BORUAK LAL – PAGE 11

67

RAMHUAITE LEH MIHRINGTE INPAWLNA

              Ramhuaite leh mihringte inkarah hian mipat hmeichhiatna (sex) hi a inhmantawn theih em? He zawhna hi hmasanga mite pawhin an lo zawt tawh ṭhin. Europe ramah chuan kum zabi 13-na aṭanga zabi zabi 18-na chhung khan khan ramhuaizâwl leh dawithiam an tam mai a. Kohhran thîkthu chhiat hun lai a lo ni bawk si a, dawithiam leh dawithiama an puh mi sâng tam tak chu hal hlum an ni. Heng dawithiamte hi hmeichhia an ni deuh ber a, heng dawithiamnu tam tak an dawp ṭhinte hi ramhuai nen inpawlna (sexual relationship) an lo nei ru reng ṭhin a ni tih an in puang tlat mai.

              Ramhuai chanchin ziakna lehkhabu hrang hrang ka dap khawm laiin BD/M. Th etc. zirna, Union Biblical Seminary Library, Pune aṭangin lehkhabu ropui tak, The Encyclopedia of Witchcraft and Demonology (1959), Rossel Hope Robbins-a ziak chu ka hmu fuh hlauh mai a. He lehkhabu hian khawvel hmun hrang hranga ramhuaite inlar dan chanchin hlui leh tharte chu chipchiar takin a tarlang hlawm a, hetiang chanchin ziakna bu kim ber a ni hial ang. Chu lehkhabu in ramhuaite leh mihringte inpawl dan a ziak chu tlemin kan tarlang ve dawn a ni.

     Succubus –

              Ramhuaiho zingah hian mihringte ngaizawng a, tisa châkna hman sualpui ṭhin chi hnih an awm a. Chikhat chu hmeichhia anga insiam, ramhuai nula ‘Succubus’ an tih hi an ni a. Mipa lakah itawm àwm takin, tisa châkna sawm chhuak tur zawngin an awm a, mipate chu an thlem vel a, an thlem thluk theih chuan an inpawl tir ṭhin. (A dang leh chu hmeichiate ngaizawng a, thlemthluk ching, ramhuai tlangval ‘Incubas’ an awm leh a. Succubus te ang bawkin incubus te hi an hur hle a, hmeichhe pawl tur hi an zawng reng, fate pawh neia sawi an ni hial mai).

              Ramhuai nula (succubus, sakubas tia lam tur) ngaizawng a, nupa ang maia khawsak dun pui chanchin hi khawvel hmun tinah hian an lo awm vek mai. Pa pakhat phei chuan kum 40 chhung ngawt ramhuai nula a lo mutpui tawh ṭhin a nih chu. Bansan mai ai chuan lungina tan hlum ṭhak mai pawh a thlang zawk tih Italian ziaktu Pico della Miranda in a ziak. Pa pakhat dang leh pawh a nupui leh a ṭhiante hmun lai ngeiin succubus in a nawr tlat si avangin a mutpui bawk.

              Sakhaw hruaitu leh tun  hma lama mi thianghlim kan tih tam takte pawh kha heng setana tirhchhiah ramhuaite hian an lo thlem fo ṭhin a, an mutna khumah te hian hmeichhe saruak ngalngat te hian an rawn mut hial ṭhin a ni. Chutianga sakhaw thu avanga mi inserh St. Victorius-a erawh chu a insum zo ta ngang lo nia record a ni. Mi inserh thianghlim pakhat pawh hmeichhe lema chang ramhuaiin a chen chilh tlut tlut mai a, thla khat chhungin a thih phah der mai tih Verona khaw Bishop Ermolaus-a (1453-1471) chuan a ziak. St. Hippolytus-a (AD 236 a thi) erawh chu hmeichhe kawrfuala a lo vawn veleh hmeichhia chu mitthi ruangah a chang nghal (Mi bumna tura mitthi ruang tihnun leh hi ramhuaite hian an ching khawp mai).

              Ramhuaite hi awmdan chi dang dang inlar thei an ni a. Chuvangin mipa fianriala awm ṭhenkhat hnenah chuan an bialnu emaw, an nupui emaw ang tein an inlar thei.

