BORUAK LAL – PAGE 10

84

BORUAK LAL – PAGE 10

4. Kristian rama ramhuai paite awmdan : Germany –

              Kristian ramah te ngei pawh hian nundan herh tak taka nung, ringlotute ai maha bawlhhlawha khawsa hi kan tam mai a, ramhuai man pawh sawi tur an awm chamchi mai. Germany rama ṭawngṭai damthei, rawngbawltu hmingthang leh Wurtemberg pastor Rev John Christopher Blumhardt (1805-1880) in ramhuai pai a hnawhchhuah dan, ‘Biography of rev. John Christopher Blumhardt‘ tia 1880 kuma a bua an chhuah aṭang hian a tlangpui kan tarlang dawn a ni.

              Ramhuai pai nula chu gottliebin Dittus-i a ni. Chaw ei dawn ṭawngṭaina ‘Lo cheng ve la kan run chhungah Lal Isu’ tih hla an sawi lai mekin thli thaw-ri ang mai hi an hria a, ani chu nikhaw hre lovin chhuatah chuan a tlu ta ṭhuai mai a. Rev Blum-a hnena a sawi leh danin, nu pakhat, a bana nausen thi tawh hnu pawm lai hi a lo hmu a ( chu nu chu kum hnih liam taa thi tawh hi a ni a) “Chawlhna ka zawng a ni. Lehkha them min pe u la, ka rawn inlar tawh lovang,” a lo ti a. Blum-a chuan chu thlarau inlar lo be tawh lo tur leh a thil ngen pawh tihsak tawh lo turin a hrilh a.

             Gottliebin-i te inah chuan mak tak taka thlarau a inlar chhunzawm tak zel avang chuan a hráng ta viau mai a. Chu khuaa mi pawimawh deuh deuhte chu intiam ruala enfianna committee member chu a ni ve a. In chu kil tin aṭangin an hual a, thawk leh khatah a lo ri phut a, ṭawngṭai pawl an awm a, ri chu a ring tial tial a. Chhuat laia chair inhungte chu anmahni hmun aṭangin boruakah an lo kang chho ur ur mai a. Tukverh darthlalangte chu a ri der der a, inchung ceiling charna nawite chu khawihtu awm si lo hian an rawn tla ri er er bawk a.

              A tawpah chuan Bluma chuan Gottliebini hnenah chuan, ‘Lal Isu min pui rawh’ ti rawh le, a han ti a. Chutia a tih veleh chuan a taksa lo insawi bawk bawk chu a lo reh nghal a. Vawikhat erawh chu Isua hming a han lam rik veleh a lo khur a, ama aw rawl ni miah lo, kha hmeithai boral ta aw ngeia a lo ngaithlatuten an hriat chuan Gottliebini ka hmangin, ‘ chu hming chu ka tuar zo lo, ‘ a rawn ti chhuak a( Isua hming lam rik ringawt pawh hian ramhuai thlarau chu hremhmun meia kan ang zawk zawk min an inhre ṭhin reng a)

Blumhardt-a chuan chu thlarau chu tiang hian a bia a,

Blum-a : Thlanah chawlhna i hmu na nge?

Thlarau: hmu lo

Blum-a: Engvangin maw?

Thlarau: Ka thil tihsualte avangin.

Blum-a : I thih dawn khan ka hnenah khan i inpuang zo na nge?

Thlarau: Puang zo lo. Naupang pahnih ka that a, a rukin ka phum bo.

Blum-a : Isua hnenah i ṭawngṭai thei lo em ni?

Thlarau: Thei tawh lo. Chu hming chu ka tuar (ter) thei thlawt lo.

 Blum-a : Nangmah chauh em ni?

Thlarau : Ni lo.

Blum-a : Tunge i bula awm ve?

Thlarau: Thil ṭha lo ber.

