BORUAk LAL – LAST PAGE

111

MIZOTE LEH RAMHUAI

             Tunah chuan Mizoten ramhuai kan buaipui dan chungchang kan thlir ve thung tawh ang. Hnam dangte pawhin chuti taka an lo buaipui ve ṭhin anih chuan keini tribal hnam ramngaw hnuaia khawsa ṭhinte zingah phei chuan buaipui loh ziazang a ni lovang. Dik takin kan pipute hunlai chauh khan ramhuaite hi an buaipui lova, tun thleng hian khawi lai laiah emaw hian sawi tur a la awm ve reng a ni. Kan chhui hlat zel phei chuan hmakhawsang. Kan hriat phak hma daih tawh aṭang khan kan thlahtu hmasate an lo chenchilh tawh a, an nitin khawsak dan leh hnam ziaah a lo kai nghet tawh a. Heng avangte hian Mizo nunphung leh zia (culture) zir tur chuan ramhuai hnathawh an ngaihdan chungchang hi ngaihthah theih a ni lovang.

             Trolical ramngaw chhah takin a hual vel kara Mizo hnam hi lo ding chhuak kan nih avang hian, kan ngaihtuahna reng reng pawh hi ramngawin min hual vel a (thliarkar chengte hi an rilru suangtuahna chenin tuiin a hual vel ṭhin ang deuh hian) Chuvangin Mizote khawsakna apianga zui a, hmuh theih loh lama awm ṭhin thlaraute kha ramhuai tih an ni a, ramhuai tihna awmzia pawh ramhuai thlarau (jungle spirit) tih a ni awm e. Chung ramhnuaia awmte chet tlatna hmun chu a zau si, an awm lohna tura ngaih khawlai fai hmun zimte leh inchhung zimteah te lah chuan hmuhtheih loh, thlarau chi dang-hrang chi hrang hrang-phung te, huai-te leh khawhringte an lo lut thei thova, chungte chu mihringte aia thil tithei leh mi tina thei vek an ni si. Anni te chu mihringte aia tlanchhiatna tur emaw, chhantu tur emaw an neih si loh avangin tlawn lungawi a, an duhzawng anga khawsak a ngai ṭhin a. Chuta ṭang chuan Mizo mize chi khat a lo piangchuak ta a ni.

             Amaherawhchu he lehkhabuah hian hnam culture chungchang kan sawi hran hman dawn lova, ramhuaite leh kan pipute lo inlaichin chhoh dan chungchang kan thlur zawk dawn a ni.

Thlarau ṭha leh ṭha lo –

             Khawvel hnam tinte hian thlarau ṭha a awm an rin laiin, thlarau ṭha lo leh sual chi hi awmin an lo ring vek a. Mizo pipute pawhin hrilhtu awm ang maiin an lo hre ve ngei a. Engkim chunga roreltu Pathian awm hi chu an ring. Chutiang bawkin Khuavang hi thlarau ṭha leh pawi lo, ṭanpuitu ni zawk anga ngaih a ni. Mahse an hriat dan a chian tawk loh vang a ni ang, an nitin khawsak thila rawn inrawlh ve zel tur angin an ngai lo a ni awm e. A awmna vansang hmun a ni si a, chuvangin a ngaisang duh turte tan pawh han biak ṭulna chhan teh vak a awmlo a ni ang, lehlamah an biak loh ngam loh thlarau sualin an khat tlat bawk si.

             Thlarau ṭhalo ‘ramhuai’ ve thungte erawh chu hmun tin luah thei khawpa tam an ni. A hma lama kan tarlan tawh angin ramhuaite pawh chi hrang hrang, mize hrang hrang leh thawh dan hrang hrang nei an ni a, mihringte tana an sual dan indawt deuhin an hming hrang hrangte chu :- khawhring, huai (bung huai, sih huai, tui huai etc.), thlahrang, tulum, khawmu, tau, chawm (nu), phung (zawhphung, kelphung), hmuithla, lasi, pheichham, maimi (maimizial chi), bawmphurinu etc. te an ni. Saphote pawh in hming hran hran (demon, devil, elf, evil, spirit, fairy, ghost, goblin, imp, spook, sprite etc.) an lo puttir ve thova. Ṭhenkhat chu mi tihlum thei hiala hlauhawm an niih laiin, ṭhenkhat thlarau tenau deuh maimi angte khi pawi an sawi tam vak lo, nizan ka mangah maimiin min lo zial te kan ti vel mai mai a. Chutiang bawkin ‘elf’ te mai pawh khi rau tenau, naupangho chhauh buai tham tawk lek an ni. Heng zawng zawngte hi Pathian chhuak an nih tak lohah chuan ramhuai (demon) tiin kan hmer vek dawn a, tuna kan thlur tur pawh naupang ho chhaihbuai mai mai ang chi khi ni lovin, puitlingte ngei lo rikrap a, mi nuna thu lo sawi tak tak tute lam kan buaipui zawk dawn a ni.