              Titia Mizo sipai pakhat chanchin an sawi fo ṭhin hi lo tarlang ila. tunge anih a, mi sawi ka hriat dan hi a dik ber em tih erawh chu ka hre lova, mahse a thawnthu tlangpui erawh chu hetiang hi a ni. Chu sipai chu a dam lova, a chau viau mai a. Chuti chung chuan a mutna pindanah chuan nula hmeṭha deuh mai pakhat hian a rawn rim zan tin mai a. a lokal tawh hi chuan a na te chu theihnghilhin a lo mutpui ṭhin a, chuvang chuan a chêr chhe tial tial mai a ni. Eng vanga chêr zel nge a nih lah chu a sawi duh der mai si lova. an hotupa mangang chuan, ‘Hei i thi tak tak dawn a lawm. I natna awmdan hi min hrilh tur i nei em? i neih chuan zep hauh lovin min han hrilh teh,’ tiin tihtak meuhin a zawt ru ta a. Ani pawh chuan zep reng chi nia a hriat tak loh avang in zan lama nula nena an awmdun dan chu a hrilh fai ta leng a.

              An hotupain thil awmdan a han hriat chian takah chuan tihdan tur ṭha a ngaihtuah ta a. Damlo hnenah chuan khawl lahlum khat a pe a. ‘Tihian nula a lokal a, i bula a rawn mut leh hunah puan hmawrah a rukin i lo hling dawn nia,’ a ti a. Chutiang tak chuan bangawng karah a lo inzam chhuak a, an chhui zel a, thlanmualah an chhui lut a, sephung kua an han lai chuan chu khawl la chu saruhroah hian a lo inhling reng mai a ni. Chu saruh an va hai chhuah chinah chuan nula lokal ṭhin kha a reh ta daih a, damlo pawh a lo ṭha chhuak ve ta a ni.

              MEDIEVAL hun chhung Gerbert-a chuan Provost of Rheims fanu a ngaizawng a. Anin a lo duh mang si lova, a beidawng ta hle mai a. Nikhat chu nula hmelṭha deuh mai, silk puan nem chunga ṭhu, pawisa tam takin a chheh hual vel hi a va hmu chhuak hlauh mai a. Chu nu chuan a hming chu Meridan-i a nih thu a lo hrilh a. Ani laka a rinawm phawt chuan an innei ang a, a neih sum leh pai leh dawithiamna te pawh pêk vek a tum a ni. Gerbert-a chuan i-he lovin a pawm hmiah mai a, tihtak nangnialin a lo hausa ta thur thur mai a. Kohhran lah a kaisang tial tial. Rheims khaw Archbishop (Bishop lian) a  lo ni a, chuta ṭangin Cardinal-ah, chumi zawhah Ravenna Archbishop ah, a tawpah phei chuan Pope a lo ni ta hial a.

              Hetih chhung zawng hian Meridian-i nen a rukin zantin an awmdun reng bawk si a. Chuti taka a lo kaisan tak avang chuan Provost fanu pawh khan a rawn ngaizawng let ve leh a, a zu ruih lai changin zan khat phei chu a rawn thlem thlu hial a ni. A tawpah zawng Gerbert-a pawh chuan a hun tawp a hnai tih hriain, a ruka a thiltih sualte chu mipui hmaah a puang chhuak a, rilrua inchhir tak chungin a thi ta a ni.

              Hnam dangte pawhin sawi tur an neih chuan keini Mizo zingah pawh sawi tur a tam ve awm e. Mizo chuan succubus te hi ‘Lasi nula’ kan ti a ni lawm ni? Kan pasaṭha te zingah pawh lasi zawl sawi tur an tam mai. Kan sawi seng lo zawk awm e. Tun thleng hian khawi khawi emaw ah te chuan an la inlar zauh zauh ni awm a ni. Hman lai deuh phei kha chuan pasalṭha ramvak, silai pu chunga kawrte kam vela an han per kai thauh thauh maite kha lasi nulate hian chilthli put duahin an lo thlir reng ṭhin a ni. Tutute emaw kha zawng an lo zawlthlu ve reng awm a nia! Ṭân tláng lalnu leh Chawngtinleri te kha khawi lai ramah hian la awm tak maw? Mizoram awp tura hmelma pa Setana tirhchhiahte chu ni hlauh lo phei se chuan an hming aṭang ringawt pawhin lung an tileng a lawm maw le.