              Chu inhrang Bluma’n a tlawh apiang chuan fimkhur thilah mi pawimawh leh chinchang hre deuh tur khaw hotu (Mayor) te, daktawr te, police te leh midangte a hruai ziah ṭhin. Ṭum khat an tlawhin kuttum hmuh theih si loh hian Mayor chu a rawn kuk fawk mai a. Bluma erawh chuan vauna tawk ve mahse an tawk ve ngai lo.

              Ṭum khat chu nidang aiin ṭawngṭaina an hmang rei a, ramhuai chuan hetiang hian thu a rawn sawi chhuak a, “Engkim kan chan zo vek tawh. Tawpintai awm lova in ṭawngṭai reng mai hian min hnawt darh zo ta vek a nih hi. 1,067 lai kan ni a. Tuna mi nungdang lai mi engemaw zat hi in rawn zilh ṭhat hle loh zawngin keini ang bawka Pathian anchhedawng a, kumkhua boral tur an ni,” tiin. An chan a chauhna chhan ber chu Blum-a vang niin an mawhchhiat ber a, anchhia pawh an lawh mawlh mawlh a. An dinhmun lungngaihthlak tak avang chuan an rum vawng vawng hlawm a. ‘Aw, Pathian a lo awm kher kher tak hi chu aw!’ tiin an chek tlawk tlawk mai a ni.

              Blumhardt-a biak mek ramhuaiho zinga pakhat chuan dawta chhecham mi (perjuror) anih thu a inpuang a. “Aw mihring teu, chatuan hun hi ngaihtuah teh u. Zahngaihna hun hi khawhral mai mai teh suh u, rorelna ni a hnai tawh teh a nia,’ tiin a au a au mai a ni. ( Ramhuaite chuan chhandamna hi an tan a inhawng ve lo tih te, sual sim pawhin awmzia a nei ve lova, an chan tur chatuan meidil a ni tih an hre chiang a. Meidila a paih luh an nih hun tur chu an engto em em mai a ni). Hetia ramhuai rawn ṭawng chuakte hian European ṭawng engpawh an hmang thiam a, an ṭawng hman ṭhenkhat erawh chu blum-a leh midang awm ve te pawhin anhriat ngai lohte an ni.

              Blum-a chuan chawngheia a ṭawngṭai tlut tlut reng avang chuan December 2 aṭang 28 , 1843 inkar khan Gootliebini chu an chhuahsan ta a ( hetianga ramhuai huaisar hnawtchhuak tur hian ni engemawzat chawngheia ṭawngṭai a, tih tak zeta Pathian hnena dil a ngai zel ṭhin a ni. Chawngheia ṭawngṭai peih lo tan chuan ramhuai hnawhchhuah chu a hnai lo viau mai!bs) Gootliebini an chhuahsan fel chauh a, a laizawnnu leh a nuṭa pa kawchhungah an han insawn leh mauh mai a. a laisawnnau Catherine-i chu patling engemawzat pawhin an chelh bet zo mang ṭhin lo. Zan khat chu darkar engemaw zat aṭawngṭai hnuah blumhardt-a chuan ramhuai chu chhuak turin thu a pe a. Chu veleh mi za tam tak hriat phak tur khawp a ringin a au chhuak ta vak vak mai a, chu ramhuai chuan Setana palai a nih zia a inpuang. Zankhuaa inbeihnain a zui a, a tawp ah zawng “Isua chu hnehtu a ni,” tia au chungin a chhuahsan ta a, a rawn let leh tawh ngai lo.

              Gootliebini-i pawhin ngai a awh leh ta. Daktawrho pawhin a kut  leh ke (fuke) piang sual tawh te leh, natna dang an tihdam theih tawh loh te kha vawi khatah an lodam ta duak mai niin an sawi.