Pipute ramhuai biak chhan –

             Kan pipute ramhuai biak kha thlarau ṭha an ni lova, ramhuai sual, nunrawng leh nghal tak an ni. engvangin nge chutiang thlarau ṭha lo te an biak, thlarau ṭha biak tur a awm lo em ni? tiin kan zawt thei awm e. Kan sawi tawh angin thlarau ṭhate kha chu biak hranpa pawh ngai lova ṭha sa tur a ngaih an ni a, mahse thlarau ṭhalo te hi tlawn lungawi an ngai tlat a, duh avang ni lovin hlauh vang zawkte in an be ṭhin a, ramhuai hnenah ranin an inthawi ṭhin.

             Hindu pathian biak dan nen a tehkhin theih awm e. a tira Hinduho pathian te chu pathum – Brahma (lei leh van siamtu) te, Vishnu (enkawltu leh vawngtu) te leh Shiva (tichhetu) te an ni. Heng pathian pathum (Tri-murti/Trinity) ah te hian a sual ber niawm lang, thil siamsa tichhetu Shiva chuan biak a hlawh hlauh mai. Hinduho ngaihdanin Brahma hi chuan engkim a siam zo tawh a, a hna tur teh vak a awm tawh lo tiin an ngaihthah hmiah tawh a. Enkawltu Vishnu pawh hian, englekhawle, thil engkim a enkawl dawn tho thova, ama hna a ni a, chibai buk tehchiam a phut ve love an ti a. Mahse thilsiam zawng zawng tiche theitu Shiva hi an hlau ber mai. Mahni eizawnnate, in leh lote a tihchhiat mai hi an engto ber a ni awm e, tun thleng hian betu a ngah ber a, ngaihthah ngam chi loh ber a ni an ti. Chuvangin Pu Vana te, Vanchungnulate, Pathian leh khuavang te chu awm bawk mahse an ṭha dawn tho thova, tlawn lungawi an phut ve lo niin an ngai ni tur a ni.

             Vawiin thleng hian kan biak duh loh zawk, ṭhalo kan tih zawk hmaah hian ka la kun zuk zuk reng thova. Ramhuai laka Chhanchhuaktu Ropui Isua Krista nei tawh reng mahila, thlarau sualten kan chungah thu an nei fo zawk a ni.

Khawhring nei –

             Khawhring hi ‘ramhuai niin an sawi ve ngai lo’ tiin Rev. Saiaithanga’n a ziak na a (Mizo Sakhua, p.6), ramhuai thlarau sual an nih loh chuan puh tur dang a vang awm hle mai. Thuthlung Tharin ramhuai bawlhhlawh, mi kawchhunga lut ṭhin a sawi ang chi kha a ni. Bung hmasa lama ramhuai man kan chhiar aṭang khan khawhring awmdan nen a inan zia hai rual a ni lovang. Khawhring te chuan mi kawchhunga an luh veleh an pum te an tina vak a, chhuat laiah an tal tawp tawp a, hmeichhiate hi an man duh bik nghe nghe a, abikin nula te hi. Chutia ramhuai bawlhhlawhin a rawn man takah chuan nula kha nikhaw hre miah lovin a awm ṭhin a. Tichuan ramhuai (khawhring) kha a lo ṭawng chhuak ta a. ‘Chumi khami chu ka ni’ tiin a hming ( a luah lai nula hming nilo) a rawn sawi a.

             Hetianga khawhring nei thu rawn sawi dan leh hmun danga ramhuai mante ṭawng chhuah dan hi tlemin a danglam hret a. Mizoten khawhring nei kan tih leh hnam dang zinga indawi nat (ât) an tih hi a inzul mah awm e. Chhan leh vang awm mang lova tuemaw a lo nat thut te hian dawithiam (black magician) tuemawin a dawi a ni phawt ang’ tiin an inringhlel nghal mai ṭhin a. Puh dik amual mual an awm laiin, diklo tak taka inpuh hmingchhiat a tam thei hle. Chutiang deuh chuan Mizo zingah pawh nula hmelṭha tak tak a lo na thut mai a, nikhaw hre lova a tluk der hnua a ka hmanga aw dang lo chhuak khan, ‘Chhingi ka nih hi,’ a rawn ti ta tlat mai sela. Nula pate chuan, ‘E heu, kan hmeithainu Chhingluturin maw lo tina che,’ tiin va tlan a, va sah sen zuai zuai mai an duh tawh mai a ni.

