ATTILA ‘SCOURGE OF GOD’ – ( 434 – 453 AD )

212

ATTILA ‘SCOURGE OF GOD’ – ( 434 – 453 AD )

           Barbarian lal, a kalna apianga chhiatna rapthlak tak mai thlen ṭhintu, Rome lalram tlu chhe meka cheng ten an hlauh êm êm chu Atilla leh a mimawl rual Hun te chu an ni. A hming an hriat ringawt pawhin mite an khûr a, Pathian Anchhia, Pathian Vuakfung, mi ṭihbaiawm hmingthang, khawpui tam tak halral vektu chu Attila hi a ni.

           A hmasain kum zabi pangana tir lama Rome lalram i lo thlir phawt teh ang. Roreltu chi hrang hrangte chu hlêprûknain an khat a, suamhmang an tam a, ṭhenkhat dan lova thuneihna chan tum an awm bawk. Hengho zawng zawng hian tum thuhmun pakhat an nei a, chu chu rangkachak tam tak neih a ni.

           Mipui aiawhten ro an relna ram, Rome lalram  ropui tak chu a lo chuai ṭan ta a. Venghimtu sipai atan pawh hnam dang mi tam tak an ruai a, chu chu an innghahna pui ber a ni tawh a. An ṭanrualpui Franhote, Visigoth-hote chuan innghahna pakhat a ni bawk. Him tawh lo tih inhre chungin a then vel lo thei ta lo.

           Kum AD 405 khan hnam mawl sipai hotu (Barbarian General) Radagaisius leh a sipai Slav leh German sipaite chuan Roman lalram an run a. Roman sipaite chu awlsam zetin an hneh ta mai a. An chhiat zawh vek hmain, Visigoth-ho puihnain an hneh tâwk a. Mahse, hei hi Rome tân chuan zahthlâk tak a ni. Emperor pa minister, Stilicho chuan Danube luipui kam vela mite la khawmin sipai rual thar a din a. He sakawr chungchuang sipai rual hian Rome an chhanhim ta a.

           Rome khawpui lawm lutuk chu an â lo chauh a ni ber mai. Ram chhantuteho lawm turin an inbuatsaih mup mup mai a. Hnehna meichher te, parṭhi te buatsaihin hla te an phuah a.

           Chu ni ropui takah chuan khawpui kawngkhar an hawng a, mikhual an lo lut ta a. Kut beng leh au thawm a ri chur chur mai a. Mahse maw, thawklehkhatah an hlimna chu mak leh rapthlâk tihnain a rawn thlâk ta thut mai le. Chu mite anga hmel ṭihbaiawm leh hmelchhia chu Roman hovin an la hmu ngai lo. Mihring aiin ramsa an ang zawk mah a, an tawi bial hmam hlawm a, an ke a kual a, sahmul kawr an ha a, an ṭhal bawmte chenin an tân chuan hmuhnawm a tling. Nuihzatthlâk khawpin an pian a mawi lo va, an hmel han en erawh chuan an hlauhawmin en leh chakawm lo tak an ni. An vun eng a, an naupang lai aṭanga savun hruihrual an hren reng avangin chal mumal an nei meuh lova, an mit zim leh tung hret mai chu a rawng hle bawk. An aw lah chu a tumbu ei aw hlût mai a, han biak lah chuan thil pakhat sawi ngun deuh mai an nei a, chu chu Ioung tih a ni. Roman-hovin a ngaihna an hre lo va Hun (Han tia lam tur) tihna niin an hria a, chu hming chu an vuah a, an pu hlen ta a ni. Heng mite hi an ṭobul hria reng an awm lo va, khawchhak (Asia) aṭangin an lo kal tih chiah an hria. Pêm kual ṭhin hnam (nomadic tribe) an ni a, Danube leh Volga luikam velah te an pem kual ṭhin tih chu an chanchin hriat chhun a ni mai. Hun-ho chu Ramhuai leh Dawithiam thlah an ni tih chu an lar vena a ni a, Pathian an nei lo va, puithuna âtthlâk thil erawh an ngah hle thung.

           Hei hi Hun-hovin Rome khawpui an tlawh hmasak ber ṭum a ni.

           Attila chu tunge maw ni le? Attila pian leh murna hi hriat a ni lo. Danube lui kama lal pakhat fapa chu a ni ngei mai a. Khawi sakawr tawlailir pakhatah emaw chuan a piang ta ve ang.

