana an hmu ve dân pawh chipchiar takin a ziak a, a ṭhianten Setana an hmuh ve dan chungchang a ziak tel bawk.

                Heng thi thlengte hi tute emaw tihṭhaih nana phuahchawp thu mai ni lo, titi phungléng mai pawh ni hek lo, a taka thil thleng ngei a ni tiin Luthera hian a sawi uar viau. A sawi zel danin ramhuai pangngai hian hnawhchhuah a tâwk emaw, tihmualpho emaw a tâwk a nih chuan a dinhmun a tlahniam a, tichuan ramhuaiah pawh a chhe chi, a nghal chi leh chimawm chi-ah an ṭang ta ṭhin a, zawnghote pawh hi chutiang chu niin a ngai a ni.

                Ramhuai chungchang hi Luthera zirtirna pawimawh tak zinga mi a ni rêng rêng. Setana hnuhma hi hmun tinah hmuh tur awmin a ngai a. A lehkhabu ziak ropui leh thurin a tarlanna ‘Great Catechism'(1529)-ah chuan heng innghirhona te, inthahna te, helna te leh indona tichhuaktu hi Devil (Setana) a ni a. Chubakah khawpui rite, thlipui te, thlai leh nungcha tichhetu rial tla angte pawh hi Devil hnathawh vanga lo awm an ni a, boruakah hrichhia a lêntir bawk ṭhin niin a sawi. https://ekhai.com

                Luthera sawi zêl danin a awmna Germany ram bial khata tlangsáng tak, Polsterberg (ramhuai tláng an tih) ah chuan dil pakhat a awm a. Tah chuan lung han vawm luhte hian thlichhia a lo thawk thut a, a chheh vel ram chu a suasam vak mai ṭhin a. Chu dil chu ramhuai hlirin an khat a. An chhuah vah pawh phal lovin Setanan a khungkhawm niin a sawi. (Chhunzawm leh tur.. Ramhuai Man “Demon Passession” )

By – P.C. Biaksiama 

PAGE 4