             Chutianga khawhring neia han inpuh chu alawm kan pi pute khan an lo hlauh em em. Miten puh lo se khawhring nei tih pawh an lo inhre lo thei a, an khawhringin mi a va tihnat lah an hre bawk hek lo, mahse leh lama miten ‘mi tina'(min dawi â) an rawn tih miau si chuan ṭan lo lâk a, lo phatmar chu huphurhawm tak a ni ang. Khawhring a lo nei reng a ni maw? tia miten an han sawi thang vel tur kha tun laia AIDS vei hlauhawm dan nen hian a in tehkhin theih awm e.

             Hman laia khawhring neia puh te dinhmun chauh zia leh thiamthu sawina tur a awm loh zia kan tar lang tawh a. Chutiang thil laka tunlai Chanchin Ṭha ênga mite kan vannei tawh zia entirnan tun hnaia thil thleng i lo tarlang zawk teh ang.

             Meichher chanchinbu, August 1992 ah khawhring chanchin Pu C.Z. Tumluaia, Kolasib-in ama hmuh ngei a rawn ziak nual a, chung zinga pakhat chu hetiang deuh hi a ni. 1982 kum khan A.O. hnathawkin thingtlang khaw pakhatah a awm a. Chuta a awm lai chuan, nula pakhat, pawl 8 zirlai chu a na thut mai a, a tinatua an puh chu tualchhung nula bawk a ni.

             Vawi khat chu chu nula chu tuihal em emin an sikul aṭangin a haw a, tui a lam ta chul mai a. Reiloteah a hrawka reh beh ang mai leh, a thi ngei dawn anih hi tih turin a ri ta bawrh bawrh mai a. A nu leh pa leh khawtlang an buai zo ta. A marte ka han khawih a, a chal te ka han dawm chuan dam pangngai taksa chiah a ni sia. Mahse a na a lo chhuah chuan a hrawk a rekbettu awm angin a ri leh bawrh bawrh a, a zi mak vak a. a tawpah chuan a zawi leh hnep ṭhin. Rei vak lo hnuah chuan, ‘Khawinge, tlangvalho belpui lak kha, mi pe ula, ka haw tang e,’ a rawn ti ta mai a (Damlo hming hian hockey tournament – ah an khaw tlangvalhovin belpui an lo la a, a nat hma kar khat vel lawk khan belpui leh he nula hi hlim takin an lo zawn haw tawh hi a lo ni a).

             Belpui chu an han pe a, natna nei lo ang mai hian khum aṭangin a lo thova, belpui khum chung chuan a kal ta mai a. Mak angreng takin khawhring neia an rinte kawtah chiah chuan a tlukpui ta a nih chu. Chuta ṭang chuan a tuartu chhung leh khawhring nei, tinatua puhte inkarah chuan thubuai a lo awm ta. Palai an intir tawn zak zak a. An puhate chhung chuan hawihhawm takin, ‘Kan tihnat che u hi kan hre hauh lova, kan lo tina ta che u anih pawhin a damna tura inhriat ang chu kan ti ve tur alawm,’ an lo ti ve hlauh a ni.

             Han hmehbel tiremchang turin damlo lah khan a tinatu a mi puh awmdan ang chiahin a awm ve a, a rilṭam chuan damlo tih a ṭam ve a. a zai a nih pawhin a zai ve a, a tih ang ang a lo ti ve zel a. He thil hi midangte pawhin entawna finfiah a ni a, damlo khan a hming a sawi reng rengin a tinatu hming a sawi zel a, tape recorder- ah te pawh an awm chu thun a ni. A finfiah nan damlo natzual lai hian daktawrin morphine in an injection a, engmah a danglam phah chuan lo. Damlo hi Rangoon lama enkawl tura an kaltir pawhin a tinatua puhte chhung hian kal man tur engemaw zat an tum sak ve nghe nghe. Engtianginnge damlo hi a awm zui tak zel tih Pu. Tumluaia hian a sawi zui lova. A thusawi aṭanga thil chiang tak erawh chu chutiang damlohna danglam enkawl nan damdawi chak morphine pawh a sawt lo tih leh, tinatua an puhte chungah hman laite angin phuba lak tumna a awm tawh lo tih hi a ni. Chu ai maha thil chhinchhiah tlak chu – khawhring nei tih hi hman lai pipute puithuna âtthlak thil mai ni lovin, tun thleng pawha thil awm thei, ramhuai bawlhhlawhte hnathawh avanga lo awm a ni. Hetiang thil thleng hi 1964 leh 1974 kumte khan Pu. Tumluaia hian ama mit ngeia a lo hmuh tawh thu a ziak tel bawk a, a chian tawk tho avangin kan tarlang vek lo a ni.