           Engpawh nise, khawchhak lam aṭangin a lo chhuak a, indo mi a hruaite chu Russia ram phaizawl ram sakawrte chi-ah an chuang a, sakawr zin hranpa an nei lo va, chumi nia an eitur sahel chu an ṭhutphah awmchhun a ni mai. An hnungah an nupuite, sam rimchhe uih vung vung mai, awm pharh duai mai, an mipate ang bawka hmel ṭihbaiawm takte chu an ṭhu fur mai bawk a.

           Kum tam tak chhung chu Rome leh an thuhnuaia kûnte chuan Hun tih an hriat ringawt pawhin an ṭim ur ur ṭhin. Engtik niah emaw chuan heng mi hlauhawm te hian an in te an la rawn hal ang a, an thil hmuh apiang an rawn tichhe dawnin a nhria a ni. Chutih nâk alaiin thil rapthlak lo thleng tur chhinchhiahna a thleng chamchi bawk si. Kum AD 450-ah chuan Europe khawmualpui khawthlang lam chu lirnghingin a thing hrep a. Khawchhak lam kawlkilah simeikhu a lo lang a, âwkin thla a lem a, Rome khaw chungah thisen ruah a sur bawk an ti.

           Hei ngawt pawh hi a rapthlâk tawh tehreng nen, thu thang pakhat a lo awm ta; “Attila leh a hote, Barbarian indo mi nuai ngá te chuan khawthlang lalram an run tih thawm a lo thang ta nih chu. Kaisar lal lian rengpui pawh a mut a tui thei ta lo a ni.

           Attila naupan lai chanchin chipchiar kan hre lo. Chutih laia Barbarian hnam lo ho leh milian ho chuan an fapa te Rome-ah, finna zir turin an thawn fo ṭhin a. Attila pawh kum sawmpahnih a lo nih chuan a patea (Uncle) tân chuan mi hlauhawm tak a la ni dawn tih a lang ṭan tawh a. A pa a thih aṭang chuan a pa unaute chuan lal nihna an inṭawm mêk a ni. He mipa naupang, tum sang lutuk leh rorum zet mai hi Rome khawpuia lehkha zir turin thawn mai an duh ta a. A chhan chu Rome khawpuia nawm chenna leh hahdamna chuan sawi danglamin mi nêm, ngilnei takah a chhuah theih an beisei a ni.

           Mahse Attila chu naupang danglam tak a ni a, mi ropui tur a ni tih hriat theihna amahah hmuh tur a awm. Latin chuan a lo tinêm lova, a tidanglam zo bawk hek lo.

           Rome-a a awm chhúng hian Attila chuan a thiltum ropui tak mai chu a duang chhuak a. Danube-a a lo let leh chuan thiltum ropui tak neiin a lo kir ta zawk a ni. A chipuite chu indo mi an nih a hria a, anni hmang hian khawvel pumpui hneh a tum ta a ni. Tin, heng hnam ho hi a thu hnuaiah pumkhata a siam theih phawt chuan sipai rual ropui tak mai nei thei dawnin a inhria a. Chu chu thil nghahfak a ni ta bawk.

           Kum AD 434-ah Attila chu Hun lal a rawn ni a, a unaupa Bleda nen lalna an inṭawm a. Mahse, a ú Bleda chu AD 445-ah a that a, chuta ṭang chuan a duh thuin ro a rel ta a. Saspian tuipui aṭanga Danube inkara Hun-ho zawng zawng hotu a lo ni ta a.

           Kum reilote chhungin Roman Empire (Roman lalram) pawn lama Barbarian-ho zawng zawng lal chungnung ber a lo ni ta a. Vandal-hote, Osthrogoths-hote, Gepidae leh Frank-hote chu a thuhnuaiah a dah a. Tichuan, Germany leh Skuthia te a lalrama a siam hnuah Rhine luipui aṭanga China ram leh, Baltic tuipui aṭanga Danube thlengin a thuhnuaiah a dah ta a.

           Chumi hnuah khawchhak lalram (eastern empire)-a hawi leh ta a, Emperor Theodosius-a ram ṭhenkhat a la a. Black Sea leh Adriatic tuipui inkar ram zawng zawng a run a ni ber e. Thrace te, Makedonia te leh Greek ram dangte runin khawpui sawmsarih ngawt a la a, a suasam a ni.

