BORUAK LAL – PAGE 2

94

Ramhuaiho hnathawh dân :

               Rilru buai nazawng hi ramhuai hnathawh a ni vek kher. Taksa hah avang te, thil tam tak ngaihtuah avang te, taksa natna dang avangtein rilru a buai thei a, thluak khawl kal dik lo avangin a lo awm thei bawk. Chûngte chu damdawi hmangin daktawrte leh psychologist-ten an enkawl dam thei a. Mahse ramhuai hnathawh avanga taksa buaina lo awm a nih erawh chuan damdawi hman a sâwt duh lo hle.

Ramhuai hnathawh dan chi hrang hrangte chu an nasat dân indawtin lo tárlang ila :

               (1) Ramhuaiten mi tam berte rilrua hna an thawh dn hi chu hriat tham loh khawpa nêp angin a sawi theih âwm a. Bible ṭawngkam chuan ‘thlêmna’ tih a ni. Mahni duhzawng leh tsa châk zawnga inhmang tura thlêmnaa inhruailuh hi an tum a ni. Mi ṭha leh nun ngil pangngaite hi thlarau sualho hian zawitê tê bakin an kaihruai meuh lo a ang hle.

               (2) Amaherawhchu miziaah pawh rualbanlo te, chêkhawlo tak leh zuamawm bîk riau hi kan awm ṭhin a, chutiang chu ramhuaite tán pawh an zuamawm bîk a, an duh duh a thunun tumin an bei deuh bîk pawh a ang thei bawk. Chutiang mite chu an thunun theih phawt chuan Pathian leh mihring puite zahpahna boral ṭhak tûrin an hruai a, nidanga an tih duh hauh loh – rukru, hur leh uire, tisa châkna tinrenga inhmanga tâl bawraw turin an thunun tlat tawh a, ti lovin an awm hle hle thei tawh ṭhin lo. Ruihtheih thil tinréng hi loh theih lova an tih ṭhin a ni bawk a. Mi ṭhenkhat erawh chu ramhuai thiltihtheihna hmangin aienthiamna leh dawithiamna lamah an inhmang bawk ṭhin. An chhia leh ṭha hriatna a lo harchhuah chânte hian mahni nun ten ngawih ngawihin an khat a, rilru nguina leh nun beidawnna khurah a tla lût a, mahni intihlum duhna rilruin a luah tlat ṭhin a, mi tam tak chuan an puitlin fo rêng a ni.

               (3) Ramhuaiin an thuhnuaia an dah theih tawhte rêng rêng chu an awm ṭhattir hle hle tawh lo. an zar buai a, an duhzawng thilrual ti turin an tirlui tlat a, an tih duh loh chuan a chhûn azanin an nghaisa zui tawh ṭhin. An awmna inte chu thlahráng hlauhawm pui pui hian an tawmchilh reng tawh mai a ( chutiang chu kan lehkhabu hmasa ‘Boruak Lal’ tih buah chiang takin kan chhiar tawh a). Mi ṭhenkhat chuan hengte hi mitvai leh hmuhsual thil angtein sawi nêp ṭalh tum mahse ramhuai butute hian ataka awm an ni tih an hre chiang. An thil hmuhte hi a cháng chuan milian pui, hmul der dur angte, tereuhtê ang chite, rannung ang deuh-atak zawhte, a lu mihring angte hi an hmu ṭhin. Chutiang thil hmuh hrehawm leh ṭihbaiawm tak hmangte chuan ramhuaiho hian an sawisak theihte chu an zar buaiin an tihṭhaih ṭhin. A cháng chuan mihringte pawh an pawngsual hial ṭhin tih Martin Luthera ngei pawh khan a lo sawi tawh a, chiang zâwkin kan la chhiar dawn a, (Pathian ringtu mi ṭhate erawh chu ramhuai thlarau sualte hian an zar buai ve ngai lo, chutiang thil a awm pawhin ṭawngṭainaa hnawhkian daih theih a ni.)

               (4)  Ramhuaite hian taksaah hian natna chi hrang hrang – ṭawngtheilohnate (Mathaia 9:32, 33), mitdelnate (Mathaia 12:22) leh piansualna chi hrang hrang (Luka 12:11-17) te a thlen thei a. Chutianga damlote chu daktawrte leh psychiatrist-te pawhin enkawl mahse a sâwt thei lo, ramhuai hnathawh  anih vâng a ni. A enkawlna pawh thlarau damdawi, Pathian thua tihdam tûr a ni.

               A tlángpuiin ramhuaite hian Pathian dodâlna tinréng – luhlulna, chapona, rinhlehna leh helna te an thlen ṭhin. Thlarau Thianghlim hnathawh ngaihnêpna aṭangin sual tinrénga lût turin mite an hruai a, a tpawha chhiatna bawiah, Pathian hnuchhawn ram, thim thuneihna hnuaiah an hruai lût ṭhin. Ramhuaite tum ber chu nundân ṭha pangngaia nung thei lova, an mimana te hnêna lungngaihna te, manganna te, vanduaina te, tlâkchhamna te, rinhlehna te leh buaina chi tuhte hi a ni ber a, ramhuaiin an control tawhte chu thlamuangin an awm hle hle thei tawh ṭhin lo.

By P.C. Biaksiama

PAGE 3