                                Incubus (inkubas)

              Kohhran Pate (church fathers) ho ngaihdanin ramhuai mipa ‘incubus’ te hi angelho tisa châkna suala tlu tawhte an ni a, hmeichhe pawl hmang ramhuai hurho an ni. Ramhuai hmeichhia succubus te ai khan incubus te hi an tam zawk hle a. Hmeichhia an khawih buai pawh an tam zawk daih a ni.

              Engtinnge taksa pawh nei hlei lo thlarau sualten mihringte an rawn pawl theih? He zawhna hi Pathian thu zirtu (theologian) ten a ngaihna an hre lo hle ṭhin. Ramhuaite hi mihringte anga chi inthlah pung ve an nih loh avangin ziaktu tam ber chuan thlarau sualte hi, mihring hmuhah a changa mipa (incubus) anga chang a, a changa hmeichhia (succusbus) anga chang leh mai ṭhin niin an ngai.

              Incubus chanchin kan sawi mek hi zahmawh rawngkai lek lek anih theih hlawm avangin kristiante thlirna aṭanga awihawm leh awihawm lo chinte hi lo thlirfim nghal ila. Ramhuaite hi hmuhtheih loh thlarau an nih avangin kristian tam tak chuan mihringte an rawn pawl theih hi an ring lo reng reng. Mahse uluk zawka kan thlir chuan Kohhran Patcho khan an lo pawngpaw hnawl mai hauh lo. Tichuan mi thianghlim Augustine-a (354-430) chuan Genesis 6:4 in a sawi : “Pathian fapaten mihring fanute chu an pawl a, an lakah fate an nei” tih thu kha a lehkhabu ziak ‘De Civita Dei’ ah a hrilhfiahna a siam nghe nghe.

              Pope Innocent VIII leh Bonaventura te pawhin ramhuai leh mihring inpawl theihin an ngai ve bawk. Thomas Aquinas-a pawhin heng thlarau sualte hian mitthi ruangte hi tinungin, mihring hmuhah an inlartir ṭhin niin an ngai. Abikin mitthi thar deuh ruangte hmang ṭhin niin Boquet-a pawhin a ngai.

              Tun hnai lawka England rama Pathian thusawitu thlarau zawlnei Harry Edwards-a chuan Eden huana Evi khan rúl lakah fa paiin a puh a, chuta ṭang chuan Kaina kha lo piang niin pulpit mauh aṭangin a sawi hial mai. Adama fa dik tak chu Abela kha niin a ngai a (Heti zawnga chhut chuan Baptistu Johana pawh khan rawn nemnghet ve ta angte pawhin a chhuidawn theih ang chu, Pharisaite leh Saddukaite hnenah , ‘Rul thlah te u…’ a lo tih kha (Mt. 3:7). Amaherawh chu he ngaihdan hi nemngheh tum zawngin bible in a sawi hran lova, a ni ve thei ang e tih thu a ni mai a.

              Mak ang reng takin Tuipui Thi Lehkhabu (Dead Sea Scrolls) hlui tak laihchhuah zingah chuan, Isua hun lai, kum 2000 kal tawh a Juda sakhaw kulmût vuantu Essence-ho thuzuak hlui deuh maiah chuan thumak deuh mai an lo ziak tel ve a. Tah chuan Nova nu kha angelin a rawn rim ṭhin aṭanga Nova kha lo pai ta niin Nova pain a rinhlelh thu a chuang tlat mai! An hmelmaten tihhmingchhiat an tum vangte pawh a ni ang a, hman laia mi hmingthang dang – Alexander the Great-te, Martin Luther-te, Plato te, Kaisara Augustus te, Huns hnam kawlhsen pui pui angte pawh hi ramhuai thlah nia sawi an lo kai ve tlat bawk. Tu huatthu suhah titiah chuan Kawlniho thlahtu pawh hian tu fa ber nge a pai tih puh tur a hriat loh avangin Chungturni (kawlni) an puh sak ta a ni awm e.