Khawhring hnawhchhuah dan (Exocism) –

             Kristian counsellorte leh evangelistten chawngheia ṭawngṭai a, Isua hminga ramhuaite hnawhchhuah thû kan chhiar tawh a. Kan Mizo sakhaw hruaituten khawrhing (ramhuai) hnawh chhuah an tum ve dân chu dang tak a ni.

             Khatia khawhringin a tihnat nula khan engmah hre lova chhuat laia a tluk der laia a rawn ṭawng chhuaktu kha a kawchhunga ramhuai chu a ni a, kha taksa kha a rawn luah a ni. Chuvangin a taksa an sawisak hrep chuan ramhuai khan na a lo tuarin, a chhuahsan phah turah an ngai. Tichuan ramhuai paite chu an vaw hrep a, thir zumtein an chhung a, ramhuai zawk kha a lo ‘awiah tuar tuar ṭhin a. ‘Min ti tawh lo ula ka lo chhuak mai ang’ te a rawn ti a(nula kha chu thi ang maiin a tlu der a, engmah a hre lo).

             Chutianga han sawisak a, chhuak ve ta mai chu an awm zeuh zeuh. Mahse ramhuai hi a thlauthawng hma leh dawihzep deuhte pawh an awm ve a lo ni a. A luhlul deuh chuan an chhuahsan chuang lova. Puithiam leh a hote (exorcist) chuan nasa leh zualin an bei a. A tihṭhaih nan chem hriamte chuan ban te, kawngka te chu an sat sawk sawk a, silai a awm chuan silai te pawh an kap ri dur dur a, thisen chhuak khawpa an sawisak chang pawh a awm fo awm e. Ramhuai ṭhenkhat, vir deuh chuan ‘Ar-in thawi ula ka kalsan ang,’ an ti a, a chang chuan vawk te, sial te pawh an ngiat hial ṭhin a. Chutiang aṭang chuan ramhuai hnena inthawina hi lo piang chhuak ta niin a lang.

Ramhuai hnena inthawi dan –

             Ramhuaite hnena an inthawi dan chu – puithiam ‘bawlpu’ an tih chuan hnangin maicham lem tereuhte te, kutphah tiat emaw lek a tah a, rannung lemte pawh tereuh te te hlumin a siam a. Chungte chu thlarau sualho hnenah chuan an pe ṭhin. Chung ramhuaiho chu tereuhte an ni a (a te te hi an chimawm duh a), bum erawh chu awlsam angreng tak an ni awm e.

             kum 1901 khan Zosapthara (Edwin Rowlands) khan thingtlang khaw pakhata nula damlo tana bawlpuin inthawina a buatsaih lai hi a lo thlir reng a. Bawlpu thiltih dan a han en reng rengin naupang inkualtelem ni awm tak hian thil lem tereuhte te hi a remkhawm rem mai a. A bul a ṭanga a tawp thlengin rilrua tihna leh urhsunna neia ti pawh niin a lang lo. Zosapthara lehkhathawn dt. 18. 9. 1901. in a sawi angin bawlpu ngei pawh chuan a thil sawngbawl vel pahin a tihdan a sawi zuah zuah a, a chang chuan a nuihpui kur kur bawk a. Ani (Sapthara) lo thlirna aṭang chuan ramhuaite kha thil ṭha duhsak a hla ni lovin, inbiakbumna thil ni deuh maiin a ngaih theih tawm e. Inthawi nan arpui pawh talh se, a sa dukdak lo lai a hmui zum te, a ril te, a keṭhian te an hlan ta mai ṭhin a, chutianga a saserh hrang hrang an han hleh thlak den den khan ramhuaite chuan a puma chang taah an inngai ṭhin ni tur a ni, an lungawi ve em em chu a ni phawt a, a sa ṭha zawng chu puithiamte intuituahna a ni mai. Hetianga ramhuai hnena inthawi hi thil nuihzatthlak hle chuan lang mahse tihmakmawhah an ngai tlat a, damlo chhungten inthawi nan hlan tur ran an neih loh pawhin puk chawp tal pawhin an lei duh lawi si a ni.