  1. Swiss nu pakhat ramhuai man nena inbeihna rura –

              (He thu hi Dr. Kurt Koch-a German mi ramhuai hnathawh chungchanga thil hre chiang ber pawla ngaih leh khawvel hmun hrang hranga kum 30 lai rawngbawlna a lo inhman tawhin a lehkhabu ziak pakhat “Between Christ and Satan” tih aṭang lakchhuah a ni a. He thlarau lama indona rura tak aṭang hian Mizorama ramhuai paite enkawl dan tur pawh min kawhhmuh theih hial dawn avangin chipchiah deuhin kan tarlang a ni. A ziak chhiar thei tan he lehkhabu pawh hi chhiar ngei chi a ni. bs)

              SWITZERLAND rama ka ṭhian pakhatin counselling naa a thil tawh zinga khirhkhan ber min hrilh a. Counselling a neihpui nu chu kum rei tak rilru mangannate, rinhlelhnate, Pathian rin harsa tihna te in a lo tlakbuak tawh ṭhin a. Dik takin Pathian thu lampang reng reng hi chu a pawngpaw huat hlur mai a ni. Bible thu emaw, a lem ringawt pawh nise kohhran hawi lampang thil hi chu a tithei thlawt lo a ni ber mai. Psychologist ho chuan mi hetiang hi an naupan laiin sakhaw thil an zirtir hnem lutuk vang a ni an tih loh leh, kristian sakhaw huatna a lo zirtir ṭhin vang a ni an ti ngei ang. Mahse a ni si lo. A nu mizia han enin sakhaw thil han zirtir thei tur mi hi a ni lo reng reng a. Chuvangin a fanu pawh hian Pathian thu lam a haw viau a, lehlamah erawh chuan Krista hnen han pan chakna a nei tlat lawi si. Hei vang hian rilru daktawr (psychologist) te chuan mize indo (split personality) an tih ang chi hi a ni. A awmdan chik taka chhut erawh chuan split personality mai ni lovin, a kawchhungah hian mize hrang nei thil dang a tel ve a ni, ramhuai pai mizia a pu tlat. A naupan lai pawhin a pindan chhungah chuan thlahrang leh zawhphungte hi a hmu fova. Hlau va a ṭah rik vaih chuan heng phung hian an sawp nek ṭhin a ni.

              Counsellorten dilchhut taka an han zawh takah chuan chu nu chuan aien a lo ching ṭhin tih a inpuang a. A nu pawhin card khelh a hrat hle. A fanu la pian hma aṭang rengin ramhuai hnenah hlanin, intiam nan a lo hman daih tawh lo niin. A natna chu rilru daktawrte pawhin an lo enkawl fe tawh a, engmah a ang chuang lo. ‘I rilru chu a pangngai a lawm, mahse buaina deuh i nei a ni,’ an ti leh mai ṭhin a. Kristian Pawl engemaw pawhin a lu chunga kut nghatin an lo ṭawngṭaisak ve ṭhin a, mahse a zual sauh zawk avangin sakhaw lam a huatna a tizual sauh a.

              Ka ṭhianpain Kristian counselling a han ṭan takah chuan dawithiamna (magic) lampangte pawh a lo ching ṭhin ngei a ni tih a inpuang zel a. A rilru buaina Bible hmanga sutkian dan a han hrilh veleh chuana lo khur a, anchhia a lawh ta nghek mai a, chumi laka chhanchhuah chu a mamawh hle bawk si. Ṭawngṭaina han hman sak veleha a taksa insawi kual vel dan aṭang chuan ramhuai hnathawh ngei a ni tih a chiang leh zel a, Isua hminga thu an pek apianga damlo rak bual bual a lo reh leh ṭhinna aṭang pawh chuan ramhuai pai a ni tih hai rual a ni ta lo. Nikhat phei chu an ṭawngṭaisakna aṭangin Krista tlanna avanga ama sualte ngaihdan a ni ve tih pawh a lo ring thei ta hial a.