              Kohhran siamṭhatu hmingthang ber anih avangin Martin Luthera hi tunge anih sawifiah a ngai hran lovang. Ani ngaihdan hi kan chhiar nual tawh a. A thuziak zinga thil mak tak chu Setana (Devil) hian nula tleirawlte hi a pawl ṭhin a, an lo rai a, chutiang aṭanga fa lo piangte chu rapthlak khawpa piang danglam, diabol fa, thlarau pawh nei lo an ni a ti. A sawi zel danin “Setana hian taksa nei mihring chu a siam thei ngei a, thlarau erawh chu a siam sak thei lova, amah Setana chu thlarau a ni mai,” a ti a ni. “Chutiang taka mite nghaisa a, mihringte laka sáwn thlâk thei khawpa thiltitheihna a nei mai hi a rapthlakin, ngaihtuah ringawt pawhin mi a tiṭim uaih uaih thei a ni,” tiin a sawi zui nghe nghe (Leon Cristiani, evidence of Satan in the modern world, 1974, p. 15)

Ramhuai ngaite inpuanna –

              Roman Catholic kohhran thikthuchhiat lai tak chuan kohhran dan ang zawm ṭha lote, kohhran zirtirna aṭanga kal péng deuh hleka an hriatte chu manin, an chungthu ngaihtuahtu páwl Inquisition hovin namen lovin an sawisa a, an thiltih sual an dawp chhuak a, inlamlet duh lote chu an tihlum zel a. Chutih hun lai (Middle Ages) lai chuan ramhuai betu leh ramhuai thiltihtheihna hmanga dawithiama an hriat tawh phawt chu tihhlum zel tur an ni mai a. Chung an mi mante zingah chuan ramhuai tlangval lo ngai zawngte pawh an tel nawk mai. A ruka an thiltih ṭhin an dâwp chhuah ṭhenkhat phei chu rura tak a ni.

              Hmeichhe naupang te tak tê pawh incubus te hian an lo ti bawrhbang fo mai a lo ni a. Hmeichhe naupang kum 9 mi lek pakhat pawh a nuhrawn avangin ramhuaiin a rawn ngaihzawn phah a, mahse a la naupang avangin vuaka hremna chu an duh tawk mai a. A nuhrawng erawh chu dawithiamte chanvo angin, halhlum a ni tih Johannes Henricus Pott-a, kum zabi 17-na laia miin a sawi. January 1628 khan Warzburg (Europe) ah hmeichhe naupang pathum – Anna (12), Lutz (11), leh Murchin (8) te chuan ramhuai tlangval an ngai ṭhin tih an inpuang. Anna-i leh Lutz-i te hi khaihlum an ni a. Murchin-i leh naupang pasarih dangte erawh chu an pate enkawl turin an pe kir leh a ni.

              Amaherawhchu ramhuai ngaitu tam berte chu dawithiamnu an ni. Dawithiam sang tam tak an tihlum ṭhin reng a. Rorelna court hmaa an inpuan danin an fate pawh ramhuai thlah an nih hlawm thu an sawi fo reng a. Chutiang inpawlna aṭanga nausen lo piangte chu rapthlak pui pui hlir an ni awm e. Nu pakhat chuan a tirah rulhlut sei zet a hring chhuak a, chumi hnuah no tung tiat lek meichhia a hring leh a, hnute pawh a hne ve. Mahse a fa paina, incubus ramhuai tlangval David-a chuan a rawn la bo ve ve tih a inpuang. a bialpa dang, Hansen-a lakah mipa leh hmeichhia a hrin sak ve a, chungte pawh chu Hansen-a chuan a rawn la bo ve ve in a sawi. Lungina a tan chhung pawhin a rawn kan zui zel a. Chuta a fa hrin leh pawh a rawn la bo leh tih a sawi bawk (He thu hi Johann Klein-a dissertation ami, 1698 kuma Rostock University-a a thehluh aṭanga Robbins-a lakchhuah a ni).