           Theodisius-a chuan Attila hnenah inremna a dil a, Theodisius-a tâna zahthlâk leh tlawmthlâk tak inremna thu an thlung ta a. Emperor chuan Danube chhimlam ram zau tak a pek bakah kumtin chhiah tam tak a pek a ngai ta a ni.

           Kum Ad 450-ah chuan khawthlang lalram (western empire) rún turin a inpeih ta a. Rome lalram, Gaul chu a run tum tak ni mah se, a thurualpui Frank-ho Visigoth laka pui tur angin a insawi daih thung a.

           He lal ropui tak thupek hian chhun zan zawmin Asia aṭang te, Black Sea kam vel aṭang te chuan sipai chi hrang hrangin Danube an pan ta chur chur mai le. Heng indo mite hi sakawr chungchuang sipai (cavalry) an ni ber a. Hetih hun lai hi chuan indo khawl kal chak ber chu cavalry hi an ni.

           Attila chuan Rhine luipui a rawn thleng a, Frank sipai ṭhenkhatin an rawn zawm ve a. Rahbeha awmte chhanchhuaktu a nih thu a puang a, tin, amah zawm duh apiang chu hlawkna a hmuh apiangah chanvo siamsak a tiam a. amah dodaltu apiang chu sawisak, tih retheih, pawngsual, in leh lo halraksak leh thah buaih buaih a tiam bawk. Khaw ṭha leh ṭha lovah pawh Attila chuan a thutiam a hlen ṭhin.

           German Barbarian-ho chuan hel hovin an lo lawm a, an khawpuite chu a zuahsak a. Hmeichhia leh naupangte pawh an him. Burgandians leh Salian Franks-hovin an lo dodal a. Chuvangin Worns te, Spires te, Mayence khawpiu te chuan halral vek an tuar a. Basle te, Strassburg te, Besancon te, Arras te chu Hun-ho hmaah chuan an tlu phawk phawk mai a ni.

           Hemi hnu hian Attila chuan kulh nei khawpui, Metz chu a hual leh ta a. Hun-ho hi tualchaa indo ralah chuan hneh rual an ni lo va; mahse, kulh nei khawpui chu tihngaihna an hre lo. An beih ngial pawhin tihngaihna an hriat tak loh avangin Attila chuan kalsan turin thupek a chhuah ta a.

           Ni reilote hnuah Metz kulh bang a chim tih an hre leh ta a, he khawpui hi Easter zanah an bei ta a, Biakinah lutin maicham te leh thilsang an tichhia a, khawvar ruala an chhuahsan chuan he khawpui hi a kang vap huam mai a ni.

           Metz khawpui chanchin rapthlâk tak hi a thang chak êm êm a. Rheims khawpui an va thlen chuan luahtu mihring an awm tawh mang lo. Mi tlemte, sakawr chung chuang sipaite chuan huaisen takin an lo do va, awlsam takin an hneh a. Attila chu khawpui chhungah a lut a, Bishop leh vengtu lo awmte chu an sat hlum hmiah hmiah mai a. Biakin chhunga rangkachak leh thil hlu tinrengte chu la mai turah an inngai tawh a. Mahse, Attila chuan kawngkharpui a thleng dawn chauh tihin tukverh kawngkharte chu anmahniin an rawn inhawng suau mai a. Maicham aṭang chuan aw rapthlâk leh mak zet mai a lo chhuak a. Attila, hlauh reng hre ngai lo chuan a vawikhatna atân hlauh a hre ve ta le. Hun-ho chu baklengin an tlanchhe ta chiam mai a ni. Puithu ngang an ni a, Kristianho Pathian aw hre taah an inngai a, chu khawpiu chu an tlanchhiatsan ta a ni.

           Metz khawpui a suasam aṭanga ni sawmhnih pathum hnuah Attila chuan Orleans a hual leh ta a.

           Orleans khawpui hian kulh thar rinawm zet mai a nei a, kulh chhúng aṭangin huaisen takin an lo do va. Thla hnih lai an hual hnuah, kulh bangte pawh a khi ṭan tawh tihah chuan Roman sipaite chu kawlkilah an lo lang ta a. Roman General Aetius-a leh Visigoth lalpa Theodoric te chu Hun-ho do turin an lo thawk ta a ni.