              Chutia ṭha taka hma a sawn zel emaw an tih lai chuan indona ruamah an lut thuk dawn chauh a ni mai. Chu indona inṭanna chu chemte hmanga inbeihna a ni. A hma ni kha chuan counsellor pangngai ang maia lawm taka a awm lai chuan ram huai hnathawh a lo lang ta thut mai a. Chemte a la lawk a, a u pasal (counsellor) chu a bei ta mai a. Isua hminga thu a pek zawh a, a lo reh hnuah chuan thupha a chawi zui ve leh mai a.

              A ute ina ni 8 a cham hnua, an ina a va haw leh hnu chuan inbeihna ṭum hnihna a inṭan leh ta reng mai. A chhungte hnen a va thlen apiang hian dinhmun a zual zawk zel mai. Dik takin he nula selenna chhungkua an lo ni reng mai tih ka ṭhianpa chuan a hre chhuak ta a. Dawithiamna chi tinreng mai hi chin loh a hleih pawh an lo nei lova. Vawi khat pawh Zurich khuaa Billy Grahama pawh an lo nei lova. Vawi khat pawh Zurich khuaa Billy Grahama thusawi ngaithla turin an inkhawm pui a, a thusawi chhung chuan a lo khur tluan chhuak zak a. A u pasal chuan a ṭawngṭaisak reng a. Mahse in a thlen hnu reiloteah a ngai bawkin a lo ṭha lo leh a. Intihhlum te a tum a. Damdawiinah mi â dahkhawmna hmunah te an khung ve ta hial a. Mahse muthilhna damdawi (sedatives) chak ber ber an pek pawhin a muhil thei chuang lo. Chutih chhungin khawl hmangin an lo ‘shock’ mawlh mawlh reng bawk a, a ṭha thei chuang lo. Dik takin hetiang ramhuai hnthawhte hi chu rilru daktawr (psychiatrist) te enkawl chi hi a ni lo hrim hrim. Damdawi mum leh injection tih ang vela ṭha chhuak thei chi an ni lo. Thlarau lam natna anih avangin Kristian counsellor chinchang hre takte enkawl chi chauh a ni.

              Damlo kawchhunga ramhuai rawn chet chhuah lehna, inbeihna vawi thumna inṭan leh dan chu – damlo ngawi ṭha hle hle lai kha a lo thawk chhuak leh ta phut a, ‘Ka intihlum dawn a nia,’ tiin thinrim takin a au va, a tlan kual ruai ruai a. A u pasal chuan a lo man bet a. Chuti chung chuan thinrim takin, ‘Zan inah hian thil rapthlak a thleng dawn. Kei ka thih loh pawhin he evangelist hi chu a thi ngei ngei ang,’ a ti a. a u pasal chuan, ‘Tumah an thi dawn lo. Isuan hnehna a chang a lawm,’ tiin a ṭawngṭai pui a. A tawpah zawng ṭawngṭaina chu a rawn hmang chhunzawm ve leh thei ta a. Pindan aṭang chuan ngawi rengin a kal chhuak a, chumi zan chuan a muhil ta chiah chiah a.

              Indo ṭum 4-na zia chu a dang hle. A tuk chawlhni chuan damlo chuan inkhawmna pawh a hmang kim thei vek a. Evangelist nena inkawmnaah phei chuan dawithiamna te, aienthiamna te, ramhuai thlarau (mitthi thlarau anga lemchangte) biaknaah te leh thil bawlhhlawh chi dang danga a lo inhman ṭhin thu chu a puang a. A nu ngei pawhin dawi a lo ching ṭhin tihte a hre zui zel a. Counselling an neih zawhah chuan ama tan leh a nu thil lo tihsual tawhte laka chhanchhuah an nih theih nan a ṭawngṭaisak a. Chu veleh damlo chu thinurin a zuang tho leh thut a, counsellor chu a sual ta awrh awrh mai a. Chutih lai chuan a ka aṭangin aw danglam deuh mai hi a rawn ṭawng chhuak a. ‘Hei hi ka fanu a ni a. A thi tur a ni. Ramhuai ta a ni tawh. A naupan lai aṭangin ramhuai hnenah thisena ka hlan tawh asin,’ a rawn ti ta mai a. Counsellor chuan thil awmdan chu a man chhuak vat a. ‘E khai, a thi dawn lo reng reng. Nang, a nu thlarauvin engmah thuneihna i nei tawh lo. Isua thisenin a tlan chhuak tawh,’ tiin a lo chhang let ve vat a. Chutah aw mak tak chuan, ‘Ka fanu ka chan loh chuan ka at phah vek ang. Ka chhe vek a ni mai.’ a rawn ti leh a. Hetia an inbeih lai hian damlo-nu nu kha a la dam ve reng a ni. Chutianga inbiakna danglam an neih zawhah chuan damlo nula chu a chau hnep a, ngawi reng chuan a ṭawngṭai ve leh thei ta a.