              1275 kum khan Toulouse khuaah Angela de Labarthe-i chuan nau a hring a, a lu chu chinghne lu a ni a, a tak chu rúl mei ang hi a ni. Chu nu chu ramhuai ngaih vanga an halhlum hmasak ber pawh a ni awm e. 1531 khan Augsburg khuaa nu pakhat pawhin rúl ke pahnih nei a hring a. A chanve mihring, a chanve dang ramsa inpawlh, nausen rapthlak tak tak hring chhuak nawlh nawlh hi khawvel hmun tam takah sawi tur an awm ve ṭhin reng a ni.

Ramhuaite taksa neia an insiam theih dan –

              Thlarau hmuhtheihloh, ramhuaiten engtinnge taksa nei ve ang maia mihringte an pawl mai theih tih zawhna kha lo chhang daw ila. Mithiante sawidan tlangpui chu hetiang hi a ni.

              Taksa neia an inlar dawn chuan ramhuaite hian mitthi ruang an hmang ṭhin, mipa leh hmeichhe ruang an hmang thei ve ve, a hman ṭul dan azirin. Heng hmanruate hmang hian taksa che thei a din a, chu taksa chuan mihringte a pawl ṭhin a ni (Sinistrari, 1701). Chutiang hmanrua engemaw fawmkhawm hmeichhia leh mipa zahmawh ang reng hi an siam chawp a (ṭhenkhat phei chu an vuah fuh lova, a letling he hu ṭhin awm a nia. Bs.). Tichuan mipa hnenah hmeichhe thil nei angin an insiam a, hmeichhe hnena an kal dawn chuan mipa anga insiam in, mipa  thil an vuah ṭhin (anmahniin sazu te hi nei ve hek lo!). Inpawl laia a vawrtawp thlen huna chi tla ang hian khawi khawi emaw aṭanga mipa chi an lak kha an tlingtlak pui ṭhin a ni tiin Guazzo-a chuan Compendium Maleficarum buah a ziak. Martin of Arles-a chuan mitthi ruang aṭangte hian chi (baw) an sawr chhuak ṭhin niin a ring a. Guazzo-a erawh chuan mipaten zan lama mangpui an man laia chi tla ṭhin hi ramhuaiten an ru chhuak ṭhin niin a ring thung.

              Kum zabi 13-na laia Kohhran theologian ropui ber Thomas Acquinas (1225-74) pawhin ramhuaite hian mihring angin chi an thlah ve thei lo tih pawmin, “Ramhuai ngaih avanga nau lo piang whin hi ramhuai chi tihchhuah aṭanga lo insiam an ni lova. Hetiang atana hman tura mipate hnen aṭanga an lak a ni, a chhan chu ramhuai pangngai kha a chángin mipaah a chang a, a chángin hmeichhiaa a chan leh ṭhin avang a ni,” (Summa Theologica) a ti a ni. Bonventura pawhin hetiang bawk hian “Ramhuaiten nula anga an insiam a, mipa an mutpui hian, mipa chi a lo dawn chu fing takin an khawl ṭha a. Pathian phalnain, mipa angin an chang leh a, hmeichhia an pawl laiin an thun lut ta ṭhin a ni,” tiin a lo tuihnih ve bawk.

              Hetianga  ramhuai ngaite hian nuam an ti tehreng emaw ni le? Ziaktu hmasate chuan dibola tirhkohte nena inpawl nawm bik zia an sawi uar hle a, amaherawhchu a nghawng nat bik vang nge ni, dawithiam tam tak chuan ni engemawzat lai an chauh phah hnawp ṭhin niin 1458 khan Nicholas Jacquier-a chuan a ziak. Catholic hotu pakhat Grillandus pawhin ama hnena a rawn inpuang (sual puang) hmeichhiate chuan nuam an tih zia an sawi tih a report. Ziaktu hnuhnung lamte sawi dan chu a dang hlauh thung. Chutia ramhuaiin a pawl lai chuan hlauhna namenlovin hmeichhiate hian an hlau ṭhin a, ramhuai hmanraw hman leh tuihnang tihchhuah te lah hi vur ang maia vawt khal tlat a nih thu an sawi thung a ni. Ramhuai ngaia an puh dawithiamnu te pawhin chutiang inpawl laia nawmna a awm zia leh na an tih theih zia an sawi zel. De Lancre-a sawi dan phei chuan hmeichhe pawlna tura ramhuai hmanraw hman hi kel-li aṭanga siam a ni ṭhin a, a chang chuan a zahve thir, a zahve tisa a ni thung a, chuvangin hmeichhe na tuar hi an au chhuak ṭhawt ṭhawt ṭhin a ni.