           An kulh beih lai bansanin Attila leh sipaite chu hmun remchangah an insuan a. Roman-ho leh Visigoth-ho chu Chalon phaizawlah an lo nghak ta a. He hmunah hian indona rapthlâk tak mai a lo thleng ta a ni.

           Hun sakawr chungchuang sipaite chuan, a rapthlâk thei ang bera auvin, an hmelma intel ruh tlatte chu an bawh ta a. He indonaah hian Hun sipaite huaisenzia leh an rorumzia a lang chiang hle a, khawvel chanchin ziahnaah pawh an hmingthan phah hle mai. Mahse, anmahni ang bawka huaisen Visigoth sipaite chuan an lo dang ding a. Chuti chung chuan Hun sipaite chuan hma an sawn tho va, Theodoric-a chu an that a, Aetius-a sipaite chu an kehdarh ta a.

          Barbarian lal Attila chuan khawvel ram zawng zawngah ro a rel dawn a ni maiin a lang tawh. Chutah Theodoris-a fapa Thorismund-a hovin Visigoth-ho thinrim chu an rawn thawk leh a, an lalpa phuba lâk ngei tumin an rawn nawr leh ta a. Phaizawl chunga tlang pawng aṭangin tha tharin Hun-ho chu an nawr ta a. Hun-ho chu an hnungtawlh a, Atilla chu indona aṭangin a tlanchhia a, a hote chuan an zui a. An thuam phur tawlailir dahkhawmnaah tlanin, tawlailirin an inhung a, hetah hian ral raih thlenga ṭan tumin ṭan an khawh ta a. Nung chunga inmantir an tum bau lo.

           Rome lalram tluchhe mek chu Visigoth-ho huaisenna avangin a him ta rih a. He Chalons indonaah hian minhring 2,50,000 (nuai hnih leh singnga) an thi a, khawvel chanchina indona rapthlâk, hriatreng hlawh berte zingah a tel phak a ni.

           Attila chuan Roman-ho chu a lo nghak na a, nghahchhuah tur an awm ta lo. General Aetius-a chuan a Roman thluak a vawrhvir a, Visigoth-ho tawlh bo a phal ta a ni. Tin, Hun râl hlauh tur a bo chuan Roman-ho tan Visigoth-ho hi phurrit an ni nghal mai thei bawk ang.

           Hnehin awm mah se Hun sipaiho tan chuan rallâk sum leh hausaknate chu hnehna a ni mai a, Attila tân erawh chuan tlawmthlâk a tling thung a. Danube-ah an kir a, rangkachak te, lunghlu leh thilhlu tam tak an phur hawng thur thur a.

           Chalon indona aṭang hian Atilla chuan til thar tam tak a zir chhuak a. A sipaite chu Rome-ho angin ṭha takin a thunun tur a ni, tin, roman-hovin an sut hleih theih loh ang kha zir chhuah a duh bawk. Tin, khawpui kulh sut chimna tur khawl a mamawh tih a hre bawk.

           Tin, kristianna inleh mai chu finthlâkin a hre bawk. Kristiana a inleh chuan Biak ina aw a hriat, a hlauh êm êm, kristiante Pathian chuan a pui tawh ang. Chu bâkah, kristian Bishop-ho, ralthuam tel lova lo chelh ding ṭhin tute kha a hlau tawh lo vang. amah lo dan tum Bishop-hote chu an hrawkah a zai bung mai ṭhin tak na a, hlauhna mak takin a man ṭhin niin a lang.

           Engpawh nise, Rome lalram ropuina chuan a rilru a luah reng a, chu hmunah ngei mai chuan Attila Lalram din a duh a ni.

          Danube-ah khawpui a din a, a sipaite zirtir turin Roman officer a ruai a, indo a zirtir ṭhin a. Chalon indona aṭanga kum khat pawh a ral hmain Attila chuan a sipai samruk te, lalte leh a general-te hruaiin Rome leh Italy panin a thawkchhuak leh ta a.

           Italy luhna kawnga kulh nghet bera an sawi, Aquilia chu an bei a. He khawpui hi râlin an lo hual fo tawh a, an hlawhtling ngai lo. Mahse, he khawpuia mite hian Hun-ho chu namen lovin an hlau thung a ni.