             Ramhuaite hi engtiangnge maw ni hlawm le? A chunga kan chhiar tak aṭang khian ramhuai tam berte hi chu an tê viau ni tur a ni (lian deuh, mihring tiat leh a aia lian pui puite chu sawi tur an awm bawk). A chimawm zual deuhte phei hi chu ramhuai tenau (huaite leh raute, imp or goblin) an ni deuh ber awm e. Inhnuai lama cheng chite hnena an inthawi dawn pawhin Hnautea inthawina an hlan. Shillong (Madanrting) a ka ṭhianpa Pu. Liannghawra’n an inchhunga ramhuai ho lo luh ṭhinna hmun min kawhhmuh chu bang-awng tereuhte hi a ni. Khasi thingphel rem, awng sir siar, kutzungṭang pawh a len mang lohna aṭang khan an lo lutin an chhuak leh zeng zeng ṭhin a ni ( Hei hi a zu ruih buai laia a hmuh ṭhin an ni a, sapṭawngte chu hnehsawh hlawm tak an ni).

             Heng ramhuai chimawm tak tak laka inven reng a ṭul avang hian nau lo piangtharte pawh hi kan pu pute chuan hming chhe deuh deuh leh ramhuaite tan pawha itawm lo tur chi an sa ṭhin, entirnan, Lulawka, Chhepherha, Pazua etc. Ramhuaite hlau viau e ti lo chuan duh duha buk thei emaw tiin an ngai fing vak lo hle lawi si a ni.

             Len lama teha ramhuaite (size) têt theih tur zia tarlan nan thawnthu pakhat, ka lungtileng deuh mai pakhat a awm a. Ramhuaiho zingah pawh sihhuaihote hi chu a kawlh pawl tak an ni awm e. Mahse pakhat erawh chu a lo lamah amahin a khawsa rei tawh bawk a. Sihhuaihote pawhin ṭhian enin an en tawh hial ni awm a ni. Zan khat chu Sih tlangvalho chuan chu pa chu an khuangchawina hmuna kal ve turin an rawn sawm a. Tichuan an inzui chhuak ta khap khap mai a. A vau ngaw chhung an zu lut a, thui pawh an la kal hmain in lianpui mai, kawtzawl nuam tak mai hi an zu hmu a. Inchhungah an han lut a, nula leh tlangvalho chu an lo lam hut hut mai a, zu leh sa lah duh tawka lim tur a awm. A han in hrai tlai te te a, a nulaho zingah chuan a lam ve ta a, nuam a ti em em mai a. Reilote emaw a tih lai chuan khua a lo var dawn ta mai a. Tlangvalho bawk chuan thlam thlengin an hruai haw leh ta a.

             A tuk zing a han thova, a khua a har ta veng veng mai a. Zan lama a hun hman nawm zia a ngaihtuah a, hnathawh zai reng a rel thei ta lo mai a. Sihhuai nula hmelṭhate hlir mai kha a rilruah a cham a. ‘Khawnge, ka zuk kal leh ngawt mai teh ang’ tiin a vau lam chu a zu pan leh ta chawt mai a. Ngaw chhung a va lut a, mahse engmah hmuh tur a va hre tawh si lova. A hma zana in pianpui, an lam hut hut na hmun ni awma a hriat zawnah chuan perhpawng kua hi a lo awm a, a kawtzawl ni awma a ngaih lah chu perhpawng lâmna tualzawl mai a lo ni si a, beidawngin a haw leh ta a ni. Mahse a rilruah sihhuai nila leh tlangvalte hlim zia ngawt mai chu a cheng ta reng a, a chang phei chuan ngaw chhunga sih nilaho nui ri her her te hian a hre ṭhin a, tumah hmuh phakah an awm tawh si lo. He pa thil tawh aṭang hian sihhuaite hi mi hlim thei tak nia ngaihdan hi a lo chhuak ta ni awm a ni. Hla siamtu lar tak C.Z. Huala pawhin vanram nawm tur zia a suangtuahin,

             Aw hmana ka lenrual hlui zawng te nen khan,

             Sih nauang nui zanin ka hmu

a lo ti hial a ni.