              Ramhuaiten mihringte hetianga hmeichhiat mipatna an rawn hman pui ṭhin hi châkna hrikthlak duh hrim hrim vang em ni? He zawhna hi chhangin kan sawi tak Pathian thu zirmi Thomas Aquinas-a chuan ramhuaiten Pathian an huatna tihlan nan (thinrim hrikthlak nan) mihringte an rawn tibawrhbang ṭhin niin a ngai. Bakah nawmchen duh vang a ni thei bawk ang. Tichuan nawmchen paha Pathian thilsiam duhawm rawn tihbawlhhlawh chu ramhuaiho tum tak pawh ni awmin a ngaih theih awm e. William of Auvergne-a ṭawngkam hi a chhinchhiah tlâk hle, “Hmeichhiate laka châkna hrîk thlâk mai hi an tum a ni love, chutiang châkna nise anmahni (ramhuai) ho zingah pawh an inhmang tawn ṭha thei zâwk tûr,” a ti a ni.

Zanvak tenawm –

              Zanvak hi kan naupan tet lai chuan kan sawi hráng thei hle ṭhin. Zanvak chu mipa puitling tawh (tlangval emaw pa emaw) zan reh mi muthilh hlana mi ina lût a, hmeichhe mu lai ‘zen’ (ngaih) tuma veh ṭhinte sawina a ni. Hetiang chîn dan thianghlim lo tak hi tunlai Mizo zîngah chuan a vang deuh tawh awm e (?). Zan vak ṭhenkhat chin dan bawlhhhlawh ber zawk erawh chu thimtham zinga mi nupui va pawl ruksak hi a ni. An pasal leng kha an lo va hmakhalh a, an pasalte tihdan angin an va ti a, a pasal emaw tiin a lo remti ve mai si a. Tiang chuan inbumna tenawm ber ‘lawithlêm’ an tih hi a lo awm ṭhin a ni. Mi muhil lai an va tih chuan ‘thlim’ an ti. Chutiang tih chingte chu man an nih vaih chuan a mualpho thei ang bera hrem an ni ṭhin.

              Setana pawh hian hetiang chindan tenawm tak hmang hian hmeichhe tam tak chu a lo titlawm tawh ṭhin a ni. Nu tam takte hnenah an pasalte ang chiahin an inlantir a, nula hnenah an bialpa te angin.

              Sakhaw rawngbawl tura hmeichhe inserh hrang (nun/sister) ho te hian hetiang beihna hi an tawk duh hle. 1467 kum daih tawh khan alphonus de Spina chuan heng rawngbawltu hmeichhiate muthilh hlana ramhuaiin an lo chenchilh a, mipa laka che bawlhhlawh ta ang maia a tuk zing an thawh ṭhin tur zia a lo sawi tawh a. Rossell Hope Robbins-a lehkhabu ziak The Encyclopedia of Witchcraft and Demonology bua a tarlan, hmanlai thawnthu dang chu hei a ni.

              Hmeichhe inserh thianghlim (nun) pakhat chu zanriah eikham hnu hi chuan a pindan ah a inkalkhung tlat ṭhin a. Bang lehlam luahtu hmeichhe pakhat chuan enge a tih hriat chakin a ngaithla ru a. Thawm dîm takia mi pahnih inbe ru sar sar hi a hre ta a. Chumi zawhah chuan khum nghing der der a, innawt ri ret ret leh nuam tih vanga chîk ngher ngher thawm hi a hre zui a. Pindanah chuan midang an awm em tia an endik ṭhin lahin tumah a hmu ngai si lova. Mahse chu hmeichhia chuan engemaw hmuh chhuah tur awm tlatin a hria a, an inkar bang chu a rek pawp ta a. A han bih chian nak chuan le tlangval hmelṭha deuh mai hian a thawhpui nu chu a lo mutpui reng mai a lo ni a, midangte pawhin chilthli far duahin an rawn bihthla ve hlawm. Vauna nena chu hmeichhia an han dawp takah zawng, hun rei tak chhung ramhuai tlangval nen nupa ang maiin an lo khawsa ṭhin tih a inpuang ta a ni.