           Khawpui kulh bang a rinawmin a nghet a, an buh inte chu a khat ṭha a, khawchhúngah tuihna ṭha tak a awm bawk. Rei tak an beih hnuah Hun-ho chuan an dawhtheihna an hloh ṭan ta a, chutih laiin hrileng tuarin an damlo nasa ta mai a. Attila pawhin kalsana, kal mai a rilrûk tawh a. Mahse, ni khat chu, kulh bang aṭangin kanghlai nu pakhat hian a note la thlâwk ṭha hlei thei lote chu chhawmin a rawn thlawh chhuah pui a. Attila chu puithu ta ngang a ni a, savate hian leirawhchan leh a charna te chu a chhe dawn tih hriatin hrilh lawkna an rawn pe niin an ngai a. Nasa taka kulh beih leh a tum ta bur mai a ni.

           Hun-ho chuan tha tâwp chhuahin kulh bang chu khawlin an chhu leh ta a. An thin a rim tawh a, thisenin an tuihal tawh bawk a, tuma tih chhiat theih loh kulh bang chu a tlu ta duai duai mai a ni. Tuilian tawlh dul dul ang maiin mi eng (tellow)-ho chu khawpuiah an tawlh lut hum hum a. Attila pawh Aquilia kawtthlerah nuam ti takin a vei vel a, chutih chhungin Hun sipai rual chuan khawpui chu an rawk chiam a. Kawtthlerah te chuan hnehna hla an sa rual ṭhuau ṭhuau mai a ni.

           Hun sipai rual chu Rome khawpui panin an kal zel a, khawpui leh khaw te deuh an luhna apiang mai chu a lo ruak huai zel ta mai a. Mihring leh ran hmel hmuh tur a awm lo va, an thlaite tichhiain an tlanchhiatsan vek zel mai a lo ni.

           Roman General Aetius-a chuan Italy nipui khawlumin Hun-ho a sawisak chauh hn6ep hnuah chauh beiha, chatuan atâna nuai bo tumin rem a ruat a lo ni a. Tin, Hun-ho pawh khawlum tuar ngai lo an ni bawk a. Khawsik leh kawṭhalo a leng nasain an damlo nasa hle. Sipai rual chu hmantlâk lovah an chang mai dawnin a lang ta a. Aetius-a leh sipaiho hmel hmuh tur awm bawk hek suh.

           Rome Emperor, Valentine-a chuan Aetius-a chu a ring zo lo va, chuvangin Pope Leo-a hnenah a kal a. Pope chu Attila hnenah va kal a, inremna va zawnpui turin a tir ta ngawt a.

           Hetih lai hian a mite damlo nasa hle mah se Attila chuan nghah reng a ngam tawh lo va, Rome khawpuia luh thuai a tum mêk bawk.

           Nikhat chu, vengtu sipai enthlatu a dahte chuan sipai pawl lo kal an awm thu an rawn sawi a, Attila chu a hlim hle. Aetius-a chuan a sipaite hruaiin a rawn bei dawnah a lo ngai a. Tun ṭum chu Aetius-a leh a sipaite nuai bovin Rome khawpui a lut ang a, Italy ram pumpui a nei thei tawh ang. Rang takin a sipaite chu indo turin a in zarpharhtir a, luikam aṭangin lo nghak a.

           Mahse sipai rual lo kalte chu sipai azawnga mak ber an ni awm e. Puithiam kawrfual varh ha, khabe hmul var vo mai hian a rawn ho va, a hnungzuitute chuan kawrfual sendang an ha zuar bawk a. An lo kal hnai zel a, thu chham sawi rual ri an hre ta a. Hun sipai rual chu an ngawi ṭhup a.

           Lui kamah chuan sipai rual mak takte chu an ding a, thu an la chham rual ṭhuau ṭhuau bawk a. A vara inthuampa leh Attila chu reife an in en ran mai a. Thawklehkhatah Attila chuan ring zetin, “Tunge i nih?” a ti tuar a. Chuveleh thuchham chu a tawp a, an hotu pa chuan “Leo” tiin a chhang a.

           Attila chu a tim chawih a, chutah lui a daikai a, Pope bulah chuan a va kal a. Chuta an inbiakna chu tumahin an hriatpui ta lo. Mahse, Attila chu hnara khawn ang maiin a inher vut a, lui a rawn daikai leh a, ṭial ruai hian a hote chu thu a pe a. Sipai rualte chu an inher a, hmar lam panin an hawng ta nguai nguai a, Italy ram an chhuahsan leh ta a ni.