              Mahse a ṭum ngana tur inbeihna a la bak tlat mai. A tuk thusawi inkhawmnaah chuan evangelist chuan thu ngaithlatute chu Krista pawm turin a ngenna a siam a. Damlo nu-i pawh chuan a rilruin Krista zuitu nih ve duhna a lo nei ve thei ta a. Ni hnih khat chu hlim takin a awm a, mahse a nithum tukah erawh chuan a tukṭhuan ei lai chu a tawp chawt a, a khur a, a hmelte chu rapthlak khawpin a insiam chhe vak vak a. A hlau mangang chuan a u pasal chu a au chel chul mai a. Ani chuan a rawn ṭawngṭaisak a. Tunah zet chuan ṭawngṭai chhung ngei pawhin a ngawi hle hle thei ta lo. A kawchhung-ah chuan engemaw thiltithei tak, amah daltu awmin a hre tlat a. ama thlate pawh chu chiang lo ruai hi chuan a hmu ṭhinin a inhre nghe nghe.

              A u pasal chuan chu thlarau bawlhhlawh chu a kawchhung aṭanga chhuak turin thu a pe a. Chu veleh awrawl chi dang, tun hmaa an la hriat ngai loh a rawn ṭawng chhuak ve ta thung a. “Ka chhuahsan lovang. Kum rei tak ka lo cheng tawh a, ka chhuak mai mai lovang,” a rawn ti a. Chu aw chu tu aw nge ni? tia counselorin a han zawh chuan, “Gypsy pitar ka ni,” a rawn ti a. Chutih lai chuan damlo chuan chhangthawp zaina chemte chuan a u chu vih tumin a tin leh uaih uaih mai a. An man bet a, a ṭap chhuak ta a ni. Inbeih vawi ngana a zo ta.

              Inbeih vawi rukna, a hnuhnung ber chuan a vawrtawp a thleng ta. A tuk lehah chuan gypsy ka ni titu aw kha damlo ká bawk hmangin a rawn ṭawngchhuak leh a, inchhunga mite chu a rawn nuihzat vel ta thung a. “In hlau hle maw. In khur dawr dawr mai alaw,” te a rawn ti vel a, ngeiawm em em hian a nuihsawh kual vel a. Counsellor chuan, ‘Ka hlau chhete love,’ tiin a chhang a. Chu aw bawk chuan diriam hmel fahran hian, “Engmah inti thei nawi nawi love. Kan tam em! A tawp rât thlengin kan ṭang tlat dawn. Mi â dahkhawmna daktawr (psychiatrist) te lahin a tinatu an hre chhuak thei bawk si lo” a rawn ti leh a.

              Counsellor nupui lo ṭhu ve reng chuan a tuar ta lova, ‘In tam hle chuan vawk kawchhungah lut ve ula a ni mai,’ a lo ti bak hlak mai a, “Chutiang kan duh lo, mihring ah chauh kan awm ang,” a rawn ti let a. Counsellor chuan, ‘In lut thei lovang. Krista ta kan nih hi,’ a ti a. Ramhuai chuan, ‘Chuti chu in fate hnenah kan lut tal ang. In fapa pawh kan tihnat tawh nghe nghe kha,” a rawn ti leh a ( Hetih lai hian an fapa Theo-a chu a dam lova)

Counsellor : Kan fate hnena in luh phal a ni lo. Anni pawh Isua ta vek an ni.