              Kum 1230 A.D. vel khan bonn khawpuia puithiam pakhat chuan fanu hmelṭha deuh mai a nei a. Mipa laka venhim tlat tumna lamah, a awm loh san dawn hi chuan pindan chungnung lamah a khung tlat ṭhin a. Mipa anga insiam chawp thei ramhuai tan chuan chu tluka chetna remchang a awm lovang. Tihtak nangialin a birh ta tlut tlut mai a. Mahse kha nula khan a awmdan diklo chu simin a pa hnenah a inpuang ta vek a, ani chuan Rhine luikam lehlamah a thawn bo ta daih a. Ramhuai chu a pa hnenah a rawn inlar a. ‘Puithiam tlaktlai lo pa, engahnge ka nupui mi thawn bo sak ni? Nangman i tuar ang,’ a ti a. Puithiam awmah chuan a vaw vak vak a, ni thum hnuah a thi ta a ni.

Ringtu piangtharte hi ramhuaiten an pawl ve thei em?

              Hei hi zawhna pawimawh tak, Kristiante chhan ngei tur a ni. Bung hmasa lam leh a hnu lama kan hmuh angin a hming maia inti Kristian nazawng hi chu ramhuaiten an pawisa lo niin a lang. Mahse Krista ringtu, mi piangthar leh ṭawngṭaina hmang ṭhin mite erawh chu, rinnaa an awm reng chuan Isuan a humhim tlat ang tih a rinawm. Chutiang mite chu ramhuai tan nêl chi ni hek lo.

              Isua Krista vuan tlattu an nih loh chuan Pathian tana inserh hrang, ‘Nun’ te ngat pawh thlem thluka an awm theih zia kan hre ta a. Krista ring nghettute laka engmah tih theih an neih loh zia chu St. Margaret of Corton-a chanchin aṭang hian a hriat theih. ani chu ama pindan chhungah ṭap chunga a lo ṭawngṭai laiin, ramhuai chuan a beng bulah hla duk dak lo leh bawlhhlawh tak tak a rawn sa a, Pathian hnena ṭawngṭai ai chuan love song hla lunglenthlak tak taka in awih lunglen puiah a rawn sawm a, mahse a ni chuan chutiang chu bengtlalo mai mai chu ngaithla duh lovin, ṭap chungin a ṭawngṭai zel a, thlemtu chu an hnawt bo thei ta a ni.

              Kohhran pawhin ramhuai ngai hmeichhiate hi chi thumin a thliar hrang ta hial a. (1) duh reng reng vanga lo ngai te, dawithiamnu angte hi. (2) ramhuai mutpui tura dawithiamten an duh lo chunga an tirh luih te leh (3) duh lo chunga pawngsual te. Hetiang hian sualna nasat hleih dan azirin hremna pawh a in nasat hleih ṭhin a ni.

Tlipna

              Heng ramhuai khawsak dan tenawm tak tak kan tarlan takte hi Europe rama mi an ni deuh ber a, ziaka thil chhinchhiah nachang hria nise khawvel ram dangah pawh sawi tur a tam thei fu awm e. Ram dangah pawh a thlen theih chuan Mizo zingah pawh athleng ve ngei ang tih chu phat rual a ni awm love. Ziak leh chhiar thiamna lama kan san ve viau tawh hnuah pawh uluk taka thuziaka, chhinchhiah nachang kan hre ve vak lova, titi-ah te hi chuan thawnthu mak pui pui sawi tur kan neih ṭeuh hi maw le. Lasi nula ngaizawngte hi kan awm zut tawh maw? Lehkhabu meuha chhuah hi sawi a va khat bik ve? Rairahtea thawnthua Rengtea farnu ramhuai tlangval ngaizawngtu chanchin bak kha sawi tur kan hria em? Nge, a, a mualpho thlak mai mai e, tiin kan inthup sak dawn? https://ekhai.com

By – Dr. P.C. Biaksiama


 Mizote leh Ramhuai
LAST PAGE >>