           Thisen chhuah lova inremna chuan Rome khawpuiah hlimna nasa tak a thlen a; mahse, Aetius-a erawh chuan a tuipui vak lo. A hmelma pa rilru chu a chhuidawn thiam tlat. ‘Thisen chhuah lova a kir ta mai kha inchhirin a lo let leh ngei ang tih a ring a. Chu chu a dik bawk, reilote hnuah thuthang rapthlâk tak “Attila chu Rome run turin a inpuahchah leh ta,” tih thawm a lo thang leh ta ngei a. Mahse, rei vak lo hnuah Attila thih thu chu a lo thang leh ta a, emperor pawh a mut a tui leh thei ta a.

           He tichhetu rapthlâk tak hi engtia mual liam ta mai nge a nih le? Khawvel hmelhmang rawn thlak danglam mai tura a lan laiin ‘ngati nge fam a chan tak mai le?’

           Attila chu Danube-a a lokir leh khan a chite leh a fapate chuan Italy an chhuahsan leh ta mai kha an hrethiam thei lo va. Tin, a thuhnuaia kun ṭhin German lal ṭhenkhat an hel zui ta bawk a. Tichuan, a laka hel hote chu râwng zetin a sawisa a, lal eng emaw zat chu an chhungkuaa thah pawh a nei a.

           Vawikhat chu German lal chhungkaw pakhat inah a lut a, nula pakhat IIdico-i chuan ṭhingṭhiin a pa leh a nuṭate chu zuah turin a lo dil a. Chu chuan Attila rilru khauh tak chu a tinem chhete lo va. A nu leh pa leh a nuṭate chu nula mithmuh lai chuan a thahtir a. Mahse, IIdico-i chu a hmelṭhatna chuan a chhandam a. Attila chuan ama tân a hauh ta hlur a. Kum sawmruk a ni tawh a, a vawithumna atân Rome ram run turin a inuahchah mek bawk. Mahse, a vawi zali (400)-na atân inneih ruai ropui tak a buatsaih leh ta a ni.

           Asia leh Europe khawchhak lam lal tam takte chu mi lawm turin an lo kal a. Thilpek tam tak an rawn phur hlawm a. Nilengin mo lawmna ropui takin an hmang a. attila chuan a eiin a in nasa hle mai, a sirah chuan hlau leh ngawi rengin IIdico-i chu a ṭhu reng bawk a. Zan a lo thleng a, Attila chu a nupui thar nen hahchawl turin a inah a lût ta a.

           A tukah khua a var a, Attila hmel reng a lang ta lo va, chhunlai thlengin an nghâk a. a general-te an ngaih a ṭha ta lo va. kaihthawh tumin kawngkhar an kik a; mahse, chhângtu an awm lo. Kawngkharpui chu vawi tam tak an chhut hnuah a inhawng thei ta a.

           An va luh chuan sahmul puan vár chungah, thisen bual nguaiin Attila chu ruakin an va hmu a, a lo thi der tawh nghe nghe a. A ei tam luat leh a in tam luat tuar lovin, thisenzâm puakkeh vangin a thi a lo ni a.

           Kilkhatah chuan, hlauh lutuk vanga ṭawng pawh ṭawng thei lovin IIdico-i chu a lo bawk phek reng bawk a. https://ekhai.com

           Hun lal ropui, Attila chu a thi ta. A hming ringawt pawhin Kaisar lal ropui a tikhur ṭhin kha a ni a, tunah huan a awm ta lo.

           Nilengin a ruang chu a bûkah an zalh a, lalho ngunhnam leh lallukhum a chhuhsak te, Biak in Thianghlim aṭanga a lak thil hlu chi tinreng chu a bulah an dah rui mai a.

           Thlân zau tak an lai a, an thlân laiah chuan Attila leh rohlu tam tak an chhûng lût a. An pu chawimawi nana an nunna pe mi pali te nen chuan an phúm za ta a ni.

           He, pa eng pip pep, pa te tak te, a hun lai khawvela mi hlauhawm ber, khawvel changkang zawka mite hlauhhlawpa siam ṭhintu hian Hun hnam a tiropui a. Hun hnam an hmingthan phah bawk. Rome lalram leh a pawn lam a mite pawh, Attila chanchin hre tawh phawt chuan a ṭihbaiawmzia chu hahipin an sawi ṭhin ngei ang.