Ramhuai ramvât thâwm –

             He lehkhabu ka ziak laiin Meichher chanchinbu jumy 1993 chhuakah khan Pu. Ch. Aikiman ‘Ramhuai pêm’ chanchin leh ‘Ramhuai lo vât thâwm’ a hriat dan a rawn ziak a. Ka ngaihtuah vang vangin he lehkhabua tarlan ve chi nia ka hriat bakah, hetiang thil danglam bik hi hnam dangten an lo hre ve reng ṭhin em? tih te pawh kan chhui chho dawn a ni.

             Pu. Ch. Aikiman ama hriat dan ngei a sawi chu :  “Kum 1942 january thlaah buhfai phur bawng khalhin ka ṭhiante nen Aizawl kan kal a. Baktawng ram Rawntezel tawp Darnam tuiah kan bawngte nen kan riak dul mai a. Zanlai pelhah ramhuai lo vât thâwm nasa deuh mai kan hre ta a. Kan in kaitho vek a, bûkah chuan ka ṭhu ṭhap a. Mau an han sah rik, a tlu diai duai te, mau an han sah auh keh ri te, mau ro an sat ri chhawr chhawr, a han tlu ri chhak te, mau tuai an han sah thluk a ler in vaw ri fia, vahchap chunga a tleng ri te, thingpui ṭhin, hreipuia an cheh ri chaih chaih, a tlu ri ta siai leh hrepui, hma lama an chhawp an han ṭheh ri chhak te a hriat vek a. Perhte an vai ri te, an thing kih tlu tur a ti han inpawt irh ri te, thinglawn rahbi tuk ri te, thing an han thlâk ri te nen, mihring lawmrual lovât ri chi kim ang thlapa ramhuai lovât thawm kan hre ta mai a! “A va mak ve! A va mak ve!” kan ti a, an thawm a reh chuan khua a var a, rawng kan bawl zui ta a ni.

             He thil thleng hi engti kawng zawng pawhin chhui ila, thil danglam tak chu a ni reng reng mai. A sawitu hian ama hriat dan ang takin a ziak chhuak a ni ngei ang a. Ṭhenkhat chuan ataka suangtuahnaa lo awm chu a takin a ngai ta mai ni ang, a hriat hun lah hi January thla, lovah ṭul hun lai tak a lo ni bawk si a. Chhun lama a thil hriat a benga cham reng kha a mangphan ta a ni ang’ tia lo ngai tawk an awm thei ang. Rilru daktawr (psychiatrist.psychialogist) te sawi danin mi rulru buaite hian hmuh loh tur tur leh hriat loh tur tur hi an hmu in an hre thei riau a, an hriat theih dan pawh bung 10-na ah kan la chhiar ang a. Mahse Pu. Aikima erawh hi chu a thuziak aṭang aṭang ngawt pawhin chutiang rilru harhfim lo chu niin a lang lova. A thil hriatte lah chu amah mai ni lovin, a kalpuite pawhin an hre ve vek a, chuvangin mi tam takin a ruala thil hriat sual thu a awm si lo a ni.

             NGOPA khaw bul Darnam ruam khawi lai hmun emaw aṭang khian ramhuai thawm na hre bawk ṭhin a ni awm e. Chutiang thawm hre zinga pa pakhat chu Pu. Challiana, Ngopa khua a ni. Mihring thawm chiah hi a ni mai a. Ani hian a han hriat ve chuan ‘ramhuai thawm an tih fo hi a lo ni tak tak hlei nem, khawchhunga thawm riva khawk ri vel mai a  lo nia lawm maw le’ a ti nghe nghe. A chhan chu thawm ri hriatte kha âr khuang âl âl te, tualzawla naupang infiam thawm te, an inselem chaih a, an haw haw ho dar dar te, nuin a fate khawlai leng a ko a, a au ri âl âl te, nau ṭap rite leh ui bauh rite an ni ta awm e. Darnam chu Ngopa aṭanga Khawdungsawi panna kawng Leisekawt tlang dung tlak lama awm a ni a, a chhuah lam ruamah chuan sih, Nuhnap ruam an tih chu a awm bawk a. A hming putna chhan pawh hman laiin darnam sihhuaite leh Nuhnap sihhuaite hi an inau ṭhin a, Darnam huaite chuan, ‘Nuhnap’ ti hian a au rawih rawih ṭhin a, tun thleng pawhin Nuhnap tih hming a la pu ta reng a ni.

By – P.C. Biaksiama