Ramhuai : Chuti biakinah kan lut ang a, kan tichhia ang. Vengtu nei lo thlaraute chu kan hre chiang em.

Counsellor : Chu pawh in ti thei chuang lovang. Kristian a kohhran chu a veng tlat.

Chu veleh damlo chu tlanbo tumin a tho thut a. Counsellor nen chuan an inchaih leh laih laih a. A kawchhunga ramhuai chhuak turin thu a pe leh a. Chutih lai tak chuan damlo kawchhungah chuan mi tam tak rum thawm a lo ri a.

Ramhuai : Ṭawngṭai hi in titawp thei hram lo maw?

Counsellor : Thei lo. In vaia in lo chhuah vek hma chu kan titawp dawn lo.

Ramhuai : Thlarau pakhat chhanchhuak turin engatinge heti taka in beih?

Counsellor : Chhandamtu tan thlarau pakhat chauh pawh hi khawvel pum aiin a hlu zawk.

Ramhuai : He nu hi duh leh inah haw tir ula, ringtu ṭha takah pawh awm ang hmiang, thlarau dang chu kan chan mai ang e. He nu kawchhung aṭang kher hi chuan kan lo chuhak lovang. In ṭawngṭaina erawh hi chu titawp rawh u. In lamah lah midang an lo ṭawngṭai reng bawk si. (counsellor hian an inah faten ṭawngṭai rualna an lo nei tih reng a hre lo va. Chu ramhuai chu tihian a chhang a)

Counsellor : ‘Nia. Chhandamtu pawhin nangni tan a dilsak a che u’ a’n ti zauh va.

Ramhuai : (thinrim leh vin takin) “Min dilsak love, min dil sak love (Chutih rual chuan damlo chuan banga Isua lem intar chu a chhiat khum vak a).

Counsellor : Ni reng e. Nangni thlarau sualho tan a dil sak lo reng a ni. Mihringte chauh a dil sak a lawm.

Ramhuai : In ṭawngṭai reng mai hi kan tuar zo ta ngang lo.

              Hetianga an inbeih hun chhung hi darkar thum lai a ni (a vawi rukna hi). Heng thim thiltihtheihna te bei tur hian counsellor te nupa leh an fate, mi sawm laiin pindan dang aṭangin ṭawngṭaiin ṭan an lo la ve ngat ngat a. Chutiang khawpa rei an beih hnu chuan counsellor chuan thlarau bawlhhlawh te chhuak bo turin thu a han pe leh a. Chutah zawng damlo chu a ngai ta hmiah a. A rawn ṭap chhuak a, a ṭawngṭai ta thung a. Tichuan chhanchhuah a ni ta. Ni khat dang erawh chu a taksain na a tuar leh vak a, mahse a reh zui ve leh ta a. Rawngbawltu ho inkhawmnaah chuan Krista hmingin testimony a sawi ve ta a. Zalen leh engthawl takin, thlamuang takin Lalpa Zanriah Sacrament a kil ve thei ta a ni. Tun hma zawng kha chuan sacrament a kil dawn veleh hian thim lalpa hian a hrawk a rawn hnawh dawn tlata hriatna a nei ṭhin a, tunah erawh chuan chutiang tibuaitu lakah chuan chhanchhuah a ni ta. He nu khawngaihthlak leh hun rei tak ramhuaiin a lo phuar tawh chu Kristan a hneh sak ta. Hei vang hian Pathian Fapa lo lan chhan ber chu Dibola leh a hnathawhte tihboral a ni.

                                                              – Otto Vogt.

By Dr. P.C. Biaksiama

Chhun zawmna, ‘Ramhuaite leh mihringte inpawlna’ (Sexual relation with Devils) –  

PAGE 11 >>